Mark 14 - Yak'usda Ooghuni

Jesus yoo yo whútsul hikunúta hituzilhghelh ha

¹ Nat dzin whuzꞌai Lizwifne butus lhuseya-un whewhúnahulni ꞌinkꞌez lhes lhuntíldoh-i ꞌutꞌalh-un, whe whúnahulnih cha, ꞌet lubret moodihne ꞌinkꞌez Moses be ꞌudustlꞌus ꞌukꞌu nunáguzne, Jesus yoo yoh whútsul hikunúta hituzilhghelh ha.

² ꞋEt ꞌuhutni, “Butus lhuséya-un, ꞌet whutoh iloh ꞌutsꞌooleh doo ka la dunene lhtahohótꞌalh.”

Bethany ꞌet tsꞌeke Jesus kꞌunutsꞌútjul yutsi kꞌeyilhdzo

³ ꞋIlhoghun keyoh wheyaz Bethany, ꞌet Simon ooka whulhjut ínleꞌ-un, leprosy huyúlhni, ooyoh Jesus yuzih usda. Naꞌutꞌalh whe tsꞌeke kꞌunútsútjul díztiꞌ-i tse bé ha hoogaz-i be súlhdzo ꞌinkꞌez oodéꞌ duldze yiꞌalh whe danínya. Yayányuz ꞌinkꞌez kꞌunutsꞌútjul ꞌi Jesus yutsi kꞌeyilhdzo.

⁴ Whulohne dune hukwaꞌ honílchꞌe ꞌinkꞌez ꞌulhodútni, “Di ha kꞌunutsꞌútjul ꞌantsꞌet nintaꞌyulhꞌih.

⁵ Diztiꞌ whe daꞌ be ꞌóket ꞌinkꞌez sooniya telꞌenne gha húyodzaih,” ꞌinkꞌez tsꞌeke tube cho hichꞌaz yálhduk.

⁶ ꞋEt Jesus ubúlhni, “Ootsꞌá ha lhozahꞌai! Di ha teduhle? ꞋUtꞌen unzóo-i sba ꞌinla whe ꞌuntꞌoh.

⁷ ꞋAhoolhyiz telꞌenne nohnat whutáleh. Hukwáꞌ nahzun totsuk bula tihtelh. ꞋEt si ꞌahoolhyiz nohbulh lhéꞌtuzistꞌel.

⁸ Kꞌunutsꞌútjul-i syustꞌe yukꞌé yilhdzo ꞌadutistelh wheni lhasúdinla. Ndun tsꞌeke ꞌaw ꞌon ꞌun ooneh ꞌaitꞌoh-un, ꞌet ꞌuhóonla whe ꞌuntꞌoh.

⁹ ꞋAlhaꞌ nohdusni ndi yun kꞌut ndulcho whe ndi khuni unzoo-i nudútikat, ndun tsꞌeke ꞌuhoonla-un, ꞌet hukwꞌu naootitnuk ꞌet whe dune yunatilnih.”

Judas Jesus be ꞌóotakulh-un lhaoodinla

¹⁰ Whunizyane ꞌon ꞌat nane yugha hodulꞌehne, ꞌilhoghun Judas Iscariot huyúlhni-un, ꞌen Lizwif bulubret bumoodih butsꞌú whinya Jesus butlꞌa ítilhtelh ha.

¹¹ Dája ubúlhni-un huhóontꞌiꞌ ꞌinkꞌez sooniya hitsꞌóozi. Judas Jesus yeꞌ óotakulh-un, ꞌet hukwa itísꞌen.

Jesus ꞌen yugha hodulꞌehne butus lhuséya-un bubulh naꞌutꞌalh

¹² ꞋEt ꞌudechoo dzin lhes lhuntíldoh-i nahutꞌúlh-un, ꞌet dzin ꞌusbaiyaz naꞌhititꞌulh-i naihizulghih, Lizwifne butus lhuséya-un huba ꞌuntꞌoh. ꞋEt Jesus yugha hodulꞌehne ꞌuhuyúlhni, “Ntsꞌe netalhꞌalh natantꞌulh-i, ꞌi mba lházdutileh?”

¹³ ꞋEt Jesus nane, whébalhꞌaꞌ ꞌinkꞌez ubúlhni, “Jerusalem tsꞌe ahꞌus. Dune too naꞌá-un, ꞌen nohdudóyaꞌ. Yoh tsꞌú tizya tsꞌe whuz bun toohꞌas,

¹⁴ ꞌinkꞌez yoh oochꞌeꞌ-un njan dúdohniꞌ, ‘Dune hodulhꞌéh-un njan ndutni ndet sgha hodulꞌehne bulh butus lhuséya-un huwa naꞌuztitꞌúlh-un yoh negho tálhꞌalh eh?’

¹⁵ ꞋEt dohyoh hooncha-un lháoodintꞌoh-un whunóhnoolhtun, ꞌet si naztitꞌúlh-i lhadóohleh.”

¹⁶ ꞋEt yugha hodulꞌehne Jerusalem tsꞌe whe hánꞌaz ꞌinkꞌez Jesus soo daja ubúlhni-un tsꞌiyawh whuz unꞌa nahoohóonꞌai ꞌinkꞌez butus lhuséya-un wheni lhahodinla.

¹⁷ Hulhgha Jesus whunizyane ꞌon ꞌat nane te whusahándil.

¹⁸ ꞋEt naꞌhutꞌalh whe Jesus ubúlhni, “Tsꞌihꞌun unꞌa ꞌunóhdusni ꞌilhoghun nohtoh sulh náꞌutꞌalh-un seꞌóotakulh.”

¹⁹ ꞋEt yugha hodulꞌehne budzi únduda suliꞌ ꞌilhoghun hinli whe huyoodulhkut, “Si eh ꞌusudíni,” huyúlhni. ꞋUyoon cha ndutni, “Si eh ꞌusudíni?”

²⁰ ꞋEt Jesus ubúlhni, “Whunizyane ꞌon ꞌat nane njan netoh dules sulh tunayuzꞌai-un ꞌutinelh.

²¹ Yakꞌusda ooghuni ꞌukꞌu nusgúz-i ꞌet ndutni, ‘Yinka Dune Yeꞌ, ꞌen datítsah. ꞋEt ye ónket-un, dalcho-i be ooba wheóonujut tileh.’ Ndun dune ꞌaw lhuhóolel de, ꞌet daꞌ ꞌon nus sooꞌ hotꞌeꞌ ooleꞌ.”

Jesus ꞌudekꞌez naꞌutꞌalh

²² ꞋEt naꞌhutꞌalh whe Jesus lhes yílhchoot yuba tenadidli ꞌinkꞌez lhtsꞌe danyuz. Yugha hodulꞌehne bugha íninla ꞌinkꞌez ubúlhni, “Ndi ulhchoot, ꞌinkꞌez ꞌahꞌálh. Ndi syustꞌe ꞌuntꞌoh.”

²³ ꞋEt lubot yílhchoot, ꞌinkꞌez duBá “Músi,” yúlhni. Butlꞌa yánkai ꞌinkꞌez tsꞌiyawh huyitnaiꞌ.

²⁴ ꞋInkꞌez ubúlhni, “Ndi ꞌi suzkaiꞌ ꞌuntꞌoh. Lhane buba nadútiltꞌih ꞌinkꞌez ꞌi gha ꞌandit nohtsꞌu nahizúsya.

²⁵ Tsꞌihꞌun unꞌa nohdúsni, ndi tsꞌekoo tooꞌ ꞌaw doo cha za oosnaiꞌ ꞌaitꞌoh ndet dzin ꞌuyoo ꞌandidi-i tsꞌekoo tooꞌ tisnelh de, Yakꞌusda ookꞌúneꞌ hutitꞌen ꞌet whutsꞌun.”

²⁶ ꞋEt Yakꞌusda ooyun be híjun ꞌinkꞌez ndo shus kꞌuz Olive be hóodzi whuz whe hándil.

Jesus Peter ꞌulhni, “Tꞌesunuzínzun dutanelh”

²⁷ ꞋInkꞌez Jesus ubúlhni, “ꞋAndit ꞌulhdzis nohni tsꞌiyawh ska yátilhleh, ꞌinkꞌez ninta tilhwus, ndi Yakꞌusda ooghuni ndutni, ‘ꞋEt huwa Yakꞌusda ꞌen ꞌusbai ghunlí-un ootꞌaitasnalh ꞌinkꞌez ndi ꞌusbai tsꞌiyawh yaitálhꞌus.’

²⁸ ꞋEt dunadusja hukwꞌelhꞌaz de, yun kꞌut Galilee tsꞌe nohtso tisyalh.”

²⁹ Peter uyúlhni, “Tsꞌiyanne nkayá tileh, ꞌet hoontsꞌi ꞌaw si íloh!”

³⁰ ꞋEt Jesus uyúlhni, “Peter, ꞌandit ꞌulhdzis lugok dune nat ꞌudutinelh whutso, tat ꞌet tꞌesunuzínzun dutanelh.”

³¹ ꞋEt Peter soo khuni ulhtus-i be ndutni, “Nyulh datísah hoontsꞌi ꞌaw tꞌenyunuzúszun doosniꞌ ꞌaitꞌoh.” ꞋOnghunne yugha hodulꞌehne tsꞌiyawh whuz unꞌa nduhútni.

Jesus Gethsemane ꞌet tenadudli

³² ꞋEt ꞌilhoghun ha níyeh kꞌet Gethsemane huwhútni tsꞌe whe hándil ꞌinkꞌez Jesus yugha hodulꞌehne ubúlhni, “Njan dulhtsꞌi. Si nꞌun tenadutisdli.”

³³ ꞋEt Peter James ꞌinkꞌez John te ꞌon ꞌun bubulh whe nꞌaz. ꞋEt ꞌawet tsꞌodi be tewhéndunilne

³⁴ ꞌinkꞌez ꞌubulhni, “Szul tube tsꞌodi suliꞌ kꞌet ꞌawet datisah le ꞌustꞌoh. Njan dúlhtsꞌi ꞌinkꞌez howahli.”

³⁵ ꞋEt ꞌon ꞌunyaz whenya ꞌinkꞌez nachánitno. ꞋEt tenadudli whe ndutni, “ꞋUBá njan whusawhútiltsꞌulh-un, whuz unꞌa ꞌuhoontꞌoh de, ꞌet whute senghóltsꞌit.

³⁶ ꞋUBá, nyun za tsꞌiyantsuk nkꞌúneꞌ whutꞌen. Ndi dzoh nutiszut-un sba hooloh nahoolhtsi, ꞌet hoontsꞌi si hukwaꞌ nuszun íloh, nyun hukwaꞌ ninzun hukwꞌunꞌa ꞌet ꞌuhóneh.”

³⁷ ꞋEt nyoonne yugha hodulꞌehne nahunistez whe bughu nanja ꞌinkꞌez Peter ꞌulhni, “Simon nanínti whe ꞌintꞌoh. ꞋAw eh ꞌatsulyaz honih ꞌaitꞌoh?”

³⁸ ꞋInkꞌez ꞌúbulhni, “Howahli tankꞌus-un tihtꞌi whuchꞌa tenadoohdli. Nohyughi be tihzooꞌ hukwaꞌ nahzun, ꞌet hoontsꞌi nohyustꞌe tetsun whe ꞌuntꞌoh.”

³⁹ ꞋEt doo cha ꞌon ꞌun whe naja ꞌinkꞌez whutsodaꞌ tenadidli whuz unꞌa za tenadidli.

⁴⁰ Doo cha za yugha hodulꞌehne nahunistez whe bughu nanja ꞌaw huhoonih ꞌaitꞌoh ꞌinkꞌez ꞌaw whéꞌ hidoniꞌ hooyoh.

⁴¹ Whulh tat-un bughu nanja ꞌet ubúlhni, “Whute sahtez ꞌinkꞌez nalhyis. ꞋAwet whusahóoltsꞌut, soo cho whunulhꞌen, Yinka Dune Yeꞌ, ꞌen dune ntsiꞌne butlꞌa hítilhtelh.

⁴² Dunadahdilh uztoodilh, nulhꞌen dune seꞌóotakulh-un, ꞌawet ꞌoh whuya uyalh.”

Jesus ꞌawet huyílhchoot

⁴³ ꞋAhoh ꞌawhuz Jesus yalhduk whe Judas whusaínya. Judas ꞌen whunizyane ꞌon ꞌat nane whelꞌaꞌne, ꞌilhoghun ꞌuntꞌoh. Dzoh saꞌ inleꞌ Lizwif lubret bumoodihne, Moses be ꞌudustlꞌus ꞌukꞌu nunáguzne cha, ꞌinkꞌez dune tso whudilhdzulhne cha, ꞌudaꞌ butsꞌú nuséya, ꞌinkꞌez Jesus ye bútsꞌeꞌonket. Judas butsꞌó whenáhiyalhꞌaꞌ, ꞌinkꞌez dune lhane yulh údulh saluzti ꞌinkꞌez tutꞌoh cha hilelh whe whusahándil.

⁴⁴ Hídulh whe Judas ubúlhni, “ꞋIlhoghun dune oonimbus kꞌut nadistsꞌoos, ꞌen olhchoot ꞌinkꞌez oogha óohli whe tóolhteꞌ.”

⁴⁵ ꞋEt ꞌahoh Judas Jesus yughu ninya ibulh uyúlhni, “Hadih, Rabbi,” ꞌinkꞌez naiditsꞌooz.

⁴⁶ ꞋEt ꞌawet Jesus huyílhchoot ꞌinkꞌez huyoontun.

⁴⁷ ꞋInkꞌez ꞌilhoghun Jesus zih usyin-un saluzti ha yálhtsus ꞌinkꞌez Lizwif lubret ꞌukꞌénus díztiꞌ-un be ꞌulhna-un yudzo kꞌuz habeꞌ yalhtꞌo.

⁴⁸ ꞋEt Jesus yatilhduk ꞌinkꞌez ubúlhni, “ꞋEt di ha saluzti ꞌinkꞌez tutꞌoh cha nuhle ꞌinkꞌez ꞌundunustꞌih hukwꞌunꞌa ska tíhdil?

⁴⁹ Dzin totsuk nohbulh ꞌústꞌoh ꞌinkꞌez lugliz whucho whunohodusꞌeh, ꞌet di ha ꞌoh daꞌ sulhúlhchulh inleꞌ. ꞋEt hoontsꞌi Yakꞌusda ooghuni dája ni whuz unꞌa ꞌohóneh hubaꞌ hoontꞌoh.”

⁵⁰ ꞋEt tsꞌiyawh yugha hodulꞌehne hichꞌa sudil ꞌinkꞌez whe hilghaz.

⁵¹ ꞋIlhoghun chilh naih tsꞌutꞌan-i za khaóosduz, ꞌen Jesus uniyalh. Ndun chilh ꞌuyoonne chilke huyílhchoot.

⁵² ꞋUstꞌet bula kꞌéhalgai whe naih za bula kꞌeyáno.

Jesus nahiyílhne bubut nenínya

⁵³ ꞋEt Jesus huyílhchoot ꞌinkꞌez Lizwif lubret ꞌukꞌenus díztiꞌ-un ooyoh tsꞌe whe húyalhti. ꞋEt Lizwif lubret bumoodihne, dune tso whudilhdzulhne cha, Moses be ꞌudustlꞌus ꞌukꞌu nunáguzne cha ꞌilhuhozdil.

⁵⁴ Peter niz de Jesus bubuniyalh. Lizwif lubret ꞌukꞌenus díztiꞌ-un ooyoh ꞌet whunaꞌnistlꞌóo-un whuz bughu danínya. ꞋEt howunline buzih natlꞌa didaꞌ ꞌinkꞌez naldzilh.

⁵⁵ Lizwif lubret bumoodihne ꞌinkꞌez nahíyilhne cha bubut Jesus néhinilhti hukwá hituzilhghelh-un highu nahóꞌalh hukwaꞌ hutꞌen, dune yuchꞌaz yaoolhdukne nahólhtelh hukwaꞌ hutꞌen, ꞌet hoontsꞌi ꞌaw ꞌilhoghun nalhihilhtel.

⁵⁶ Lhane dune huwhutsꞌit whe hichꞌaz yálhduk, ꞌet hoontsꞌi tsꞌiyawh lhelhtsꞌun unꞌa ꞌuhutni.

⁵⁷ Whulohne dune dodindil ꞌinkꞌez Jesus hiba whutsꞌit whe njan duhútni,

⁵⁸ “Njan dutni whe nenalh ꞌútni, ‘Njan lugliz whucho dune ꞌuhóonla-un, ꞌet nanaóoduntisyus ꞌinkꞌez tat dzin inleꞌ de, ꞌaw dune whutꞌálhanal whe ꞌudun naꞌwhutisdlelh.’”

⁵⁹ ꞋEt hoontsꞌi ꞌaw tsꞌihꞌun lhgha ꞌúhudooniꞌ ꞌaítꞌoh.

⁶⁰ ꞋEt lizwif bulubret ꞌukꞌenus díztiꞌ-un butoh dudinya ꞌinkꞌez Jesus ꞌulhni, “Dune nchꞌaz yáhulhduk daja datanelh?”

⁶¹ ꞋEt hoontsꞌi Jesus tꞌedusni ꞌinkꞌez ꞌaw yalhtílhdih. ꞋEt doo cha za lubret yoodulhkut, “Nyun eh Christ ꞌintꞌoh? Yakꞌusda díztiꞌ-un ooYeꞌ inli?”

⁶² Jesus uyúlhni, “A, ꞌen ꞌustꞌoh, ꞌinkꞌez nohni tsꞌiyawh si, Yinka Dune Yeꞌ, huyuntilhꞌelh Yakꞌusda ooghu nailhni tsꞌunkꞌus usda whe ndus de kwꞌus toh ha nátidalh.”

⁶³ ꞋEt nyoon lubret tube hunílchꞌe kꞌet dunaih lhtsꞌe yalhchꞌul ꞌinkꞌez njan ndutni, “ꞋAw ꞌon ꞌun ꞌuyoonne tsꞌoodolhkut ꞌaítꞌoh.

⁶⁴ Ndi ooghuni Yakꞌusda yechꞌaz yálhduk-i dahtsꞌo! Nohba dáhoontꞌoh?” ꞋEt tsꞌiyawh ꞌúhutni, “Daóotsa hubaꞌ ꞌuntꞌoh.”

⁶⁵ ꞋEt whulohne highá whenduninzo, hinakꞌenáꞌuzguz ꞌinkꞌez hiyoochis, “Nus dawhutanelh, nedini?” huyúlhni. ꞋEt salda ghunline ꞌinkꞌez huyoonankat.

Peter ꞌutni, “Jesus ꞌaw tꞌenuzúszun”

⁶⁶ ꞋEt ꞌawhuz Peter ꞌon yo nanistlꞌoo bet ꞌutꞌen whe Lizwif bulubret ꞌukꞌenus díztiꞌ-un tsꞌekeyaz yuba ꞌutꞌen-un, ꞌoh whuya uyalh.

⁶⁷ Peter naldzilh yutilhꞌen ꞌinkꞌez uyúlhni, “Nyun cha Jesus Nazareth whutꞌen-un bulh ꞌíntꞌen inleꞌ.”

⁶⁸ ꞋEt Peter ꞌutni, “Tilah, ndet ꞌuwhudíni ꞌaw tꞌéoonuzúszun,” ꞌinkꞌez ꞌaz whenya. ꞋEt ꞌahoh lugok dune ꞌudíja.

⁶⁹ ꞋEt tsꞌekeyaz doo cha ꞌet yanꞌen nyoonne ꞌoh nudilhyanne ubúlhni, “Nyoon ꞌen cha ꞌilhoghun ꞌuntꞌoh.”

⁷⁰ Peter doo cha “ꞋAwundooh!” ni. ꞋEt ꞌatsulyaz inleꞌ nyoonne ꞌoh nudilhyanne doo cha za Peter ꞌet nduhúyulhni, “ꞋAlhaꞌ nyun cha ꞌilhoghun ꞌintꞌoh. Nyun cha Galilee hoontꞌen whe ꞌintꞌoh whuz unꞌa yailhduk ꞌet huwa.”

⁷¹ ꞋEt Peter ꞌutni, “Ndughi nalh, ꞌalhaꞌ dusni wheꞌ dusni, ndun dune ꞌudáhni-un, ꞌaw tꞌenuzuszun!”

⁷² ꞋEt lugok dune whulh nat ꞌudija. Peter ꞌet Jesus dája yulhni la whunalni, “Lugok dune nat ꞌudutinelh whutso tat tꞌesunuzínzun dutanelh.” ꞋEt huwu nuninuzut ꞌinkꞌez intse.