Luke 23 - Yak'usda Ooghuni

Jesus, Pilate but néhinilhti

¹ ꞋEt dune ꞌilhozdilne tsꞌiyawh dunáhudidil ꞌinkꞌez Pilate but néhinilhti.

² ꞋAwet hikꞌewhehoninꞌai ꞌinkꞌez ꞌuhutni, “Ndun dune lizwifne tankꞌus úbunilhtꞌi ꞌet bulh nátsꞌuhoonꞌai. ꞋInkꞌez lerwe Caesar tsꞌun ndi yun kꞌelha huyilhꞌi-i, ꞌi tax ꞌuyulhni, ꞌet cha whuchꞌa buníyoot. ꞋInkꞌez didut lerwe Christ tsꞌutni-un, ꞌen usdli naꞌdudútni.”

³ ꞋEt Pilate yoodulhkut, “Nyun eh Lizwif bulerwe inli?” ꞋEt Jesus ꞌutni, “A, ꞌalhaꞌ dini.”

⁴ ꞋEt Pilate Lizwif bumoodihne, ꞌinkꞌez ꞌilhozdilne ꞌubulhni, “Ndun dune ꞌaw hoonli nintaꞌantꞌen-un ooghu nalhuwhusꞌal.”

⁵ ꞋEt ꞌon nus huhunílchꞌe ꞌinkꞌez ꞌuhutni, “Yun kꞌut Judea ndulcho whe ꞌinkꞌez Galilee yun kꞌut ꞌinkꞌez njan cha, dune nohchꞌaz nehudodilh whuz unꞌa whubodulhꞌeh.”

Lerwe Herod, ꞌen cha Jesus yóolhdzih

⁶ Pilate whudantsꞌo whe, uboodulhkut, “Ndun dune Galilee whutꞌen-un ꞌuntꞌoh?”

⁷ ꞋEt Pilate Jesus lerwe Herod ookeyoh whuchꞌeꞌ unli tꞌeoonanzin, ꞌet ꞌaho yutsꞌu whe yálhꞌaꞌ. Ndun lerwe ꞌen cha ꞌoh daꞌ soo ꞌet Jerusalem ꞌutꞌen inleꞌ.

⁸ Herod tube hoontꞌiꞌ whe Jesus yanꞌen. ꞋEt tube saꞌ whutsꞌun yutiꞌelh hukwaꞌ ninzun ꞌet huwa. Lhat-un whe yulh ꞌúditsꞌo inleꞌ. Khun tilah huwa ꞌítꞌen dunalh ꞌóohooleh.

⁹ ꞋInkꞌez lhat-un hukwa yoodulhkut. ꞋEt hoontsꞌi Jesus yutsꞌu tꞌédusnih.

¹⁰ ꞋUdedo lubretne ꞌinkꞌez Moses be ꞌudustlꞌus ꞌukꞌu nunáguzne, tsꞌiyawh dunahúdidil ꞌinkꞌez huske be hikꞌé hoonꞌai.

¹¹ ꞋEt Herod ꞌinkꞌez yuba lhuganne, ꞌenne bubulh tsꞌiyawh hoonliyaz buba lhíloh hinínzun ꞌinkꞌez highudloh. Lerwe nayitsꞌuz-i be húyalhti ꞌinkꞌez Pilate tsꞌun whe náhuyalhꞌaꞌ.

¹² ꞋEt dzin Pilate ꞌinkꞌez Herod bulh kꞌeke lhuhulhtsi. Whutsodaꞌ lhchꞌaz huditni inleꞌ.

Pilate Jesus butlꞌa yálhti datitsah ha, ꞌinkꞌez Barabbas buba yula naditni

¹³ ꞋEt ꞌawet Pilate ꞌudedo lubretne, dune kꞌuneꞌ ꞌulꞌenne cha, tsꞌiyanne dune, tsꞌiyawh ꞌalhgoh ꞌilhubozdla,

¹⁴ ꞌinkꞌez ꞌubulhni, “Ndun dune tankꞌus ubunilhtꞌi-un kꞌunꞌa sghu nulhti. ꞋEn nohbut soo tsꞌihꞌun unꞌa ooghu núnistai. ꞋEt hoontsꞌi ndet ookꞌé whahꞌai-un ꞌaw hoonli ooghu nalhuwhusꞌal.

¹⁵ ꞋInkꞌez Jesus Herod tsꞌun nohbulh whésꞌaꞌ. ꞋEn cha whe tankꞌus ꞌuntꞌoh-un yughu nalhuhóoꞌal. Ndun dune ꞌaw hoonli hukwa daóotsa-un hooloh.

¹⁶ ꞋInka huyootalhtsus ꞌinkꞌez oola nadutisnih.”

¹⁷ ꞋEt njan butus lhuseya naꞌhutꞌalh-un ꞌet ꞌoh totsuk ꞌilhoghun ꞌadinꞌai-un lanahudutni. ꞋEt whuz unꞌa bukꞌoh tsꞌe ꞌuhoontꞌoh.

¹⁸ ꞋAlhgoh hitsꞌu háyih ꞌinkꞌez ꞌuhutni, “Barabbas neba oola nadintnih, ꞌinkꞌez ndun ꞌen sulhghe!”

¹⁹ Barabbas ꞌen gha lhtahuwhuntꞌai whe ꞌilhoghun dune silhghi ꞌet hukwa ꞌahuyanꞌai inleꞌ.

²⁰ ꞋEt hoontsꞌi Pilate Jesus lanadutitnih hukwaꞌ ninzun, ꞌinka ꞌilhozdilne doo cha bubulh yáilhduk.

²¹ ꞋEt hoontsꞌi ꞌon nus hitsꞌu huyih, “Tulalhgus kꞌeílhtih! Tulalhgus kꞌeílhtih!” hutni.

²² ꞋEt whulh tat ꞌubulhni, “ꞋEt di ha? Ndet dáhoontꞌoh whe hoontsiꞌ-un whe nintaꞌuntꞌen? ꞋAw hukwꞌelha daootsah-un ooghu nalhuwhúsꞌal! ꞋEt huwa huyootalhtsus ꞌinkꞌez oola nadutisnih.”

²³ ꞋEt hoontsꞌi ꞌaw huyoozólhtsꞌaiꞌ ꞌaitꞌoh. ꞋOn nus hitsꞌu huyih, “Tulalhgus kꞌeílhtih!” ꞋUdedo lubretne, ꞌinkꞌez ndunne cha, daja hutni ꞌet whe Pilate hichꞌaꞌ nilhde.

²⁴ ꞋInka Pilate ntsꞌenꞌa hukwaꞌ huninzun hukwꞌunꞌa ꞌuja.

²⁵ ꞋInkꞌez Barabbas ꞌen gha lhtahuwhuntꞌai whe ꞌilhoghun dune silhghi, ꞌet hukwa ꞌahuyanꞌai, ꞌen Pilate butsꞌun yula naditni. ꞋEt hoontsꞌi Jesus hukwaꞌ huninzun kꞌunꞌa ꞌuhitilelh ha butlꞌa yálhti.

Jesus tulalhgus kꞌehíyilhti

²⁶ ꞋAwet Jesus hitilhti whe ꞌilhoghun dune Simon huyulhni, Cyren whutꞌen-un, whenghoh keyoh tsꞌe hainya, Jesus ootulalhgus yuba idutootan ha hiwus kꞌehídintan.

²⁷ Lhane dune hiyuntizdil, tsꞌekoo cha. ꞋEn tsꞌodi hinli ꞌinkꞌez hutso.

²⁸ ꞋInkꞌez Jesus butsꞌu nalhꞌa ꞌinkꞌez ꞌubulhni, “Nohni Jerusalem whutsꞌekooꞌ, si sghahtso iloh, nohnichꞌoh khunahtso, ꞌinkꞌez nohuzkehke cha ghahtso.

²⁹ ꞋAlha dzin whuz de hóokulh wheꞌ hoontꞌoh, ꞌet la ꞌuhudooniꞌ, ‘Buzkeh hoolohne, ꞌaw lheꞌílhtsilne, ꞌinkꞌez mbene la chalhtsꞌul ꞌulheꞌílhtꞌukwne, ꞌon nus buba sooꞌ whutatꞌelh.’

³⁰ ꞋEt dune ꞌuhudooniꞌ ‘Dzulh ꞌi uncha nekꞌénitꞌai ꞌinkꞌez shusyaz ꞌi cha be nekꞌenáhokat.’

³¹ Duchun ꞌawhuz duli whe ꞌet hoontsꞌi nduhútꞌen. Duchun disuz de, dahootꞌen suba?”

³² ꞋEt nane untsiꞌne, ꞌenne cha, huyulh bubotuzilhghelh.

³³ ꞋInkꞌez shusyaz Calvary, ꞌutsin tsꞌun nizꞌai huwhutni-un, whuz huyoolhti whe, ꞌ tulalhgus kꞌehuyilhti. Nyoonne dune ntsiꞌne, ꞌilhoghun nailhni tsꞌe ꞌinkꞌez ꞌilhoghun ꞌintlꞌus tsꞌe, tulalhgus kꞌébihilhti.

³⁴ ꞋEt Jesus ꞌutni, “ꞋUBá buba whunaoodilnoh. ꞋAw dahútꞌen-un tꞌehonuszun, ꞌet huwa ꞌuhutꞌen.” Hina lhkꞌehuyilya ꞌinkꞌez higha ꞌaínlih.

³⁵ Dunene ꞌet nódilhya ꞌinkꞌez honilhꞌen. Bumoodihne cha buzih nodilhya ꞌinkꞌez highudloh whe nduhutni, “ꞋUyoonne, bulhyis inleꞌ. ꞋEt huwa ndun Christ, Yakꞌusda ꞌutahayálhti-un ꞌuntꞌoh de, dichꞌoh ꞌududoolyih da!”

³⁶ Lhuganne cha highudloh. Hizih neníndil ꞌinkꞌez tsꞌekoo tooꞌ duninkꞌoz-i, ꞌi hitsꞌu dúhidinkai.

³⁷ ꞋInkꞌez ꞌuhúyulhni, “Lizwifne bulerwe inli de, nyunchꞌoh ꞌududílyih!”

³⁸ Dzihtelyaz hikꞌu neꞌúzguz, ꞌudechoo Greek, Latin, ꞌinkꞌez Hebrew bughuni kꞌunꞌa hiyandus tsꞌe tulalhgus ꞌuhidunilhtꞌo. Ndiz unꞌa njan ndutni: NDUN ꞋEN LIZWIFNE BULERWE ꞋUNTꞋOH

³⁹ ꞋEt untsiꞌne, hizih tulalhgus kꞌut hulhti, ꞌilhoghun hichꞌá ꞌutsꞌun ꞌutni whe ꞌet ndúyulhni, “Nyun Christ inli de, ꞌet nyunchꞌoh ꞌududílyih ꞌinkꞌez wheni cha neílhyih!”

⁴⁰ ꞋEt ꞌilhoghun unsiꞌ-un hukwa yudániꞌ whe uyúlhni, “ꞋAw eh Yakꞌusda bé lhniljut whe eh ꞌudini? Ooba nahisda, whuz unꞌa za wheni cha neba nahisda.

⁴¹ ꞋInkꞌez wheni tsꞌihꞌun unꞌa neba nahisda. Daítꞌen la, ꞌet huwa ꞌandit tulalhgus kꞌut sílti. ꞋEt huwa neba ꞌukꞌelha whuzdliꞌ. ꞋEt hoontsꞌi ndun dune ꞌaw hoonliyaz whe ninta lheꞌítꞌel.”

⁴² ꞋEt ndun unsiꞌ-un ꞌet Jesus ꞌulhni, “SMoodihti ntsꞌe la whulerwe inli, whuz naoozinja de, snaoolnih!”

⁴³ ꞋEt Jesus uyúlhni, “Tsꞌihꞌun unꞌa nyudusni, ꞌukꞌenus hoonzoo-un, ꞌet ꞌandit dzin sulh ꞌútantꞌelh.”

Jesus tulalhgus kꞌut ye khuna-i yula ditni

⁴⁴ Dzetniz hukwꞌelhꞌaz 3:00 atꞌen whutsꞌun yun kꞌut ndúwhulcho 6:00 whutsꞌun whe tsahólhgus inleꞌ.

⁴⁵ Sa cha ꞌaw lhistꞌen suliꞌ. ꞋInkꞌez lugliz whucho dutai-i hukwa dímbal-i, ꞌi cha lhulcho lhkꞌenchꞌul.

⁴⁶ ꞋInkꞌez ꞌet Jesus tube cho ꞌudija, “ꞋUBá, syughi ꞌi ntsꞌo la disni.” ꞋInkꞌez ꞌet dúdija ꞌet ꞌawet ꞌudekꞌez ha nájiz.

⁴⁷ ꞋEt dahooja la lhuganne bumoodih whunalhꞌen whe Yakꞌusda yudilhtiꞌ whe ꞌutni, “Ndun ꞌalhaꞌ tsꞌihꞌun dune ꞌazi ꞌuntꞌoh.”

⁴⁸ ꞋInkꞌez ꞌilhozdilne tsꞌiyawh ꞌet nenindilne huwhunalhꞌen whe, dáhooja la huwhunalhꞌen, tsꞌodi kꞌet dudzi kꞌut hoohoolhchis ꞌinkꞌez whusanáhidil.

⁴⁹ Mbene la tꞌeininzunne, ꞌinkꞌez tsꞌekoo Galilee whutsꞌun hiyuwhusanándilne, nilhdzaꞌyaz highu núdilhya daootꞌen-un huwhunilhꞌen.

Joseph Jesus ꞌayalhti

⁵⁰ ꞋEt ꞌilhoghun dune Joseph huyulhni-un, ꞌen cha Lizwifne ookꞌúneꞌ whutꞌenne, ꞌilhoghun ꞌuntꞌoh, dune unzoo ꞌinkꞌez tsꞌihꞌun dune unli.

⁵¹ Nyoonne ookꞌúneꞌ whutꞌenne, dahuja-un, ꞌaw ooba tsꞌihꞌun lheꞌhootꞌoh. Joseph ꞌen Arimathea whutꞌen-un ꞌuntꞌoh. Lizwifne bukeyoh, ꞌilhoghun ꞌuhoontꞌoh. Joseph ꞌen cha Yakꞌusda whe lerwe unli-un huba sulhꞌi.

⁵² Ndun dune Pilate tsꞌu whinya ꞌinkꞌez Jesus oozi yutsꞌu yúkaꞌ daniꞌ.

⁵³ Oozi nanáyalhti whe naih diztiꞌ-i, layin huyulhni-i, ꞌi be yughaꞌ ozduz. ꞋEt tse be ha huhontsel-un, whutsꞌo daꞌ, ꞌuyoonne ꞌalhdílhtoh, ꞌet ꞌayalhti.

⁵⁴ ꞋEt dzin wheni lhahúdutneh-un ꞌuhoontꞌoh. Lizwifne natsꞌulyis dzin yutilhkai.

⁵⁵ ꞋInkꞌez tsꞌekoo Galilee whutsꞌun yuwhusanándilne, ꞌenne Joseph hiyuntizdil whe ꞌet oozi ꞌayulhtih whe hinilhꞌen.

⁵⁶ ꞋEt whenáhidil. Yoo sooltsun-i, khe sooltsun-i cha lhahídinla. ꞋEt natsꞌulyis dzin, Yakꞌusda dughuni be bubaꞌ hóonla, ꞌet nahilyiz.