Mark 1 - Yak'usda Ooghuni

John dune too be ꞌulhꞌen-un Yakꞌusda ooghuni be yalhduk

¹ Ndi khuni unzoo-i, khuni ꞌudechoo-i Jesus Christ, Yakꞌusda ooYeꞌ ghun.

² ꞋUdaꞌ Yakꞌusda be nus hooꞌenne, ndi Yakꞌusda ooghuni ghun ukꞌunuhíyuzguz-i, ꞌet njan ndutni, “‘Soo zílhtsꞌai, ꞌuyoon khuni sba naꞌá-un ntsó tisꞌalh, mba lhawhúdutileh ꞌet wheni.’

³ ꞋEt ꞌoho keyoh, ꞌaw dune lhuhóotꞌih-un, dune huyih whe, ‘NeMoodihti whuz de úyalh, ooti ooba lháoodahleh. Lhutíyalh-un lhtsꞌe whudizꞌa ooba whulhtsi,’” hutni.

⁴ John dune too be ꞌulhꞌen-un, ꞌaw dune lhuhóotꞌih tsꞌe oozya ꞌinkꞌez tubeꞌ budániꞌ, “Lubeshi ꞌulhꞌen-un noheni náhandunoohleh, ꞌinkꞌez too beꞌ ꞌúlhneh, ꞌaw ꞌet de za Yakꞌusda nohlubeshi nohba ꞌún yutilhdulh.”

⁵ ꞋEt whe la tsꞌiyanne Judea whunat whutꞌenne ꞌinkꞌez Jerusalem whutꞌenne cha tehúnindil ꞌinkꞌez John dune too be ꞌulhꞌen-un huyoozílhtsꞌai. ꞋInkꞌez dulubeshi ghun huna huhoolnuk whe ꞌukoh Jordan huwhútni-un toot ꞌet John dune too béꞌ balhꞌen.

⁶ ꞋEt John dune too be ꞌulhꞌen-un khuna-i gha stlꞌoo-i ye dune unli ꞌinkꞌez ꞌuzus se be tsúdilhꞌoo. Tulkꞌus cho ꞌinkꞌez tsꞌihnatlꞌuz cha ꞌi yaꞌalh inleꞌ.

⁷ ꞋEt ubúlhni, “Dune skꞌélhꞌaz whusatíyalh-un sanus díztiꞌ whe ꞌuntꞌoh. ꞋAw ookechun natlꞌool ooba kꞌunaítísꞌuk ꞌet hoontsꞌi huba soo lhéꞌuzdzooꞌ.

⁸ Too beꞌ nohusꞌen ꞌet hoontsꞌi ndun dune ꞌen Ndoni be too beꞌ nohtilelh ꞌinkꞌez Ndoni nohyé dutiꞌalh.”

Jesus too beꞌ ꞌúlya ꞌinkꞌez netsudúle tankꞌus óoneh-un hukwa yóolhdzih

⁹ ꞋEt saꞌ iloh hukwꞌelhꞌaz Jesus Christ Nazareth tsꞌe hainya ꞌinkꞌez ꞌukoh Jordan huwhútni-un toot ꞌet John dune too be ꞌulhꞌen-un Jesus too beꞌ yínla.

¹⁰ Soo Jesus tooz ha naja ibulh, ndo yakꞌuz dáhaꞌ dankez whutílhꞌen, ꞌinkꞌez Ndoni dutꞌai kꞌunꞌa ndus de Jesus ookꞌé diltsꞌut.

¹¹ ꞋEt ꞌuwhútni, “Nyun sYeꞌ inli. Tube nkꞌesiꞌ, ꞌinkꞌez tube nyulh hoonústꞌiꞌ.”

¹² ꞋEt ꞌahoh Ndoni ꞌen Jesus nꞌun ꞌaw dune lhuhóotꞌih-un tsꞌe whe yálhꞌaꞌ.

¹³ ꞋEt dit whunizyat dzin Jesus ꞌaw dune lhuhóotꞌih-un indaꞌ ꞌinkꞌez Satan tankꞌus óoneh-un hukwa yóolhdzih. Tsꞌantꞌi ꞌi cha ꞌoh ho hoonli. Lizasne whusahándil, ꞌinkꞌez hiba neꞌutꞌen.

Dine lho ha ꞌutꞌenne Jesus, “ꞋAnih,” ubúlhni

¹⁴ ꞋEt John dune too be ꞌulhꞌen-un, ꞌahúyanꞌai hukwꞌelhꞌaz, Jesus Galilee tsꞌe oozya ꞌinkꞌez bubulh yálhduk Yakꞌusda ookꞌúneꞌ whutꞌen-un, ooghuni ghun.

¹⁵ ꞋInkꞌez ꞌet ꞌutni, “ꞋAndit ꞌawet whusahónzut. ꞋAwet nilhdukw Yakꞌusda ookꞌúneꞌ whutitꞌen wheꞌ hoontꞌoh. Lubeshi ꞌulhꞌen-un noheni náhandunoohleh, ꞌinkꞌez khuni unzoo-i nohba ꞌalha ootꞌeꞌ ꞌinkꞌez ulhchoot!”

¹⁶ ꞋEt Jesus bunghun Galilee taba nuya whe nane lho ha ꞌutꞌenne ubanꞌen, Simon ꞌinkꞌez bulhutsin Andrew bulh lhembilh tahúyalhdil lho haꞌ ꞌutꞌenne hinli ꞌet huwa.

¹⁷ ꞋEt ubúlhni Jesus, “Sunihꞌus, dune ha ꞌoohtꞌén-un nohooselh si.”

¹⁸ ꞋAho dulembil hila ditni ꞌinkꞌez hikꞌoh tsꞌe ootꞌen ha huyuntizꞌaz.

¹⁹ ꞋOn ꞌunyaz ha hándil ꞌet ꞌuyoonne nane lhulhutsinke James ꞌinkꞌez John bulh Zebedee ooyeꞌke ꞌubutilhꞌen dutsꞌi bet dulembil naꞌhulhꞌen.

²⁰ Soo Jesus ꞌubutilhꞌen ibulh, “ꞋAnih,” ubúlhni. ꞋEt ꞌawet Zebedee ooyeꞌke Jesus bulh whe hánꞌaz. Zebedee ꞌinkꞌez yuba ꞌutꞌenne cha ꞌawet tsꞌi bet húdilhtsꞌi whe bughu whe hánꞌaz.

Dune ntsiꞌ-i ooyudínda-un

²¹ Keyoh Capernaum huwhútni-un whuz hoozdil. ꞋOm bun dzin Lizwif nahulyis dzin, ꞌet Jesus Lizwif bulugliz bughu danínya ꞌinkꞌez whe whúbondunilhꞌeꞌ.

²² Dune yudántsꞌone tube buba hooncha, soo oobaꞌ hoontꞌóh-un kꞌunꞌa whe dune whubodulhꞌeh, ꞌaw Moses be ꞌudustlꞌus ꞌukꞌu nunáguzne bukꞌunꞌa iloh ꞌutni.

²³ ꞋEt ꞌilhoghun dune butoh usda-un, ntsiꞌ-i nududeh-i kꞌúneꞌ ꞌutꞌen-un, ꞌaldzul whe ꞌutni,

²⁴ “Jesus Nazareth whutꞌen-un ndet netsꞌú hukwaꞌ ninzun? Gak netalhtselh ha whusaínya? Mbe inli tꞌenyunúszun, nyun Yakꞌusda ba lubeshi ooghu hooloh-un ꞌintꞌoh.”

²⁵ ꞋEt Jesus hukwa yudaniꞌ whe uyúlhni, “Tꞌeduzinih whe ooyáhanaindaih!”

²⁶ ꞋEt ntsiꞌ-i nudúdeh-i ndun dune yuka ootilhdzut, ꞌalhdzul, ꞌinkꞌez yuyáhanaja.

²⁷ Tsꞌiyanne buba hooncha kꞌet ꞌet ꞌulhodútni, “Dantꞌóh-i ghuni ꞌuntꞌoh, whutsodaꞌ lhtsꞌodústsꞌo-un ꞌet whuneoodulhꞌeh? Ooghuni be whúnujut kꞌet ntsiꞌ-i nudúdeh-i hoontsꞌi hikꞌúneꞌ ꞌutꞌen.”

²⁸ ꞋAhoh Galilee keyoh whuti whunat whutꞌenne Jesus huyulh ꞌúdantsꞌo.

Jesus lhane dune undudáne soo náꞌbulhꞌen

²⁹ Lizwif lugliz tenáhundil whe Simon ꞌinkꞌez Andrew buyoh tsꞌe dahunindil, James ꞌinkꞌez John hiyulh naꞌaz.

³⁰ Simon oobiz lili kꞌut sulhti. Ooyustꞌe nulwus-i be únduda. Jesus whuz oozya ibulh hidániꞌ.

³¹ ꞋEt yughu ninya ꞌinkꞌez yula tꞌaz do yilhchoot. ꞋAhoh tsꞌeke soo ꞌúja ꞌinkꞌez bugha náꞌuntꞌai.

³² Hulhgha sa yó whinꞌai hukwꞌelhꞌaz, ndudáne ꞌinkꞌez mbene la ntsiꞌ-i nudúdeh-i kꞌúneꞌ ꞌutꞌenne cha Jesus ghu bonínla.

³³ ꞋInkꞌez tsꞌiyanne keyoh whutꞌenne dati ꞌílhuhózdil.

³⁴ Lhawh didowh dada be undudáne, ꞌenne Jesus soo náꞌbalhꞌen ꞌinkꞌez ntsiꞌ-i nudúdeh-i kꞌúneꞌ ꞌutꞌenne, ꞌenne cha dune yé ha nabunanyoot. Ntsiꞌ-i nudúdeh-i ꞌaw yahoolhduk-un butlꞌa lhúhooꞌal tꞌehinínzun ꞌet huwa.

Keyoh Galilee huwhútni-un, ꞌet Jesus Yakꞌusda ooghuni be yálhduk

³⁵ ꞋOm bun bundada ꞌawhuz lhuyulhkoh daꞌ Jesus dudinya ꞌinkꞌez ꞌaz whenya. ꞋEt nyo keyoh whuchꞌa suya, disoh tsꞌe oozya. ꞋEt tenadudli.

³⁶ Simon ꞌinkꞌez dukꞌekene te Jesus hikunuta.

³⁷ Nahayilhti whe ꞌet ꞌuhuyúlhni, “Tsꞌiyanne nkunúta.”

³⁸ ꞋEt Jesus ꞌubulhni, “ꞋUtsꞌun keyoh tsꞌe cha uztoodilh dune bulh yátisduk ꞌet huba whusásya.”

³⁹ Galilee ndulcho nukéhudizde lugliz totsuk bubulh yálhduk ꞌinkꞌez ntsiꞌ-i nudúdeh-i dune ye ha nábunuyukw.

Ooka whulhjút-un, Jesus soo náꞌyinla

⁴⁰ ꞋIlhoghun dune, ooká whulhjut-un, leprosy huyulhni, Jesus ghu ninya, dugwutsi bé nenínya ꞌinkꞌez yutsꞌu tédudli dulaꞌ ooneh ha. “Nyun hukwaꞌ ninzun de, be ilhtus-i ꞌintꞌi-i, ꞌi be sunáꞌilhdeh,” yulhni.

⁴¹ Jesus yugha téꞌninzin yutsꞌú nudilhni ꞌinkꞌez yutꞌaíznai. “Hukwaꞌ nuszun soo naꞌíntneh,” yulhni.

⁴² ꞋAho dune ulhjut-un soo náꞌuja ꞌinkꞌez bunaꞌide.

⁴³ Jesus khuniti be yulh yálhduk ꞌinkꞌez ꞌaho whenáyalhꞌaꞌ.

⁴⁴ Dune natisja whe ꞌet Jesus ꞌuyulhni, “Soo zilhtsꞌai, ꞌuyoonne dóniꞌ junih! Inyalh tsꞌe lubret ꞌen ootsꞌínyalh ꞌinkꞌez nyunoolhꞌen. ꞋEt ꞌantsꞌíya soo naꞌínja hukwꞌélha ndet la Moses ooghuni kꞌunꞌa lubret ntsꞌu húkwaꞌ ꞌutni-un, ꞌi oogha íonꞌalh. ꞋEt tsꞌiyanne whúntalhtun soo naꞌínja.”

⁴⁵ ꞋEt hoontsꞌi dune whenája ꞌinkꞌez tsꞌiyanne dániꞌ ꞌon nus huweꞌ yalhduk kꞌet Jesus ꞌaw keyoh dune tunóyaꞌ ꞌaitꞌoh. ꞋInka nꞌawh dune lhuhóotꞌi ꞌoh dune unli. Lhelhtsꞌiz de whutꞌenne whuz highu lhkꞌesúdil.