Luke 9 - Yak'usda Ooghuni

Whunizyai ꞌon ꞌat nane yugha hodulꞌehne, Jesus whe balhꞌaꞌ huye ꞌutꞌen kꞌoh ꞌuhotilhꞌelh ha

¹ ꞋEt whunizyane ꞌon ꞌat nane yugha hodulꞌehne Jesus ꞌalhgoh bukaꞌ daniꞌ. Ntsiꞌ-i nududeh-i, tsꞌiyawh whe hílhtus-un cha, ꞌinkꞌez himoodih hooleꞌ ha, ꞌet bugha óoninꞌai. ꞋInkꞌez dune hukwꞌe hunduda-un, ꞌet cha soo naꞌboohoolhꞌen, cha bugha óoninꞌai.

² Yakꞌusda lerwe unli-un ꞌet huwun ubulh yahoolhduk ꞌinkꞌez ndudane soo naꞌboohooleh wheni whe balhꞌaꞌ.

³ ꞋInkꞌez ꞌubulhni, “Tihdulh tsꞌe khun hoonliyaz toohlaꞌ junih. Nohtuz, ꞌinkꞌez lhookꞌez, ꞌinkꞌez lhes ꞌinkꞌez sooniya cha, ꞌet nduntꞌoh-i toohlaꞌ junih. Nanki dzootꞌan nyiz-i oohtꞌeꞌ junih.

⁴ Ndet yoh danáhꞌaz-un, ꞌet oohkeꞌ, ꞌinkꞌez ꞌet yoh za whenádohtꞌas.

⁵ ꞋEt mbe la danáhꞌas lhuhonohdúsnine, ꞌet keyoh howu natihtꞌus whutsꞌo, ꞌet whulez chꞌa nohke naóohghat. ꞋI gha la tꞌehonózin bukꞌehóotaltsꞌulh-un.”

⁶ ꞋInka whenáhidil ꞌinkꞌez keyoh totsuk whutulh lhunáhusdil. Dune khuni unzoo-i be bubulh yahulhduk, ꞌinkꞌez keyoh totsuk dune soo naꞌhulhꞌen.

John dune too be ꞌulhꞌen-un, ꞌen hizilhghi

⁷ ꞋEt ꞌawet lerwe Herod whulh ꞌudantsꞌo ntsꞌoh te Jesus neꞌutꞌen. Whulohne nduhutni, “John yaidlane butoh nahítnaꞌ, ꞌen ꞌuntꞌoh,” hutni. ꞋEt huwa ooba nawh ꞌuhooja.

⁸ ꞋInkꞌez ꞌuyoonne cha ꞌuhutni, “ꞋEn Elijah ꞌuntꞌoh whe nenalhtsꞌet hainya.” ꞋEt ꞌonghohne cha nduhutni, “ꞋUdaꞌ yinka Yakꞌusda be nus hooꞌenne, ꞌilhoghun nakhítnaꞌ-un ꞌutꞌen.”

⁹ ꞋEt Herod ꞌutni, “John ootsi kꞌúnistꞌo inleꞌ. ꞋEt mbe whe ꞌutꞌen ndun lheꞌhoontꞌoh te neꞌutꞌen-un bulh ꞌúdustsꞌo?” ꞋInkꞌez yutiꞌelh hukwaꞌ ninzun.

5,000ne dunene, Jesus huyooꞌalh-i bugha nínꞌai

¹⁰ ꞋEt whelꞌaꞌne whusanáhidil whe dahítꞌen-un tsꞌiyawh hidaniꞌ. ꞋInkꞌez njan Bethsaida keyoh whunat disoh tsꞌe whébanla.

¹¹ ꞋEt hoontsꞌi ꞌilhozdilne nahoohoonꞌai whe huyuntizdil. ꞋEt Jesus hoontꞌiꞌ whe highu nindil ꞌinkꞌez Yakꞌusda lerwe unli hukwꞌunꞌa huwun bubulh yalhduk. ꞋInkꞌez mbene la soo naꞌtitnelh hukwaꞌ ninzunne, ꞌenne cha tsꞌiyawh soo náꞌbalhꞌen.

¹² ꞋAwet yoo ꞌun hoozulh-un whunizyat ꞌon ꞌat nane highu nindil ꞌinkꞌez ꞌuhuyulhni, “Ndunne ꞌilhozdilne nabalhꞌalh njan disoh-un ꞌutsꞌintꞌoh. ꞋEt ndo ho keyoh whunat huyaꞌalh-i hoket ꞌinkꞌez la hutitez-un cha nahohólelh.”

¹³ ꞋEt hoontsꞌi Jesus ndúbulhni, “Hoonliyaz huyooꞌalh-i bugha nánuhtꞌaih.” ꞋEt ꞌuhuyulhni, “Lho nanki ꞌinkꞌez lhes kwulaiꞌ cha, ꞌaw ꞌi za tsꞌutꞌi. ꞋEt ndunne ꞌilhozdilne tꞌalh-i buba ꞌutsꞌonket de za bugha náꞌuztitꞌulh.”

¹⁴ ꞋEt ꞌilhozdilne ꞌankwꞌus 5,000ne dune hinli. ꞋEt Jesus yugha hodulꞌehne ꞌubulhni, “Kwulat whunizyane hinli whe lhelhdun natlꞌa hudooltsꞌilh budáhni.”

¹⁵ ꞋEt whuz unꞌa ꞌuhuja ꞌinkꞌez tsꞌiyawh natlꞌa hudiltsꞌiꞌ.

¹⁶ ꞋEt kwulaiꞌ lhes yilhchoot ꞌinkꞌez lho nanki cha ndo whunalhꞌen ꞌinkꞌez musi ni whe yuba tenadidli, taidanyuz ꞌinkꞌez yugha hodulꞌehne butlꞌa yánla, ꞌilhozdilne bugha húyoꞌalh ha.

¹⁷ Tsꞌiyawh ꞌuhanꞌal ꞌinkꞌez sooꞌ huja. Chꞌutízkat-i tsꞌiyawh nahuyalhdzoo whe whunizyai ꞌon ꞌat nanki chalhyal dizbun.

Jesus ꞌen Christ ꞌuntꞌoh, ꞌet Peter huwu yalhduk

¹⁸ ꞋEt hukwꞌelhꞌaz Jesus didutchꞌoh tenadudli whe yugha hodulꞌehne highu nindil ꞌinkꞌez uboodulhkut, “ꞋIlhozdilne, mbe usdli hutni?”

¹⁹ ꞋInkꞌez ꞌuhuyulhni, “John dune too be ꞌulhꞌen-un ꞌintꞌoh hutni. ꞋEt ꞌonghohne cha Elijah ꞌintꞌoh ꞌuhutni. ꞋInkꞌez ꞌonghohne cha hutni ꞌudaꞌ nus hooꞌenne, ꞌilhoghun dunadija-un ꞌintꞌoh, hutni.”

²⁰ “Nohni doꞌ?” ꞌubulhni, “Mbe usdli dahni?” Peter yatilhduk whe ꞌuyulhni, “Yakꞌusda ooChrist tsꞌutni-un, ꞌen ꞌintꞌoh.”

Dzoh nutizut-un ꞌinkꞌez datítsah-un, ꞌet Jesus huwu yalhduk

²¹ ꞋEt khuniti be ꞌubulhni, “Khun te ꞌuyoonne te dóhniꞌ junih!”

²² ꞋInkꞌez ꞌubulhni, “Yinka Dune Yeꞌ lhat-un whé dzoh nutizut oobaꞌ hoontꞌoh. ꞋInkꞌez ꞌutso whudilhdzulhne cha, ꞌudedo lubretne cha, ꞌinkꞌez Moses be ꞌudustlꞌus ꞌukꞌu nunáguzne cha, tsꞌiyawh hichꞌaz dútatni ꞌinkꞌez hituzilhghelh. ꞋInkꞌez whulh tat dzin dunadutádalh.”

Jesus ꞌubulhni, “Mbe la sulh tídulh hukwaꞌ ninzunne, dichꞌoh duba moodih nahoodleꞌ ꞌaitꞌoh”

²³ ꞋInkꞌez tsꞌiyawh ꞌúbulhni, “Mbe la dune seꞌ ꞌutꞌen kꞌoh tsꞌe ootꞌen ha hukwaꞌ ninzun-un, tsꞌiyawh whula dootnih ꞌinkꞌez dzin totsuk dutulalhgus yólhchoot ꞌinkꞌez suntooyaꞌ.

²⁴ ꞋEt mbene la whe húkhuna-un hotilhyihne ninta hotaꞌalh. ꞋEt hoontsꞌi mbe la whe khuna-un si sgha ninta ooninꞌai de, ꞌen whe hukhuna-un nuwhutilhyih.

²⁵ ꞋEt dune ndi yun kꞌut ndulcho whuchꞌa oonilhde de, ꞌet hoontsꞌi didutchꞌoh ye khuna-i ninta nínꞌai kꞌus ye khuna-i yugha nahootálhchulh de, ꞌet ndet suba whuchꞌa hólhdeh?

²⁶ ꞋEt mbene la dune si cha ꞌinkꞌez sghuni cha yukayá unli-un, ꞌet de Yinka Dune Yeꞌ, ntsꞌo de dichꞌoh ye diztiꞌ-i cha, ooBá ye diztiꞌ-i cha, ꞌinkꞌez Yakꞌusda oolizas hiye diztiꞌ-i cha, whuz unꞌa whusanaja de, ꞌoh de bukayátileh.

²⁷ ꞋAlhaꞌ nohdusni, whulohne njan nudilhyanne ndet la dahutitsah-un ꞌet whutsꞌun Yakꞌusda whe lerwe unli-un, ꞌet dahutitsa whutso hotiꞌelh.”

²⁸ Lhkꞌu dit dzin atꞌen hukwꞌelhꞌaz ꞌet dudani-un, Peter, John, ꞌinkꞌez James ndo dzulh kꞌuz dulh úbilya, whuz tenadutidli ha.

²⁹ ꞋEt tenadudli whe oonin ꞌutsꞌun oonatꞌen suliꞌ. ꞋInkꞌez oonaih cha ꞌulhyul suliꞌ, ꞌinkꞌez busaoolkalh suliꞌ.

³⁰ Khuntsul nane dune hiyulh yálhduk. ꞋIlhoghun Moses ꞌinkꞌez ꞌilhoghun Elijah.

³¹ Bubusaoolkalh ꞌinkꞌez bube hóodatꞌen. Jerusalem tsꞌe datinelh whe datítsah-un lhaóodutileh, ꞌet huwun huwu yáhalhduk.

³² ꞋEt Peter ꞌinkꞌez yulh ꞌutꞌenne bulh bukꞌuz nintiꞌ. ꞋEt tsꞌihꞌun unꞌa tꞌenawhehunide whe ꞌet Jesus ootsꞌu ha yánduz-i, nane dune yuzih usyin whe hitilhꞌen.

³³ ꞋEt hukwꞌelhꞌaz highu natisiꞌ whe Peter Jesus ꞌuyulhni, “Nemoodih neba hoonzoo njan uzdilhtsꞌi. Tat-un whutꞌah ꞌutsꞌoohooleh. ꞋIlhoghun nyun mba, ꞌilhoghun Moses ba, ꞌinkꞌez ꞌilhoghun Elijah ba.” Peter daja daniꞌ ꞌaw tꞌeoonuszun.

³⁴ Yalhduk whe kwꞌus bukꞌeinde. ꞋEt kwꞌus bunasutꞌi whe hunilhjoot.

³⁵ Kwꞌus toh tsꞌe khuni huduztsꞌai, “Ndun sYeꞌ ookwꞌesiꞌ-un ꞌuntꞌoh. ꞋEn oozóolhtsꞌai,” ni.

³⁶ ꞋEt yaduk-un ꞌetsul ꞌuwhudija whe Jesus dichꞌoh za ꞌuntꞌoh whe hinilhꞌen, teꞌhudínel ꞌinkꞌez ꞌaw dune lhodínel ndun hohonꞌen-un.

Tsꞌoodun ntsiꞌ-i nudúdeh-i ooyudinda-un, ꞌen Jesus soo náꞌyinla

³⁷ ꞋEt ꞌom bun dzin shus kꞌut tsꞌe ha náhidil whe lhane ꞌilhozdilne Jesus hidudizdil.

³⁸ ꞋIlhoghun dune ꞌilhozdilne butoh Jesus ꞌúltus-un yutsꞌu háyih whe njan ndúyulhni, “Hodulhꞌeh-un ntsꞌu tédusdlih syeꞌ nilhꞌen. ꞋEn ꞌaw ꞌilhoghun syaz ꞌuntꞌoh.

³⁹ ꞋEt khuntsul ntsiꞌ-i nududeh-i yilhchuk ibulh hazulh, ookaootuzuk, ꞌinkꞌez huwus oozá ha núldoh. ꞋInkꞌez tube howa whúlna whe ye yáhanadudoh. ꞋEt huwa ooka hootsulh.

⁴⁰ ꞋInka nye hódilꞌeꞌne butsꞌu tédusdli hitsꞌu ha náhidoolhdeh ha ꞌet hoontsꞌi ꞌaw ꞌuhooneh ꞌaitꞌoh.”

⁴¹ ꞋEt Jesus ꞌutni, “Nohni ꞌandit whudizulhne ꞌaw nohba ꞌalhaꞌ lheꞌhootꞌoh ꞌinkꞌez tankꞌus neꞌahtꞌen. Dawhuldzoh nohtoh ꞌutistꞌelh ꞌinkꞌez nohbulh óosyin? Nyeꞌ stsꞌílhtelh!”

⁴² ꞋEt ꞌawhuz Jesus tsꞌu yilhtelh whe ntsiꞌ-i nududeh-i nayáno ꞌinkꞌez yukaootilhzut. ꞋEt Jesus ntsiꞌ-i nududeh-i khuniti be hukwaꞌ yudániꞌ, ꞌinkꞌez tsꞌoodun soo naꞌninla ꞌinkꞌez oobá tlꞌa náyalhti.

ꞋAwet nilhdukw Yinka Dune Yeꞌ, ꞌen dune ntsiꞌne tlꞌa tiltelh kꞌuneꞌ hitilꞌen ha huwu yalhduk

⁴³ ꞋInkꞌez Yakꞌusda daltus la ꞌet huwa tsꞌiyanne buba hooncha. ꞋInkꞌez Jesus ntsꞌoh te la neꞌustꞌen-un buba hooncha. ꞋInkꞌez yugha hodulꞌehne ꞌet ꞌúbulhni,

⁴⁴ “Ndi khuni soo cho nohdzeh be whudooltsꞌit. ꞋAwet nilhdukw Yinka Dune Yeꞌ, dune ntsiꞌne tlꞌa tiltelh kꞌuneꞌ hitilꞌen ha.”

⁴⁵ ꞋEt hoontsꞌi daja ni-un ꞌaw tsꞌihꞌun tꞌelhehonízil. ꞋAw buba tsꞌet ha lhúhooltsꞌulh. Daja ni, ꞌaw tsꞌihꞌun nelhúhuhooꞌal. ꞋInkꞌez whe húnuljut, ꞌaw hukwa huyoodolhkut ꞌaitꞌoh.

Mbe suba netoh ꞌukꞌenus dune uncha-un unli?

⁴⁶ ꞋInkꞌez dichꞌoh dutoh lhdulhyoh ꞌahudutni mbe ꞌukꞌenus uncha-un tileh.

⁴⁷ Dudzi yo whe daja huninzun Jesus tꞌeooninzun. ꞋIlhoghun tsꞌoodunyaz yílhchoot ꞌinkꞌez duzih neyulti.

⁴⁸ ꞋInkꞌez ꞌubulhni, “Mbe la sooziꞌ gha ndun tsꞌoodunyaz yukꞌesutsit-un, skꞌeintsiꞌ wheꞌ hintꞌoh. ꞋInkꞌez mbe la skꞌesutsit-un, whuz de sútilhꞌaꞌ-un cha hikꞌesutsit wheꞌ hoontꞌoh. ꞋEt huwa, mbe la nohtoh ꞌukꞌenus dune ba telꞌen-un, ꞌen ꞌukꞌenus ncha tileh.”

Jesus ꞌubulhni, “Mbe la nechꞌaz úlhditni-un, ꞌen nebulh ꞌuntꞌoh”

⁴⁹ ꞋEt John ꞌuyulhni, “NeMoodihti ꞌilhoghun dune nyooziꞌ be ntsiꞌ-i nududeh-i dune butsꞌu ha naídulhdoh, ꞌet tsꞌuhonꞌen. ꞋAw nebulh ꞌilhoghun lhiloh, ꞌet huwa ꞌet ndutꞌen-un whuchꞌaz níyoot.”

⁵⁰ ꞋEt hoontsꞌi Jesus ꞌuyulhni, “Whuchꞌa nahyoot iloh! Mbe la ꞌaw nechꞌaz úlhditni-un, netsꞌú ditni-un ꞌuntꞌoh.”

Keyoh Samaria whutꞌenne, Jesus hitsꞌu disnih

⁵¹ ꞋEt ꞌawet Jesus ooba whusaóodanzut ndo yakꞌuz nátidalh-un huba, ꞌet ꞌawet Jerusalem whutsꞌu nalhꞌa ꞌinkꞌez whuz natidalh-un howun nanínuzut.

⁵² Khuni yuba naꞌane dutso whe bilhꞌaꞌ. Hutizdil whe ꞌilhoghun Samaria keyoh tsꞌu hoozdil hiba lhaoodutileh ha.

⁵³ ꞋEt hoontsꞌi Jerusalem tsꞌe tiyalh-un ꞌet huwu nanininzut. ꞋEt huwa Samaritan whutꞌenne ꞌaw hikalheꞌnízun.

⁵⁴ ꞋEt yugha hodulꞌehne James ꞌinkꞌez John honalhꞌen bulh dahooja la whe Jesus huyoodulhkut, “NeMoodihti Elijah kꞌunꞌa kwun ndus de yakꞌuz tsꞌe ha dóonat ꞌinkꞌez hudókꞌun ꞌuzdooniꞌ, ꞌet eh neba hukwaꞌ ninzun?”

⁵⁵ ꞋEt butsꞌu nálhꞌa ꞌinkꞌez hukwaꞌ budaniꞌ, ꞌinkꞌez ꞌutni, “Daja nahzun tꞌewhunuzáhzun ꞌet huwaꞌ dahni!

⁵⁶ Yinka Dune Yeꞌ, dune huyeh khuna-i musai yutilhtselh ha iloh whusainya, ꞌubutilhyih ha whusainya.” ꞋInkꞌez ꞌudun keyoh whuyaz tsꞌe whe hándil.

Mbe la yun wheoonilhchꞌul-un ꞌinkꞌez kꞌoh naidututꞌih de, nduntꞌohne Yakꞌusda whulerwe unli-un, ꞌaw huba soo lhéꞌhitꞌoh wheꞌ hintꞌoh

⁵⁷ ꞋEt ti hidulh whe ꞌilhoghun dune Jesus yughu ninya ꞌinkꞌez ꞌuyulhni, “SMoodihti ntsꞌe tínya tsꞌe tsꞌiyawh nyun tisyalh.”

⁵⁸ ꞋEt Jesus ꞌuyulhni, “Nanguz ꞌi cha ꞌan whutꞌi ꞌinkꞌez dutꞌaiyaz cha tꞌo ꞌutꞌi. ꞋEt hoontsꞌi Yinka Dune Yeꞌ, ꞌaw tsén talꞌal-un lhuhóotꞌiꞌ.”

⁵⁹ ꞋEt ꞌuyoon cha ꞌulhni, “Nyun cha sunanyalh.” ꞋEt ꞌuyulhni, “SMoodihti, kꞌat ꞌudechoo sbá oozi ꞌa óostelh.”

⁶⁰ ꞋEt Jesus ꞌuyulhni, “Dudulh yaidlane didutchꞌoh ꞌanalhuhoolyelh. ꞋEt hoontsꞌi nyun nónyaꞌ ꞌinkꞌez Yakꞌusda lerwe unli-un ꞌet huwun budóniꞌ.”

⁶¹ ꞋEt ꞌuyoon cha ꞌutni, “SMoodihti nyun tisyalh, ꞌet hoontsꞌi ꞌudechoo snatneke syoh tsꞌe butsꞌú nunatisdalh stlꞌa hoonaih ꞌinkꞌez ꞌilhiz wheni nohghu tisyalh budutásnelh.”

⁶² ꞋEt Jesus ꞌuyulhni, “Mbe la wheoonilhchꞌul-un ꞌinkꞌez kꞌoh naidututꞌih de, Yakꞌusda whulerwe unli-un, ꞌaw huba soo lhéꞌhitꞌoh wheꞌ hintꞌoh.”