Luke 21 - Yak'usda Ooghuni

Tsandilh telꞌen-un, huwa íninꞌai-i

¹ ꞋEt ndo yútanꞌen whe hoonzooꞌ ꞌuntꞌohne sooniya howa hítaꞌalh-i, sooniya be kát-i be húyaꞌaih, ꞌet ꞌubunilhꞌen.

² ꞋInkꞌez ꞌilhoghun tsandilh telꞌen-un, ꞌaw ꞌiyaz yutꞌi-i, nanki sooniya tsꞌuditiꞌ-i, ꞌi deyánꞌai.

³ ꞋInkꞌez ꞌubulhni, “ꞋAlhaꞌ nohdusni, ndun tsandilh telꞌen-un, ndunne tsꞌiyawh buba nus lhai deínꞌai whe ꞌuntꞌoh.

⁴ Ndunne hoonzooꞌ ꞌuntꞌohne lhai huyutꞌi-i, ꞌi Yakꞌusda ba hiloh za dehúyanꞌai. ꞋEt ndun tsandilh telꞌen-un ꞌaw ꞌi yukꞌehútinalh-i, ꞌi tsꞌiyawh deyánꞌai.”

Njan lugliz whucho gak whutáleh-un, ꞌet Jesus huwu yalhduk

⁵ ꞋEt oolune ꞌawet lugliz whucho howu yahalhduk ꞌinkꞌez hutni, “Tseyaz lhehuldzoo tse ꞌi be ꞌuhoolya. ꞋInkꞌez Yakꞌusda gha tꞌaih ꞌi cha be nodilhtsiꞌ.” ꞋEt Jesus ꞌubulhni,

⁶ “Ndi tsꞌiyawh nulhꞌen-i, ꞌoh de whusaóotiltsꞌulh whe ꞌaw ꞌilho tse lhkꞌulhdutásdlal, tsꞌiyawh nadúntijulh wheꞌ hoontꞌoh.”

Nkede ꞌuwhutánelh?

⁷ ꞋInkꞌez huyoodulhkut, “Whuneoodulhꞌeh-un, ntsꞌo whúde ꞌuwhutánelh? ꞋInkꞌez ꞌawet nilhdukw suliꞌ de, dantꞌi-i be whe hóodutaltsilh?”

⁸ ꞋInkꞌez ꞌubulhni, “Soo cho howahli. Khun te dune nanohonooꞌah junih. Lhane sooziꞌ gha whusahútidulh ꞌinkꞌez ꞌuhudutinelh, ‘Si ꞌen ꞌustꞌoh,’ ꞌinkꞌez ꞌawet whusawhútikulh, hutni de, khun te ubuntoohyaꞌ junih.

⁹ Dune lhugan-un whulh ꞌúdahtsꞌo de, ꞌinkꞌez dune lhdulhyoh nehóninla de, ꞌoh ꞌudechoo whusawhútikulh wheꞌ hoontꞌoh. Khun te whénoolhjut junih. ꞋAwhuz whula toh-un, ꞌaw whenghoh iloh ꞌuhoontꞌoh.”

¹⁰ ꞋEt ꞌubulhni, “Lhelhdowh didowhne lhchꞌaz nehúdutadulh. ꞋInkꞌez yinka ndulcho lerwe be ꞌustlenne cha lhchꞌaz nehúdutadulh.

¹¹ Lhelhdun wheóonujut whe yun nuhútitnah. ꞋInkꞌez dai cha whutáleh dada cha whutáleh. Dune whe whunujut-un hotiꞌelh, ꞌinkꞌez ndus de hooncha-un whe hóodutaltsilh cha hotiꞌelh.

¹² ꞋEt ndo ho nduwhútanelh-un whutso, ꞌet nohotálhchulh ꞌinkꞌez dzoh nunóhotilhdeh. Lizwif bulugliz whumoodihne, butlꞌa nóhotilelh ꞌinkꞌez ꞌanohotilelh. ꞋInkꞌez lerwene yun humoodihne cha si sooziꞌ gha bubut nenohotalelh.

¹³ ꞋEt ꞌoh de si sghun khuni unzoo-i be yátilhduk.

¹⁴ ꞋEt huwa ꞌoh de, ‘Daja doosniꞌ suba’ noohzin junih.

¹⁵ Khuni ꞌinkꞌez be wháhnih-i nohtlꞌa dutisꞌalh. Mbene la nohchꞌaz ditnine ꞌaw nohtsꞌoohoodódlai ꞌaitꞌoh. ꞋInkꞌez ꞌaw daja ꞌuhudooniꞌ ꞌaitꞌoh.

¹⁶ Nohdusneke, ꞌinkꞌez nohulhutsinke, nohnatneke, ꞌinkꞌez nohkꞌekene, whutlꞌa nóhotilelh ꞌinkꞌez whulohne nohtoh nohotighan.

¹⁷ ꞋInkꞌez si sooziꞌ gha tsꞌiyanne nohtsꞌu dutitni.

¹⁸ ꞋEt hoontsꞌi Yakꞌusda ꞌaw nohla dootnih ꞌaitꞌoh. Nohtsighaꞌ ꞌilho hoontsꞌi ninta dókes ꞌaitꞌoh.

¹⁹ Yakꞌusda ba soo cho núdulhya. ꞋI gha la nohzul ohtun.”

Jerusalem musai whutilhtselh-un

²⁰ “Jerusalem lhuganne whunasguz de, ꞌet whunulhꞌen de, tꞌeoonoohzeh ꞌawet nilhdukw suliꞌ nyo keyoh whuti teoodutálneh.

²¹ ꞋEt ndúhooja de, Judea whutꞌenne shus kꞌuz tse hutoolhdilh. Mbene la ꞌet keyoh whuti ꞌet dilhtsꞌine, tsꞌiyawh whuchꞌaz hoodilh. ꞋInkꞌez mbene la whunat whutꞌine, ꞌenne cha khun te keyoh whuti-un tsꞌu hutooyaꞌ junih.

²² ꞋAwet dzoh nutiszut-un whusahooltsꞌulh wheꞌ hoontꞌoh. ꞋEt huwun ꞌukꞌehooguz-un, tsꞌiyawh lhaóodutaneh.

²³ ꞋEt de dzin mbene la ulchanne, ꞌinkꞌez mbene la duyaz eꞌúlhtꞌukwne cha, ꞌenne buba tube ꞌon nus hootátsiꞌ. Ndi yun hoontsiꞌ-un ookꞌewhudutaltsꞌulh ꞌet huwa. Yakꞌusda ye húnilchꞌe-i, ꞌi cha dune bukꞌeidutaltsꞌulh.

²⁴ Whulohne saluzti ookꞌa be tsꞌiyawh hútigan. ꞋInkꞌez ꞌonghohne hitálchulh ꞌinkꞌez lhelhdun keyoh tsꞌe hubotilhna. ꞋInkꞌez ꞌudun yun kꞌut whutꞌenne, buba neꞌunguz-un whutsꞌun, Jerusalem ndulcho whe hukwꞌu nótidulh.”

Yinka Dune Yeꞌ whusanátidalh-un

²⁵ “Sa cha ꞌinkꞌez ꞌulhdzis oozaꞌ, ꞌinkꞌez sum cha, tsꞌiyawh hoonli be hóodutaltsilh. Ndi yun kꞌut whe lhelhyoone dunene, tsꞌiyawh tube dzoh notideh ꞌaw dahútinelh-un tꞌehonúszun. Yatooꞌ cha ꞌinkꞌez tatsi taditni whe taba ndulcho yántighus.

²⁶ Whe hunuljut kꞌet, whulohne budzi ꞌetsul ꞌutinelh. Ndo yatꞌah be hóolhtus-i be ndulcho nohótitnah ꞌet huwa.

²⁷ ꞋOh de de, Yinka Dune Yeꞌ kwꞌus toh ye ulhtus-i be ꞌinkꞌez ootsꞌu ha yánduz-i cha, whuz unꞌa huyuntilhꞌelh whe whusatíyalh.

²⁸ ꞋEt njan nduwhewhúnitꞌen de, ndo yutohꞌen ꞌinkꞌez whunólhni. Nohnahootalhkulh-un ꞌawet nilhdukw suliꞌ.”

Mai cho chun, fig huyúlhni-i, oogha whútsꞌodulꞌeh

²⁹ ꞋEt be náwhutnuk ꞌi be whutsꞌodulꞌeh ꞌi be ubulh yalhduk whe njan dúbulhni, “Fig huyulhni ooduchun ꞌinkꞌez ꞌuyoo duchun cha nulhꞌen.

³⁰ Bindai ha whenilhꞌaz ꞌi gha la tꞌeoonohzin danghun ꞌawet nilhdukw wheꞌ hoontꞌoh.

³¹ Nohni cha whuz unꞌa nohnalh ꞌet nduwhútꞌen de, ꞌet huwa la tꞌeoonoohzeh Yakꞌusda whe lerwe unli-un ꞌawet nilhdukw wheꞌ hoontꞌoh.

³² ꞋAlhaꞌ nohdusni, ꞌandit whudizulhne ꞌaw yalhahásdla ndó tanelh-un tsꞌiyawh ꞌet lhawhúdutanelh ꞌet whutsꞌun.

³³ Yat ꞌinkꞌez ndi yun kꞌut cha tsꞌiyawh gak whutáleh, ꞌet hoontsꞌi sghuni ꞌaw hooloh lhtisdle.”

Soo cho khahdli

³⁴ “ꞋEt hoontsꞌi soo cho khahdli. Khun te nzoodulhꞌi, ꞌinkꞌez tanahtnai, ꞌinkꞌez ndi yun kꞌut hooni ꞌet za huwu nuní nahzut, ndowhi be nohdzi dobun junih. Doo ka sih ꞌet dzin hukwa tse lhúwhulhlih whe whusahóoltsꞌit.

³⁵ ꞋOh de ndi yun kꞌut whuduneꞌne ꞌantsꞌi hulhgooh leꞌ hutinelh khun whusaóotilhtsꞌulh ꞌet huwa.

³⁶ ꞋEt huwa ꞌahoolhyiz hukwa tse hóhleꞌ ꞌinkꞌez ꞌahoolhyiz tenadoodli ntsꞌoh daóotanelh-un nohyit ꞌuwhutánelh-un huba soo ꞌúlhdzooꞌ ꞌinkꞌez Yinka Dune Yeꞌ ꞌen oobut tihyin.”

³⁷ ꞋAwet dzin totsuk Jesus lugliz whucho dune hodulhꞌeh. ꞋInkꞌez hulhgha totsuk ndo shusyaz, Olive ꞌi huyulhni, whuz wheyaih, titelh ha.

³⁸ ꞋEt tsꞌiyanne ꞌudaꞌ cho lugliz whucho dahúdulh huyootuzalhtsꞌilh ha.