Luke 13 - Yak'usda Ooghuni

Noheni náhandunoohleh. ꞋEt ndúlhahnel de, kwuncho yo tsꞌe tihdulh

¹ ꞋEt ꞌoh daꞌ whulohne dune, Jesus huyulhni ntsꞌenꞌa la Galilee whutꞌenne ubanghanne Galilee whutꞌenne Yakꞌusda ba ꞌuhudílhkꞌun whe Pilate ꞌubanghan ꞌinkꞌez bubuzkaiꞌ hidílhkꞌun-i ootayunjut.

² ꞋEt Jesus ꞌubulhni, “Ndunne Galilee whutꞌenne dzoh nuhuzde, ꞌet huwa ꞌuyoonne Galilee whutꞌenne anus lubeshi ꞌuhulhꞌen nahzun eh?

³ ꞋAwundooh nohdusni! ꞋEt hoontsꞌi noheni náhandunoohleh ꞌet ndúlhahnel de, ꞌet de nohni cha whuz unꞌa za tsꞌiyawh yaitáhdlah!

⁴ Kꞌus keyoh Siloam huwhútni, ꞌet tse whedinꞌai-i whunizyane ꞌon ꞌat lhkꞌudine, ꞌenne bukꞌé ningez whe tsꞌiyawh higan. ꞋEt Jerusalem whutꞌenne buba nus lubeshi ꞌuhulhꞌenne ꞌuhintꞌoh nahzun eh?

⁵ ꞋAwundooh nohdusni! ꞋEt hoontsꞌi nohni cha noheni náhandunoohleh ꞌet ndúlhahnel de, nohni cha tsꞌiyawh, whuz unꞌa za tsꞌiyawh yaitáhdlah!”

Duchun, fig huyulhni, ꞌi be Lizwifne huhodutilꞌeh

⁶ ꞋEt cha Jesus huwa whutsꞌodulꞌeh-i be bubulh yalhduk whe njan ndutni, “ꞋIlhoghun dune ꞌen mai chun, figs huyulhni-i, ꞌi oomaiꞌ ha níyeh-i kꞌut, ꞌet ꞌilho há inulhyeh. ꞋInkꞌez mai yughun ha itísꞌen. ꞋInkꞌez gak ꞌaw mai ooghu hooloh.

⁷ ꞋEt oomaiꞌ ha níyeh-un huwunli-un ꞌuyulhni, ‘Whunilhꞌen eh? Tat yus kꞌut whutsꞌun ndi mai chun, oomaiꞌ kaitúsꞌen ꞌinkꞌez ꞌaw oomaiꞌ ooghu hooloh. Di ha yun kꞌut bulh hóontsool? Ntintselh!’

⁸ ꞋInkꞌez ꞌutni, ‘Moodih whute ꞌandit yus kꞌut ootsꞌú ha lhozinꞌaih. Kꞌat onat naootiskulh ꞌinkꞌez oogha soo haꞌ nuyeh-i bulh oogha ítasnalh.

⁹ ꞋEt oomaiꞌ whúzdliꞌ de, ꞌet sooꞌ hoontꞌoh. ꞋEt ndúlhinel de, ꞌet de la ntoontselh.’”

Tsꞌeke ꞌen Satan yulhghel

¹⁰ ꞋEt dzin natsꞌulyis-un ꞌet ꞌilhoghun Lizwifne lugliz ꞌet whubodulhꞌeh.

¹¹ ꞋEt ꞌilhoghun tsꞌeke whunizyat ꞌon ꞌat lhkꞌu dit yus kꞌut ꞌet la ntsiꞌ-i nududeh-i tetsun yulhtsi whe yudinda. ꞋEt huwa chanuti ꞌinkꞌez ꞌaw do naꞌootneh ꞌaitꞌoh.

¹² Jesus yunilhꞌen whe yuka huyih ꞌinkꞌez ꞌanih yulhni, ꞌinkꞌez ꞌuyulhni, “Tsꞌeke huwun dinda-un ꞌawet ntsꞌu hanahooltsꞌut.”

¹³ ꞋEt yukꞌedilni ꞌinkꞌez ꞌaho tsꞌeke lhtsꞌe nadiski ꞌinkꞌez Yakꞌusda dálhtiꞌ.

¹⁴ ꞋEt Lizwifne lugliz whumoodih hunílchꞌe. Natsꞌulyis dzin ꞌet Jesus ndun tsꞌeke soo naꞌyinla ꞌet hukwa hunílchꞌe. ꞋInkꞌez ꞌilhozdilne ꞌubulhni, “Lhkꞌu tat dzin ꞌet dune ꞌuhootꞌen hubaꞌ hoontꞌoh. ꞋEt huwa ꞌutsꞌutꞌen dzin ꞌet soo naꞌnohohooleh hubaꞌ hoontꞌoh. ꞋEt natsꞌulyiz dzin huba lheꞌhootꞌoh,” ꞌubulhni.

¹⁵ ꞋEt neMoodihti ꞌuyulhni, “Dune nalh duba naꞌudzooꞌ-un ꞌintꞌoh! ꞌalhaꞌ lawk ilohghun ꞌahli whe natsꞌulyis dzin nohmusdoos dune kꞌus nohmuyool te musdoos bayoh ꞌadultsiꞌ-un, kꞌunawhꞌuk ꞌinkꞌez too kꞌez toolhdlooh ꞌaitꞌoh?

¹⁶ Ndun tsꞌeke ꞌilhoghun Abraham ootsꞌu haínzut-un ꞌinkꞌez Satan whunizyat ꞌon ꞌat lhkꞌu dit yus kꞌut whe yulhghel. Soo cho howu nuni nahzut! ꞌalhaꞌ lawk natsꞌulyis dzin ꞌet ꞌaw kꞌunaootꞌuk ꞌaitꞌoh wheꞌ dahni?”

¹⁷ ꞋEt Jesus ꞌet ndudániꞌ whe yuchꞌaz ditnine tsꞌiyawh yooya huzdliꞌ. ꞋInkꞌez ꞌonghohne lhane ꞌen gha hoonzoo tuneꞌ ꞌustꞌen-un ꞌet huwa howu nálhni.

Ha níyeh-i, mustard huyúlhni, ꞌi oogha whútsꞌodulꞌeh

¹⁸ ꞋEt Jesus ꞌubulhni, “Yakꞌusda whe lerwe unli-un, ꞌet ntsꞌenꞌa nohba dahoontꞌoh? ꞋInkꞌez di bulh lhundúwhultꞌoh doosniꞌ?

¹⁹ Njan nduhoontꞌoh, ndi mai nintꞌum-i mustard huyulhni, ꞌi kꞌunꞌa ꞌuntꞌoh. ꞋI dune yunílhchoot ꞌinkꞌez ha níyeh kꞌet ꞌainanꞌai ꞌinkꞌez ha nányai. ꞋInkꞌez duchun dincha suliꞌ. ꞋInkꞌez dutꞌaiyaz oozooschum kꞌut tꞌo nenínla.”

Yakꞌusda whe lerwe unli, lhes ntuldoh-i ndultꞌoh

²⁰ ꞋInkꞌez doo cha ꞌubulhni, “Ntsꞌenꞌa suba whunoh untistun Yakꞌusda whe lerwe unli-un?

²¹ Lhes ntuldoh-i ndultꞌoh. Tsꞌeke yílhchoot ꞌinkꞌez lhes núdzaih-i, ꞌi ta tsetsꞌai be úndeꞌooldzih-i dizbun. ꞋI ntuldoh-i bulh ꞌilho be yandzai, ꞌinkꞌez yunilhlus. ꞋEt hukwꞌelhꞌaz ꞌudun neíninkai whe untílhdo.”

Hoondat-un datí hukwa daóohtni

²² ꞋEt hukwꞌelhꞌaz Jesus Jerusalem whuz tizya. ꞋInkꞌez keyoh whuti ꞌinkꞌez keyoh whuyaz dune toyalh ꞌinkꞌez hubodulhꞌeh.

²³ ꞋEt ꞌilhoghun ꞌuyulhni, “Nemoodihti oolune za eh hudutijih?” ꞋEt Jesus ꞌubulhni,

²⁴ “Hoondat-un datí-un hukwa daóohtni. ꞋEt nohdusni lhane ꞌet datí-un dahátidulh hukwaꞌ huntizilh, ꞌet hoontsꞌi ꞌaw ꞌuhooneh ꞌaitꞌoh.

²⁵ ꞋEt ꞌilhoh whumoodih dudinya ꞌinkꞌez dati dánaidintan, ꞌaz nudulhya ꞌinkꞌez dati dunulhkwꞌuz ꞌinkꞌez ꞌudahni, ‘Moodihti, moodihti neba dáhaꞌ dintih!’ ꞋEt nohdóniꞌ, ‘ꞋAw tꞌenohnuzúszun ntsꞌez de háhdil.’

²⁶ ꞋInkꞌez laꞌ ꞌudoohniꞌ, ‘Nyulh ꞌutsꞌuꞌalh ꞌinkꞌez nyulh ꞌútsꞌutnaiꞌ. ꞋInkꞌez nekeyoh whuti daꞌ whuneoodilhꞌe inleꞌ.’

²⁷ ꞋEt hoontsꞌi laꞌ dooniꞌ, ‘Nohdusni ntsꞌez de háhdil ꞌaw tꞌenohnuzúszun. Schꞌa nasahdilh! Tsꞌiyawh tankꞌus neꞌzahtꞌen!’

²⁸ Abraham, Isaac, Jacob, ꞌinkꞌez nus hooꞌenne tsꞌiyawh, Yakꞌusda whe lerwe unli-un, ꞌet hudutáltsꞌilh ꞌinkꞌez ꞌet la bunoolhꞌen. ꞋEt ꞌoh de nohni tenanohonilhdil. ꞋEt tihtso ꞌinkꞌez nohghoo lhudutihkꞌus.

²⁹ ꞋOh de ndaz de ꞌinkꞌez nooz de, ꞌinkꞌez nus de, ꞌinkꞌez nyaz de ha há tidulh ꞌinkꞌez Yakꞌusda whe lerwe unli-un, ꞌet nátlꞌa hudutiltsꞌilh.

³⁰ ꞋEt ꞌalha, whulohne ꞌudechoo unline ꞌudekꞌoh hutileh. ꞋInkꞌez whulohne ꞌudekꞌoh unline, ꞌenne la ꞌudechoo unline hutileh.”

³¹ ꞋEt dzin za whulohne Phariseene, Jesus highu nindil ꞌinkꞌez ꞌuhuyúlhni, “Tenanindaih ꞌinkꞌez njan whuchꞌa nasindaih. Herod nyutuzilhghelh hukwaꞌ ninzun!”

³² ꞋInkꞌez ꞌubulhni, “Nyoon ꞌuyoo unli-un dáhni, ‘Whunulhꞌen! ꞋAndit dzin ꞌinkꞌez bunde cha ntsiꞌ-i nududeh-i dune chꞌa ha nánusyoot ꞌinkꞌez dune soo náꞌusꞌen, ꞌinkꞌez whulh tat dzin hukwa whusásya-un, lhadúlya-un tisdleh.’

³³ ꞋEt hoontsꞌi ꞌandit dzin, ꞌinkꞌez bunde ꞌinkꞌez ꞌom bun dzin kedutooszit hubaꞌ hoontꞌoh. ꞋAw nus hooꞌen-un keyoh Jerusalem whan ꞌaz daóotsa huba lheꞌhóotꞌoh.”

Jerusalem whutꞌenne bugha Jesus oodzi unduda suliꞌ

³⁴ “Nohni Jerusalem whutꞌenne, Jerusalem whutꞌenne, nohni ꞌahtꞌen nus hooꞌenne ꞌahghan. ꞋInkꞌez mbene nohtsꞌu whelꞌaꞌne cha tse be bubahghan. Dantꞌoh la lugok duduzke dutsꞌuntꞌaꞌ ubudilhtsꞌi, whuz unꞌa dáwhultsuk whe ꞌilhunanohootásdlelh hukwaꞌ nuszun, ꞌet hoontsꞌi ꞌaw hukwa lheꞌnáhzun.

³⁵ Whunulhꞌen, Jerusalem whutꞌenne nohkeyoh ꞌaw hoonli hooloh suliꞌ whe nohba ꞌet nenáwhultsꞌut Yakꞌusda nohladutitnih. ꞋInkꞌez ꞌalhaꞌ nohdusni, ndet la whusaóotiltsꞌulh, ꞌet ꞌoh de ꞌet ndudútihnelh, ‘Mbe la Moodihti booziꞌ be whusatiyalh-un, ꞌen ꞌukꞌenus hoonzoo-un oogha whultsꞌut.’ ꞋEt ndudútihnelh whutso, ꞌaw soohꞌen ꞌaitꞌoh.”