Luke 10 - Yak'usda Ooghuni

Lhtakꞌantꞌit whunizyane (70) yugha hodulhꞌehne, Jesus dutso whe balhꞌaꞌ

¹ ꞋEt hukwꞌelhꞌaz neMoodihti lhtakꞌantꞌit whunizyane (70) ꞌutahábanla keyoh whuti totsuk nutiyalh-un, nane hinli whe dutso whe balhꞌaꞌ.

² ꞋEt ꞌubulhni, “ꞋAwet háꞌ nukat-un newhúninzut ꞌinkꞌez tlꞌo maiꞌ lhai suliꞌ, ꞌet hoontsꞌi ꞌutꞌenne ꞌaw soo lheꞌhuniltsuk. ꞋEt huwa Yakꞌusda haꞌ nukat-un whumoodih, ꞌaꞌ duninla-un ꞌuyoonne cha ꞌutꞌenne whusáboolhꞌaꞌ, ꞌet huba tenadahdli.

³ ꞋAwet ꞌahdulh ꞌinkꞌez soo zúlhtsꞌai! Whunulhꞌen, ꞌusbaiyaz kꞌunꞌa yús toh tsꞌe nohtísꞌaꞌ.

⁴ Sooneya ꞌuzus, lhookꞌez cha, kꞌus kegon cha, toohlaꞌ junih. ꞋInkꞌez ti dune dudíhꞌaz de, khun te hadih budóhniꞌ junih.

⁵ Ndet yoh danáhya-un, ꞌet dilhtsꞌine ndúbudohniꞌ, nohyoh whudizghel ooleꞌ.

⁶ ꞋEt dune tꞌe dusni-un ꞌet usda de, ꞌet de nohdzi dizghel-un ꞌet dutáꞌalh. ꞋEt ꞌaw nduntꞌoh-un hooloh de, be nohdzi dizghel-i nohtsꞌu nádutiltsꞌulh.

⁷ ꞋEt yoh za oohkeꞌ. Ndai nohgha húyaꞌaih ꞌi oohꞌalh ꞌinkꞌez oohtnaiꞌ. ꞋUtꞌenne bube ꞌutꞌen kꞌelha holeꞌ hubaꞌ hoontꞌoh. ꞋInkꞌez lhelhdun yoh te danaóohdaih junih.

⁸ ꞋInkꞌez ndi keyoh tsꞌóozahꞌaz de, ꞌet ꞌanih nohuwhútni de, ndai la nohbut nehininla-i, ꞌi oohꞌalh.

⁹ ꞋEt mbe la ꞌet yoh ndudane cha soo naꞌboohle ꞌinkꞌez ꞌubudóhniꞌ, ‘Yakꞌusda lerwe unli-un, ꞌawet nohenghoh ꞌuhoontꞌoh.’

¹⁰ ꞋEt ntsꞌe la keyoh tsꞌoozahꞌaz-un, ꞌaw nohghu nulhíhiyal de, ꞌet ti kꞌenaoohja, ꞌinkꞌez ꞌudoohniꞌ,

¹¹ ‘Nohkeyoh whulez neke ghu hoonli-i, nohchꞌa búnaꞌtsꞌalhde. ꞋEt hoontsꞌi tꞌewhunóhzin Yakꞌusda whulerwe-un nohenghoh ꞌuhoontꞌoh,’ budóhniꞌ.

¹² ꞋEt nohdusni, ꞌet dzin whusaootiltsꞌulh-un, keyoh Sodom whutꞌenne, ꞌoh daꞌ bubulh dahooja la inleꞌ, ꞌenne ꞌon nus hoontsiꞌ-un bugha óotaltsꞌulh.”

Mbene la dudeni nahádunooleh hukwa lheꞌhunízunne, dáwhultsiꞌ-un butsꞌu hóoltsꞌulh wheꞌ hoontꞌoh

¹³ “ꞋEt nohni Chorazin whutꞌenne, ꞌinkꞌez nohni Bethsaida whutꞌenne, nohni chaꞌ dawhultsiꞌ-un nohtsꞌu hóoltsꞌulh! Ndet la hoolhtus-un nohnat ꞌuhooja-un, ndunne Tyre ꞌinkꞌez Sidon whutꞌenne, bunat ndúhooja de, ꞌudaꞌ daꞌ dudeni náhondunizdla ooleꞌ daꞌ. ꞋInkꞌez daꞌ doso be hudilhtsꞌi ꞌinkꞌez daꞌ kwun lez kꞌéhidzi.

¹⁴ ꞋEt dzin nohba whuz de hooltsꞌulh nohba nahutideh ha, ꞌet ndunne bubulh dawhutanelh-un, nohni ꞌon nus nohba hootatsiꞌ.

¹⁵ ꞋEt nohni Capernaum whutꞌenne ndo yat huba soo ꞌáhtꞌoh nahzun eh? ꞋAwundooh! Kwuncho yo tsꞌe nóhotilhdulh!

¹⁶ Mbene la nohoozilhtsꞌaine, si soo hoozilhtsꞌai. Mbe la chꞌa nohnísjoot-un, si chꞌa sunísjoot wheꞌ ꞌuntꞌoh. ꞋInkꞌez mbe chꞌa sunísjoot-un, whuz de sútilhꞌaꞌ-un, ꞌen chꞌa inísjoot wheꞌ ꞌuntꞌoh.”

Ndo yakꞌuz nohooziꞌ ꞌukꞌusguz, ꞌet huwa whunólhni

¹⁷ ꞋEt lhtakꞌantꞌit whunizyane huhoontꞌiꞌ whe whusanáhidil. ꞋEt nduhúyulhni, “NeMoodihti ntsiꞌ-i nududeh-i hoontsꞌi, nyooziꞌ gha nekꞌuneꞌ hutꞌen!”

¹⁸ ꞋInkꞌez ꞌubulhni, “Ditni kwun kꞌunꞌa ndus ha dúnat, ꞌet whuz unꞌa Satan ndus de yakꞌuz tsꞌe ha dílduz, ꞌet nusꞌen.

¹⁹ Soo zúlhtsꞌai, tlꞌughus ꞌinkꞌez lubezo unli-i, scorpion huyulhni, tube cho ookꞌu nahya. ꞋInkꞌez ndai la nohchꞌaz ditnine hiye ulhtus-i, tsꞌiyawh ndi ba ndo oohtꞌeꞌ-un, ꞌet nohtlꞌa hóosꞌai ꞌinkꞌez ꞌaw hoonli nohundólhda ꞌaitꞌoh.

²⁰ ꞋEt hoontsꞌi ntsiꞌ-i nududeh-i nohkꞌuneꞌ ꞌutꞌen, ꞌet huwa iloh whunúlhni. ꞋEt kꞌus ndo yakꞌuz nohooziꞌ ꞌukꞌusguz, ꞌet huwa whunólhni.”

Jesus Ndoni be whunólhni

²¹ ꞋEt ꞌoh whuya ꞌuhunitꞌoh Jesus Ndoni be whunílhni whe njan ndutni, “ꞋUBá nyun nyudústiꞌ! Yakꞌuz ꞌinkꞌez yun kꞌut buMoodihti inli. Whunihne ꞌinkꞌez hodulꞌehne, ndi ꞌi tsꞌiyawh buchꞌá whuntinꞌi. Tsꞌoodunneyaz leꞌ ꞌuntꞌohne, bunalhtsꞌet ha honꞌai. ꞋAlhaꞌ ꞌuBá dainja la hoonintꞌiꞌ.

²² ꞋUBá tsꞌiyawh stlꞌa hónla, ꞌinkꞌez ꞌen ooYeꞌ mbe unli tsꞌiyanne tꞌehonúszun. OoBá ꞌaw ꞌen za tꞌeooninzun. ꞋInkꞌez mbe ooBá unli, ooYeꞌ ꞌaw ꞌen za tꞌeininzun. ꞋInkꞌez ooYeꞌ ꞌonghohne whubuntilhtun hukwaꞌ ninzun de, ꞌen za oobaꞌ hoontꞌoh.”

²³ ꞋInkꞌez yugha hodulꞌehne butsꞌu nálhꞌa ꞌinkꞌez yoo yo whútsul ubúlhni, “Ndet la hoohꞌen-un ꞌuyoonne duna be honilhꞌen, ꞌukꞌenuz hoonzoo-un bugha whultsꞌut.

²⁴ Nohdusni lhane nus hooꞌenne ꞌinkꞌez lerwene cha dalcho-i be ndet hoohꞌen-un hotiꞌelh hukwaꞌ huninzun, ꞌet hoontsꞌi ꞌaw lhuhuhóoꞌel. ꞋInkꞌez whudáhtsꞌo-un cha hidutátsꞌo hukwaꞌ huninzun ꞌet hoontsꞌi ꞌaw lhohoditsꞌil.”

Daztitꞌelh whe ꞌilhiz be tsꞌukhuna-i tsꞌitálhchulh?

²⁵ ꞋEt hukwꞌelhꞌaz ꞌilhoghun Moses beꞌ ꞌudustlꞌus ꞌuyoo unli be yalhduk-un dudinya ꞌinkꞌez Jesus ꞌonilha yoodulhkut, “Nehodulhꞌeh-un datistꞌelh whe ꞌilhiz be tsꞌukhuna-i stlꞌa ootiltsꞌulh?”

²⁶ ꞋEt Jesus ꞌutni, “Ndet ꞌukꞌu whusguz Moses be ꞌudustlꞌus kꞌut? Ookwꞌuyailhduk whe ntsꞌenꞌa mba daja ni?”

²⁷ ꞋEt ndúyulhni, “Yakꞌusda nyuMoodihti ndzi ndulcho-i be cha, nzul ndulcho-i be cha, nyunutꞌi tsꞌiyawh ꞌi be cha, nyeni tsꞌiyawh ꞌi be cha ookꞌeoonsiꞌ. ꞋEt dáhoontꞌoh hukwꞌunꞌa nyunchꞌoh kꞌenaintsiꞌ, ꞌet whuz unꞌa za nyulh dune ookꞌeoonsiꞌ.”

²⁸ Jesus ndúyulhni, “Tsꞌihꞌun ꞌudini. ꞋEt ndintꞌen de, ꞌilhiz wheni khutanalh.”

²⁹ ꞋEt hoontsꞌi ndun tsꞌihꞌun ꞌuntꞌoh-un naꞌdudilꞌi. ꞋEt huwun Jesus yoodulhkut, “Mbe la senghoh whutꞌi-un?”

³⁰ ꞋEt Jesus njan ndúyulhni, “ꞋIlhoghun dune Jerusalem whe dinya ꞌinkꞌez Jericho tsꞌe tizya whe ꞌundunutꞌihne huyílhchoot. Oonaih tsꞌiyawh higha ha háyulya ꞌinkꞌez ka huyulhtsi. ꞋEt nehinilhti, ꞌinkꞌez higho whenádil, ꞌawet dátsah whe.

³¹ Soo ꞌoh daꞌ za ꞌilhoghun lubret ti ꞌoh whuya uyalh whe ndun ꞌen yutilhꞌen whe ꞌantsꞌi yanchꞌaz lhusiya.

³² Whuz unꞌa za ꞌilhoghun dune Levi tsꞌu hainzut-un, ꞌen cha ꞌoh whuya uyalh whe yunalhꞌen ꞌinkꞌez yanchꞌaz lhusiya.

³³ ꞋEt hoontsꞌi ꞌilhoghun Samaria whutꞌen-un, ꞌen cha ꞌoh whuya uyalh whe yutilhꞌen ꞌinkꞌez ꞌaho yugha teꞌninzin.

³⁴ Yughu ninya ꞌinkꞌez khe cha yukailhdzo ꞌinkꞌez tsꞌekoo tooꞌ cha, ꞌinkꞌez yukaꞌ dalhꞌoo. ꞋInkꞌez dughunaꞌ kꞌéyilhti ꞌinkꞌez dune ꞌuztez bayoh tsꞌú yoolhti ꞌinkꞌez ꞌet yughinle.

³⁵ ꞋEt ꞌom bun dzin natidalh whutso nanki sooniya tsꞌuztez whumoodih tlꞌa yanꞌai ꞌinkꞌez ꞌuyulhni, ‘Ooghonleꞌ. ꞋInkꞌez ndai la ꞌon ꞌun ookwꞌuz tsꞌiyai yilhꞌi-i whusanásja de mba ookwꞌelha whutiselh.’”

³⁶ ꞋEt Jesus ꞌuyoo unli be yalhduk-un yoodulhkut, “ꞋEt ndun mbe la dune untsiꞌne ꞌankwꞌus hizilhghi whe ndunne tane dune hinalhꞌen daꞌ, kꞌus mbe tsꞌihꞌun unꞌa ye nghoh whutꞌi-un ꞌuntꞌoh ninzun?”

³⁷ ꞋEt ꞌuyulhni, “Mbe la yugha teꞌninzit-un, ꞌen ꞌuntꞌoh!” ꞋEt Jesus ꞌuyulhni, “Inyalh ꞌinkꞌez nyun cha whuz unꞌa ndóntꞌen!”

Mary ꞌukꞌenus hoonzoo-un ꞌutahahónꞌai

³⁸ ꞋEt hukwꞌelhꞌaz hidulh whe Jesus ꞌudun keyoh tsꞌoozya ꞌinkꞌez tsꞌeke Martha huyulhni, duyoh tsꞌe yughu nuseya.

³⁹ ꞋInkꞌez bulhtus Mary huyulhni, Jesus yucheh usda ꞌinkꞌez yughuni yoozilhtsꞌai.

⁴⁰ ꞋEt hoontsꞌi Martha bugha náꞌtitꞌalh-un tube ꞌunístꞌet. ꞋEt Jesus yughu ninya ꞌinkꞌez ꞌuyulhni, “SMoodihti ꞌantsꞌi mba hoontꞌoh eh sulhtus sichꞌoh za ꞌet nesunilhti butaoostꞌen ha? ꞋEt huwa sla ootꞌen dini!”

⁴¹ ꞋInkꞌez Jesus ꞌuyulhni, “Martha Martha lhat-un howu nuni ninzut ꞌinkꞌez huwu ni inli!

⁴² ꞋEt hoontsꞌi ꞌaw ꞌilhoghun ndutsꞌooneh-un ꞌuhoontꞌoh. Mary ꞌukꞌenus hoonzoo-un ꞌutahahónꞌai whe ꞌuhoontꞌoh ꞌinkꞌez ꞌaw oola kꞌéha hooltsꞌit ꞌaitꞌoh.”