Mark 11 - Yak'usda Ooghuni

Whuníni whe Jerusalem ninya

¹ ꞋAwet Jerusalem whénghun hidulh whe nat-un keyoh Bethphage ꞌinkꞌez Bethany whulh ꞌet shus Olive be hóodzi-un, whuz nehúnindil. Jesus nane yugha hodulꞌehne whébalhꞌaꞌ whe ubúlhni,

² “Keyoh whuyaz nohanchꞌaz whuzꞌai-un whuz ahꞌus. Whuz oozahꞌaz, yeztliyaz, donkey huyúlhni, whutso dune yakꞌulhídoh-i, ꞌet whédintꞌi, kꞌunahꞌuk ꞌinkꞌez diz ꞌulhdlooh.

³ Dune, ‘Di ha ꞌet ndahtꞌen?’ nohúlhni de, ‘NeMoodihti yukaꞌ ninzun’ doohniꞌ. ꞋAhoh nohtlꞌa yoolhtelh.”

⁴ ꞋEt whe hánꞌaz ꞌinkꞌez keyoh ꞌet yeztliyaz nahuyilhti ꞌilhoghun yoh dati whédintꞌi, ꞌi kꞌunáhúyanꞌuk.

⁵ ꞋEt núdilhne hubuhoodulhkut, “Dahtꞌen whe ꞌahtꞌen yeztliyaz kꞌunahꞌuk?” hubuhútni.

⁶ Jesus buba náhizyeꞌ kꞌunꞌa ꞌubuhútni ꞌet tꞌehudínel ꞌinkꞌez bula huditni.

⁷ ꞋEt Jesus yeztliyaz highu hinílhti whe whulohne duluglok hiba hikꞌélhbal ꞌinkꞌez Jesus yukꞌétlꞌa didaꞌ.

⁸ Lhane duluglok ti ꞌet hinulhbulh. Whulohne cha ꞌul kꞌus ꞌutꞌan kꞌunuhídutꞌas-i, ti nahídulhdilh.

⁹ Dune Jesus hitso ꞌudulhne ꞌinkꞌez hikꞌoh údulhne tsꞌiyawh húzulh whe ꞌuhutni, “Yakꞌusda ba whudólhtiꞌ! NeMoodihti booziꞌ gha whusaínya-un, ꞌukꞌenus hoonzoo-un ooghá whultsꞌut.

¹⁰ Netsodaꞌ David oolerwe keyoh ꞌet hoonzoo-un oogha holtsꞌit. NeMoodihti booziꞌ be whusawhútiltsꞌulh ꞌinka Yakꞌusda ba tsꞌodólhtiꞌ!”

¹¹ ꞋEt Jesus Jerusalem keyoh neninya whe Lizwif bulugliz whucho tsꞌe danínya ꞌinkꞌez ndulcho núyuzꞌen. ꞋAwet náwhendunilhghel ꞌet huwa Bethany huwhútni-un tsꞌe whunizyane ꞌon ꞌat nane yugha hodulꞌehne whuz bubulh wheínꞌaz.

Duchun mai kwaꞌ hunúlhye, ꞌi Jesus yekꞌé hanya

¹² ꞋOm bun Bethany whuchꞌa nahusdil whe Jesus ooyeꞌíltsꞌul.

¹³ Nilhdzaꞌ ꞌet mai cho chun nílhꞌen ootꞌan hoonli. ꞋEt yughu nínya whe mai ntálhchulh ha. Yughu ninya whe ꞌutꞌan za ꞌuntꞌoh ꞌawhuz oomaiꞌ hooloh.

¹⁴ ꞋEt Jesus mai chun uyúlhni, “ꞋAw ꞌon ꞌat dune nyumaiꞌ hooꞌalh ꞌaítꞌoh!” ꞋEt ndutni whe yugha hodulꞌehne hidántsꞌo.

Jesus Lizwif bulugliz whucho tsꞌe tizya

¹⁵ ꞋEt Jerusalem tsꞌe hoozdil, Jesus Lizwif bulugliz whucho daninya. ꞋEꞌóoketne ꞌinkꞌez ooketne tsꞌiyawh tenábuninyoot. Sooneya lhkꞌenádudzaihne buludab cha nánenizꞌai, ꞌinkꞌez dutꞌai be óoketne cha,

¹⁶ ꞌinkꞌez ꞌaw lugliz hoonli nuhóoleꞌ hukwa lheꞌnizun.

¹⁷ ꞋInkꞌez Jesus dune whubodulhꞌeh whe ubúlhni, “Yakꞌusda be ꞌudustlꞌus kꞌut ꞌukꞌu whusguz, ‘Njan syoh tsꞌiyanne tenadudli bayoh ꞌúhoontꞌoh,’ ni. ꞋEt ꞌuwhúhla ꞌundunutꞌihne bayoh whuzúlhtsi!”

¹⁸ ꞋEt lubret moodihne ꞌinkꞌez Moses be ꞌudustlꞌus ꞌukꞌu nunáguzne hodántsꞌo whe hizoolhghelh-un hukó nuta tube huyé nilhjoot tsꞌiyanne ꞌilhozdílne hubodulhꞌeh buba hooncha ꞌet huwa.

¹⁹ Nadálhghel whe Jesus yugha hodulꞌehne bubulh Jerusalem whuchꞌa nahusdil.

Mai chun gha húhodulꞌeh

²⁰ ꞋOm bun bundadaꞌ ti hidulh whe mai cho chun hinilhꞌen. Ooghih tubulh ꞌatsꞌo disuz.

²¹ Peter whunalni whe Jesus bulh yátilhduk, “Nehodulhꞌeh-un nilhꞌen nyoo mai cho chun bulh ookwꞌehanya disuz,” yúlhni.

²² ꞋEt Jesus ubúlhni, “Njan whunaoolhnih, Yakꞌusda nohba ꞌalha ꞌootꞌeꞌ.

²³ Tsꞌihꞌun nohdusni, ndi dzulh ꞌi laꞌ dóhniꞌ, ‘Dudiltsꞌit ꞌinkꞌez yatoo kꞌut tailtsꞌit,’ nohdzi yo whe ꞌaw nawh lheꞌnahzun de, ꞌinkꞌez nohba ꞌalha ꞌuhoontꞌoh de, dawhútanelh dahni, tsꞌiyawh nohba ꞌet ndó tanelh.

²⁴ ꞋEt huwaꞌ nohdúsni, tenadahdli de, ꞌinkꞌez hoonli haꞌ dahni te ꞌalhaꞌ nahzun whe nohgha tíkulh nahzun de, ndai la ookaꞌ dahni-i nohgha tíkulh whe ꞌuntꞌoh.

²⁵ ꞋInkꞌez sahyin whe tenadahdli de, ꞌuyoonne tsꞌun nohba dzoh de buba nꞌún whutulhdilh ꞌet la nohBá, yakꞌuz úsda-un, nohni cha nohlubeshi nohba ꞌun yutoolhdilh.

²⁶ ꞋEt hoontsꞌi ꞌuyoonne buba nꞌún lhotulhdulh de, nohBá, yakꞌuz úsda-un, ꞌaw nohlubeshi nohba ꞌun yutoolhdilh ꞌaítꞌoh.”

Jesus be ꞌutꞌen kꞌoh ꞌet hukwá hoodulhkut

²⁷ ꞋEt cha za Jerusalem tsꞌe nahoosdil Jesus Lizwif bulugliz whucho nuya whe lubret moodihne, Moses be ꞌudustlꞌus ꞌukꞌu nunáguzne, ꞌinkꞌez dune tso whudilhdzulhne, Jesus highu nindil,

²⁸ ꞌinkꞌez hiyoodulhkut, “Nedini ndai gha dune ando ꞌintꞌoh whe njan ndintꞌen-un? Mbe nghá whuninꞌai whe ꞌintꞌen?”

²⁹ ꞋEt Jesus ubúlhni, “ꞋIlhoghun hukwa nohoodutaskut. ꞋEt sudáhni de, ꞌet nohdutasnelh ndai gha dune ando ꞌustꞌoh whe njan ndustꞌen.

³⁰ John dune too beꞌ ꞌulhꞌen-un mbe yutlꞌa hónꞌai whe dune too be ꞌúlhꞌen inleꞌ, Yakꞌusda tilah kꞌus dune tilah yugha óoninꞌai? Sudahni.”

³¹ ꞋEt didutchꞌoh dutoh hukwꞌu nahúhulhyeꞌ whe njan nduhútni, “‘Yakꞌusda yugha óoninꞌai,’ tsꞌutni de, ꞌet la dooniꞌ, ‘Di ha John nohba ꞌalhaꞌ lheꞌdusni?’

³² Kꞌus ‘Dune yugha óoninꞌai tsꞌutni de,’” duduneꞌne be bé hunuljut huwa, tsꞌiyawh dune tꞌehonínzun John dune too be ꞌulhꞌen-un, ꞌen Yakꞌusda be nus hooꞌen-un unli inleꞌ.

³³ ꞋEt huwa Jesus huyúlhni, “ꞋAw tꞌetsꞌonúszun.” Jesus ꞌet ubúlhni, “Si cha mbe sghá whuninꞌai-un ꞌaw nohdósniꞌ ꞌaítꞌoh.”