Mark 16 - Yak'usda Ooghuni

Jesus dunadija

¹ Lizwif nahulyis dzin hukwꞌelhꞌaz hulhgha tsꞌe Mary Magdalene, ꞌinkꞌez Salome cha, ꞌinkꞌez Mary James ooloo te, yoo sooltsun-i honket, Jesus ooyustꞌe hiye hítilho huba.

² ꞋOm bun bundadaꞌ ꞌudaꞌ lisman ꞌudechoo dzin, sa haínꞌai whe tsꞌun kꞌuz hutizdil.

³ Whuz hidulh whe ꞌulhodútni, “Tse cho tsꞌun kꞌut whudánduninꞌai-i mbe suba neba whusaídooꞌalh?”

⁴ Tse ꞌudaꞌ whusandunilgai whe hotilhꞌen. Tse tube ndunincha.

⁵ ꞋInkꞌez tseꞌan ꞌuhandil whe chilh ꞌulhyul-i be dune unli, ꞌen naílhni tsꞌunkꞌus usda whe hitilhꞌen. ꞋEt bugha ꞌánjaz.

⁶ ꞋEt ubúlhni, “Nulhjut iloh! Tꞌeoonúszun Jesus Nazareth whutꞌen-un, tulalhgus kꞌehíyilhti-un ookunáhta whe ꞌahtꞌen. Hooloh! Dunadija whe ꞌuntꞌoh! Njan whunulhꞌen ilhtéꞌ-un.

⁷ ꞋAwet nahdulh, Peter ꞌinkꞌez ꞌonghunne Jesus yugha hodulꞌehne cha ubudúhni, Jesus dája nohúlhni daꞌ nohtso Galilee tsꞌe tíyalh ꞌet la oohꞌen,” ubúlhni.

⁸ ꞋEt ꞌawet tseꞌan tenáhalghaz ꞌinkꞌez nahutílhghaz tube bughá neꞌusjaz ꞌinkꞌez ꞌaw dune lhodínel hunuljut ꞌet huwa.

Jesus Mary Magdalene yunalhtsꞌet haínya

⁹ ꞋEt Jesus dunadija hukwꞌelhꞌaz, Lizwif nahulyis dzin ꞌom bun bundadaꞌ ꞌudaꞌ ꞌet Jesus Mary Magdalene, ꞌen cho yunalhtsꞌet hainya. ꞋEn la lhtakꞌántꞌi ntsiꞌ-i nudúdeh-i ye yáhanananyoot ínleꞌ.

¹⁰ Jesus yulh ꞌútꞌen inleꞌne híkꞌenudle, ꞌinkꞌez hutso whe bughu ninya ꞌinkꞌez ubudániꞌ,

¹¹ Jesus khuna whe yanꞌen, ꞌet hoontsꞌi ꞌaw buba ꞌalhaꞌ lheꞌdusnih.

Jesus nane yugha hodulꞌehne bunalhtsꞌet hainya

¹² ꞋEt hukwꞌelhꞌaz Jesus ꞌutsꞌun unꞌa be hóodatꞌen whe nane ꞌutsꞌun keyoh tsꞌe hiꞌus whe bunalhtsꞌet hainya.

¹³ Whusanáhitꞌaz whe, ꞌonghunne bubulh náwhuhulnuk whe ꞌaw ꞌenne cha buba ꞌalhaꞌ lheꞌhudusnih.

Jesus whunizyane ꞌon ꞌat ꞌilhoghun bunalhtsꞌet hainya

¹⁴ ꞋEt hukwꞌelhꞌaz Jesus yugha hodulꞌehne whunizyane ꞌon ꞌat ꞌilhoghun naꞌhutꞌalh whe bunalhtsꞌet hainya. ꞋEt ꞌaw be ꞌalha ꞌuhoontꞌoh-i lhuhítꞌiꞌ ꞌinkꞌez ꞌutsꞌun ꞌoninzun. ꞋEt huwa yanꞌenne ꞌaw buba ꞌalhaꞌ lheꞌhudusnih, ꞌet Jesus hukwaꞌ budániꞌ

¹⁵ ꞌinkꞌez ꞌubulhni, “Yinka ndulcho whe náhdilh, ꞌinkꞌez khuni unzoo-i yinka duneꞌne whubunulhtun.

¹⁶ Mbe ooba ꞌalha ꞌuhoontꞌoh-un, ꞌinkꞌez too be ꞌúlya de, ꞌen dutijih. Mbe la ooba ꞌalhaꞌ lheꞌhootꞌoh-un, ꞌen hoontsiꞌ hukwꞌunꞌa ooba nahutideh.

¹⁷ Mbene la ooba ꞌalhaꞌ ꞌustꞌohne, ꞌenne la be úlhtus-un bugha óotasꞌalh. Si sooziꞌ gha ntsiꞌ-i nududeh-i dune tsꞌu ha náhuyuntiyulh. ꞋUyoo khuni be cha yahatilhduk.

¹⁸ Nahunitꞌa whe tlꞌughus ntsiꞌ-i hílhchoot, kꞌus lubezo whe hítnaiꞌ de, ꞌet hoontsꞌi ꞌaw dalhótisnel. ꞋInkꞌez undudáne butsi kꞌehudilnih, ꞌenne cha soo náꞌhutitnelh.”

Jesus yakꞌuz whe naja

¹⁹ ꞋEt hukwꞌelhꞌaz Jesus neMoodihti dune bubulh yálhduk ꞌetsul ꞌudíja whe, ꞌet yakꞌuz whenája ꞌinkꞌez Yakꞌusda ooghu naílhni tsꞌunkꞌus nátlꞌa didaꞌ.

²⁰ Yugha hodulꞌehne ndulcho nahúdilh, ꞌinkꞌez dune bulh yáhalhduk. NeMoodihti bubulh ꞌútꞌen ꞌinkꞌez be úlhtus-i butlꞌa dánꞌai, ꞌet huwa ooghuni be yahulhduk-un, ꞌalhaꞌ hutni wheꞌ hutni. ꞋEt ndo honeh.