Luke 8 - Yak'usda Ooghuni

Lhane tsꞌekoo Jesus hila ꞌutꞌen

¹ ꞋEt hukwꞌelhꞌaz Jesus kedutizut keyoh whucho ꞌinkꞌez keyoh whuyaz totsuk, Yakꞌusda lerwe unli, ꞌet huwun khuni unzoo-i be yalhduk. ꞋEt whunizyat ꞌon ꞌat nane cha huyulh ꞌutꞌen.

² ꞋInkꞌez tsꞌekoo cha huyulh ꞌutꞌen whe ntsiꞌ-i nududeh-i buyudultsi ꞌinkꞌez hunduda, tsꞌiyawh soo naꞌbinla. Mary Magdala whutꞌen-un cha ꞌutꞌen. ꞋEn ꞌuntꞌoh lhtakꞌantꞌi ntsiꞌ-i nududeh-i ꞌen ooyáha naidide.

³ ꞋInkꞌez Joanna, Chuza ooꞌat, ꞌet Chuza, ꞌen Herod yoh dilhtsꞌine bumoodih unli, ꞌinkꞌez Susanna cha ꞌinkꞌez ꞌuyoonne lhane cha huyutꞌi-i, ꞌi be hila ꞌutꞌen.

ꞋAꞌ nulé-un oogha whútsꞌodulꞌeh

⁴ ꞋEt keyoh whutꞌenne ꞌilhuhozdil ꞌinkꞌez Jesus nawhutnuk-i be whutsꞌodulꞌeh-i be yalhduk,

⁵ “ꞋIlhoghun ꞌaꞌ nule-un ꞌaꞌ untilelh ha. ꞋEt ꞌaꞌ nule whe ninutsut whe ꞌet ooloh tinchꞌoh nanánkat. ꞋInkꞌez hikꞌut nusúdil ꞌinkꞌez dutꞌaiyaz cha tsꞌiyawh yunildil.

⁶ Ooloh cha tse kꞌut nanánkat. ꞋEt há nuski whe ha nulhyeh-i too hooloh ꞌet huwa yanúdizgi.

⁷ ꞋEt ꞌonghoh-i cha whus cho tanínkat. ꞋI cha whus cho bulh dúduninyai ꞌinkꞌez bulh lhéwhulloh.

⁸ ꞋEt ꞌonghoh-i yun unzoo-i kꞌut nanánkat, ꞌinkꞌez há nuski. Oomaiꞌ ꞌi lhanꞌun te lhai suliꞌ whunizyat whunizyai ꞌet ꞌultsuk suliꞌ.” ꞋEt hukwꞌelhꞌaz ꞌet tube cho ꞌubulhni, “Mbe la oodzeh hoonline hidotso!”

Di ha Jesus be nawhutnuk-i be whutsꞌodulꞌeh-i be ubulh yalhduk?

⁹ ꞋEt yugha hodulꞌehne huyoodulhkut, “Ndi be whutsꞌodulꞌeh-i, ꞌi daja ni whe ꞌutni?”

¹⁰ ꞋEt ubúlhni, “Ndi buba wheꞌ hoontꞌoh hooyoh-un Yakꞌusda lerwe unli-i, ꞌi ghun, tꞌeoonoohzeh ha ꞌudaꞌ nohtlꞌa hóoltsꞌut. ꞋEt hoontsꞌi ꞌonghohne be whutsꞌodulꞌeh-i whuz unꞌa za bubulh yasduk. Doo ka la, ‘Honalhꞌen ꞌet hoontsꞌi ꞌaw lhuhuhoos̱ꞌen. ꞋEt hoditsꞌo ꞌet hoontsꞌi ꞌaw tꞌehonuszun daja ni.’”

ꞋAꞌ nule-un oogha whutsꞌodulꞌeh-un, ꞌet Jesus neba hukwꞌu nuhúlhyeꞌ

¹¹ “Ndi be nawhutnuk-i be whutsꞌodulꞌeh-i ꞌet ndutni. Ndi ꞌanukat-i, ꞌi Yakꞌusda ooghuni ꞌuntꞌoh.

¹² Mbene la ti ꞌuntꞌohne, ꞌenne Yakꞌusda ooghuni hiditsꞌo ꞌinkꞌez netsudule khuni budzi be ha naídanꞌaih. Doo ka si ꞌalha ꞌuhoontꞌoh de hudoojih.

¹³ Ndai la tse toh nanánkat-i leꞌ ꞌuntꞌohne hoditsꞌo ꞌinkꞌez huhóontꞌiꞌ whe khuni huyilhchuk. ꞋEt hoontsꞌi ꞌaw bughih hooloh. ꞋEt huwa ꞌatsulyaz buba ꞌalha ꞌuhoontꞌoh. ꞋEt ꞌaho bé tankꞌus uznintꞌi-i, ꞌi be tinchꞌu nahuskat, ꞌenne ꞌuhintꞌoh.

¹⁴ Ndai la whus cho toh nanánkat-i, dune Yakꞌusda ooghuni hiditsꞌo ꞌet hoontsꞌi yun kꞌut huwu ni tsinli-un, ndi yun kꞌut hoonzooꞌ hoontꞌoh-un, ꞌinkꞌez ndi yun kꞌut huhoontꞌiꞌ tuneꞌ hutꞌen-un, ꞌi tsꞌiyawh whus cho ꞌi be bulh lhellhoh ndultꞌoh. ꞋEt huwa ꞌaw lhadúlyane hooleꞌ ꞌaitꞌoh.

¹⁵ ꞋEt hoontsꞌi ndai la yun unzoo-i kꞌut nanánkat-i, ꞌenne huhóontꞌiꞌ whe khuni hidantsꞌo ꞌinkꞌez budzi unzoo whe huyoontun. Ntsꞌoh dahoontꞌoh hoontsꞌi ꞌilhiz huyilhchuk. ꞋEt whuz unꞌa bumaiꞌ whulaih.”

Too dízkꞌun ookwꞌuz yo ꞌadinꞌai-i, Jesus yughu yalhduk

¹⁶ “Dune too dizkꞌun nahidilhkꞌaih ꞌinkꞌez ꞌaw oosaꞌ yukꞌuz yo nádooꞌah ꞌaitꞌoh. Kꞌus lili tꞌa tsꞌe ꞌayooꞌalh ꞌaitꞌoh. ꞋEt too dizkꞌun-i hukwꞌusꞌai-un, ꞌet hukwꞌe yinꞌai. ꞋEt de dandílhne hinoolhꞌen la.

¹⁷ Di la nistꞌi-i, nus de tsꞌiyawh ha ootikulh. Di la whuꞌiz ꞌulhꞌen, ꞌi hootꞌen-un, tsꞌet ha ootikulh.

¹⁸ ꞋInka howahli ntsꞌenꞌa la khuni dutáhtsꞌo. Hoontsool-unyaz tꞌehonínzunne, ꞌon nus lhat-un tꞌe honínzun-un, ꞌet bugha whútaltsꞌulh. ꞋInkꞌez mbene la hoonli tꞌewhunúszunne, hoontsool-unyaz hoditsꞌo, ndai la ꞌaw ꞌi huyutꞌi-i huninzun, ꞌi hoontsꞌi bughu nayitálchulh.”

Jesus ooloo ꞌinkꞌez bulhutsinke te hiyulh yatilhduk hukwaꞌ huninzun

¹⁹ ꞋEt ꞌawet ooloo ꞌinkꞌez bulhutsinke te, hitsꞌun tizdil. Dune lhai kꞌet ꞌaw hiyenghoh nehoodil ꞌaitꞌoh.

²⁰ Whulohne huyulhni, “Nloo ꞌinkꞌez nyulhutsinke te ꞌaz nodilhya, nyahutiꞌelh hukwaꞌ huninzun.”

²¹ ꞋEt ubúlhni, “Mbene la Yakꞌusda ooghuni yoozílhtsꞌaine ꞌinkꞌez hikꞌuneꞌ ꞌutꞌenne, ꞌenne sloo ꞌinkꞌez sulhutsinke hinli, wheꞌ hintꞌoh.”

²² ꞋEt hukwꞌelhꞌaz ꞌilhoh dzin yugha hodulꞌehne bulh tsꞌi be handil. ꞋInkꞌez “Nyan uztookeꞌ,” ubúlhni. ꞋEt nus huzki.

²³ Nus huzki whe Jesus ꞌaho nanisti. Khuntsul bubulh taoodiltsꞌut ꞌinkꞌez ꞌawet tsꞌi too be tádutih. ꞋInkꞌez tube howa ꞌóodli whe ninleꞌ.

²⁴ ꞋInka tsꞌe nahuyulhtsꞌit, “NeMoodihti, neMoodihti, ꞌawet too netighan!” huyúlhni. ꞋEt tsꞌe nandzut, ꞌinkꞌez dudinya whe too kꞌut nilhtsꞌi khuni ulhtus-i be hukwaꞌ yulhni. ꞋEt ꞌaho kꞌoh ꞌúhooja ꞌinkꞌez dínghel.

²⁵ ꞋEt “Nohba ꞌalhaꞌ ꞌustꞌoh-un, dáhooja?” ubúlhni. Tsꞌiyawh whe hunilhjoot ꞌinkꞌez buba hooncha. ꞋEt ꞌulhodutni, “Ndun dune, ꞌen mbe whe ꞌuntꞌoh? Nilhtsꞌi ꞌinkꞌez tatsi ꞌi hoontsꞌi ndahneh yulhni te yukꞌuneꞌ ꞌutꞌen.”

Dune ntsiꞌ-i nududeh-i ooyudúltsꞌi-un, Jesus soo náꞌyinla

²⁶ ꞋEt ꞌawet Gadarene yun kꞌut yahuzki. ꞋEt Galilee whanchꞌaz whuzꞌai.

²⁷ ꞋEt de hainya ꞌaho dune ꞌet keyoh whutꞌen-un yududizya. ꞋEn saꞌ whutsꞌun ntsiꞌ-i nududeh-i lhai ooyudúltsꞌi. ꞋEn tsan yit nuya, ꞌinkꞌez ꞌaw yoh lhidoh, ꞌinkꞌez tsꞌun kꞌut whutꞌi.

²⁸ ꞋEt Jesus yutilhꞌen whe yutsꞌu huyih ꞌinkꞌez yubut nachániti. ꞋInkꞌez tube cho yutsꞌu tédudli, “Jesus nyun soo ꞌudedo Yakꞌusda ooYeꞌ ꞌintꞌoh! Ndet stsꞌu hukwaꞌ ninzun? Ntsꞌu tedusdlih, dzoh nusilhdzut iloh!”

²⁹ ꞋEt ꞌudaꞌ ntsiꞌ-i ndudeh-i khuniti be ꞌubulhni ndun dune ye yáhanadoodeh ha. ꞋOh daꞌ lhuztih tlꞌool be huyulhghel oola ꞌinkꞌez ookechun cha, ꞌet whuz unꞌa highunli inleꞌ. ꞋEt hoontsꞌi lhat whe ntsiꞌ-i ndudeh-i yilhchuk whe lhuztih tlꞌool tániduchꞌas ꞌinkꞌez ntsiꞌ-i nududeh-i, ꞌen dune lhuhootꞌih tsꞌe whuz whénanyoot.

³⁰ ꞋInkꞌez Jesus yoodulhkut, “Ndai la nyooziꞌ?” “Legion,” yulhni. Lhane ntsiꞌ-i nududeh-i ye yudúltsꞌi ꞌinka ꞌutni.

³¹ Ntsiꞌ-i nudúdeh-i Jesus hitsꞌu tedudli tsa kꞌet whucho whutlꞌah hooloh-un, whuz te netolhꞌaꞌ junih, huyúlhni.

³² ꞋEt nilhdukw-un lhai gugoos whenun ꞌaꞌalh. ꞋEt ntsiꞌ-i nududeh-i Jesus hitsꞌu tedudli gugoos ooyúdoodeh ha. ꞋInka ꞌet butlꞌa honꞌai.

³³ ꞋEt ntsiꞌ-i nududeh-i dune, ꞌi ootsꞌu haídande ꞌinkꞌez gugoos yudánde. ꞋAho gugoos bubulh whenghólghaz ꞌinkꞌez too yanghan.

³⁴ ꞋEt ndunne gugoos ghunline dahooja-un honalhꞌen whe tsꞌiyawh whehílghaz. Hidulh whe ꞌet keyoh whunat whutꞌenne ꞌinkꞌez ꞌet keyoh whutꞌenne tsꞌiyawh bubodániꞌ.

³⁵ ꞋEt dune hodántsꞌo whe whuz whe hándil ꞌinkꞌez honalhꞌen. Jesus highu nindil whe ndun dune ntsiꞌ-i nududeh-i ootsꞌu ha naídide-un, Jesus yukꞌetlꞌa usda whe hinalhꞌen. Naih be dune unli ꞌinkꞌez beni cha oogha nádiltsꞌut. Hinalhꞌen ꞌinkꞌez hunílhjoot.

³⁶ ꞋEt dahooja-un honalhꞌenne, ꞌuyoonne cha hudániꞌ dahooja la ntsiꞌ-i nududeh-i ooyudinda-un dujih.

³⁷ ꞋEt Gadarene whunat whutꞌenne ndulcho whe hunílhjoot. ꞋEt huwa Jesus buchꞌa naoojaꞌ huyúlhni. ꞋInka tsꞌi be naja ꞌinkꞌez whe nahiki.

³⁸ ꞋEt dune ntsiꞌ-i nududeh-i ootsꞌu ha nádide-un, Jesus yutsꞌu tedudli yulh ꞌútitꞌelh hukwaꞌ ninzun. ꞋEt hoontsꞌi Jesus whenáyalhꞌaꞌ ꞌinkꞌez ꞌuyulhni,

³⁹ “Nyoh tsꞌe naindalh ꞌinkꞌez dáhoolcho whe Yakꞌusda mba daja la, budóniꞌ.” ꞋInka whe naja ꞌinkꞌez keyoh ndulcho whe tsꞌiyanne Jesus dahoolcho yubaꞌ hóonla-un huwun ubudániꞌ.

Jesus Jairus ootseꞌ dunaidilhti, ꞌinkꞌez tsꞌeke Jesus yunaih tꞌaíznai-un

⁴⁰ ꞋEt ꞌawet nyan whenaki. Tsꞌiyanne Jesus hibalhꞌi whe whusanaki tsꞌiyawh huhóontꞌiꞌ hinilhꞌen whe.

⁴¹ Soo yanáski ibulh ꞌaho dune Jairus yughu ninya. ꞋEn Lizwif bulugliz whumoodih ꞌuntꞌoh. Yubut nachaniti ꞌinkꞌez yutsꞌu tedudli duyoh tsꞌe yulh nátootꞌas ha.

⁴² ꞋIlhoghun za ootseꞌ, whunizyat ꞌon ꞌat nat be yus kꞌut atꞌen-un. ꞋEn ꞌawet datítsah. Jesus Jairus ooyoh tsꞌe yulh nátistꞌaz. ꞋEt ꞌilhozdilne lhane higha óozdil.

⁴³ ꞋEt ꞌilhoghun tsꞌeke tube dzoh nuzut whunizyat ꞌon ꞌat nat yus kꞌut ꞌuskaiꞌ ꞌuyulhꞌen-un, yoo be dúyunne lhane cha hukwaꞌ huyalhꞌen. ꞋEt hukwꞌuz duzooneya tsꞌiyawh gak yulhtsi, ꞌet hoontsꞌi nus za lheꞌínelh.

⁴⁴ Jesus yutꞌa tsꞌe yughu ninya ꞌinkꞌez nayitsꞌuz-i yus tsꞌe ooban ꞌet yutꞌaiznai. ꞋEt ꞌaho ꞌuskaiꞌ ꞌuyulhꞌen-un ꞌetsul ꞌuja.

⁴⁵ ꞋEt Jesus ꞌutni, “Mbe ꞌuja stꞌa iznai?” “Tsꞌiyawh wheni iloh ꞌutsꞌuja,” hutni. Peter ꞌinkꞌez yulh ꞌutꞌenne ꞌuhutni, “Nemoodih lheltsukne nyando ha huníldo ꞌinkꞌez nyuhoolhkalh. ꞋInkꞌez di ha ꞌudini ‘Mbe stꞌa iznai?’ dini?”

⁴⁶ ꞋEt Jesus ꞌutni, “ꞋIlhoghun stꞌa iznai. Be stus-i stsꞌu ha díltsꞌut tꞌeoonuszun.”

⁴⁷ ꞋEt tsꞌeke tꞌeoonanzin ꞌaw yuchꞌá ntoolꞌih ꞌaitꞌoh. Dutlut whe yughu ninya ꞌinkꞌez yubut nachaniti. ꞋEt tsꞌiyanne nalh Jesus ꞌuyulhni ndet huwa yutꞌaiznai ꞌinkꞌez daja whe ꞌaho soo náꞌuja.

⁴⁸ ꞋInkꞌez ꞌuyulhni. “ꞋUstseꞌ hooníntꞌiꞌ! Mba ꞌalha ꞌuhoontꞌoh ꞌet huwa soo naꞌinja. Ndzi dizghel whe naindalh.”

⁴⁹ ꞋEt ꞌawhuz tsꞌeke yulh yalhduk whe Lizwif bulugliz whumoodih ooyoh usda-un yughu ninya ꞌinkꞌez ꞌuyulhni, “Ntseꞌ dazsai. Whute ndun dune hodulhꞌeh-un, ꞌaw ꞌon ꞌun dzoh nilhdzut iloh.”

⁵⁰ ꞋEt Jesus whúdantsꞌo whe Jairus ꞌuyulhni, “Whenoljut junih. Mba ꞌalhaꞌ hotꞌeꞌ, ꞌinkꞌez soo naꞌtitnelh whe ꞌuntꞌoh.”

⁵¹ ꞋEt yeyoh tsꞌe daninya, ꞌaw ꞌuyoonne dalhoosyaꞌ. Peter, James, ꞌinkꞌez John, ꞌinkꞌez tsꞌoodun oobá cha ꞌinkꞌez ooloo cha, ꞌenne za dahóodilh.

⁵² ꞋEt tsꞌiyanne tso yahalhduk ꞌinkꞌez hikꞌetedudli. ꞋEt Jesus ꞌubulhni, “ꞋAhtso iloh! ꞋAw dalhitsal nanisti whe ꞌuntꞌoh.”

⁵³ ꞋInkꞌez highudloh, tꞌehonínzun dazsai whe ꞌuntꞌoh.

⁵⁴ Jesus tsꞌiyawh tenábunilhꞌaꞌ, ꞌinkꞌez tsꞌoodun yula ilhchoot ꞌinkꞌez, “Tsꞌekeyaz dudinyaih,” yúlhni.

⁵⁵ Ooyughi ooyunaídide ꞌinkꞌez ꞌaho dudinya. ꞋInkꞌez oodusneke ꞌubulhni, “Hoonli yutiꞌulh-i oogha náhꞌaih.”

⁵⁶ Oodusneke buba hooncha, ꞌinkꞌez khuni ulhtus-i be ꞌubulhni, “Dáhooja-un ꞌuyoonne dóhniꞌ junih.”