Luke 18 - Yak'usda Ooghuni

Dune ꞌahoolhiz tenazdoodli ꞌinkꞌez whulazdootnih junih

¹ ꞋEt Jesus be whutsꞌodulꞌeh-i, ꞌi ghun ꞌubulhni, dune ꞌahoolhyiz tenahudoodli ꞌinkꞌez whulazdootnih junih.

² ꞋInka ꞌubulhni, “ꞋEt ꞌilhoghun keyoh, ꞌet nahíyilh-un, ꞌaw Yakꞌusda élhniljut, ꞌinkꞌez ꞌaw dune cha lheꞌílhꞌi.

³ ꞋEt keyoh ꞌilhoghun tsandilh, ꞌen yughu ninya ꞌinkꞌez ꞌuyulhni, ‘Schꞌaz ditni-un, dásinla-un sba tsꞌihꞌun naꞌhoonleh!’

⁴ ꞋEt ꞌaw yoozólhtsꞌaiꞌ ꞌaitꞌoh. ꞋEt hukwꞌelhꞌaz naꞌdudútni ‘ꞋAw Yakꞌusda be lhnuzjut ꞌinkꞌez dune cha ꞌantsꞌi sba hinli.

⁵ ꞋEt hoontsꞌi ndun tsandilh sdabe tesudule ꞌet huwa ooba tsꞌihꞌun naꞌwhutisdlelh, doo ka si súdoolhdzas!’”

⁶ ꞋInkꞌez neMoodihti ꞌubulhni, “Ndun nahiyilh-un tsꞌihꞌun lheꞌitꞌoh-un, daja ni oozúlhtsꞌai.

⁷ ꞋAw lakw Yakꞌusda ooduneꞌne, mbene la dzin ꞌinkꞌez ꞌulhdzis ibulh hitsꞌu tedudlihne, ꞌenne ꞌaw talhúbudini. ꞋEt soo eh buba kꞌutítnelh? Whuz unꞌa bubaꞌ whutilelh?

⁸ ꞋInkꞌez ꞌunohdusni, ꞌahoh buba kꞌutítnelh! ꞋEt hoontsꞌi Yinka Dune Yeꞌ ndi yun kꞌut whusanája de, soo eh dune ooba ꞌalha ꞌuhoontꞌohne naitálelh?”

Dahoontꞌoh huwa dune Yakꞌusda nalh tsꞌihꞌun naꞌuja

⁹ Whulohne tsꞌihꞌun unꞌa ꞌustꞌoh naꞌhundunúdzun, ꞌinkꞌez ꞌonghohne, hintsiꞌ ubunínzun. ꞋEt huwa Jesus ꞌenne nawhutnuk ꞌi be whútsꞌodulꞌeh ꞌi be bubulh yalhduk whe njan ndúbulhni,

¹⁰ “Nane dune Lizwifne bulugliz whucho tenahudutidli ha whuz whehanꞌaz. ꞋIlhoghun Pharisee ꞌuntꞌoh, ꞌinkꞌez ꞌilhoghun sooniya ꞌilhunaoosꞌaih-un ꞌuntꞌoh.

¹¹ Ndun Pharisee ꞌen dichꞌoh usyin ꞌinkꞌez tenadudli whe njan ndutni, ‘Yakꞌusda musi nyudusni. ꞋAw ꞌuyoonne dune dúlhuztꞌoh. ꞋUyoonne eꞌwhuhalhtsꞌit sooniya be, ꞌenne ꞌaw tsꞌihꞌun lheꞌitꞌohne ꞌuhintꞌoh, ꞌinkꞌez tsꞌekoo kꞌus dunene bulh níntaꞌ ꞌutꞌihne. ꞋInkꞌez ndun sooniya ꞌilhunaoosꞌaih-un, ꞌen cha bundúlh uztꞌoh.

¹² Lisman totsuk nat sóo hoosnih. ꞋInkꞌez ndai la sba ꞌukꞌelha unli-i, ꞌi cha ooloh, 10%, lugliz huwasꞌaih,’ ni Pharisee.

¹³ ꞋEt ndun sooniya ꞌilhunaoosꞌaih-un, ꞌen cha ꞌudun usyin. ꞋAw ndo hoontsꞌi yutóꞌen ꞌaitꞌoh ꞌinkꞌez yo nilhꞌai. ꞋInkꞌez dudzi kꞌut hoolhchis, ‘Yakꞌusda sgha teꞌninzeh! Lubeshi ꞌulhꞌen-un ꞌustꞌoh,’ ni.”

¹⁴ ꞋEt Jesus ꞌubulhni, “Nohdusni ndun sooniya ꞌilhunaoosꞌaih-un, ꞌen Yakꞌusda nalh tsꞌihꞌun naꞌuja whe duyoh tsꞌe naoosja. ꞋEt ꞌilhoghun ꞌaw ndúlhinel. ꞋInkꞌez mbe la duba naꞌudzooꞌ-un, ꞌen yooya yutilhtselh. ꞋInkꞌez mbe la yo ꞌúdudildzun-un, ꞌen Yakꞌusda yudutalhtiꞌ.”

Jesus tsꞌoodunneyaz buba tenadudli

¹⁵ ꞋEt chalhtsꞌulne highu ninla khun tilah bukꞌudólni ha. ꞋEt yugha hodulꞌehne honilhꞌen whe dah ꞌubuhutni.

¹⁶ ꞋEt hoontsꞌi Jesus yugha hodulꞌehne ꞌanih ꞌubulhni, “Whute tsꞌoodunneyaz stsꞌó toodilh. Dah budóhniꞌ junih. Mbene la Yakꞌusda whe lerwe unli-un whuz dilhtsꞌine, ꞌenne tsꞌoodunneyaz ubunduhúltꞌoh wheꞌ hintꞌoh.

¹⁷ Soo tsꞌihꞌun ꞌalhaꞌ nohdusni, Yakꞌusda whulerwe unli tsꞌe, mbene la Yakꞌusda bulerwe unli-un ꞌaw tsꞌoodunneyaz kꞌunꞌa lhuhuhóolhchulh de, ꞌaw whuz dahóoyaꞌ ꞌaitꞌoh.”

Dune hoonzooꞌ ꞌuntꞌoh datinelh whe ꞌilhiz hutinalh-un whuchꞌa ootálhdoh

¹⁸ ꞋEt ꞌilhoghun dune moodih uncha-un Jesus yoodulhkut, “Dune hodulhꞌeh-un unzoo-un, ntsꞌenꞌa datisnelh whe ꞌilhiz khutisnalh-un whuchꞌa ootásdoh?”

¹⁹ ꞋInka Jesus ꞌuyulhni, “Di haꞌ unzoo-un sudini? ꞋAw ꞌilhoghun unzoo-un hooloh. Yakꞌusda ꞌen za unzoo whé ꞌuntꞌoh.

²⁰ Ndai Yakꞌusda khuni dune butlꞌa idanꞌai-i, ꞌi tꞌeninzun. Khun te tsꞌekoo bulh ninta oohtꞌen junih. Dune soolhghelh junih. ꞋUndunoohtꞌih junih. ꞋUyoonne ba hoohtsꞌit junih. Nohbá ꞌinkꞌez nohloo bulh budólhtiꞌ.”

²¹ ꞋEt ꞌuyulhni, “Usool daꞌ whutsꞌun, ndi tsꞌiyawh ookꞌuneꞌ zustꞌen.”

²² ꞋEt Jesus njan whudantsꞌo whe ꞌet ꞌuyulhni, “ꞋAwhuz ꞌilhoghun mba ꞌet whuzꞌai. Ndai la ꞌintꞌi-i tsꞌiyawh be ꞌóonket, ꞌinkꞌez telꞌenne gha nínꞌaih. ꞋEt de la yakꞌuz diztiꞌ-i, ꞌet mba oolaꞌ. ꞋInkꞌez ꞌanih seꞌ ꞌutꞌen kꞌoh tuneꞌ óntꞌen ha sunanyalh.”

²³ ꞋEt whudántsꞌo whe tube oodzi yo ꞌúja. Ndun dune tube hoonzooꞌ whe ꞌuntꞌoh ꞌet huwa.

²⁴ ꞋEt Jesus yunilhꞌen whe ndun tube oodzi unduda suliꞌ, ꞌet ꞌutni, “Hoonzooꞌ ꞌuntꞌohne dawhulcho whe buba howa whulnaꞌ whe Yakꞌusda whe lerwe unli tsꞌe hutidulh.

²⁵ ꞋEt khuna ncha-i, camel huyulhni, ꞌi ooba howa lhuhoolnaꞌ whe ughabatsulh oolatoh ookonínꞌa-un hukwutilgwulh. ꞋEt whanus howa whulnaꞌ whe hoonzooꞌ ꞌuntꞌoh-un Yakꞌusda lerwe unli-un datíyalh.”

²⁶ ꞋEt whudantsꞌone ꞌuhutni, “Mbe za suba doojih?”

²⁷ ꞋEt hoontsꞌi ꞌubulhni, “Dunene ꞌuhuhooleh ꞌaitꞌoh, ꞌet hoontsꞌi Yakꞌusda ba huwa lhúhoolnaꞌ wheꞌ hoontꞌoh.”

²⁸ ꞋEt Peter yatilhduk whe Jesus njan ndúyulhni, “Whunilhꞌen tsꞌutꞌi-i, ꞌi tsꞌiyawh oolazditni ꞌinkꞌez nye ꞌutꞌen kꞌoh tsꞌe tsꞌootꞌen ha nyutsꞌun tizdil.”

²⁹ ꞋInka ꞌubulhni, “ꞋAlhaꞌ nohdusni, Yakꞌusda whe lerwe unli-un, ꞌet huwa dune duyoh huwu tizya de, kꞌus dudusneke, kꞌus dulhutsinke te, kꞌus duꞌat, duzkeh cha, tsꞌiyawh huwu tizya de,

³⁰ ꞌet ndúja-un, ꞌen ꞌon nus lhat-un ootlꞌa naóotikulh. Nus de whusahóoltsꞌut de, ꞌet ꞌandit ꞌilhiz hutinalh.”

Jesus datitsah-un whulh tat huwu yalhduk

³¹ ꞋEt ndunne whunizyane ꞌon ꞌat nane, ꞌudun nebuninla ꞌinkꞌez ꞌubulhni, “Soo zulhtsꞌai, Jerusalem tsꞌuztidulh ꞌinkꞌez Yinka Dune Yeꞌ, nus hooꞌenne, ꞌen ghun ꞌukꞌehuyanguz-i, ꞌi tsꞌiyawh lhawhudutatneh.

³² Lizwifne ꞌudun yun kꞌut whutꞌenne butlꞌa hítilhtelh. Highu notilyeh, highu tidloh, ꞌinkꞌez higha dútazoh.

³³ Huyootalhtsus ꞌinkꞌez hituzilhghelh. ꞋInkꞌez whulh tat dzin dunadutádalh.”

³⁴ ꞋEt hoontsꞌi njan ubúlhni-un, ꞌaw bubeni tálhodulhtsꞌit. Daja ni-un buchꞌa whuntistꞌi. ꞋAw daja ni whe ꞌutni-un, ꞌaw tꞌehonúszun.

Dune hoos̱ꞌen-un, Jesus hooꞌen nayulhtsi

³⁵ ꞋEt hukwꞌelhꞌaz Jesus keyoh Jericho whenghoh uyalh whe, dune hoos̱ꞌen-un ti whuzih usda, ꞌinkꞌez datso.

³⁶ Lhane ꞌoh whuya udulh whe ꞌet buduztsꞌai. “ꞋEt dawhutꞌen wheꞌ whutni?” ꞌubulhni.

³⁷ ꞋEt ꞌuhuyulhni, “Jesus Nazareth whutꞌen-un ꞌoh whuya uyalh.”

³⁸ ꞋEt huyih, “Jesus, David ootsꞌuhainzut-un, sgha teꞌninzeh!”

³⁹ ꞋEt ꞌudetso ꞌudulhne khuni ulhtus-i be, “Tꞌeduzinih!” huyúlhni. ꞋEt hoontsꞌi ꞌon nus nintꞌi whe huyih, “David ootsꞌuhainzut-un, sgha teꞌninzeh!” ni.

⁴⁰ ꞋEt Jesus ꞌilhiz neninya ꞌinkꞌez dune hoos̱ꞌen-un dutsꞌeꞌ hítoolhtelh ubúlhni. ꞋEt Jesus hizih nehinilhti whe yoodulhkut,

⁴¹ “Ndet mba ꞌuwhutisdlelh hukwaꞌ ninzun?” “Moodihti hoosꞌen silhtsi!” ni.

⁴² ꞋEt Jesus ꞌuyulhni, “Honꞌen naoodleꞌ! Mba ꞌalhaꞌ ꞌustꞌoh-un ꞌet huwa soo naꞌinja.”

⁴³ ꞋEt ꞌaho hooꞌen sulih, ꞌinkꞌez Jesus yuntizya ꞌinkꞌez Yakꞌusda dilhtiꞌ. ꞋEt tsꞌiyanne whunalhꞌenne cha tsꞌiyawh Yakꞌusda hudálhtiꞌ.