Mark 2 - Yak'usda Ooghuni

Dune délhdusni-un Jesus soo náꞌyinla

¹ ꞋEt hukwꞌelhꞌaz whutizútyaz whe Jesus keyoh Capernaum tsꞌe naoosja. Tsꞌiyanne whulh ꞌúhuduztsꞌai ndet yoh usda.

² ꞋAhoh dune ꞌilhuhozdil. Whuz dune lhane ꞌalhgoh daníndil kꞌet ꞌaw whuzꞌái-un hooloh, dati ꞌi bulh whudizbun. ꞋEt Jesus Yakꞌusda ooghuni ghun ubulh yálhduk.

³ Yalhduk whe dine dune, ꞌilhoghun dune délhdusni-un Jesus tsꞌun híyoozkai.

⁴ Whuz dune lhai kꞌet ꞌaw Jesus híyénghun neóodilh ꞌaitꞌoh. ꞋInka ndo bun kꞌihinílhti ꞌinkꞌez ndet la Jesus ꞌuntꞌoh-un, whuz dune délhdusni-un ndus de yukꞌusti-i, ꞌi bulh hukwꞌu huyankai.

⁵ ꞋEt Jesus dalcho-i be hitꞌa nínintan tꞌeoonínzun ꞌet huwa dune délhdusni-un ꞌulhni, “Yeꞌ nlubeshi mba hooloh suliꞌ.”

⁶ Whulohne Moses be ꞌudustlꞌus ꞌukꞌu náguzne, ꞌet hudilhtsꞌi ꞌinkꞌez ꞌuhinínzun,

⁷ “Di ha ndun dune Yakꞌusda chꞌaz yalhduk? Mbe ꞌutinelh lubeshi untilhdulh? Yakꞌusda za lubeshi nꞌun tulhdilh whe ꞌuntꞌoh.”

⁸ ꞋEt hoontsꞌi Jesus duyughi be daja huninzun tꞌewhunínzun ꞌet ꞌahoh ꞌubulhni, “Dáhoontꞌoh huwa ꞌoh te nuní nahzut?

⁹ Ndet ꞌukꞌenus huwa lhúhoolnaꞌ ndun dune délhdusni-un ꞌudutásnelh, ‘Nlubeshi mba nꞌun tisdil,’ kꞌus ‘Dudinyaih ꞌinkꞌez ninya?’

¹⁰ ꞋEt la tꞌeoonohzin Yinka Dune Yeꞌ, ꞌen ndi yun kꞌut ye úlhtus ꞌi be lubeshi nꞌun tulhdilh-un whe ꞌuntꞌoh.” ꞋInka ndun dune délhdusni-un ꞌulhni,

¹¹ “Nyudúsni, dudinyaih, ookwꞌusinti-i ilhchoot ꞌinkꞌez nyoh tsꞌe naíndalh.”

¹² ꞋAho dunadija, yukꞌusti-i yilhchoot ꞌinkꞌez tsꞌiyanne nalh whenája. Tsꞌiyawh buba hooncha ꞌinkꞌez Yakꞌusda hidálhtiꞌ ꞌinkꞌez ꞌuhútni, “ꞋAw whutsodaꞌ nduhoontꞌoh-un lhtsꞌuhoos̱ꞌen.”

Jesus Levi, “ꞋAnih,” yúlhni

¹³ Jesus doo cha za taba tsꞌe naóosja. ꞋIlhozdílne highu nindil whe ꞌet whubodulhꞌeh.

¹⁴ Jesus ꞌoh whuya uyalh whe Alphaeus ooyeꞌ Levi, Capernaum whenkuti huwunli ha sooniya nálhdzooh-un, ꞌen Jesus yutilhꞌen ꞌet uyúlhni, “Sunanyalh.” Levi dudinya ꞌinkꞌez yukꞌoh tsꞌe ootꞌen ha yuntizya.

¹⁵ Hukwꞌelhꞌaz Levi ooyoh lhanne sooniya nalhdzóohne ꞌinkꞌez lubeshi ꞌulhꞌenne, Jesus yugha hodulꞌehne cha ꞌet bula naꞌutꞌalh.

¹⁶ ꞋEt Moses beꞌ ꞌudustlꞌus ꞌukꞌu nunáguzne ꞌinkꞌez Pharisee didowhne, Jesus hinilhꞌen lubeshi ꞌulhꞌenne, ꞌinkꞌez sooniya nalhdzóohne bula naꞌutꞌalh. Phariseene Jesus yugha hodulꞌehne hubuhoodulhkut, “Dáhoontꞌoh huwa nduntꞌóhne bula ꞌaꞌalh?”

¹⁷ Jesus budántsꞌo ꞌinkꞌez ꞌubulhni, “Soo ꞌúntꞌohne ꞌaw yoo be duyun-un ha lheꞌhunízun, mbene la ndudáne za yoo be dúyun-un kaꞌ huninzun. Tsꞌihꞌun ꞌuntꞌohne buba whusálhusyal, lubeshi ꞌulhꞌénne lhtꞌanahunoodilh bubudutásnelh ꞌet wheni whusásya.”

Dune soo huhooni-un hukwa hoodulhkut

¹⁸ John dune too be ꞌulhꞌen-un yugha hodulꞌehne ꞌinkꞌez Phariseene bugha hodulꞌehne cha soo húhoonih whe Jesus highu nindil ꞌinkꞌez ꞌuhuyúlhni, “ꞋEt dáhoontꞌoh huwa John dune too be ꞌulhꞌen-un yugha hodulꞌehne ꞌinkꞌez Pharisee bugha hodulꞌehne soo húhoonih ꞌet hoontsꞌi nyun ngha hodulꞌehne, ꞌenne gak?”

¹⁹ Jesus ubúlhni, “ꞋAndit ꞌat ꞌutꞌi-un bughu nusdílne soo húhoonih la nahzun eh? Dune ooꞌat whuzdliꞌ-un, butoh usda de, ꞌaw nduhóoneh ꞌaitꞌoh.

²⁰ ꞋEt hoontsꞌi whusaóotiltsꞌulh dune ꞌat utꞌí-un bughu nayitálchulh. ꞋEt dzin whusahóoltsꞌut de, ꞌoh de soo húhootanih.”

²¹ “ꞋAw ꞌilhoghun naih ꞌandidi-i naih jut be naoolhkut ꞌaitꞌoh. ꞋEt ndúja de, naih ꞌandidi-i be nalhkut-i, naih jut nalhkut-i bulh ha naitichꞌulh ꞌinkꞌez ꞌon nus hoontsiꞌ tileh.

²² ꞋInkꞌez ꞌaw ꞌilhoghun tsꞌekoo tooꞌ, ꞌawhuz ꞌutꞌen-i, ꞌuzus ꞌujut-i be húyoolhdzeh ꞌaitꞌoh. ꞋEt nduhúyinla de tsꞌekoo tooꞌ zus ꞌujut-i ookꞌotáltulh ꞌinkꞌez nankiltꞌoh tsꞌekoo tooꞌ ꞌinkꞌez oozus bulh nintaꞌtitꞌelh. Tsꞌekoo tooꞌ ꞌawhuz ꞌutꞌen-i ꞌuzus ꞌandidi-i be óoldzeh hubaꞌ hoontꞌoh.”

Nahulyis dzin hukwa hoodulhkut

²³ ꞋEt doo cha nahulyis dzin ꞌuhoontꞌoh whe, Jesus ꞌinkꞌez yugha hodulꞌehne tubulh tlꞌo kꞌut ꞌoh whuya hidulh whe, tlꞌo maiꞌ hoonuyin.

²⁴ ꞋEt Phariseene Jesus ꞌuhuyúlhni, “Nilhꞌen dáhoontꞌoh huwa ngha hodulꞌehne natsꞌulyis dzin ꞌet ꞌuhutꞌen? ꞋAw nduhóotꞌen huba lheꞌhootꞌoh.”

²⁵ Jesus ubúlhni, “ꞋAw lakw hukwꞌu yalhúlhdih David dája ꞌoh daꞌ, yooꞌalh-i hooloh whe yulh ꞌútꞌenne te buye ꞌíltsꞌul whe nduja:

²⁶ Yakꞌusda ooyoh ꞌet danínya ꞌinkꞌez lhes Yakꞌusda gha tꞌaih-i, ꞌi yuꞌalh ꞌinkꞌez yulh ꞌutꞌenne cha huyanꞌal. Lubretne ꞌaw ꞌenne za huyooꞌalh hubaꞌ hoontꞌoh, ꞌet hoontsꞌi David ꞌinkꞌez yulh ꞌutꞌenne cha nduhuja. ꞋOh daꞌ Abiathar ꞌen lubretne bumoodih unli wheꞌ hooja.”

²⁷ ꞋEt Jesus ubúlhni, “Nahulyis dzin dune whe sooꞌ hootꞌeꞌ ha ꞌoohoolya, ꞌinkꞌez dune, ꞌaw nahulyis dzin huba lheꞌhílnel.

²⁸ ꞋEt huwa Yinka Dune Yeꞌ, nahulyis dzin ꞌet hoontsꞌi whuMoodihti unli.”