Mark 5 - Yak'usda Ooghuni

Dune ntsiꞌ-i nudúdeh-i ooyudinda-un Jesus soo náꞌyinla

¹ ꞋEt bun kꞌut nyan hoozki whuz Gadarenne bukeyoh ꞌúhoontꞌoh.

² Jesus tsꞌi bé hainya ibulh ꞌilhoghun dune tse bet dune ꞌadinla-un whuz de haínya.

³ Ndun dune ntsiꞌ-i nudúdeh-i, ꞌi ooyudínda ꞌinkꞌez tsꞌun kꞌut whutꞌi. ꞋAw dune lhuztih tlꞌool be hoontsꞌi whehídolhtꞌi ꞌaitꞌoh.

⁴ Lhat whe oola ꞌinkꞌez ooke bulh huyulhghelh ꞌet hoontsꞌi ꞌoh totsuk lhuztih tlꞌool kꞌunuyúchꞌus ꞌinkꞌez lhuztih ooke be lhulhꞌoo-i, ꞌi cha yayalhꞌus. Ulhtus kꞌet ꞌaw dune hichꞌaꞌ oolhdeh ꞌaítꞌoh.

⁵ Dzin ꞌinkꞌez ꞌulhdzis ꞌi bulh tsꞌun kꞌut whutoh ꞌinkꞌez nódistꞌai-un, ꞌoh nuya whe ꞌaldzul ꞌinkꞌez tse be oodudutꞌas.

⁶ Nilhdzaꞌ-un yughusyin whe Jesus yutilhꞌen. ꞋAhoh yutsꞌu tílhgai ꞌinkꞌez dugwutsi be yubut nachánitno,

⁷ ꞌinkꞌez soo ꞌultus-un ꞌaldzul whe ꞌutni, “Jesus, Yakꞌusda ꞌukꞌenus diztiꞌ-un ooYeꞌ, ndet stsꞌu húkwaꞌ ninzun. Yakꞌusda ꞌintꞌoh ꞌinka ntsꞌu tédusdlih dzoh nusílhdzut iloh.”

⁸ Ndutni whe Jesus ndúyulhni, “Ntsiꞌ-i nudúdeh-i ndun dune ooyáhanaindaih.”

⁹ ꞋEt Jesus yoodulhkut, “Ndai la nyooziꞌ?” yúlhni. ꞋEt ꞌutni, “Legion, ꞌi sooziꞌ ꞌuntꞌoh. ꞋI lhane lhuganne ꞌutsꞌintꞌoh ni whe ꞌutni.”

¹⁰ ꞋEt ntsiꞌ-i nudúdeh-i Jesus yutsꞌu tédudlih, “Njan keyoh whuchꞌa netolhꞌaꞌ junih,” yúlhni.

¹¹ Dzulh enghoh gugoos lhai ꞌet ꞌaꞌálh.

¹² “ꞋEt ntsíꞌ-i Jesus tsꞌun tehududlih gugoos butsꞌu néilhꞌalh ꞌet la buyúzdoodeh.”

¹³ ꞋInkꞌez ꞌahoh Jesus butlꞌa hónꞌai ntsiꞌ-i nudúdeh-i dune yutsꞌa ha nádide ꞌinkꞌez gugoos ꞌi yudande. Gugoos ꞌankwꞌus 2,000 ꞌuntꞌoh, ꞌi tsꞌiyawh whenghólghaz ꞌinkꞌez too yanghan.

¹⁴ ꞋEt gugoos ghunline whehílghaz ꞌinkꞌez keyoh whutakhuni huninꞌai. Lhane whusaíndil dáhooja hontilhꞌelh ha.

¹⁵ Jesus highu nindil ꞌinkꞌez dune hinilhꞌen ntsiꞌ-i nudúdeh-i ooyudúltsꞌi inléꞌ-un usda beni oogha nádiltsꞌut ꞌinkꞌez soo dintꞌoh cha ꞌuntꞌoh. Buba hooncha kꞌet tube whé hunilhjoot.

¹⁶ ꞋInkꞌez mbene la honꞌénne, dune hudániꞌ dune ntsiꞌ-i nudúdeh-i ooyudúltsꞌi inléꞌ-un dája la ꞌinkꞌez gugoos ghun cha.

¹⁷ ꞋEt Jesus highu tedudli bukeyoh whuchꞌa naóojaꞌ ha.

¹⁸ ꞋInkꞌez Jesus tsꞌi be nádaih dune ntsiꞌ-i nudúdeh-i ooyudúltsꞌi inleꞌ-un, Jesus yutsꞌu tédudlih, “Nyulh ꞌóosneh,” yúlhni.

¹⁹ ꞋEt Jesus, “ꞋAwundooh,” yúlhni ꞌinkꞌez uyúlhni, “Nyoh tsꞌe naíndalh ꞌinkꞌez nkꞌekene te hubudíni dalcho ꞌi be la nyuMoodihti nla ꞌuja ꞌinkꞌez ngha teꞌninzin.”

²⁰ ꞋEt dune whenája ꞌinkꞌez whunizyat-un keyoh ꞌet whutulhuséya Jesus daíyinla whe yula ꞌuja ubúlhni, ꞌinkꞌez tsꞌiyawh buba hooncha.

Jesus Jairus ootseꞌ dunaidilhti ꞌinkꞌez tsꞌeke Jesus yunaih tꞌaíznai-un

²¹ ꞋEt Jesus nyan tadatus tsꞌe whenáhiki ꞌinkꞌez bunghun whuzih lhane dune higha óozdil.

²² ꞋInkꞌez Lizwif bulugliz whumoodih Jairus huyúlhni ꞌen yughu ninya Jesus yutilhꞌen whe yubut nachániti.

²³ ꞋInkꞌez soo cho yutsꞌu tédudlih, “Ustseꞌyaz ꞌawet datítsah, sulh naíntꞌus ꞌinkꞌez ookꞌu dólni sih soo náꞌootne ꞌinkꞌez khoonaꞌ sih.”

²⁴ ꞋEt ꞌawet Jesus yulh nátistꞌaz. Whuz lhane dune yulh tizdil kꞌet lhtsꞌun únꞌa huyúlhedindil.

²⁵ ꞋIlhoghun tsꞌeke tube dzoh nuzut whunizyat ꞌon ꞌat nat yus kꞌut ꞌet nduwhulyiz whe ꞌuskaiꞌ ꞌuyulhꞌen-un,

²⁶ yoo be dúyunne lhane cha hukwaꞌ huyalhꞌen. Duzooneya tsꞌiyawh gak yulhtsi ꞌet hoontsꞌi nus za lheꞌínelh.

²⁷ Jesus yulh ꞌúdantsꞌo whe dune toh Jesus yutꞌa tsꞌe yugha nínya ꞌinkꞌez oonaih yutꞌaíznai.

²⁸ “ꞋAntsꞌi oonaih ootꞌa ízasnai de ꞌet de la soo náꞌoosneh,” dichꞌoh ꞌet ndunínzun.

²⁹ Jesus yunaih ꞌi yutꞌaíznai ibulh ꞌet ꞌahoh ꞌuskaiꞌ ꞌuyulhꞌen-un ꞌetsul ꞌuja ꞌinkꞌez ꞌahoh tꞌéoonanzin dzoh nuzut-un soo náꞌuja.

³⁰ ꞋAhoh Jesus tꞌéoonanzin yé ulhtus ye dune laꞌ ꞌutꞌen-i ooloh ootsꞌa ha díltsꞌut. ꞋEt ꞌilhozdílne butsꞌu nálhꞌa ꞌinkꞌez ꞌutni, “Mbe whe ꞌuja snaih yutꞌaíznai?”

³¹ ꞋEt yugha hodulꞌehne huyúlhni, “Dadíni wheꞌ dini? Lheꞌultsuk ꞌilhozdilne nyando ha húnildo ꞌinkꞌez, ‘Mbe ꞌuja snaih yutꞌaíznai dini?’”

³² ꞋEt Jesus mbe ꞌuja-un yanꞌen.

³³ ꞋEt tsꞌeke daja whe soo náꞌuja tꞌeoonanzin whe butahaínya nuljut kꞌet dutlut ꞌinkꞌez Jesus yubut nachániti ꞌinkꞌez khuni ꞌalhaꞌ ꞌuntꞌoh-i be tsꞌiyawh yulh náhoolnuk.

³⁴ Jesus uyúlhni, “Stseꞌ be ꞌalha ꞌuhoontꞌoh-i ꞌintꞌi ꞌet huwa soo náꞌinja. Ndzi hóontꞌiꞌ whe natonjaꞌ ꞌinkꞌez be dzoh ninzut-i soo náꞌontneh.”

³⁵ ꞋAwhuz Jesus nusíyilh whe khuni naꞌáne Jairus ooyoh tsꞌe haíndilne ꞌuhuyúlhni, “Ntseꞌyaz dazsai, ndun dune hodulhꞌéh-un di ha ꞌon ꞌun ooghu tédínlih?”

³⁶ ꞋEt Jesus ubudantsꞌo ibulh daja hutni whe lugliz whumoodih uyúlhni, “ꞋAw whéniljut iloh ꞌantsꞌi mba ꞌalhaꞌ hotꞌeꞌ.”

³⁷ ꞋAw ꞌuyoonne dune dulhúlhtildulh Peter cha, James ꞌinkꞌez bulhutsin John, ꞌenne za hiyulh tizdil.

³⁸ ꞋEt Lizwif lugliz whumoodih ooyoh tsꞌe hoozdil ꞌet Jesus whunilhꞌen ndulcho whe tahuditni ꞌinkꞌez tso yahalhduk.

³⁹ Jesus yoh danínya ꞌinkꞌez ubúlhni, “Di ha sdabe tádahtni ꞌinkꞌez ꞌahtso? Ndun tsꞌoodun ꞌaw dálhitsal ꞌantsꞌi ꞌusti whe ꞌuntꞌoh.”

⁴⁰ ꞋInkꞌez tsꞌiyawh highudloh. ꞋInka tsꞌiyawh tenábunilhꞌaꞌ. Tsꞌoodun oobá ooloo bulh hubílhchoot, yugha hodulꞌehne tane cha ꞌinkꞌez tsꞌoodun sulhti tsꞌe danínya.

⁴¹ ꞋEt tsꞌekeyaz yula ílhchoot ꞌinkꞌez uyúlhni, “Talitha koumi,” ꞌet dakelh kꞌunꞌa, “Tsꞌekeyaz dududinyaih nyudúsni,” ni whe ꞌutni.

⁴² ꞋAhoh dudinya ꞌinkꞌez nádinya. Tsꞌekeyaz whunizyat ꞌon ꞌat nat be yus kꞌut ꞌet ndúhooja whe tube buba hooncha.

⁴³ Jesus soo khuni ulhtus-i be ubúlhni, “Dune dóhniꞌ junih, ꞌinkꞌez hoonliyaz yutiꞌúlh-i oogha nahꞌaih,” ubúlhni.