Mark 4 - Yak'usda Ooghuni

ꞋAꞌ nulé-un oogha whútsꞌodulꞌeh

¹ Bunghun Galilee huwhútni-un, ꞌet doo cha za ꞌilhozdilne Jesus higha óozdil ꞌinkꞌez hubodulhꞌeh. ꞋIlhozdilne huldlai kꞌet tsꞌi bet tlꞌa didaꞌ. Nusle dodikelh whe ꞌet whutsꞌun ꞌilhozdilne taba nódilhyane hubodulhꞌeh.

² Lhat-un whe hukwꞌu bubulh nawhulhnuk huwa há hodoolꞌeh ꞌet wheni ꞌinkꞌez ꞌubulhni,

³ “Soo zúlhtsꞌai ꞌilhoghun ꞌaꞌ nule-un, ꞌáꞌuntilelh tsꞌu whenya.

⁴ ꞋEt ꞌaꞌ nule whe ooloh ti whuzih nanánkat. ꞋI dutꞌaiyaz whusaíndil ꞌinkꞌez tsꞌiyawh yinildil.

⁵ Ooloh tse toh nanánkat, ꞌankwꞌus yun hooloh-un, ꞌet huwa ꞌahoh há nuski.

⁶ Ooghih hooloh ꞌet huwa ha sainꞌai whe tsꞌiyawh yanúdizgi ꞌinkꞌez gak suliꞌ.

⁷ Ooloh cha whus cho tanínkat. ꞋI cha whus cho whutoh bulh ha inanyai bulh lhéwhulloh ꞌinkꞌez ꞌaw hálhniyil.

⁸ ꞋEt hoontsꞌi ꞌonghoh-i yun unzoo-i kꞌut nanánkat whe soo ha nanyai ꞌinkꞌez oomaiꞌ whulukhi tat whunizyai (30) oomaiꞌ suliꞌ, whulukhi lhkꞌu tat whunizyai (60) oomaiꞌ suliꞌ, ꞌinkꞌez whulukhi whunizyat whunizyai (100) oomaiꞌ suliꞌ.”

⁹ ꞋEt Jesus ꞌubulhni, “Mbe la oodzeh hoonline, ꞌenne ꞌuhoozólhtsꞌaiꞌ.”

Oogha whútsꞌodulꞌeh-i, ꞌi di unli wheꞌ ꞌuntꞌoh?

¹⁰ Jesus dichꞌoh ꞌúntꞌoh whe whulohne yoozálhtsꞌaꞌne huyulh ꞌuntꞌohne whelꞌaꞌne bulh Jesus higha óozdil ꞌinkꞌez ꞌuhuyúlhni, “Dája daniꞌ-un, ꞌet neba hukwꞌu nuhílhyeꞌ.”

¹¹ Jesus ndúbulhni, “Nohni Yakꞌusda ookeyoh huwu ni wheꞌ hootꞌoh hooyoh-un tꞌeoonohzin hubaꞌ hoontꞌoh. Mbene la yoo ꞌaz ꞌuntꞌohne khuni nawhutnuk-i gha hohodulꞌeh.

¹² ꞋEt whe la: ‘Hohonilhꞌen hoontsꞌi la ꞌaw lhuhuhoos̱ꞌen ooleꞌ. ꞋUhuditsꞌo ꞌet hoontsꞌi ꞌaw tꞌehahonoosze ꞌaitꞌoh. Bubeni taóodiltsꞌut ꞌinkꞌez Yakꞌusda tsꞌu náhulhꞌa de, bulubeshi buba ꞌún yutilhdulh.’”

ꞋAꞌ nule-un oogha whútsꞌodulꞌeh-un, ꞌet Jesus neba hukwꞌu nuhúlhyeꞌ

¹³ ꞋEt Jesus ubúlhni, “Ndi oogha hódulhꞌeh-un, ꞌaw tsꞌihꞌun nelhúwhuꞌal? Ntsꞌenꞌa suba ꞌuyoo oogha hódutilhꞌeh-un tsꞌihꞌun unꞌa tꞌewhuntizeh?”

¹⁴ ꞋEt Jesus ndúbulhni, “ꞋAꞌ nule-un ꞌaínule, ꞌen khuni ꞌaínule.

¹⁵ Whuloh te Yakꞌusda ooghuni ti nanúkat, ꞌi hiditsꞌo te, ꞌet ꞌahoh Satan khuni budzi yonedinkai bughu yílhchuk.

¹⁶ Ndai tse toh ꞌanilya, ndunne ꞌi kꞌunꞌa za ꞌuhintꞌoh. Yakꞌusda ooghuni hiditsꞌo ꞌinkꞌez ꞌahoh huhóontꞌiꞌ whe huyilhchuk.

¹⁷ ꞋEt hoontsꞌi ꞌaw bughih hooloh leꞌ hintꞌoh. ꞋEt huwa ꞌatsulyaz za buba ꞌalha ꞌuhoontꞌoh. ꞋInkꞌez ndi khuni ꞌi gha dzoh nuhudeh ꞌinkꞌez ꞌonghohne buchꞌaz huditni. ꞋEt huwa ꞌaho ndi khuni hila dutnih.

¹⁸ Ndai la whus toh ꞌanankat-i leꞌ ꞌuntꞌohne, ꞌenne khuni hiditsꞌo.

¹⁹ ꞋEt hoontsꞌi ndi yun kꞌut huwu ni udli-un, ndi yun kꞌut hoonzooꞌ hoontꞌoh-un, ꞌinkꞌez yun kꞌut huhóontꞌiꞌ tuneꞌ hutꞌen-un, ꞌet ꞌi tsꞌiyawh whus cho ꞌi be bulh lheꞌullhuk. ꞋEt huwa ꞌaw lhadúlyane hooleꞌ ꞌaitꞌoh.

²⁰ ꞋEt whulohne yun unzoo-i kꞌut nanánkat ꞌi unduhúltꞌoh Yakꞌusda ooghuni hiditsꞌo, huyílhchuk, ꞌinkꞌez dudzi yo nehídiꞌaih, ꞌet oomaiꞌ whulih. Whulohne tat whunizyai (30), whulohne lhkꞌu tat whunizyai (60), ꞌinkꞌez whulohne cha whunizyat whunizyai (100).”

Too dízkꞌun kwꞌuz yo yudinꞌai-i Jesus yughu yalhduk

²¹ ꞋOn ꞌun Jesus ndúbulhni, “Too dízkꞌun dune daíninꞌai ꞌinkꞌez yukꞌuz yonáꞌdizꞌai tilah kꞌus lili tꞌa tilah ꞌaiyanꞌai? ꞋAwundooh! Hukwꞌusꞌai-un, ꞌet hukwꞌé yiꞌaih.

²² ꞋEt huwa di la whuꞌiz ꞌuntꞌoh-i, tsꞌiyawh tsꞌet ha tíkulh. Kꞌus nonutiꞌ-un tsꞌet halhoohooskat ꞌaitꞌoh.”

²³ ꞋEt Jesus ubúlhni, “Mbe la oodzeh hoonline, huyoozólhtsꞌaiꞌ hubaꞌ hoontꞌoh.”

²⁴ ꞋEt doo cha ndúbulhni, “Huwahli ꞌinkꞌez soo cho hoozúlhtsꞌai. Be ꞌundunaꞌoolhdzih-i, ꞌi be za nohba ꞌundunaootalnih. ꞋUdahtsꞌo de, ꞌon nus ꞌuniltsuk nohgha tikulh.

²⁵ Mbene la sghuni soo cho huyoozílhtsꞌaine, ꞌon ꞌun cha huyootuzálhtsꞌilh ꞌinkꞌez higha hódutilꞌeh. ꞋEt bugha whútatꞌalh ꞌinkꞌez mbene la lhuhuyootuzálhtsꞌilhne, sghuni hidántsꞌo ꞌi hoontsꞌi hinaoodutilnoh.”

Ha níyeh-i oogha whútsꞌodulꞌeh

²⁶ ꞋEt Jesus ꞌutni, “Nohbulh naóowhutiznuk Yakꞌusda ookꞌúneꞌ whutꞌen-un, dune lhéꞌutꞌen ꞌanulye-i ꞌanúle whuz unꞌa ꞌuntꞌoh.

²⁷ ꞋEt hukwꞌelhꞌaz ꞌulhdzis ꞌusti ꞌinkꞌez dzenis ꞌet nꞌawh neꞌútꞌen, ꞌainanla-i ookꞌu nónultalh ꞌinkꞌez ha níyeh ꞌet hoontsꞌi ꞌaw tꞌeoonúszun datꞌen whe ha núlhyih.

²⁸ Yun ꞌi gha ha núlhyih ꞌinkꞌez oomaiꞌ whulih. ꞋUdechoo yun ghu nuki ꞌet nuyih ꞌinkꞌez dinyiz lhih te oomaiꞌ whulih.

²⁹ ꞋEt oomaiꞌ nutꞌi te dune lufoo be yutꞌus ꞌawet háꞌ nukat newhúninzut ꞌet huwa.”

Ha níyeh-i Mustard huyúlhni ꞌi oogha whútsꞌodulꞌeh

³⁰ ꞋEt Jesus ꞌutni, “Daja uzdutinelh whe Yakꞌusda ookꞌúneꞌ whutꞌen-un, hukwꞌu nutsꞌúhulhyeꞌ whe hígha hódoolꞌeh ꞌi ookꞌú natsꞌotilnuk?

³¹ ꞋUkꞌenus ꞌanulye-i nintsool-i, mustard huyúlhni, ꞌi ndultꞌoh. ꞋI dune yilhchuk ꞌinkꞌez ꞌainulih.

³² ꞋEt ha núlhyih te, ꞌinkꞌez dilhtán-i ꞌukꞌenus ꞌudilcho lhih oozooschum dincha whe lhtsꞌenunúlhyeꞌ ꞌet dutꞌaiyaz yutoh netꞌo ulih.”

³³ Lhat-un higha hódoolꞌeh ha bubulh yálhduk soo huwhudotsꞌo ha tꞌehontizeh-un, ꞌet hukwꞌu bubulh náwhulnuk.

³⁴ Higha hódoolꞌeh-i, ꞌi be bubulh yálhduk ꞌinkꞌez dichꞌoh ꞌúhintꞌoh te yugha hodulꞌehne, soo cho buba hukwꞌú nuhúlhyeꞌ.

Whudutilhtsꞌut whe Jesus whudílhghel

³⁵ ꞋEt hulhgha za Jesus yugha hodulꞌehne ꞌúbulhni, “Nyan tadatus tsꞌe uztookeꞌ.”

³⁶ ꞋInka ꞌilhozdilne buchꞌa nahusdil yugha hodulꞌehne tsꞌi be hándil, Jesus ꞌudaꞌ ye usda-i be nyan hutizki ꞌuyoo tsꞌiyaz cha bubulh tizkat.

³⁷ Khuntsul nilhtsꞌi ulhtus tiztsꞌi whe tatsi dincha kꞌet tsꞌi be tádutih ꞌinkꞌez too be whendunimbun.

³⁸ ꞋEt Jesus tsꞌi niz tsꞌe ꞌet tseꞌalh kꞌut tse nilhꞌal ꞌinkꞌez nanisti. Yugha hodulꞌehne tsꞌe nahinílhdzut ꞌinkꞌez ꞌuhuyulhni, “Nehodulhꞌeh-un, ꞌawet yatsꞌitádla ꞌaw neghuni lhínloh?”

³⁹ Jesus dudinya whe too kꞌut nilhtsi khuni ulhtus-i be hukwa yudániꞌ, “Nilhtsꞌi, ꞌetsul ꞌineh,” ꞌinkꞌez, “Tatsi nulhózina.” ꞋEt ꞌaho dínghel.

⁴⁰ ꞋEt Jesus yugha hodulꞌehne ndúbulhni, “Dahoontꞌoh huwa stabe nulhjut, ꞌaw eh bé ꞌalha ꞌuhoontꞌoh-i lhuhtꞌih whé ꞌahtꞌoh?”

⁴¹ Tube whé hunilhjoot ꞌinkꞌez ꞌulhodútni, “Dantꞌoh-un dune unli whe ꞌuntꞌoh? Nilhtsꞌi ꞌinkꞌez yatoo hoontsꞌi yukꞌúneꞌ ꞌutꞌen.”