Mark 13 - Yak'usda Ooghuni

Njan Lizwif bulugliz whucho gak whutáleh-un, ꞌet Jesus huwu yalhduk

¹ ꞋEt Jesus Lizwif bulugliz whucho ꞌaz nadalh whe ꞌilhoghun yugha hodulꞌeh-un uyúlhni, “Nehodulhꞌeh-un whunilhꞌen, njan lugliz whucho ꞌinkꞌez tse cha lhéꞌuldzooꞌ ꞌi be ꞌuhóolya.”

² ꞋEt Jesus ꞌutni, “Njan yoh whucho whuzꞌai whunilhꞌen eh? ꞋAw ꞌilho tse hoontsꞌi lhkꞌulhdutásꞌal tsꞌiyawh nadúntijulh wheꞌ hoontꞌoh.”

Dune ye túzilalh ꞌinkꞌez dzoh núzut bulh huwun ubulh yátilhduk

³ ꞋEt Lizwif bulugliz whucho whanchꞌaz shus Olive, ꞌi kꞌut, ꞌet Jesus usda. Peter, James, John, ꞌinkꞌez Andrew te disoh Jesus huyoodulhkut.

⁴ “Nedíni nkede ꞌuwhutánelh? ꞋInkꞌez nedíni ndet huwa tꞌetsꞌontázin daóotanelh whe ꞌet neóotaltsꞌulh?”

⁵ Jesus ubúlhni, “Huwuhli dune nanohnooꞌah junih.

⁶ Lhane dune whusahúdulh ꞌinkꞌez sooziꞌ gha ꞌuhudutinelh, ‘Christ ꞌustꞌoh!’ ꞋEt nduhutni whe dune lhane nahuntiꞌah.

⁷ ꞋEt hoontsꞌi nohgha ꞌóojas junih. Nilhdukw dune lhutigan whulh ꞌudahtsꞌo de, ꞌinkꞌez nilhdzaꞌ lhuhugan whulh ꞌúdahtsꞌo de, ꞌet ndo honeh hubaꞌ hoontꞌoh. ꞋEt hoontsꞌi ꞌawhuz whula toh iloh, ꞌawhuz ꞌudun cha whusawhútikulh.

⁸ Lhelhtsꞌun keyoh whutꞌenne, lhchꞌaz nehúdutadulh, ꞌinkꞌez lhelhtsꞌun lerwe be ꞌustlénne cha lhchꞌaz nehúdutadulh. Lhelhdun yun cha nuhútitnah, dai cha whutáleh ꞌinkꞌez dune dzoh nulhotildeh. ꞋEt nduwhútꞌen suliꞌ te, tꞌewhuntáhzin ꞌon nus hooncha tuneꞌ whutitꞌen. ꞋEt dzoh nutideh-un ꞌawet wheꞌ whutꞌen.

⁹ Nohnihchꞌoh huwohleꞌ. Keyoh huwunline but nenóhotalelh ꞌinkꞌez lugliz nohoohootalhtꞌoh. ꞋEt si sgha moodihne ꞌinkꞌez lerwene cha bubut nenóhotalelh. ꞋEt Si sghu tꞌewhunoozeh.

¹⁰ ꞋInkꞌez ꞌudechoo ndi yun kꞌut ndulcho whe dune tsꞌiyawh khuni unzoo-i ghun bubulh yatiduk.

¹¹ ꞋAnóhuhanꞌai ꞌinkꞌez nahiyílh-un but nenóhnilhti de dája dutihnelh-un huwu ni oohleꞌ junih ꞌinkꞌez nohdzi dóghel. ꞋEt neóoninzut te, nohza dánkat, ꞌi be la yaoolhduk. Ndoni ꞌi yatilhduk ꞌaw nohni iloh ꞌudutihnelh.

¹² Dune dulhutsinke dahútitsah-un huwá botalelh. Bubáke cha, duduzke ꞌet ndúbotilhꞌelh, ꞌinkꞌez tsꞌoodunne cha, dudusne buchꞌaz náhulhya ꞌinkꞌez dahátitsah-un huwá botalelh.

¹³ Si sunihdulh huwa tsꞌiyanne nohtsꞌo dutitni. ꞋEt hoontsꞌi ꞌudekꞌez whutsꞌun whulh nudalyaꞌne za hudutijih.”

ꞋUkꞌenus Be whéwhunujut-un

¹⁴ “ꞋInka ꞌukꞌenus bé whunujut-un, ꞌaw ooba lheꞌhóotꞌoh-un, naꞌwhuditꞌen de, (Ndi yukꞌú yalhdúkne soo cho noheni taóodoltsꞌit. Daniel, Yakꞌusda be nus hóoꞌen-un, ꞌudaꞌ húwu yailhduk ínleꞌ). Judea dilhtsꞌine shus kꞌuz tsꞌe tse hutoolhdilh.

¹⁵ Dune duyoh bun kꞌut usda de, ꞌaw duyoh tsꞌe nunátidalh ꞌinkꞌez duchꞌeꞌ yutilelh-i nayitálhchulh ꞌet hoontsꞌi ooneh ꞌaitꞌoh.

¹⁶ ꞋInkꞌez dune ha níyeh kꞌet ꞌutꞌen-un cha yoh tsꞌe duluglok hunaóodaꞌ ꞌaitꞌoh.

¹⁷ ꞋEt tsꞌekoo, yazba ꞌuntꞌohne, ꞌinkꞌez duzkeh eꞌulhtꞌúkwne cha, tube buba hoontsiꞌ tileh.

¹⁸ ꞋInkꞌez ténadoohdli khit nohbeꞌ honeh whuchꞌa.

¹⁹ ꞋEt Yakꞌusda yun ꞌinla ꞌet dzin whutsꞌun ꞌaw lheꞌwhúsne ꞌinkꞌez ꞌet ꞌulcho ꞌi be whutsodaꞌ hiye dzoh nulhuzut-i, ꞌi be dzoh notideh.

²⁰ ꞋEt hoontsꞌi neMoodihti ꞌoh dzin kꞌoh náꞌhoonla. ꞋEt ndúlhinel de, ꞌaw ꞌilhoghun hoontsꞌi doojih ꞌaitꞌoh. ꞋUtahábanlane, bughaꞌ hoonla hoondukw whulhtsꞌih.

²¹ ꞋOh de dune ndunóhohutni de, ‘Nulhꞌen Christ njan usda!’ Kꞌus, ‘Ngut usda!’ nohoútni de, nohba ꞌalhaꞌ ꞌuhudooniꞌ junih.

²² ꞋEt Christ naꞌdudilꞌíne, ꞌinkꞌez nus hóoꞌenne naꞌdudilꞌíne cha, lhat te huwa ꞌítꞌen ꞌinkꞌez hooncha túneꞌ hutitꞌen Yakꞌusda ꞌutáhabanlane, ꞌenne hoontsꞌi nahunooꞌa hukwaꞌ hutitꞌelh.

²³ ꞋAhoolhyiz hóohli! Tsꞌiyantsuk whutsodaꞌ nohdásniꞌ.”

Yinka Dune Yeꞌ whusatíyalh-un

²⁴ “ꞋEt ꞌoh de dune dzoh nuhuzde, hukwꞌelhꞌaz sa dulhgus tileh, ꞌinkꞌez ꞌulhdzis oozaꞌ cha ꞌaw be lhoohoostꞌen tileh.

²⁵ Sum cha nántikulh ꞌinkꞌez yat be hóolhtus-i, ꞌi be nuhótitnah.

²⁶ ꞋEt de Yinka Dune Yeꞌ, kwꞌus toh bé whunujut ye ulhtus-i bulh ꞌinkꞌez Yakꞌusda ootsꞌu ha yánduz-i be hóodutaltsilh.

²⁷ ꞋInkꞌez dulizas whusabutilhꞌalh nus de, nꞌaz de, nooz de, ꞌinkꞌez ndaz de, yun kꞌut ndulcho whe ꞌinkꞌez Yakꞌusda ꞌutahábanlane ꞌilhúbuhootálelh ꞌet wheni.”

Mai cho chun, oomaiꞌ fig huyulhni-i, oogha whútsꞌodulꞌeh

²⁸ “Mai, fig huyulhni, ooduchun, ꞌi be nawhutnuk be whutsꞌodulꞌeh-i, tsꞌihꞌun unꞌa bodulhꞌeh. Ndi ꞌi ꞌuntꞌoh, oozischum ulughih te, ꞌet ꞌawet ootꞌan whulih, ꞌi gha tꞌewhunáhzun ꞌawet shin nilhdukw suliꞌ.

²⁹ ꞋEt nohni cha whunulhꞌen de, néꞌwhutitꞌen-un whunulhꞌen de, ꞌet la whuz unꞌa tꞌeoonóhzin ꞌawet nilhdukw, datih whuzih ꞌuhoontꞌoh.

³⁰ Tsꞌihꞌun unꞌa nohdusni, ꞌandit whudizulhne ꞌaw yalhihitásdla, ꞌet ndó tanelh-un tsꞌiyawh lhawhúdutanelh, ꞌet whutsꞌun.

³¹ Yat ꞌinkꞌez ndi yun kꞌut cha gak whutaleh. ꞋEt hoontsꞌi sghuni ꞌaw gak lhtisdleh.”

³² “ꞋEt ꞌaw dune tꞌeoonúszun ndet dzin kꞌus ntsꞌowhuya ꞌuhunitꞌoh-un whusaóotiltsꞌulh. ꞋAw lizas yakꞌuz dilhtsꞌíne kꞌus Yakꞌusda ooYeꞌ cha tꞌehonúszun, ꞌuBá dichꞌoh za tꞌeoonínzun.

³³ ꞋAhoolhyiz huwahli ꞌinkꞌez tenadahdli. ꞋAw tꞌeoonuzúhzun ntsꞌoh de whusaóotiltsꞌulh.

³⁴ ꞋEt dune nilhdzaꞌ keyoh tsꞌe whinya leꞌ leꞌ hoontꞌoh, ꞌinkꞌez yuba ꞌutꞌénne ꞌet nébuninla ꞌilhone hinli whe dude ꞌutꞌen ꞌuhoolhꞌen ha, ꞌinkꞌez ꞌet dati ghunli-un uyúlhni, ‘Soo cho huwonleꞌ!’

³⁵ ꞋEt whuz unꞌa nohdúsni, huwahli! ꞋEt ntsꞌoh de yoh humoodih whusanátidalh ꞌaw tꞌéoonuzúhzun, hulhgha tilah, tuzniz tilah, yukaih tsꞌun tilah, kꞌus sa haínꞌai de tilah, kꞌus bundadaꞌ tilah.

³⁶ Kꞌus ꞌaw hukwaꞌ tse lhúwhuhlih ꞌinkꞌez naníhtez de, nohche tilah nohmoodih nohghu naoojaꞌ.

³⁷ ꞋInkꞌez daja nohdúsni-un, ꞌet tsꞌiyanne cha budúsni, huwahli!”