Mark 3 - Yak'usda Ooghuni

Nahulyis dzin ꞌet Jesus dune oola únduda-un soo naꞌyinla

¹ ꞋEt Jesus Lizwif bulugliz tsꞌe naóosja. ꞋIlhoghun dune oola ꞌaw ye nulhéꞌustꞌen-un, ꞌet usda.

² ꞋEt Phariseene tube Jesus highunli nahulyis dzin tilah nyoon dune ka únli-un nayoolhyih, hukwa hikꞌé hoꞌalh-un, ꞌet hukwa highunli.

³ Jesus dune oola ka únli-un ꞌulhni, “Dunadindaih ꞌinkꞌez nus ínyalh!”

⁴ ꞋEt Jesus uboodulhkut, “Neghá whuntꞌai eh nahulyis dzin, ꞌulaꞌ tsꞌutinelh kꞌus ꞌutsꞌuduntálhda, uztilhyih kꞌus gak uztilhtselh?” ꞋAw dája lhodinel.

⁵ Jesus tube hunílchꞌe whe butunuyúꞌen budzi dadiltsꞌun la ꞌet huwun unli. ꞋEt dune ka únli-un yulhni, “Lhtsꞌedílnih!” Nyoon dune lhtsꞌedilhni ibulh ꞌilhoghi oola kꞌunꞌa soo náꞌuja.

⁶ ꞋEt ꞌahoh Phariseene lugliz tenáhundil ꞌinkꞌez Herod didowhne bulh highu yalhduk ntsꞌenꞌa Jesus hituzilhghelh ꞌet wheni lhahóduleh.

ꞋIlhozdílne bunghun taba húdilhtsꞌi

⁷ ꞋEt doo cha za Jesus yugha hodulꞌehne ꞌinkꞌez Galilee bun tsꞌe náhoosdil. Galilee keyoh whutꞌenne whuz huyoonizdíl ꞌinkꞌez lhelhtsꞌiz de keyoh tsꞌe haíndilne tubulh. Judea tsꞌe haíndilne cha,

⁸ Jerusalem whutꞌenne cha, Idumea tsꞌe haíndilne cha, Jordan koh whanyan whutꞌenne cha, ꞌinkꞌez Tyre ꞌinkꞌez Sidon whutꞌenne cha, tsꞌiyawh Jesus highe ꞌilhozdil lhat teneꞌútꞌen huyulh ꞌúdantsꞌo ꞌet huwa.

⁹ ꞋIlhozdílne huldlai ꞌinkꞌez Jesus huyulh lhedudadulh ꞌet whuchꞌa yugha hodulꞌehne, “Tsꞌi sba lhadáhleh,” ubúlhni.

¹⁰ Lhane ndudáne soo naꞌbinla ꞌinkꞌez ꞌuyoonne cha hitꞌa óonalh hukwaꞌ hutꞌen,

¹¹ ꞌinkꞌez ntsiꞌ-i nudúdeh-i buyudíndane, Jesus hitulhꞌih te, hibut nachánuldulh, ꞌinkꞌez ha húzulh whe ꞌuhutni, “Nyun Yakꞌusda ooYeꞌ inli whe ꞌintꞌoh.”

¹² ꞋEt Jesus khuniti be ntsiꞌ-i nudúdeh-i ubúlhni, “Khun mbe ꞌustꞌoh doohniꞌ junih!”

Whunizyáne ꞌon ꞌat nane, Jesus ꞌutahábanla

¹³ Shus kꞌut ndo whenya whe mbene la bukaꞌ ninzun bukaꞌ daniꞌ ꞌinkꞌez hitsꞌo whúsaindil.

¹⁴ Whunizyáne ꞌon ꞌat nane, ꞌutahábanla. “Sulh óohtꞌeꞌ ha ꞌutahanóhisdla,” ubúlhni, “Dune bulh yátilhduk ha nohtisꞌalh,

¹⁵ ꞌinkꞌez ntsiꞌ-i nudúdeh-i dune yáhananoohyoot ꞌinkꞌez dune soo naꞌboolhꞌen-un, nohtlꞌa hóosꞌai.”

¹⁶ Simon, ꞌen Jesus “Peter” naidútni.

¹⁷ James ꞌinkꞌez bulhutsin John Zebedee ooyeꞌke ꞌenne Jesus Boanerges nabudátni, ndi oozíꞌ-i “Ditni Yeꞌke” ni whe ꞌutni;

¹⁸ Andrew, Philip, Bartholomew, Matthew, Thomas, James Alphaeus ooyeꞌ, Thaddaeus, Simon huwu daóoditꞌowh-un,

¹⁹ ꞌinkꞌez Judas cha ꞌen Jesus be náꞌoodutakulh-un. ꞋInkꞌez yoh tsꞌe whehandil.

Netsudule Jesus Christ ooyudinda hutni

²⁰ ꞋEt doo cha za ꞌilhozdilne huldlai kꞌet Jesus ꞌinkꞌez yugha hodulꞌehne bulh ꞌuhutiꞌulh, ꞌet hoontsꞌi ꞌaw ꞌuhooneh ꞌaítꞌoh.

²¹ ꞋEt hoontsꞌi duduneꞌne huyulh ꞌúdantsꞌo whe, “Beni hoolel” hutni ꞌinkꞌez hika natisdil dudeni yit nintaꞌootꞌen whuchꞌa.

²² Moses be ꞌudustlꞌus ꞌukꞌu nunáguzne, Jerusalem tsꞌu haíndilne, ꞌuhutni, “Beelzebul ooyudínda ꞌen yugha óoninꞌai huwa ꞌutꞌen ntsiꞌ-i nududeh-i bughu whenábunuyukw.”

²³ ꞋInka Jesus, “ꞋAnih,” hubúlhni, ꞌinkꞌez bubulh náwhulnuk higha hodoolꞌeh ha, “Ntsꞌenꞌa netsudule dichꞌoh nadudúntíjulh?

²⁴ Keyoh whutꞌenne lhchꞌaz nehúdindil ꞌinkꞌez lhehúndil de, ꞌet keyoh gak whutaleh,

²⁵ kꞌus ꞌilhoghun yoh whutꞌenne lhchꞌaz nehúdindil de, ꞌet yoh whutꞌenne tsꞌiyawh yahitádulh.

²⁶ ꞋEt ntsiꞌ-i nududeh-i lhchꞌaz nehúdindil de, ꞌaw saꞌ ꞌuhootꞌeꞌ ꞌaítꞌoh lhchꞌá náhúsdil ꞌinkꞌez la gak hooleꞌ.”

Mbene la Ndoni chꞌaz ditni be yalhdukne, ꞌaw buba whunaoodootnoh ꞌaitꞌoh

²⁷ “Dune ulhtus-un ooyoh daháꞌ danyuz ꞌinkꞌez teꞌóolelh nehooloh, ꞌudechoo dune ulhtus-un yulhghel de, ꞌet de za yughu téꞌtilelh.

²⁸ Soo tsꞌihꞌun nohdúsni, tsꞌiyanne dune bulubeshi cha ꞌinkꞌez Yakꞌusda chꞌaz yálhduk-un cha tsꞌiyawh buba nꞌún whutildulh.

²⁹ ꞋEt hoontsꞌi mbe la Ndoni chꞌaz yálhduk-un, ꞌen ꞌaw oolubeshi buba nꞌun yutoolhdilh ꞌaitꞌoh, ꞌilhiz wheni ooba nahutideh.”

³⁰ Jesus ubudaniꞌ-un, ꞌet huwa Moses be ꞌudustlꞌus ꞌukꞌu nunáguzne ꞌuhútni, “Ntsiꞌ-i nudúdeh-i ooyudínda!”

Jesus ooloo ꞌinkꞌez bulhutsinke ꞌanih huyúlhni

³¹ ꞋEt Jesus ooloo ꞌinkꞌez bulhutsinke te whusahándil yoh yoo ꞌaz tsꞌe nódilhya ꞌinkꞌez hika huyih.

³² Dune ꞌilhozdílne Jesus hinat dilhtsꞌi ꞌinkꞌez ꞌet ꞌuhuyúlhni, “Nilhꞌen nloo ꞌinkꞌez nyulhutsinke nꞌaz ꞌuhutꞌen nkaꞌ hoodulhkut.”

³³ ꞋEt Jesus ubúlhni, “Mbe la sloo kꞌus mbene la sulhutsinke?”

³⁴ Tsꞌiyawh dilhtsꞌíne butunúyuzꞌen ꞌinkꞌez ꞌutni, “Ndunne, ꞌenne sloo ꞌinkꞌez sulhutsinke cha ꞌuhintꞌoh.

³⁵ Mbene la Yakꞌusda kꞌúneꞌ ꞌutꞌen unli-un, ꞌen sulhutsin, sulhtus, ꞌinkꞌez sloo cha ꞌuhintꞌoh.”