Luke 22 - Yak'usda Ooghuni

Jesus yoo yo whútsul hikunúta hituzilhghelh ha

¹ ꞋEt ꞌawet lhes lhuntulhdoh-i, ꞌi naꞌhititꞌulh, ꞌawet whenghoh hoozulh. ꞋEt butus lhuseya-un dzin huwhútni.

² ꞋInkꞌez ꞌudedo lubretne, ꞌinkꞌez Moses be ꞌudustlꞌus ꞌukꞌu nunáguzne, Jesus whe hituzilhghelh-un, ꞌet hukwa hunuta. ꞋEt dunene bube hunuljut ꞌet huwa whunistꞌi be néꞌhutꞌen.

³ ꞋEt Satan Judas ye yínya. ꞋEn Iscariot huyulhni. Whunizyane ꞌon ꞌat nane, ꞌenne butoh ꞌilhoghun ꞌuntꞌoh.

⁴ ꞋEt lubret bumoodihne ꞌinkꞌez saldanne bumoodihne cha butsꞌu whinya ꞌinkꞌez bubulh hukwꞌu nótilhyeꞌ ntsꞌenꞌa la Jesus butlꞌa itilhtelh.

⁵ ꞋInkꞌez huhóostꞌet whe tsꞌihꞌun huyúlhni whuninꞌai ꞌinkꞌez sooniya higha tíꞌalh huyulhni.

⁶ ꞋAwet Judas butsꞌu náhizya ntsꞌenꞌa la dune chꞌoh butlꞌa itilhtelh, ꞌet hukwunúta.

Jesus yugha hodulhꞌehne butus lhuséya-un bubulh naꞌtitꞌulh lhahoduleh

⁷ ꞋAwet lhes lhuntildoh-i, ꞌi naꞌhititꞌulh dzin whusahóoltsꞌut. ꞋEt butus lhuseya-un ꞌet whunahilni whe ꞌusbai kꞌus unzoo-i hituzilhghelh.

⁸ ꞋInkꞌez ꞌet Jesus, Peter ꞌinkꞌez John bulh whe balhꞌaꞌ ꞌinkꞌez ꞌubulhni, “Ahꞌus ꞌinkꞌez neba lhaoodahleh butus lhuseya-un ꞌet naꞌuztitꞌulh-un.”

⁹ ꞋInkꞌez ꞌuhuyúlhni, “Ntsꞌe hukwaꞌ ninzun mba lhatsꞌódutileh-un?”

¹⁰ ꞋInkꞌez ꞌubulhni, “Whunulhꞌen keyoh whuti nenáhꞌaz de, dune nohdudutáyalh. Too be sulhdzo-i naꞌa. Ndet yoh danátidalh tsꞌe budánohꞌas.

¹¹ ꞋInkꞌez yoh whumoodih ꞌen la ꞌudóhniꞌ, ‘Whuneodulhꞌeh-un njan ndúnyulhni, ndet ꞌuhoontꞌoh nyoh dune ꞌilhodulh-un ꞌuhaꞌalh wheni? ꞋEt sgha hodulꞌehne butus lhuseya-un bubulh náꞌtistꞌulh.’

¹² ꞋInkꞌez la dohyo hooncha-un lhaoodintꞌoh-un whunóhnoolhtun. ꞋEt lhaoodahleh.”

¹³ ꞋInka whe hánꞌaz whe soo ntsꞌenꞌa la ubudániꞌ, whuz unꞌa nahahoonꞌai. ꞋEt butus lhuseya-un wheni lhaháduja.

Jesus ꞌudekꞌez naꞌutꞌalh-un

¹⁴ ꞋAwet ꞌoh whuya whudizulh-un whusahóoltsꞌut, ndunne whunizyane ꞌon ꞌat nane whelꞌaꞌne bubulh natlꞌa didaꞌ.

¹⁵ ꞋInkꞌez ꞌubulhni, “Dzoh nutiszut-un whutso sdzi ndulcho-i be njan butus lhuseya-un ꞌet nohbulh náꞌtistꞌulh tube hukwaꞌ nuszun.

¹⁶ ꞋAlhaꞌ nohdusni, Yakꞌusda whe lerwe unli-un, ndi butus lhuseya-un lhaoodutaneh, ꞌet whutsꞌun, ꞌaw ꞌon ꞌat oosꞌalh ꞌaitꞌoh.”

¹⁷ ꞋEt lubot yilhchoot ꞌinkꞌez duBá musi yulhni ꞌinkꞌez ꞌutni, “Ulhchoot ꞌinkꞌez tsꞌiyawh ꞌalhgoh ꞌahtnai.

¹⁸ ꞋAlhaꞌ nohdusni, Yakꞌusda whe lerwe unli-un, ꞌet whusaootiltsꞌulh ꞌet whutsꞌun, ꞌaw ndi mai tooꞌ oosnaiꞌ ꞌaitꞌoh.”

¹⁹ ꞋInkꞌez lhes yilhchoot. ꞋInkꞌez duBá musi yulhni, taídanyuz ꞌinkꞌez butainínla, ꞌinkꞌez ꞌubulhni, “Ndi yustꞌe ꞌuntꞌoh. Nohba huwalti. Ndahtꞌen de, ꞌet whe snaoolhnih.”

²⁰ ꞋUhanꞌal hukwꞌelhꞌaz whuz unꞌa za lubot yílhchoot ꞌinkꞌez ꞌutni, “Ndi lubot ꞌi suzkaiꞌ be ꞌandidi khuni nohba lhadúsdla-i, ꞌi ꞌuntꞌoh, nohni nohba nadútiltꞌih.

²¹ ꞋInkꞌez whunulhꞌen, whuꞌizyaz dune chꞌaz ditni-un, ꞌen njan lutab ba sulh usda.

²² ꞋAlhaꞌ hoontꞌoh Yinka Dune Yeꞌ, ntsꞌenꞌa ooba ꞌet néwhultsꞌut, ꞌet whuz unꞌa ꞌet ꞌuwhutánelh. ꞋEt hoontsꞌi ndun dune mbe la whuꞌizyaz dune tlꞌa itilhtelh-un ndun dune dáwhultsiꞌ-un ootsꞌu hóoltsꞌulh!”

²³ ꞋInkꞌez didutchꞌoh dutoh lhoohoodulkut, “Kꞌus mbe suba yulhni, mbe ꞌutinelh whe ꞌutni?”

Yugha hodulꞌehne butoh, kꞌus mbe suba ꞌukꞌenus ꞌuntꞌoh-un ooleꞌ?

²⁴ ꞋEt didutchꞌoh lhdulhyoh ꞌuhudutni kꞌus mbe suba ꞌukꞌenus ꞌuntꞌoh-un ooleꞌ?

²⁵ ꞋInkꞌez Jesus ꞌubulhni, “ꞋUdun Keyoh whulerwe dune kꞌuneꞌ hulꞌen-un ꞌuntꞌoh. ꞋInkꞌez buba ndo ꞌuntꞌohne, nohtsꞌun unzoone ꞌuhintꞌoh hubuhútni.

²⁶ ꞋEt hoontsꞌi nohni nohtoh ꞌe dóhtꞌeꞌ junih! Kꞌus nohtoh mbe ꞌukꞌenus ꞌuntꞌoh-un ooleꞌ-un, ꞌen ꞌudekꞌoh-un kꞌunꞌa ooleꞌ. Mbe la nohtso whudilhdzulh-un, nohba neꞌútꞌen-un ooleꞌ.

²⁷ Daja nahzun? Mbe ꞌukꞌenus ꞌuntꞌoh-un ꞌuntꞌoh? Ludab kꞌusda ꞌutiꞌulh ha, kꞌus yuba neꞌútꞌen-un? ꞋEt hoontsꞌi nohni nohtoh nohba neꞌútꞌen-un usdli.

²⁸ Nohni ꞌahtꞌoh dzoh nususzut-un, ndulyiz whe sulh ꞌíhtꞌeꞌ.

²⁹ ꞋInka sBá stlꞌa hónꞌai whe lerwe usdli-un, whuz unꞌa nohni cha lerwe tihleh-un nohgha hónꞌai.

³⁰ ꞋEt whe lerwe usdli-un, ꞌet slutab kꞌut sulh ꞌutihꞌulh ꞌinkꞌez sulh utihtnelh. Kwꞌutsꞌuzda cho diztiꞌ-i, ꞌet hukwꞌu dutálhtsꞌilh ꞌinkꞌez whunizyat ꞌon ꞌat nat-un Israel ootsꞌu hainzutne bulh didowhne buba nahutihyeh.”

Jesus Peter ꞌulhni, “Tꞌesunuzínzun dutanelh”

³¹ ꞋInkꞌez neMoodihti ꞌutni, “Simon, Simon, soo zilhtsꞌai! Satan tube nkadaniꞌ. Tlꞌo maiꞌ lhtah ha nyununtidlih.

³² ꞋEt hoontsꞌi mba tenadisdli whe mba ꞌalhaꞌ ꞌustꞌoh-un, ꞌet ꞌaw nla kꞌéha hooltsꞌit ꞌaitꞌoh. ꞋInkꞌez ndet la stsꞌu naóozinja de, nyulhutsinke hilhtus ubolhtselh.”

³³ ꞋEt hoontsꞌi ꞌuyulhni, “SMoodihti lhadústꞌoh nyulh tisyalh, ꞌadutisꞌalh ꞌinkꞌez nyulh datísah.”

³⁴ ꞋEt ꞌuyulhni, “Nyudusni Peter, ꞌandit dzin lugok dune ꞌudutinelh whutso, tat, ‘ꞋAw ndun tꞌenuzuszun,’ dutanelh.”

Tsꞌiyawh lhawhúdoneh hubaꞌ hoontꞌoh

³⁵ ꞋInkꞌez ꞌubulhni, “ꞋOh daꞌ whenóhisꞌaꞌ whe, sooniya zus, lhookꞌez cha, ꞌinkꞌez neketlꞌa whulh tlꞌoo-i tsꞌiyawh ooyit. ꞋAw eh hoonliyaz lhundunuzáhdzit?” ꞋInkꞌez, “Gak!” huyulhni.

³⁶ ꞋInkꞌez ꞌubulhni, “ꞋEt ꞌandit sooniya zus ꞌutꞌi-un, whute yólhchoot. ꞋInkꞌez whuz unꞌa za bé neꞌuge-i cha ólhchoot. ꞋInkꞌez mbe la saluzti lhitꞌiꞌ-un, duluglok ye ꞌóket ꞌinkꞌez saluzti ꞌilho oket.

³⁷ ꞋEt huwa ꞌunohdusni Yakꞌusda ooghuni kꞌut si sghun ꞌukꞌu núsguz-i, ꞌi tsꞌiyawh lhawhúdoneh hubaꞌ hoontꞌoh. Ndiz unꞌa njan duwhutni, ‘Ndunne ꞌukꞌú nulheꞌustꞌenne bubun ndultꞌoh hudooniꞌ,’ ni. ꞋEt huwa si sghun ꞌukꞌuneꞌ ꞌusguz-un lhawhúdoneh hubaꞌ hoontꞌoh.”

³⁸ ꞋInkꞌez ꞌuhuyulhni, “NeMoodihti njan whunilhꞌen nanki saluzti ꞌet ꞌusdla.” ꞋInkꞌez ꞌubulhni, “ꞋAwet soo ꞌúltsuk.”

Jesus Gethsemane ꞌet tenadudli

³⁹ ꞋEt ꞌawet tenánja whe whutsodaꞌ hukwꞌunꞌa shusyaz Olive ꞌi kꞌuz whe naja. ꞋInkꞌez yugha hodulꞌehne cha hiyuwhenándil.

⁴⁰ Whuz hoozdil whe ꞌet ꞌubulhni, “Tankꞌus úntihtꞌi-un whuchꞌa ténadahdli.”

⁴¹ Tse nazdulhꞌus-un, ꞌet ꞌuwhuldzoh tsꞌe bughu nenínya. ꞋInkꞌez dugwutsi be nenínya ꞌinkꞌez tenadudli.

⁴² ꞋEt ndutni, “ꞋUBá hukwaꞌ ninzun de, ndi be dzoh nutiszut-i sghu nahoolhchoot. ꞋEt hoontsꞌi ꞌaw si hukwaꞌ nuszun kꞌunꞌa iloh. Nyun hukwaꞌ ninzun kꞌunꞌa ꞌuhóneh!”

⁴³ ꞋEt ndus de yakꞌuz lizas be hoodiltsai. ꞋEn ulhtus náyulhtsi.

⁴⁴ Tube oodzi unduda whe ꞌon nus ulhtus whe tenadudli. ꞋUskaiꞌ kꞌunꞌa ootsꞌu halhdzilh whe yun nadúltꞌi.

⁴⁵ Tenadudli-un ꞌetsul ꞌudija ꞌinkꞌez dunadija whe yugha hodulꞌehne tsꞌodi kꞌet nahunistez whe bughu nanja,

⁴⁶ ꞌinkꞌez ꞌubulhni, “Di ha sahtez? Doo ka si tankꞌus nóohtꞌi dunadahdilh ꞌinkꞌez whuchꞌa tenadahdli.”

Jesus ꞌawet huyílhchoot

⁴⁷ ꞋAwhuz yalhduk whe khuntsul lhane dune whuz de údulh, Judas huyulhni, ꞌen butso uyalh. ꞋEn whunizyane ꞌon ꞌat nane bubulh ꞌilhoghun ꞌuntꞌoh. Jesus ye nghoh neninya naidutitsꞌoos ha.

⁴⁸ ꞋInkꞌez Jesus ꞌuyulhni, “Judas, Yinka Dune Yeꞌ nadutántsꞌoos ꞌi be eh whunistꞌi whe whutlꞌa tálhtelh?”

⁴⁹ Jesus oonat núdilhyane, dawhútanelh la honilhꞌen, ꞌet ꞌuhuyulhni, “NeMoodihti saluzti be eh lhtsꞌutigan?”

⁵⁰ ꞋInkꞌez ꞌilhoghun yuzih usyin-un, Lizwif lubret ꞌukꞌenus diztiꞌ-un be ꞌulhna-un nailhni tsꞌunkꞌus yudzo yutsꞌa habeꞌ yalhtꞌo.

⁵¹ ꞋInkꞌez Jesus ubúlhni, “Njan dutísnelh, ꞌet stlꞌa wháhꞌaih.” ꞋInkꞌez nyoon oodzo yutꞌaiznai ꞌinkꞌez soo naꞌyinla.

⁵² ꞋEt lubret bumoodihne, lugliz whucho whusaldanne bumoodih, ꞌinkꞌez butso whudilhdzulhne cha highu nindil, ꞌinkꞌez Jesus ꞌudubúlhni, “Di ha saluzti ꞌinkꞌez tutꞌoh cha nuhle ꞌundunustꞌih hukwꞌunꞌa ska tíhdil?

⁵³ Dzin totsuk lugliz whucho nohtoh susda whe, ꞌaw ꞌoh daꞌ sólhchoot hukwa lheꞌzahtꞌen inleꞌ. ꞋEt hoontsꞌi ꞌandit netsudule, tsalhgus yo usda-un nohmoodih tileh, ꞌawet nohba néꞌhunintꞌo.”

Peter ꞌutni, “Ndun dune ꞌaw tꞌenuzuszun”

⁵⁴ ꞋAwet Jesus huyilhchoot ꞌinkꞌez lubret ꞌukꞌenus diztiꞌ-un highu dáhinilhti. ꞋInkꞌez Peter yoo niz de yuniyalh.

⁵⁵ ꞋEt naniztlꞌoo bez tsꞌe whuniz kwun húdulhkꞌan ꞌinkꞌez ꞌalhgoh nátlꞌaꞌhudiltsꞌiꞌ. Peter ꞌen cha butoh usda.

⁵⁶ Kwun zih usda whe ꞌilhoghun ꞌustle-un tsꞌekeyaz yunin tsꞌe yunilhꞌen ꞌinkꞌez ꞌuyulhni, “Ndun dune ꞌen cha yulh ꞌutꞌen inleꞌ.”

⁵⁷ ꞋEt hoontsꞌi yutsꞌoo dildlai ꞌinkꞌez ꞌuyulhni, “Tsꞌeke, ndun dune ꞌaw tꞌenuzuszun.”

⁵⁸ ꞋEt hukwꞌelhꞌaz ꞌatsulyaz inleꞌ whe ꞌet ꞌuyoon cha ꞌuyulhni, “Nyun cha bubulh ꞌilhoghun ꞌintꞌoh.” ꞋEt hoontsꞌi Peter ꞌutni, “ꞋAwundooh!”

⁵⁹ ꞋEt doo cha ꞌilho sadzi hukwꞌu hoonistꞌo ꞌet ꞌuyoon cha ꞌuyulhni, “ꞋAlhaꞌ hoontꞌoh ndun ꞌen cha yulh ꞌutꞌen. Galilee whutꞌen-un ꞌuntꞌoh ꞌet huwa.”

⁶⁰ ꞋEt Peter ndun dune ꞌuyulhni, “ꞋAw daja dini-un tꞌewhunuzúszun!” ꞋAwhuz yalhduk whe lugok dune ꞌudija.

⁶¹ ꞋEt neMoodihti Peter tsꞌu nálhꞌa ꞌinkꞌez yunin tsꞌe yunalhꞌen. ꞋEt Peter ꞌaho neMoodihti yughuni yunalni daja yudaniꞌ inleꞌ whe ndúyulhni, “Lugok dune ꞌudutinelh whutso tat tꞌesunuzínzun dutanelh.”

⁶² ꞋEt Peter ꞌaz whinya ꞌinkꞌez tube intse.

Lhugánne Jesus highu núwhulhya

⁶³ Ndunne dune Jesus yilhchootne, highudloh ꞌinkꞌez huyoolhchis.

⁶⁴ ꞋInkꞌez hina kꞌúnaꞌuzguz ꞌinkꞌez huyoonukat ꞌinkꞌez huyoodulhkut, “Neba nus hóoꞌen nedini mbe ꞌunyinla nyunízkuk?”

⁶⁵ ꞋInkꞌez lhat-un hoontsiꞌ whe hichꞌaz yalhduk.

Jesus nahiyilhne bubut nehinilhti

⁶⁶ ꞋAwet yulhkai ibulh dune tso whudilhdzulhne, ꞌudedo lubretne ꞌinkꞌez Moses be ꞌudustlꞌus ꞌukꞌu nunáguzne cha, ꞌenne ꞌilhuhozdil ꞌinkꞌez buba nahíyilhne but nehinilhti. ꞋInkꞌez ꞌuhuyúlhni,

⁶⁷ “Nyun Christ inli de, nedíni!” ꞋEt ꞌubulhni, “Nohdasniꞌ de, ꞌaw nohba ꞌalhaꞌ doosniꞌ ꞌaitꞌoh.

⁶⁸ Si cha hoonli nohooduskut de, ꞌaw sudóhniꞌ ꞌaitꞌoh ꞌinkꞌez ꞌaw sla nadoohtnih ꞌaitꞌoh.

⁶⁹ ꞋAndit whutsꞌun Yinka Dune Yeꞌ nailhni tsꞌe Yakꞌusda whelhtus-un tidalh.”

⁷⁰ ꞋInkꞌez tsꞌiyawh ꞌuhutni, “Nyun Yakꞌusda ooYeꞌ eh ꞌintꞌoh?” ꞋEt ꞌubulhni, “Tsꞌihꞌun ꞌudahni si, ꞌen ꞌustꞌoh.”

⁷¹ ꞋInkꞌez ꞌuhutni, “ꞋAw ꞌon ghun hoonli highun nedóniꞌ hukwa lheꞌtsꞌunízun. Whenichꞌoh ooze whuzdántsꞌo.”