Mark 10 - Yak'usda Ooghuni

Dune Lhghudilhtsꞌíne lhchꞌá nahusdilh ꞌet huwun Jesus hubodulhꞌeh

¹ ꞋEt Jesus whuchꞌa nasja ꞌinkꞌez Judea ꞌoho nenínya ꞌukoh Jordan whanchꞌaz tsꞌe. ꞋEt lhane dune yugha óozdil. ꞋInkꞌez whutsodaꞌ datni la whuz unꞌa doo cha za hubodulhꞌeh.

² Whulohne Phariseene highu nindil ꞌinkꞌez huyóolhdzih whe huyoodulhkut, “Nedíni dune, bughá whuntꞌai duꞌat lahudootnih ha?”

³ ꞋEt Jesus ꞌutni, “Daja ni whe Moses khuni nohtlꞌa ídanꞌai inleꞌ?”

⁴ ꞋEt ꞌuhuyúlhni, “Moses bugha óoninꞌai dune ꞌudustlꞌus ꞌukꞌu néyuzguz-i be duꞌat duchꞌa nayólhtelh.”

⁵ ꞋEt Jesus ubúlhni, “Stabe nohdzih dutsꞌun ꞌet huwa ndi khuni Moses nohba ꞌukꞌeyánguz.

⁶ ꞋEt hoontsꞌi ꞌudechoo Yakꞌusda tsꞌiyaitsuk ꞌinla whe dune ꞌinkꞌez tsꞌeke cha ꞌubinla.

⁷ ꞋEt huwa dune dubá ꞌinkꞌez duloo bulh buchꞌa óoyaꞌ, ꞌinkꞌez duꞌat zih oodaꞌ.

⁸ ꞋEt nuhultꞌoh ꞌilho hutileh, ꞌon ꞌun whe nane lhuhíloh, ꞌilho huzliꞌ.

⁹ ꞋEt huwa mbe la Yakꞌusda lhghá buninlane, dune lhchꞌa nabohólelh junih.”

¹⁰ Yoh danáhandil whe yugha hodulꞌehne Jesus dáhoontꞌoh la doo cha hukwa huyoodulhkut.

¹¹ ꞋEt ubúlhni, “Dune mbe la duꞌat ꞌún tizno ꞌinkꞌez ꞌuyoon tsꞌeke ghu nasda de, ꞌuyoon tsꞌeke bulh nintaꞌtitꞌelh whe ꞌuntꞌoh.

¹² ꞋEt tsꞌeke duki ꞌún tizno ꞌinkꞌez ꞌuyoon dune ghu nasda de, ꞌuyoon dune bulh nintaꞌuntih.”

Jesus tsꞌoodunne bukꞌudílhni ꞌinkꞌez buba tenadudli

¹³ ꞋEt tsꞌoodunne Jesus tsꞌun ubúhoozdla bukꞌudólni ha, yugha hodulꞌehne tsꞌoodunne whusaínlane hukwaꞌ bodániꞌ.

¹⁴ ꞋEt Jesus whunalhꞌen whe whutsꞌu dutni ꞌinkꞌez yugha hodulꞌehne ubúlhni, “Whute tsꞌoodunne stsꞌó toodilh. Khun te dah budóhniꞌ junih. Yakꞌusda whe lerwe unli-un whuz dilhtsꞌine, tsꞌoodunneyaz duhúltꞌoh wheꞌ hintꞌoh.

¹⁵ Soo tsꞌihꞌun ꞌalhaꞌ nohdúsni, Yakꞌusda whulerwe unli tsꞌe, Yakꞌusda bulerwe unli-un ꞌaw tsꞌoodunneyaz kꞌunꞌa lhuhuhóolhchulh de, ꞌaw whuz dahóoyaꞌ ꞌaitꞌoh.”

¹⁶ ꞋEt tsꞌoodunne tsꞌiyawh bunasuni ꞌinkꞌez ꞌilhoghun hinli whe bukꞌudálni ꞌinkꞌez buba tenadidli.

Dune hoonzooꞌ ꞌuntꞌoh-un

¹⁷ ꞋEt Jesus ti tizya whe ꞌilhoghun dune yutsꞌu tílhgai ꞌinkꞌez yubut dugwutsi be nenínya ꞌinkꞌez yoodalhkut, “Dune hodulhꞌeh-un unzoo-un, dastꞌen whe ꞌilhiz khutisnalh-un whuchꞌa ootásdoh?”

¹⁸ ꞋEt Jesus uyúlhni, “Di ha sudíni, unzóo-un sudíni? ꞋAw ꞌilhoghun unzoo-un hooloh. Yakꞌusda ꞌen za unzoo whe ꞌuntꞌoh.

¹⁹ Khuni Yakꞌusda nohtlꞌa ídanꞌai-i tꞌeninzun: nezolhghelh junih, dune kꞌus tsꞌeke bulh nintaꞌontꞌen junih, ꞌundunontꞌih junih, hontsꞌit junih, ꞌeꞌ holhtsꞌit junih, ꞌinkꞌez mbá cha nloo cha hubudólhtiꞌ.”

²⁰ ꞋEt dune ꞌutni, “Nehodulhꞌeh-un chilh usdli whutsꞌun, ndi khuni tsꞌiyawh ookꞌúneꞌ zustꞌen.”

²¹ ꞋEt Jesus yukꞌensiꞌ whe yunalhꞌen ꞌinkꞌez uyúlhni, “ꞋIlhoghun za whuyit ꞌintꞌoh, naindalh ꞌinkꞌez ꞌintꞌi-i tsꞌiyawh be ꞌóonket ꞌinkꞌez sooniya telꞌenne gha níndzaih, tulalhgus ilhchoot ꞌinkꞌez ꞌanih, seꞌ ꞌutꞌen kꞌoh tuneꞌ óntꞌen ha sunanyalh. ꞋEt de yakꞌuz hoonzoo-un, ꞌet whuchꞌa ootálhdoh.”

²² ꞋEt dune ndi khuni yudántsꞌo whe ni suliꞌ, ꞌinkꞌez tsꞌodi unli whe natisja tube hoonzooꞌ ꞌuntꞌoh ꞌet huwa.

²³ Jesus yugha hodulꞌehne bunilhꞌen ꞌinkꞌez ꞌubulhni, “Dáhoontꞌoh huwa whúlnaꞌ whe hoonzooꞌ ꞌuntꞌohne, Yakꞌusda whe lerwe unli-un dahútidulh.”

²⁴ ꞋEt yugha hodulꞌehne ndi khuni hudántsꞌo whe buba hooncha. ꞋEt hoontsꞌi Jesus whuz hiyilh whe ndutni, “Suzkehke dahoontꞌoh la huwa whúlnaꞌ whe duzooneya ꞌi za hitꞌaz ꞌuntꞌohne Yakꞌusda whe lerwe unli-un, ꞌet dahútidulh.

²⁵ Khuna-i cho, camel huyúlhni-i, ꞌaw ꞌughabátsulh yukaóolget ꞌaitꞌoh. ꞋEt whuz unꞌa dune hoonzooꞌ ꞌuntꞌoh-un, ꞌon nus ooba huwa whúlna Yakꞌusda whe lerwe unli-un datíyalh huba.”

²⁶ ꞋEt yugha hodulꞌehne tube buba hooncha ꞌinkꞌez lhoohoodulkut, “Mbe suba doojih?”

²⁷ ꞋEt Jesus ꞌubunilhꞌen ꞌinkꞌez ubúlhni, “ꞋEt dune ba ꞌuhóneh ꞌaítꞌoh, ꞌet hoontsꞌi Yakꞌusda ba tsꞌiyantsuk huwa lhúhoonlnaꞌ wheꞌ hoontꞌoh.”

²⁸ ꞋEt Peter yatílhduk, “Whunilhꞌen, tsꞌiyaitsuk oolazditni ꞌinkꞌez nyutsꞌun tizdil.”

²⁹ ꞋEt Jesus ubúlhni, “A, tsꞌihꞌun nohdúsni, mbe la duyoh huwu tizya-un ꞌinkꞌez dulhutsinke, kꞌus dulhtuske, duloo, dubá, duꞌat, duzkehke, kꞌus duyun kꞌut te, si sgha ꞌinkꞌez khuni unzoo-i kꞌuz tsꞌiyantsuk whula ditni de, ꞌinkꞌez suntizya de, nus de ꞌon nus

³⁰ lhai ootlꞌa naítikulh: yoh ꞌinkꞌez bulhutsinke, bulhtuske, ooloo, buzkehke, ꞌinkꞌez ooyun kꞌut cha ꞌinkꞌez dune huye túzilalh cha nus de ꞌilhiz hutinalh.

³¹ ꞋEt hoontsꞌi lhane ꞌudechoo ꞌuntꞌohne ꞌudekꞌez hutileh, ꞌinkꞌez ꞌudekꞌez unline, ꞌenne ꞌudechoo hutileh.”

Jesus datitsah-un whulh tat huwu yatilhduk

³² ꞋAwet Jerusalem tsꞌu ti hidulh Jesus ꞌen yugha hodulꞌehne butso uyalh whe bugha ꞌúnjaz, ꞌinkꞌez hidulh whe hunílhjoot. ꞋEt Jesus yugha hodulꞌehne whunizyane ꞌon ꞌat nane ꞌudun nébuninla ꞌinkꞌez nus de bulh daóotanelh-un, ꞌet huwun bubulh yálhduk.

³³ “Soo zúlhtsꞌai, Jerusalem tsꞌuztidil ꞌinkꞌez Yinka Dune Yeꞌ, Lizwif lubret moodihne ꞌinkꞌez Moses be ꞌudustlꞌus ꞌukꞌu nunáguzne butlꞌa ihítilhtelh. Datítsah wheni hiba nahutiyeh ꞌinkꞌez ꞌudun yun kꞌut whutꞌenne butlꞌa ihítilhtelh.

³⁴ Highu tidloh, highu dútazoh, huyootálhtsus ꞌinkꞌez hituzilhghelh. ꞋEt tat dzin inleꞌ de, dunadutádalh,” ubúlhni.

James ꞌinkꞌez John bulh Jesus huyoodulhkut

³⁵ ꞋEt James ꞌinkꞌez John bulh Zebedee ooyeꞌke Jesus highu ninꞌaz ꞌinkꞌez huyoodulhkut, “Nehodulꞌéh-un ndai ntsꞌo ookwaꞌ tsꞌutni-i neba whutanlelh hukwa ꞌuzninzun.”

³⁶ Jesus uboodulhkut, “Ndet nohba ꞌuwhutisdlelh hukwaꞌ nahzun?”

³⁷ ꞋEt ꞌuhutni, “Yakꞌuz ꞌukꞌenus díntiꞌ tsꞌe sinda de, nzih tákelh ꞌet hukwaꞌ nítzun, ꞌilhoghun ꞌen nailhni tsꞌe ꞌinkꞌez ꞌilhoghun ꞌintlꞌus tsꞌe.”

³⁸ ꞋEt Jesus ubúlhni, “Stsꞌu hukwaꞌ dahni ꞌaw tꞌéoonuzúhzun. Lubot be tísnelh-i soo tilah oohtnaiꞌ ꞌinkꞌez be too béꞌ uzya soo tilah too beꞌ óolhneh?”

³⁹ “Soo la ꞌutsꞌooneh,” huyúlhni. ꞋEt Jesus ubúlhni, “Lubot be tisnelh-i nohni cha tíhtnelh wheꞌ ꞌuntꞌoh. ꞋInkꞌez too béꞌ uzya whuz unꞌa too béꞌ tilhnelh.

⁴⁰ ꞋEt hoontsꞌi nailhni tsꞌe sghu tidalh, ꞌinkꞌez ꞌintlꞌus tsꞌe sghu tidalh, ꞌaw si huwá hosꞌalh ꞌaitꞌoh, buba lhawhúdulyane bubaꞌ hoontꞌoh.”

⁴¹ ꞋEt ꞌon ꞌunne whunizyane yugha hodulꞌehne, James ꞌinkꞌez John bulh buba dzoh ꞌuhudija.

⁴² ꞋInka Jesus tsꞌiyawh, “ꞋAnih,” hubudániꞌ ꞌinkꞌez ubúlhni, “Tꞌeoonáhzun ꞌudun yun kꞌut whutꞌenne butoh, dune tso whudilhdzulh unlíne, ꞌenne dune bukꞌut moodih hinli. ꞋInkꞌez bumoodih unline, cha bumoodih hinli.

⁴³ ꞋEt hoontsꞌi ꞌaw whuz unꞌa iloh nohni ꞌahtꞌoh. ꞋIlhoghun nohtoh dune uncha-un tileh hukwaꞌ ninzun de, nohba neꞌútꞌen-un cha ooleꞌ whubaꞌ hoontꞌoh.

⁴⁴ ꞋInkꞌez nohtoh ꞌilhoghun ꞌudetso tileh hukwaꞌ ninzun de tsꞌiyanne eꞌulhna ooleꞌ hubaꞌ hoontꞌoh.

⁴⁵ Yinka Dune Yeꞌ, ꞌen hoontsꞌi ꞌaw ooba néꞌwhutitꞌen huba whusálhiyal. ꞋEt hoontsꞌi dune ba néꞌtitꞌen ꞌinkꞌez buba datítsah ꞌet whe tsꞌiyawh nabootakulh.”

Dune hoos̱ꞌen-un Bartimaeus huyúlhni, Jesus hooꞌen nayulhtsi

⁴⁶ Jericho tsꞌe hoozdil whe Jesus yugha hodulꞌehne tubulh nahutisdil lhane ꞌilhozdílne cha ꞌutꞌen. Dune hoos̱ꞌen-un Bartimaeus huyúlhni-un, Timaeus ooyeꞌ, ti whuzih usda datso.

⁴⁷ Jesus Nazareth whutꞌen-un ꞌóh whuya uyalh ꞌet whundantsꞌo, ꞌahoh hazulh whe ꞌutni, “Jesus David ootsꞌuhainzut-un sgha téꞌninzeh!”

⁴⁸ Lhane tꞌedoosnih huyulhni. ꞋEt hoontsꞌi ꞌon nus ꞌaldzul whe ꞌutni, “Jesus David ootsꞌuhainzut-un sgha téꞌninzeh!”

⁴⁹ Jesus lhgha nenínya ꞌinkꞌez, “ꞋAnih dúhni,” ubúlhni. ꞋEt dune hoos̱ꞌen-un hika huyih, “Hooníntꞌiꞌ ꞌinkꞌez dudinyaih, ꞌanih nyúlhni,” huyúlhni.

⁵⁰ Duluglok tsꞌahayítꞌoh, dudinya ꞌinkꞌez Jesus yutsꞌóozya.

⁵¹ Jesus yoodulhkut, “Ndet mbaꞌ whutisdlelh stsꞌu hukwaꞌ ninzun?” “Nehodulhꞌeh-un doo cha hoosꞌen naoosdleh,” yúlhni.

⁵² “Naindalh, si stsꞌun be ꞌalha ꞌuhoontꞌoh-i be soo náꞌinja,” yúlhni. ꞋEt ꞌahoh dune hooꞌen nasdliꞌ ꞌinkꞌez Jesus ti yuntizya.