Luke 19 - Yak'usda Ooghuni

Zacchaeus ꞌen cha dune hiye dujis-i oogha íyultsꞌut

¹ ꞋEt Jesus Jericho tsꞌoozya ꞌinkꞌez ꞌoh whuya lhuseya.

² ꞋInkꞌez ꞌet ꞌilhoghun dune ꞌen ꞌet usda, Zacchaeus huyulhni. ꞋEn sooniya ꞌilhunaoosꞌaihne bumoodih, ꞌinkꞌez soo dinꞌa-un.

³ ꞋInkꞌez Jesus mbe ꞌuntꞌoh yuntilhꞌelh hukwaꞌ ninzun. ꞋEt hoontsꞌi ꞌilhunaoosdilne bugha ꞌaw yooꞌen ꞌaitꞌoh. Ndun dune ndukw ꞌet huwa.

⁴ ꞋInka butso tilhgai ꞌinkꞌez duchun, Sycamore huyulhni yuntilhꞌelh ha, ꞌi kꞌut dugailget. Whuz unꞌa Jesus ꞌoh whuya lhutiyalh.

⁵ ꞋEt Jesus ꞌet neninya, ndo yútanꞌen whe yutilhꞌen, ꞌinkꞌez ꞌuyulhni, “Zacchaeus ꞌa cho nanáindaih! ꞋAndit dzin nyoh tisdalh hubaꞌ hoontꞌoh.”

⁶ ꞋInka ꞌa cho nanája. ꞋInkꞌez hoontꞌiꞌ whe duyoh tsꞌe yughu nuséya.

⁷ ꞋEt tsꞌiyanne hinalhꞌen whe whutsꞌo disnih, ꞌinkꞌez howu yahalhduk, “Lubeshi ꞌulhꞌen-un, ꞌen zih tidalh.”

⁸ ꞋEt hoontsꞌi Zacchaeus dudinya ꞌinkꞌez Moodihti ꞌuyulhni, “SMoodihti whunilhꞌen, ndai la ꞌustꞌi-i lhulcho telꞌenne gha sdle. ꞋInkꞌez mbene la bubeꞌ hoostsꞌitne, dit ꞌet ꞌuniltsuk-i butlꞌa násꞌalh.”

⁹ ꞋEt Jesus ꞌuyulhni, “ꞋAndit dzin dune ye dujis-i whe njan yoh dilhtsꞌine bugha íyultsꞌut. Ndun ꞌen cha Abraham tsꞌu hainzut whe ꞌuntꞌoh ꞌet huwa.

¹⁰ Ninta ninkatne, Yinka Dune Yeꞌ, ꞌen bukúniztai ꞌinkꞌez ꞌubutilhyih ha, ꞌet huba whusainya.”

Ndi khuni be whutsꞌodulꞌeh-i, ꞌi be tꞌezninzun neMoodihti whusanátidalh whutsꞌun, ndiz unꞌa ndi yun kꞌut ꞌuzdóltsꞌiꞌ

¹¹ ꞋEt njan hidantsꞌo whe ꞌuyoo khuni be whútsꞌodulꞌeh-i be bubulh yawhénilhduk. Jerusalem whenghoh hidulh ꞌinkꞌez ꞌuhuninzun ndet Yakꞌusda whe lerwe unli-un, ꞌawet ꞌaho whe óodutaltsilh huninzun.

¹² ꞋEt huwa ꞌubulhni, “ꞋIlhoghun dune ncha-un, ꞌen nilhdzaꞌ keyoh tsꞌe whinya. ꞋEt whuz oozya de, whuz whulerwe hitilhtselh. ꞋInkꞌez ꞌet dukeyoh tsꞌe nátidalh.

¹³ Tiyalh whutso whunizyane dude ꞌulhnane ꞌanih ubudaniꞌ. ꞋInkꞌez ꞌilhoghun hinli whe sooniya diztiꞌ-i, ꞌilho butlꞌa inꞌai, ꞌinkꞌez ꞌubulhni, ‘Whusanátisdalh whutsꞌun be óohtꞌen ꞌinkꞌez be ꞌéꞌ oohleh,’ ꞌubulhni.

¹⁴ ꞋEt hoontsꞌi bulh keyoh whutꞌenne hika lheꞌnizun. ꞋInka whinya hukwꞌelhꞌaz keyoh whuduneꞌne, ꞌenne whulohne, keyoh whunat whuz whe bahalhꞌaꞌ hiba dóniꞌ ha, ‘ꞋAw ndun dune nelerwe ooleꞌ hukwa lheꞌuznízun,’ hutni.

¹⁵ ꞋEt ndun dune lerwe suliꞌ whe whusanája, ꞌet ndunne dude ꞌulhnane, sooniya butlꞌainꞌaine, ꞌanih ubúlhni. ꞋIlhone hinli whe daltsuk hiba ꞌinla-un ꞌet nahootáꞌalh hukwaꞌ ninzun.

¹⁶ ꞋEt ꞌudechoo-un yughu ninya ꞌinkꞌez ꞌuyulhni, ‘SMoodih ndi sooniya diztiꞌ-i szih nenínꞌai-i, ꞌi be whunizyai ꞌuniltsuk-i be mba ꞌusdla.’

¹⁷ ꞋInkꞌez ꞌuyulhni, ‘Seꞌulhna-un, tube soo ꞌínja! Ntsool-iyaz ntlꞌasꞌai-i, tsꞌihꞌun unꞌa be neꞌzintꞌen. ꞋEt huwa whunizyat-un keyoh whuti whumoodih tanleh ꞌet ntlꞌa hóosꞌai.’

¹⁸ ꞋEt bulh nane whusainya ꞌinkꞌez ꞌuyulhni, ‘SMoodih nzooneya diztiꞌ-i szih nenínꞌai-i, ꞌi be kwulat ꞌuniltsuk-i be mba ꞌusdla,’ yúlhni.

¹⁹ ꞋEt ndun ꞌuyulhni, ‘Nyun cha kwulat-un keyoh whuti whumoodih tanleh, ꞌet ntlꞌa hóosꞌai.’

²⁰ ꞋEt ꞌuyoon cha yughu ninya ꞌinkꞌez ꞌuyulhni, ‘SMoodih, nah njan nzooneya diztiꞌ-i szih nenínꞌai-i. ꞋI dzezoh be beꞌ zuschuz ꞌinkꞌez mba ꞌet ꞌusꞌai.

²¹ ꞋAw dune dutso-un inli tꞌenyunúszun, ꞌet huwa nye nuzjut. Ndai la nchꞌeꞌ lhiloh, ꞌi hoontsꞌi nailhchuk. ꞋAlhnuzinloh-i, ꞌi ha nínle,’ yulhni.

²² ꞋInkꞌez ꞌuyulhni, ‘Nyunchꞌoh nze whe dája dini-un, ꞌet whe mba nahutisyeh. Seꞌulhna-un intsiꞌ. Tꞌeooninzun dantꞌoh-un dune usdli, dalhúzusꞌai-i, uschuk. ꞋInkꞌez ndai la ꞌalhnúsdlel-i ha núsdlih ꞌinkꞌez be sooniya ꞌusꞌen.

²³ ꞋEt di ha sooniya lhkꞌenádaꞌaihne uszooneya ꞌenne butlꞌa lheyinꞌal? ꞋEt de daꞌ, whusanasja de, ꞌon ꞌun be ꞌéꞌoosdleh?’

²⁴ ꞋEt ꞌonghoh nudilhyanne ꞌubulhni, ‘Sooneya diztiꞌ-i ooghu nayulhchoot. ꞋInkꞌez mbe la whunizyai ꞌinla-un, ꞌen oogha ínahꞌaih.’

²⁵ ꞋEt hoontsꞌi ꞌuhuyulhni, ‘Moodih ꞌudaꞌ ꞌawet whunizyai ꞌutꞌi.’

²⁶ ꞋInka dune diztiꞌ-un ꞌutni, ‘Mbene la hoonli ꞌutꞌi-un, ꞌon ꞌun lhai oogha títꞌalh. ꞋInkꞌez mbe la hoonli lhitꞌih-un, ꞌaw ꞌi yutꞌi, ꞌi hoontsꞌi ooghu nayitálchulh.

²⁷ ꞋEt ndunne schꞌaz ditnine, ska lheꞌhunízun whe bulerwe tisdleh, whusábahle ꞌinkꞌez sbut ꞌet bubahghan.’”

Yakꞌusda hudilhtiꞌ whe keyoh Jerusalem hunindil

²⁸ ꞋEt ndubúdaniꞌ-un hukwꞌelhꞌaz Jesus Jerusalem tsꞌe hutizdil whe butso tizya.

²⁹ ꞋEt ꞌawet shusyaz, Olive huyulhni, ꞌet keyoh whuyaz Bethphage ꞌinkꞌez Bethany huwhutni shusyaz zih whuzdla, whenghoh hidulh whe nane yugha hodulꞌehne ubutílhꞌaꞌ.

³⁰ ꞋInkꞌez ꞌutni, “Keyohyaz nohanchꞌaz tsꞌe whuz ahꞌus. Keyoh whuyaz nenahꞌaz de, ꞌet ꞌilhoghun yeztliyaz, donkey huyúlhni, whédintꞌi, ꞌi ꞌaw whutsodaꞌ dune yukꞌulhídoh-i, ꞌi tihꞌelh. Kꞌunaoohꞌuk ꞌinkꞌez ndiz tóolhdlooh.

³¹ Dune nohoodulhkut de, di ha ꞌulhꞌen kꞌunahꞌuk? ꞋEt njan dúdohniꞌ, neMoodihti yukaꞌ ninzun.”

³² ꞋEt whebalhꞌaꞌne whuz hoozꞌaz whe daja ni-un, ꞌet whuz unꞌa nahuhoonꞌai.

³³ ꞋEt yeztliyaz kꞌunuháyuꞌuk whe oochꞌeꞌne ꞌubuhutni, “Di ha ꞌulhꞌen ndi yeztliyaz kꞌunahꞌuk?”

³⁴ ꞋInkꞌez ꞌet ꞌubuhútni, “NeMoodihti yukaꞌ ninzun.”

³⁵ ꞋEt Jesus highu hinílhdlukw. ꞋInkꞌez dichꞌoh dunaih yeztliyaz hikꞌehúyinla, ꞌinkꞌez Jesus hikꞌehúyilhti.

³⁶ ꞋEt tizya whe dunaih ti yun hiba nehínilhbal.

³⁷ ꞋEt ꞌawet shusyaz, Olive whuduhútidulh ꞌet huwu nilhdukw whe, lhane yugha hodulꞌehne huhóostꞌet. ꞋEt dáhooltus-un ꞌuhóoja-un neꞌwhustꞌen huwunalhꞌen-un, ꞌet huwa tube cho Yakꞌusda hudilhtiꞌ.

³⁸ ꞋInkꞌez ꞌuhutni, “Lerwe ꞌen Moodihti booziꞌ be whusainya-un, ꞌukꞌenus hoonzoo-un oogha whultsꞌut! Ndo yakꞌuz whudutághel, ꞌinkꞌez ꞌudedo kꞌus whudutatiꞌ.”

³⁹ ꞋEt whulohne Phariseene butoh whutsꞌun hitsꞌu huyih, “Dune hodulhꞌeh-un, nye hódilꞌeꞌne hukwa budini!”

⁴⁰ ꞋEt hoontsꞌi ꞌubulhni, “Nohdusni, njan tꞌewhudusnih de, tse daꞌ ꞌaho yatoolhdih.”

Jerusalem whutꞌenne bubulh dawhutanelh, ꞌet Jesus howintse

⁴¹ ꞋEt keyoh whuti whenghoh uyalh, Jerusalem whutilhꞌen whe howintse.

⁴² ꞋInkꞌez ꞌet ndutni, “Nohni Jerusalem whutꞌenne, ꞌandit dzinuncha tꞌeoonahzun nohdzin ꞌuhoontꞌoh. ꞋEt huwa daꞌ tꞌeoonóhzin ntsꞌenꞌa whe nohba whudutághel-un. ꞋEt ꞌandit nohna chꞌa whuntistꞌi.

⁴³ ꞋEt dzin whusaootiltsꞌulh nohchꞌaz ditnine nohnahutigus. ꞋInkꞌez lhez lhkꞌehitalhkulh nohnat ndulcho whe, ꞌinkꞌez whez tsꞌe nohuhootatun.

⁴⁴ ꞋInkꞌez keyoh whuti-un lhkꞌunahuhootálhkulh. ꞋInkꞌez mbene whez tsꞌe dilhtsꞌine cha tsꞌiyawh bubulh ꞌuwhútanelh. ꞋAw ꞌilho tse lhkꞌudizꞌai-i nohba ꞌet nenálhodutasꞌal. Nohulhyis-un nohtsꞌó whusaiyan-un, ꞌaw tꞌelhonáhzil, ꞌet huwa.”

Lugliz whucho tsꞌe óoketne ꞌinkꞌez ꞌeꞌóoketne, tsꞌiyawh Jesus tenábuninyoot

⁴⁵ ꞋEt lugliz whucho whunaꞌniztlꞌoo-un daninya ꞌinkꞌez óoketne ꞌinkꞌez ꞌeꞌóoketne, tsꞌiyawh tenábuninyoot.

⁴⁶ ꞋInkꞌez ꞌubulhni, “ꞋUkꞌehóoguz wheꞌ njan ndutni, ‘Syoh ꞌet tenadudli bayoh ꞌúhoontꞌoh.’ ꞋEt hoontsꞌi ꞌundunutꞌihne bayoh whuzúlhtsi.”

⁴⁷ ꞋInkꞌez ꞌet lugliz whucho dzin totsuk dune hodulhꞌeh. ꞋEt hoontsꞌi soo ꞌudedo lubretne, ꞌinkꞌez Moses be ꞌudustlꞌus ꞌukꞌu nunáguzne, ꞌinkꞌez dune tso whudilhdzulhne cha, tsꞌiyawh hituzilhghelh-un hukwa hitísꞌen.

⁴⁸ ꞋEt hoontsꞌi ꞌilhunaoosdilne, tsꞌiyawh hinat núdilhya ꞌinkꞌez soo cho huyoozílhtsꞌai. ꞋEt huwa ꞌaw nyoonne hizoolhghelh ꞌaitꞌoh.