Mark 15 - Yak'usda Ooghuni

Jesus Pilate but nenínya

¹ ꞋOm bun bundadaꞌ ꞌahoh Lizwif lubret moodihne, dune tso whudilhdzulhne, Moses be ꞌudustlꞌus ꞌukꞌu nunáguzne cha, ꞌinkꞌez dune ba nahiyilhne cha, tsꞌiyawh yahalhduk. ꞋEt Jesus hiyulhghel ꞌinkꞌez Pilate tlꞌa húyalhti.

² ꞋEt Pilate yoodulhkut, “Nyun eh Lizwif bulerwe inli?” ꞋEt Jesus ꞌutni, “ꞋAlhaꞌ dini wheꞌ dini.”

³ Lizwif lubret moodihne lhat-un Jesus hichꞌaz yalhduk, ꞌinkꞌez hiba hontsꞌit, ꞌet hoontsꞌi Jesus ꞌaw tꞌedusnih.

⁴ ꞋInka Pilate doo cha za Jesus yoodulhkut, “Dáwhultsuk-un nkꞌehúhoonꞌai, ꞌaw eh dája lhdutuzanel?”

⁵ ꞋEt doo cha za Jesus ꞌaw yalhtílhdih. ꞋEt Pilate ooba hooncha.

Pilate Jesus datítsah-un whutsꞌu yúlha

⁶ Nawhúdizulh totsuk Lizwifne butus lhuséya whunahulníh-un, ꞌet ꞌilhoghun dune ꞌadinꞌaí-un Lizwif ꞌutahahúyulhtih, ꞌen Pilate yula nadutnih.

⁷ ꞋInkꞌez ꞌilhoghun, Barabbas hiyulhni-un, lhuzti tlꞌool be yulh keyoh humoodih chꞌaz nidindilne bubuyulhꞌoo. Dune cha huzilhghi.

⁸ Tsꞌiyanne ꞌilhozdilne Pilate ꞌuhuyúlhni, “Nawhudizulh totsuk ꞌilhoghun dune ꞌadinꞌaí-un, ꞌen oola nadintnih. Doo cha za ꞌet ndineh.”

⁹ ꞋEt ꞌubulhni, “Lizwif bulerwe, ꞌen oola nadutistnih hukwaꞌ nahzun?”

¹⁰ Didutchꞌoh tꞌeoonínzun Lizwif lubret bumoodihne ꞌoonih gha Jesus hitlꞌa háyalhti ꞌet huwa.

¹¹ ꞋEt hoontsꞌi Lizwif lubret bumoodihne dune buba nus hónilhtꞌi, Barabbas ꞌen Pilate yula nadootnih hidóniꞌ ha.

¹² ꞋEt Pilate doo cha za dune ꞌilhozdílne ubúlhni, “Ndun Lizwif bulerwe dáhni-un datísdlelh hukwaꞌ nahzun?”

¹³ ꞋEt tube cho ꞌuhuyúlhni, “Tulalhgus undunilhtꞌah!”

¹⁴ ꞋEt Pilate ꞌubulhni, “Ndet whe tankꞌus ꞌúja?” ꞋEt hoontsꞌi ꞌon nus ꞌuhutni, “Tulalhgus undunilhtꞌah!” hutni.

¹⁵ ꞋEt ꞌilhozdílne hohótꞌeꞌ ha Barabbas ꞌen Pilate buba yula naditni. Jesus yayalhtsus, ꞌinkꞌez tulalhgus kꞌehíyolhtelh ha butlꞌa yálhti.

Lhugánne Jesus highu núwhulhya

¹⁶ ꞋEt lhugánne moodih ooyoh whunanistlꞌoo-i bez tsꞌe Jesus dáhinilhti ꞌinkꞌez ꞌonghunne lhugánne tsꞌiyawh bukaꞌ hudániꞌ.

¹⁷ Luglok dulkꞌún-i, Jesus hitꞌahúyalhbal. Whus nꞌawh nahínilhjaz, ꞌi hitsi nehídanꞌai.

¹⁸ ꞋEt hidílhtiꞌ nahoohoolhꞌi, ꞌinkꞌez ꞌuhuyúlhni, “Adih, Lizwif bulerwe!”

¹⁹ Duchun be hitsi tsꞌeꞌ nalhtꞌo, highá dizoh, hibut dugwútsi be nehúdulh, ꞌinkꞌez hibut teniꞌ hunilhdzun nahuhoolhꞌi.

²⁰ Jesus highu núwhulhya ꞌetsul ꞌuhayínla hukwꞌelhꞌaz luglok dulkꞌún-i highu nahuyílhchoot, ꞌinkꞌez dichꞌoh hinaih be náhayalhti. ꞋInkꞌez tulalhgus kꞌehuyitalhtelh tsꞌe hítilhti.

Jesus tulalhgus kꞌehíyilhti

²¹ ꞋEt hidulh whe ꞌilhoghun dune, Simon huyúlhni-un, ꞌoh whuya uyalh. ꞋEn hidudizdil ꞌinkꞌez Jesus ootulalhgus yuba idutitelh ha huwa húyalhꞌa. Simon Cyrene whutꞌen-un, ꞌen Alexander ꞌinkꞌez Rufus bubá ꞌuntꞌoh.

²² ꞋInkꞌez Jesus Golgotha huwhútni tsꞌe huyoolhti. Golgotha ꞌutsin tsꞌun nizꞌai hutni wheꞌ hutni.

²³ ꞋEt tsꞌekoo tooꞌ ꞌinkꞌez yoo, myrrh huyúlhni, hitadínla, ꞌi Jesus huyúhuyoolhnaiꞌ hukwaꞌ huyínla, ꞌet hoontsꞌi ꞌaw lheyílhchulh.

²⁴ ꞋEt tulalhgus kꞌehúyilhti ꞌinkꞌez hinaih ꞌi ꞌuhúntúlhdulh whe higha ꞌaínlih whe hinaih lhtáhayulya.

²⁵ Bundadaꞌ 9:00 ꞌuhunitꞌoh atꞌen Jesus tulalhgus kꞌehíyilhti.

²⁶ Ndet hukwaꞌ huyínla hutni-un, ꞌet ꞌukꞌehúhoonguz, ꞌi hiyando whahidinꞌai. Ndi khuni ꞌukꞌehúyinguz-i ndutni: LIZWIF BULERWE

²⁷ Nane ꞌundunutꞌíhne cha huyulh tulalhgus kꞌébihilhti, ꞌilhoghun ooghu naílhni tsꞌunkꞌus ꞌinkꞌez ꞌilhoghun ooghe ꞌintlꞌus tsꞌe.

²⁸ ꞋUdaꞌ Yakꞌusda ooghuni ꞌukꞌu nusgúz-i whuz unꞌa ꞌuhóoja ndutni whe, “Dune ntsiꞌne bubulh olto.”

²⁹ Dune ꞌoh whúya ꞌoh nudilhne nóndunulꞌus ꞌinkꞌez Jesus highudloh, “Hee! Nyun lakw ꞌudini, ‘Lugliz whucho yanahootányus ꞌinkꞌez tat dzin naꞌwhutanlelh,’ dini?

³⁰ ꞋAndit ꞌahoh nanaíndaih, ꞌinkꞌez ꞌududílyih,” huyúlhni.

³¹ Whuz unꞌa za Lizwif lubret bumoodihne ꞌinkꞌez Moses be ꞌudustlꞌus ꞌukꞌu nunáguzne cha, Jesus highudloh ꞌinkꞌez njan dúlhodutni, “ꞋUyoonne ilhyiz, ꞌet hoontsꞌi didutchꞌoh ꞌandit ꞌududoolyih ꞌaítꞌoh.

³² ꞋAndit Christ, Lizwif bulerwe tsꞌunoolhꞌen nanaóojaꞌ, ꞌet la neba ꞌalhaꞌ hotꞌeꞌ.” Nane hizih tulalhgus kꞌut sulhtíne, ꞌenne hoontsꞌi highudloh.

Jesus dazsai

³³ Dzetniz ꞌet whutsꞌun nꞌun whe 3:00 atꞌen ꞌuhúnitꞌoh keyoh ndulcho whe tsalhgus naki.

³⁴ Whulh ꞌilho hooloh sadzi ookꞌoh ꞌuhoonistꞌoh, ꞌet Jesus tube cho haínzul whe, dughuni kꞌunꞌa ꞌutni, “Eloi, Eloi, lama sabachthani,” “SYakꞌusda, sYakꞌusda, di ha sla dantni?” ni whe ꞌutni.

³⁵ ꞋEt whulohne dune ꞌet núdilhyane hidántsꞌo, ꞌinkꞌez ꞌuhutni, “Hadih Elijah ka huyih.”

³⁶ ꞋIlhoghun whusálgai, ꞌinkꞌez duchun ooláꞌdulꞌoo-i tsꞌekoo tooꞌ duninkꞌoz-i ye tunayuzsi, ꞌinkꞌez ndo Jesus yuza bé yunintan, ꞌinkꞌez ꞌutni, “Kꞌat Elijah whusaínya ꞌinkꞌez tilah tulalhgus kꞌut nanáyoolhtelh.”

³⁷ ꞋEt Jesus tube cho haínzul ꞌinkꞌez ꞌudekꞌez ha naji.

³⁸ Lizwif bulugliz whucho chunkelh diztiꞌ-i ooꞌih yanintꞌi, ꞌi cha soo lhóohoolcho yo únꞌa lhtsꞌenchꞌul.

³⁹ Lhuganne moodih tulalhgus yubut usyin. Jesus ntsꞌenꞌa haínzul, ꞌinkꞌez dazsai ꞌet yunalhꞌen. “Ndun dune ꞌalhaꞌ ꞌazi Yakꞌusda ooYeꞌ ꞌuntꞌoh,” ni.

⁴⁰ Tsꞌekoo cha ꞌet núdilhya yoo ꞌaz de whutsꞌun huwhunilhꞌen. Butoh Mary Magdalene, ꞌinkꞌez Mary Jamesyaz, ꞌinkꞌez Joses bulh buloo, ꞌinkꞌez Salome cha.

⁴¹ ꞋEnne Jesus Galilee ꞌutꞌen whe hiyunúnizdil ꞌinkꞌez hila ꞌítꞌen. ꞋUyoonne tsꞌekoo lhane cha ꞌet ꞌuhutꞌen. Jerusalem tsꞌe heyuha nándil.

Joseph Jesus ꞌayalhti

^42-43 ꞋEt ꞌawet hulhgha suliꞌ whe Joseph Arimathea whutꞌen-un whusaínya. ꞋEn nahíyilhne toh booziꞌ unzoo-un ꞌuntꞌoh. ꞋOh de Yakꞌusda ookꞌúneꞌ whutꞌen-un, ꞌet hukwa itísꞌen. ꞋEt dzin natsꞌulyis dzin huba lhahúdutneh-un ꞌóohoontꞌoh. Joseph oodzi hooni whe Pilate yubut nenínya, ꞌinkꞌez Jesus oozi yutsꞌu yúkaꞌ daniꞌ.

⁴⁴ ꞋEt Pilate ooba hooncha Jesus ꞌudaꞌ dazsai. Lhugan moodih, ꞌen yukaꞌ daniꞌ ꞌinkꞌez ꞌuyulhni, “Jesus ꞌudaꞌ tilah dazsai?”

⁴⁵ ꞋEt hukwꞌelhꞌaz lhugánne moodih, “ꞋAlhaꞌ dazsai,” ni. ꞋEt Pilate Joseph ꞌulhni, “Jesus oozi nayólhchoot,” yúlhni.

⁴⁶ Joseph naih diztiꞌ-i ꞌonket, ꞌinkꞌez yuzih nanáyalhti, ꞌinkꞌez nyoo naih diztiꞌ-i yughá yozduz. ꞋInkꞌez tseꞌan whuz ꞌayalhti, ꞌinkꞌez tse cho whudunaídanꞌai.

⁴⁷ Mary Magdalene ꞌinkꞌez Mary Joses ooloo bulh bunalh, Jesus ꞌet nehínilhti.