Luke 24 - Yak'usda Ooghuni

Jesus dunadija

¹ ꞋEt ꞌawet ndi lisman ꞌudechoo dzin ꞌuhoontꞌoh. Bundada ꞌudaꞌ, tsꞌekoo ꞌinkꞌez ꞌuyoonne cha bulh tsꞌun kꞌuz tsꞌe hutizdil. Yoo sooltsun-i lhahídinla-i cha hitizdla.

² Tse ꞌudaꞌ ꞌudun dizꞌai whe hotilhꞌen.

³ ꞋEt dahúnindil ꞌinkꞌez Jesus oozi hooloh.

⁴ Buba wheꞌ hooja hooyoh ꞌet dáhooja whusuba ꞌuhoontꞌoh. ꞋEt khuntsul nane dune buzih huzyin. Bunaih tube busaoolkalh.

⁵ ꞋInkꞌez ndunne tsꞌekoo tube whe hunuljut whe yun nacháhunilya. Ndunne ꞌubuhutni, “ꞋEt di ha yaidlane toh khuna-un, ꞌen ookunáhtah?

⁶ ꞋAw njan hooloh, dunadija whe ꞌuntꞌoh! ꞋAwhuz Galilee ꞌutꞌen whe, daja nohulhni-un, whunalhni.

⁷ Nóhulhni, ‘Yinka Dune Yeꞌ, ꞌen lubeshi ꞌulhꞌenne tlꞌa hitilhtelh ꞌinkꞌez tulalhgus kꞌehúyitalhtelh. ꞋInkꞌez whulh tat dzin dunadutádalh.’”

⁸ ꞋInkꞌez highuni hinalni.

⁹ ꞋEt tsꞌun kꞌuz ha náhidil, ꞌet ndi tsꞌiyawh whunizyane ꞌon ꞌat ꞌilhoghun, ꞌinkꞌez ꞌonghohne cha bubodániꞌ.

¹⁰ Mary Magdala whutꞌen-un, Joanna cha, Mary James ooloo cha, ꞌinkꞌez ꞌuyoonne tsꞌekoo bubulh ꞌutꞌenne, ꞌenne ꞌuhuja ndunne whelꞌaꞌne bubodániꞌ.

¹¹ ꞋEt hoontsꞌi nyoonne ꞌantsꞌi ꞌoh neꞌhuduniꞌ whula ꞌuhutni ubonínzun ꞌinkꞌez ꞌaw buba ꞌalhaꞌ lheꞌhudusnih.

¹² ꞋEt hoontsꞌi Peter dudinya ꞌinkꞌez tsꞌun kꞌuz tsꞌe oolhgai. Yoleꞌ ꞌuja ꞌinkꞌez tsa kꞌet whunilhꞌen. ꞋEt naih diztiꞌ-i za ꞌet ꞌusdla whe yutilhꞌen. ꞋEt duyoh tsꞌe whe naja. ꞋEt howu nuní nuzut ꞌinkꞌez ooba hooncha dahooja whusuba ꞌuhoontꞌoh.

Jesus nane yugha hodulꞌehne bunalhtsꞌet hainya

¹³ ꞋEt dzin keyoh whuyaz, Emmaus tsꞌoutni, nane dune whuz hitiꞌus. Jerusalem whutsꞌun 7 miles atꞌen ꞌuhoontꞌoh.

¹⁴ Whuz hiꞌus whe dahóotꞌen la ꞌoh howu yahulhduk.

¹⁵ ꞋEt howu yahulhduk dahóotꞌen la neꞌwhustꞌen-un, Jesus bughu ninya ꞌinkꞌez bubulh tizꞌaz.

¹⁶ Hinilhꞌen ꞌet hoontsꞌi ꞌaw butlꞌa lhúhooꞌal ꞌet huwa ꞌaw tꞌelhihinízil.

¹⁷ ꞋInkꞌez ꞌubulhni, “ꞋOh whuya ahꞌus whe, ndet wheꞌ whudahni? Stabe huwun nohdzi unduda whe howu yalhduk?”

¹⁸ ꞋIlhoghun, Cleopas huyulhni, ꞌen ꞌuyulhni, “ꞋAw nyun za iloh eh ntsꞌoh te ꞌandit neꞌwhustꞌen-un, ꞌaw eh tꞌewhunuzínzun. ꞋAw Jerusalem whutꞌen-un lhinloh whe laꞌ dini?”

¹⁹ ꞋEt ubúlhni, “Ndet wheꞌ whudahni?” ꞋInkꞌez ꞌuhuyulhni, “Jesus Nazareth whutꞌen-un, ꞌen ooghun dahooja la. Nus hooꞌen-un ꞌuntꞌoh. Yakꞌusda ꞌinkꞌez dune cha bunalh hoolhtus whe neꞌústꞌen ꞌinkꞌez hoolhtus whe cha yáilhduk.

²⁰ ꞋUdedo lubretne, ꞌinkꞌez wheni nemoodihne cha, ꞌenne Rome whutꞌenne hiba nahuhooyeh ha butlꞌa húyalhti, ꞌinkꞌez tulalhgus kꞌehíyilhti.

²¹ ꞋEn úncha Israel ootsꞌu hainzutne nabootakulh ꞌuzninzun daꞌ. Ntsꞌoh te neꞌwhustꞌen whutsꞌun ꞌandit ꞌawet whúlh tat dzin ꞌuhoontꞌoh.

²² A, ꞌalha ꞌuhoontꞌoh, ꞌinkꞌez whulohne tsꞌekoo ndulyiz whe nebulh ꞌítꞌenne, daja hutni-un, tube neba hooncha. ꞋUdaꞌ bundada tsꞌun kꞌuz hoozdil.

²³ ꞋAw hizi nálhilhtel. ꞋInkꞌez lizasne hanꞌen whe ꞌenne ꞌuhutni, ‘Khuna whe ꞌuntꞌoh!’

²⁴ ꞋInkꞌez oolune nebulh ꞌutꞌenne cha tsꞌun kꞌuz nahúzꞌaz. Ntsꞌenꞌa la tsꞌekoo ꞌuhutni la, whuz unꞌa nahahoonꞌai. ꞋEt hoontsꞌi Jesus ꞌaw lhuhuyíꞌel.”

²⁵ ꞋEt Jesus ꞌubulhni, “Tube nohni whusnine ꞌahli! Ndet la tsꞌiyawh nus hooꞌenne daja hutni-un, tube saꞌ whe nohdzi be nohba ꞌalhaꞌ whuneh!

²⁶ ꞌalhaꞌ eh ꞌuhoontꞌoh Christ, ꞌen dzoh nutizut huba ꞌuhoontꞌoh ꞌinkꞌez ꞌet hukwꞌelhꞌaz whe diztiꞌ tsꞌu natidalh?”

²⁷ ꞋInkꞌez Moses be ꞌudustlꞌus ꞌukꞌu nunáguz-un ꞌinkꞌez nus hooꞌenne bubeꞌ ꞌudustlꞌus cha, ndai ꞌukꞌu nuhúyuzgus ꞌen ghun, ꞌi tsꞌiyawh Yakꞌusda ooghuni yúbunilhtan.

ꞋEt ꞌantsꞌiya hitánꞌen leꞌ huja ꞌinkꞌez nahuyóolhtsꞌit

²⁸ ꞋEt keyoh whuyaz hutizdil tsꞌe, ꞌawet whenghoh hidulh. ꞋInkꞌez Jesus njan keyoh whenghoh táyalh leꞌ ꞌutꞌen.

²⁹ Duzíh oodaꞌ hukwaꞌ huyulhꞌen, ꞌinkꞌez ꞌuhuyúlhni, “ꞋAwet sa naínꞌai, hulhgha ꞌuhoontꞌoh.” ꞋInkꞌez yoh bubúlh danántꞌaz buzih tidalh ha.

³⁰ ꞋEt natlꞌa hudiltsꞌiꞌ ꞌinkꞌez ꞌuhutiꞌulh. Jesus lhes yilhchoot ꞌinkꞌez Yakꞌusda musi yulhni. ꞋInkꞌez lhkídanyuz ꞌinkꞌez bugha íninꞌai.

³¹ ꞋEt hitánꞌen leꞌ huja ꞌinkꞌez nahuyóolhtsꞌit. ꞋInkꞌez khuntsul hooloh nasdliꞌ.

³² ꞋEt ꞌulhodutni, “Niz de ti nebulh yalhduk ꞌinkꞌez Yakꞌusda ooghuni daja ni whunenulhtun whe ꞌaw lawk nedzi dízkꞌun le lhéꞌtsꞌitꞌoh inleꞌ?”

³³ ꞋEt ꞌoh whuya ꞌuhunitꞌoh whe unahuditꞌaz ꞌinkꞌez Jerusalem tsꞌu náhoostꞌaz. ꞋEt whunizyane ꞌon ꞌat ꞌilhoghun ꞌinkꞌez bubulh ꞌutꞌenne, tsꞌiyawh ndet ꞌilhoh ꞌúhintꞌoh whe bughu nahuntꞌaz,

³⁴ ꞌet dilhtsꞌine ꞌuhutni, “ꞋAlhaꞌ neMoodihti dunadija whe ꞌuntꞌoh! ꞋInkꞌez Simon yunalh be hóodiltsai!”

³⁵ ꞋInkꞌez nyoonne nane ti dahooja la ꞌet huwun bubulh náhoohoolnuk ntsꞌenꞌa la Jesus lhes taídanyuz whe mbe unli nahuyóolhtsꞌit.

Jesus dichꞌoh buniz be hóodiltsai

³⁶ ꞋAwhuz howu yahalhduk whe, Jesus dichꞌoh buniz be hóodiltsai, ꞌinkꞌez ꞌubulhni, “Nohbulh sooꞌ hotꞌeꞌ.”

³⁷ ꞋEt hoontsꞌi bugha ꞌúnjaz ꞌinkꞌez tube hunílhjoot. Dune dazsai-un tsin hanꞌen huninzun.

³⁸ ꞋInkꞌez ꞌubulhni, “Dahoontꞌoh huwa whénulhjut? ꞋInkꞌez dahoontꞌoh huwa nohdzi yo whe nohba nawh ꞌuhoontꞌoh?

³⁹ Sla ꞌinkꞌez ske cha nulhꞌen. Si ꞌustꞌoh. Stꞌa íhnaih ꞌinkꞌez sunulhꞌen! Syustꞌe cha hoonli ꞌinkꞌez stsꞌun cha. Dune tsin ꞌaw ndúlhitꞌoh, ooyustꞌe ꞌinkꞌez ootsꞌun cha hooloh, tsꞌiyawh bulh ꞌustꞌoh.”

⁴⁰ ꞋEt ꞌet ndudániꞌ whe, dula ꞌinkꞌez duke cha bunalhtsꞌet neyuzdla.

⁴¹ Huhóontꞌiꞌ ꞌinkꞌez huwáꞌ hiꞌen ꞌet hoontsꞌi ꞌawhuz buba ꞌalhaꞌ lheꞌhootꞌoh. ꞋInkꞌez ꞌubulhni, “ꞋAw njan ꞌutꞌalh-i lhahtꞌih?”

⁴² ꞋInka lho sutꞌe-i ꞌinkꞌez tsꞌihna dutlꞌuz ye ꞌulhꞌen-i, ꞌi yooꞌalha higha híninla.

⁴³ ꞋI yílhchoot ꞌinkꞌez bunalh yanꞌal.

Jesus whubunulhtun Yakꞌusda ooghuni daja ni

⁴⁴ ꞋInkꞌez ꞌubulhni, “ꞋAwhuz nohbulh ꞌústꞌoh daꞌ ndi khuni ꞌi daꞌ be nohbulh yasduk-i, tsꞌiyawh lhaoodoneh Moses be ꞌudustlꞌus kꞌunusguz-i, ꞌinkꞌez nus hooꞌenne, ꞌinkꞌez Yakꞌusda ooghuni Shun eꞌdustlꞌus kꞌut cha si sghun ꞌukꞌu nusguz.”

⁴⁵ ꞋEt bubeni tꞌehonoozeh ha butlꞌa hónꞌai Yakꞌusda ooghuni tꞌehinoozeh ha.

⁴⁶ ꞋInkꞌez ꞌubulhni, “Ndi ꞌi ꞌukꞌu nusguz whe ꞌet ndutni, Christ, ꞌen dzoh nozut, ꞌinkꞌez whulh tat dzin dunadíjaꞌ hubaꞌ hoontꞌoh,

⁴⁷ ꞌinkꞌez booziꞌ gha tsꞌiyanne dulubeshi chꞌa dudeni naháhundunooleh, ꞌinkꞌez bulubeshi buba úntukuk cha, ꞌohwhi ghun booziꞌ gha tsꞌiyanne dóhniꞌ hubaꞌ hoontꞌoh. ꞋEt njan Jerusalem ꞌet cho wheꞌ dohtꞌen. ꞋEt hukwꞌelhꞌaz de ꞋUdun Yun Kꞌut Whutꞌenne whubodoolhꞌeh.

⁴⁸ Nohni dune whúntilhtunne ꞌahli whé ꞌahtꞌoh.

⁴⁹ ꞋInkꞌez soo zulhtsꞌai, ndi sBá nohtsꞌu yoozi-i, ꞌi nohtsꞌo tlꞌa dutisꞌalh. ꞋEt hoontsꞌi yakꞌuz ndus de whelhtus-i, ꞌi nohkꞌedútaltsꞌulh ꞌet whutsꞌun, Jerusalem ꞌet za dólhtsꞌiꞌ.”

Jesus ndo yakꞌuz whenálti

⁵⁰ ꞋEt ꞌawet Bethany whuz naboozdla. Dula do ꞌuyinla ꞌinkꞌez Yakꞌusda yoodulhkut butsꞌun oozooꞌ ha.

⁵¹ ꞋAwhuz Yakꞌusda yoodulhkut butsꞌun oozooꞌ ha, buchꞌa nasdzut ꞌinkꞌez ndo yakꞌuz whenálti.

⁵² Hitsꞌun teniꞌ nalhdzin, ꞌinkꞌez tube huhóontꞌiꞌ whe Jerusalem tsꞌe náhoosdil.

⁵³ ꞋInkꞌez ꞌahoolhdzin lugliz whucho hudilhtsꞌi whe Yakꞌusda hidilhtiꞌ ꞌinkꞌez daldzooꞌ whe ꞌuntꞌoh hutni. ꞋEt ndo honeh.