Luke 1 - Yak'usda Ooghuni

Luke ndi ꞌudustlꞌus ndun Theophilus ba ꞌukꞌu neyuzguz

¹ Lhane ꞌudaꞌ hoolhtus whe hitꞌen be nawhutnuk-i tsꞌihꞌun unꞌa ookwaꞌ ditniꞌ-i, ꞌukꞌehuyanguz. ꞋI tsꞌiyawh netoh neba ꞌalhaꞌ ꞌuntꞌoh.

² ꞋUdechoo wheꞌ whuditꞌen ꞌet dichꞌoh duna be honalhꞌen ꞌinkꞌez Yakꞌusda ooghuni be neꞌústꞌenne huzdliꞌ, ꞌenne nduwhi khuni netlꞌa hídanla-i ꞌuntꞌoh.

³ ꞋEt Theophilus nyun dune diztiꞌ-un inli. ꞋInkꞌez si cha ndi ꞌukꞌu nutísguz, tsꞌiyawh ꞌudechoo wheꞌ whuditꞌen-un whutsꞌun dahooja-un ꞌinkꞌez ndet ꞌuwhulhni, soo tsꞌihꞌun unꞌa tꞌeoonúszun ꞌet huwa.

⁴ ꞋEt ꞌonghohne whunyohodalhꞌeꞌ-un, tsꞌihꞌun unꞌa ꞌuhoontꞌoh-un, hodalꞌeꞌ.

Zacharias ooꞌat, Elizabeth ooyaz duneyaz tileh. ꞋEn ꞌuntꞌoh John dune too be ꞌulhꞌen-un ꞌuntꞌoh

⁵ ꞋEt ꞌoh daꞌ Herod ꞌen Judea yun kꞌut whulerwe unli whe, ꞌilhoghun lubret, Zacharias huyulhni, Abijah bulh didowh-un ꞌuntꞌoh. Ooꞌat Elizabeth huyulhni, ꞌen Aaron yé dinzut-un ꞌuntꞌoh.

⁶ ꞋEt nahultꞌoh Yakꞌusda nalh tsꞌihꞌun dune hinli. Yakꞌusda ooghuni buba yutulhúhizyeꞌ-i ꞌinkꞌez ndet butsꞌu hukwaꞌ ninzun hikꞌuneꞌ titꞌen ha, ꞌet tsꞌiyawh hukwꞌú neꞌhutꞌen. ꞋAw hoonli whe bukꞌeholtsꞌit ꞌaítꞌoh.

⁷ ꞋEt hoontsꞌi Elizabeth ꞌaw ooyaz holeꞌ ꞌaitꞌoh ꞌinkꞌez nahultꞌoh yoo ꞌun hizulh, ꞌet huwa cha ꞌaw bubukeh holeꞌ ꞌaitꞌoh.

⁸ ꞋEt Zacharias bulh ꞌúntꞌohne kꞌunꞌa whe Yakꞌusda nalh lubret be ꞌutꞌen kꞌoh huwana.

⁹ Lubret kꞌunꞌa néꞌhutilelh, ꞌet whuz unꞌa Zacharias, ꞌen cha lubretne ꞌutahahúyalhti yoo sooltsun-i dutálhkꞌun ha. ꞋInka neMoodihti oolugliz whucho tsꞌe danínya.

¹⁰ ꞋEt yoo sooltsun-i yudilhkꞌun whe ꞌet nduwhulyiz lhane ꞌaz tenahududli.

¹¹ ꞋEt loodel kꞌut yoo sooltsun-i dilhkꞌun, ꞌet nailhni tsꞌe, lizas ꞌet usyin whe be hoodiltsai.

¹² Zacharias khun yutilhꞌen ꞌi be oogha ꞌúnjaz ꞌinkꞌez whenilhjoot.

¹³ ꞋEt lizas ꞌuyulhni, “Zacharias wheniljut iloh. Yakꞌusda ntenadudli yudántsꞌo. Nꞌat Elizabeth ooyaz duneyaz tileh, ꞌinkꞌez booziꞌ John be ootanzilh.

¹⁴ ꞋEn gha tube hootántꞌeꞌ ꞌinkꞌez whuntálhni. ꞋInkꞌez whuzdli de, ꞌuyoonne lhane cha huwhuntálhni.

¹⁵ ꞋEt neMoodihti oonalh dune uncha-un tileh. Tsꞌekoo tooꞌ kꞌus too ulhtus-i cha lhtisnel. Whutileh whutso ꞌet hoontsꞌi Ndoni be dutibun.

¹⁶ ꞋInkꞌez Israel ootsꞌu hainzutne, lhane neMoodihti buYakꞌusda tsꞌu butilelh.

¹⁷ Nus hooꞌen-un Elijah huyulhni, whuz unꞌa Ndoni ye ulhtus-i be neMoodihti yutso tiyalh. Lhane tsꞌoodunne bubáke budzi butsꞌun tizooꞌ nabutilhtselh. Mbene la ꞌukꞌu nulheꞌustꞌenne, lhane tsꞌihꞌun ꞌuntꞌohne ye whunih-i hitálhchulh. ꞋInkꞌez dune, ꞌenne lhane neMoodihti butsꞌu tiyalh-un, ꞌet wheni lhábudutileh,” lizas ꞌuyulhni.

¹⁸ ꞋEt Zacharias lizas yoodulhkut, “Ntsꞌenꞌa tꞌewhuntiszeh? Duneti ꞌustꞌoh ꞌinkꞌez sꞌat ꞌen cha yoo ꞌun uzulh whe ꞌuntꞌoh.”

¹⁹ ꞋEt lizas ꞌuyulhni, “Si Gabriel ꞌustꞌoh. Yakꞌusda zih usyin-un. Ntsꞌu whúsazꞌaꞌ whe ꞌustꞌoh nyulh yatisduk ꞌinkꞌez ndi khuni unzoo-i nyudutásnelh ha.

²⁰ Soo zilhtsꞌai! Sghuni daja dusni, soo ꞌet néwhultsꞌut de, ꞌet tsꞌiyawh ꞌet dó tanelh. ꞋEt hoontsꞌi daja dusni-un ꞌaw mba ꞌalhaꞌ lheꞌhootꞌoh. ꞋInka ndet ꞌuwhutanelh whutsꞌun, ꞌaw yalhtuzalhduk!” yulhni.

²¹ ꞋInkꞌez dune, tsꞌiyawh Zacharias hika tse hooli, ꞌinkꞌez daja whe suba ꞌuntꞌoh saꞌ whe lugliz whucho tsꞌe ꞌutꞌen.

²² Tenanja whe ꞌaw bubulh yaóolhduk ꞌaitꞌoh. ꞋInkꞌez tꞌehoninzun hoonli be nghun néwhultsꞌut whe ꞌuntꞌoh. ꞋInkꞌez ꞌantsꞌi buba núlhni whe bubulh yalhduk.

²³ ꞋEt hukwꞌelhꞌaz neꞌúle-un ꞌetsul ꞌuhooja whe duyoh tsꞌe whenája.

²⁴ ꞋEt hukwꞌelhꞌaz ooꞌat Elizabeth ooyaz ꞌucháinya whe kwulat sanun ꞌet duwhulyiz ꞌet ꞌilhoghun indaꞌ. ꞋEt njan ndutni,

²⁵ “ꞋEt whuz unꞌa ꞌazih neMoodihti sulh ꞌutꞌen. ꞋOh daꞌ dzin sunalni inleꞌ whe hukwaya usdli-un, tsꞌiyawh stsꞌa ha náhonla.”

Lizas Gabriel, ꞌen Mary uyúlhni, “Tsꞌoodun baꞌ tanelh. ꞋEn Jesus dutanelh”

²⁶ ꞋEt bulh lhkꞌu tat sanun whe Yakꞌusda lizas Gabriel huyulhni, ꞌen keyoh Nazareth tsꞌe whe yalhꞌaꞌ. Njan keyoh ꞌet yun kꞌut Galilee whuzꞌai.

²⁷ ꞋIlhoghun tsꞌeke ꞌaw dune tꞌenuszun-un, ꞌen tsꞌun whelꞌaꞌ. ꞋIlhoghun dune, Joseph huyúlhni, David tsꞌu haindene, ꞌilhoghun ꞌuntꞌoh. Yughu tidalh-un yutsꞌu lhaoodinla. Ndun ꞌaw dune tꞌenuszun-un ꞌuntꞌoh, Mary huyúlhni.

²⁸ Lizas yutsꞌo whusainya, ꞌet njan ndúyulhni, “Whunílhni! Yakꞌusda ntsꞌun unzoo! Nemoodihti nyulh ꞌuntꞌoh ꞌet huwa tsꞌekoo toh ꞌukꞌenus hoontꞌiꞌ-un inli!”

²⁹ ꞋEt yutilhꞌen whe tube oogha ꞌúnjaz. ꞋInkꞌez ꞌet howu nuninuzut ooghuni daja ni whe ꞌutni.

³⁰ ꞋInkꞌez lizas uyúlhni, “Mary niljut iloh! Yakꞌusda nyulh hoontꞌiꞌ.

³¹ Whunilhꞌen tsꞌoodun baꞌ tanelh. Duneyaz nyaz tileh. ꞋInkꞌez Jesus dutanelh.

³² ꞋEn ncha-un tileh. ꞋEn ꞌuhidutanelh soo ꞌudedo-un ooYeꞌ tileh. ꞋInkꞌez Yakꞌusda neMoodihti David ootsodaꞌ-un, yukꞌedinda-i ꞌindaꞌ-un, ꞌet yutlꞌa óotiꞌalh.

³³ ꞋEt Jacob ootsꞌu haindene ꞌilhiz wheni buba lerwe tileh. ꞋInkꞌez lerwe tileh-un, ꞌaw whula toh hootáloh.”

³⁴ ꞋEt Mary lizas ꞌulhni, “Ntsꞌenꞌa ꞌuwhutanelh, ꞌaw dune tꞌenuzuszun whe ꞌustꞌoh.”

³⁵ ꞋEt lizas yulh yalhduk, “Ndoni nkꞌedinde ꞌinkꞌez ꞌudedo-i ye ulhtus-i, ꞌi nkꞌut sa whusꞌih be whútaleh. Yustꞌe lubeshi ooghu hooloh-i, whuzdli te, Yakꞌusda ooYeꞌ hidutanelh.

³⁶ ꞋAndit nyunat-un Elizabeth yoo ꞌun uzulh-un, ꞌen cha duneyaz oochainya. ꞋAw buzkeh holeꞌ ꞌaitꞌoh huyulhni, ꞌet hoontsꞌi ꞌawet whulh lhkꞌuta sanun be suliꞌ.

³⁷ ꞋAlha ꞌi be Yakꞌusda ꞌaw hoonli-unyaz ooba hoolhtus-un hooloh.”

³⁸ ꞋEt Mary ꞌutni, “Nilhꞌen, si neMoodihti be ꞌulhna-un ꞌustꞌoh! Ntsꞌenꞌa la nghuni kꞌunꞌa daootanelh dini, whuz unꞌa sulh ꞌúhoneh.” ꞋEt lizas yugho whenája.

Mary ꞌen Elizabeth ꞌatsulyaz whuba yuzisda

³⁹ ꞋEt hukwꞌelhꞌaz Mary lhadúja. ꞋEt yun kꞌut nódistꞌai, whuz Judea yun kꞌut ꞌilhoghun keyoh whuzꞌai, ꞌaho whuz whinya.

⁴⁰ Zacharias ooyoh daninya ꞌinkꞌez Elizabeth hadih yulhni.

⁴¹ ꞋEt Elizabeth Mary daja ni yuduztsꞌai ibulh tsꞌoodun oochan tsꞌe tilhloh. ꞋInkꞌez Ndoni be dizbun.

⁴² Elizabeth tube cho uyúlhni “Tsꞌekoo toh ꞌukꞌenus hoonzoo-un nyulh ꞌuhooja. ꞋInkꞌez nyaz whutáleh-un, dawhuldzooꞌ-un nghá whultsꞌut!

⁴³ Di ha suba sgha whultsꞌut sMoodihti ooloo ꞌen sghu ninya?

⁴⁴ ꞋEt, hadih ꞌusudini whe nyuduzústsꞌai ibulh, tsꞌoodun schan tsꞌe hoontꞌiꞌ kꞌet tilhloh.

⁴⁵ Mbe la tsꞌeke ooba ꞌalha ꞌuhoontꞌoh-un, ꞌen ꞌukꞌenus hoonzoo-un oogha whultsꞌut. Ntsꞌenꞌa la neMoodihti daja yulhni-un, ooba ꞌalha ꞌuhoontꞌoh, ꞌet huwa ꞌoh te ooba neꞌwhutitꞌen.”

Mary ooyun

⁴⁶ ꞋEt Mary njan ndutni, “Szul, ꞌi neMoodihti yudílhtiꞌ.

⁴⁷ ꞋInkꞌez Yakꞌusda súlhyih-un. ꞋEn be syughi whunílhni.

⁴⁸ ꞋAlhaꞌ ndun be ꞌulhna-un, ntsꞌenꞌa yo ꞌududildzun-un tꞌewhuninzun. Whunulhꞌen, ꞌandit whutsꞌun, nus de, ꞌilhiz wheni ndi yun kꞌut tsꞌiyanne ꞌukꞌenus hoonzoo-un bulh ꞌúhooja sodutánelh.

⁴⁹ ꞋAlhaꞌ mbe hooncha whe tuneꞌ sulhꞌen-un, ꞌen be whúnujut-un ꞌuntꞌoh ꞌinkꞌez booziꞌ, ꞌi ꞌukꞌenus diztiꞌ.

⁵⁰ ꞋInkꞌez ye teꞌninzun ꞌi mbene la ye nuljutne bukꞌidoꞌa, nus de yinka dunene.

⁵¹ Dugan oonutꞌi be hoolhtus tuneꞌ ꞌutꞌen. Dudzi be ꞌududíltiꞌne, ꞌenne tsꞌiyawh yabanla.

⁵² Mbene la dune nchane hukꞌo dáltsꞌiꞌ nanábanla. ꞋEt mbene la yo ꞌuntꞌohne, ꞌenne hincha ꞌubulhtsi.

⁵³ Ooye últsilhne, unzoo-i be ubudilhbun. Hoonzooꞌ ꞌuntꞌohne, ꞌaw hoonliyaz bughá lhiꞌal whe whe nábalhꞌaꞌ.

⁵⁴ Be ꞌustlenne Israelne, ꞌenne bugha teꞌninzun, ꞌet whunalnih whe bula ꞌuja.

⁵⁵ ꞋEt whuz unꞌa la nebáke bubulh yailhduk Abraham ꞌinkꞌez yutsꞌu haindene, ꞌilhiz wheni.”

⁵⁶ ꞋEt Mary ta sanun atꞌen whe Elizabeth yuzih indaꞌ. ꞋEt hukwꞌelhꞌaz duyoh tsꞌe whe naja.

John dune too be ꞌulhꞌen-un whuzdliꞌ

⁵⁷ ꞋEt ꞌawet Elizabeth ooyaz whutaleh ꞌet neóodilhdzut ꞌinkꞌez ooyeꞌ whúzdliꞌ.

⁵⁸ ꞋEt ye nghoh dilhtsꞌine ꞌinkꞌez oonatneke whulh ꞌúhuduztsꞌai ntsꞌenꞌa neMoodihti yugha teꞌninzin. Tsꞌiyawh hiyulh whunálhni.

John ꞌawet yuka dune unli-i kꞌut hititꞌus

⁵⁹ ꞋEt ꞌawet whulh lhkꞌu dit dzin whe tsꞌoodun yuka dune unli-i kꞌut hititꞌus. ꞋInkꞌez oobá booziꞌ Zacharias ꞌi be huyootázilh.

⁶⁰ ꞋEt hoontsꞌi ooloo ꞌutni, “ꞋAwundooh! Booziꞌ John be huyootázilh,” ꞌubulhni.

⁶¹ ꞋEt ꞌuhuyúlhni, “Nyunatneke butoh ꞌaw John booziꞌne hooloh!”

⁶² ꞋEt oobá di oozíꞌ higha dútaꞌalh ꞌet tꞌehontizeh hukwaꞌ huninzun. ꞋInka dula be hiba núlhni whuz unꞌa huyoodulhkut.

⁶³ Dula be núlhnih whe ꞌudustlꞌus butsꞌu haꞌ daniꞌ, ꞌinkꞌez ꞌukꞌuneꞌ ꞌuzguz, “Booziꞌ John hidutanelh.” ꞋInkꞌez tsꞌiyawh buba hooncha.

⁶⁴ ꞋAho yanawhénilduk whe Yakꞌusda dálhtiꞌ.

⁶⁵ Yunat whutꞌenne, tsꞌiyawh nujut bughu nédiltsꞌut. ꞋInkꞌez Judea ndulcho ꞌoh whutꞌenne, tsꞌiyawh howu yahalhduk.

⁶⁶ ꞋEt mbene la whulh udantsꞌone, tsꞌiyawh dudzi be hódanla ꞌinkꞌez ꞌulhodutni, “Ndun tsꞌoodun dantꞌoh-un suba ooleꞌ?” hutni. ꞋInkꞌez neMoodihti dula be yula ꞌutꞌen.

Zacharias nus hónꞌen-un

⁶⁷ ꞋEt oobá Zacharias, Ndoni be dizbun ꞌinkꞌez nus hónꞌen whe yailhduk njan ndutni,

⁶⁸ “Israelne buYakꞌusda ꞌinkꞌez buMoodihti, dalzooꞌ la! Ooduneꞌne, butsꞌunusiya ꞌinkꞌez nabonket.

⁶⁹ David ꞌen Yakꞌusda be ꞌustle-un, ꞌen tsꞌu haindene, bugha neulhyis-un hooncha-un, neba yulhtsi.

⁷⁰ ꞋUdaꞌ wheꞌ whuditꞌen whutsꞌun, whuz ꞌunꞌa Yakꞌusda be nus hooꞌenne bube yailhduk.

⁷¹ ꞋEt whe nechꞌaz ditnine ꞌinkꞌez mbene netsꞌu dutnine, tsꞌiyawh bula kꞌéhaoodiltsꞌut, ꞌet whe neulhyis.

⁷² Nebáke Yakꞌusda butsꞌu yoozi-i, ꞌinkꞌez ndi khuni buba lhaídinla-i, ꞌet hinaoolnih.

⁷³ Netsodaꞌ-un Abraham Yakꞌusda dughuni yutlꞌa danꞌai whe ꞌinkꞌez yutsꞌu náhizya,

⁷⁴ ꞌet whe nechꞌaz ditnine bula kꞌehaoodiltsꞌut ꞌet whe neulhyis. ꞋInkꞌez ꞌaw whelhtsꞌuniljut whe Yakꞌusda baꞌ ꞌuztitꞌelh.

⁷⁵ Lubeshi lheꞌulhꞌenne ꞌuztileh ꞌinkꞌez tsꞌihꞌun unꞌa ꞌuztitꞌelh, Yakꞌusda oonalh dzin totsuk tsꞌukhuna whe oobaꞌ uztitelh.

⁷⁶ ꞋInkꞌez nyun tsꞌoodunyaz, kꞌus ꞌudedo-un, ba nus hooꞌen-un nyo dutanelh. NeMoodihti ꞌen ti hoonzoo ooba whutalhtselh ha ootso tanyalh ꞌet huwa.

⁷⁷ ꞋInkꞌez ooduneꞌne soo cho tꞌehozoozeh uzditijih-un ꞌinkꞌez nelubeshi cha neba gak yutilhtselh, ꞌet huwun nedutanelh.

⁷⁸ NeYakꞌusda nekꞌentsiꞌ whe negha teꞌnanzin. ꞋInka mbe la sa yo táꞌaih tsꞌutni-un, ꞌen ndus de whutsꞌun netsꞌú kꞌunadaih.

⁷⁹ Tsalhgus yo dilhtsꞌine ꞌinkꞌez datsahne cha, ꞌenne tsꞌiyawh ubeídutadih. ꞋInkꞌez lhutiyalh-un whe nedzi sooꞌ hotꞌeꞌ, ꞌet ntsꞌe whe honꞌa-un, ꞌet whuneuntilhtun. ꞋEt huwa Yakꞌusda be nus honꞌen-un nyo dutanelh,” ni Zacharias.

⁸⁰ ꞋEt tsꞌoodun John, ꞌen nuyeh ꞌinkꞌez ooyughi ulhtus suliꞌ. ꞋInkꞌez ndet la Israel ooduneꞌne bunalhtsꞌet ha ooyaꞌ dunábuntiltun ha, ꞌet whutsꞌun ntsꞌe la dune lhuhootꞌih tsꞌe indaꞌ.