Jude 1 - Yak'usda Ooghuni

Yakꞌusda ꞌutahábanlane, Jude hadih ꞌubulhni

¹ Si Jude Jesus Christ be ꞌulhna-un ꞌinkꞌez James bulhutsin ꞌustꞌoh. Nohni Yakꞌusda neBá, ꞌen ba ꞌudun nelyane ꞌinkꞌez Jesus Christ ꞌen be uboontun. ꞋEt nduntꞌohne, ꞌenne ꞌutꞌahályane ꞌuhintꞌoh. Nohni ndi ꞌudustlꞌus nohtsꞌó kꞌesguz.

² Ye téꞌninzun ꞌinkꞌez be nedzi dizghel-i, ꞌi cha, ꞌinkꞌez be lhkꞌetsꞌusiꞌ-i cha, ꞌi tsꞌiyawh nohba lhkꞌuz lhutookat ha nohba tenadusdli.

Neba ꞌalha ꞌuhoontꞌoh-un, soo cho whulh núdolhyaꞌ

³ Ookꞌesiꞌne ndet whe whézdijiz-un, ꞌet huwun daꞌ nohtsꞌó kꞌetisgus. ꞋEt hoontsꞌi be neba ꞌalha ꞌuhoontꞌoh-un, ꞌet huwun ꞌon nus nohtsꞌo kꞌeꞌoosges hubaꞌ hoontꞌoh. Ndi neba ꞌalhaꞌ ꞌuntꞌoh-i, ꞌilhoh za ꞌinkꞌez ꞌilhiz wheni Yakꞌusda oochꞌeꞌne, ꞌenne Yakꞌusda butlꞌa hónla, ꞌi ba soo cho núdolhyaꞌ, ꞌet nohdutasnelh ha nohtsꞌo kꞌeꞌisguz.

⁴ ꞋEt whulohne dune tube nistꞌi unline whe nohtáhunindil. Niz de whudizulh saꞌ inleꞌ ꞌet whutsꞌun ntsꞌénꞌa buba nahutiyeh, ꞌet tsꞌiyawh ꞌukꞌu whusguz. ꞋEnne dune Yakꞌusda yit ꞌuntꞌohne, ꞌenne ꞌuhintꞌoh. NeYakꞌusda ye unzoo-i, ꞌi ꞌutsꞌun unꞌa naꞌhuyulhꞌih whe ꞌet nduhútni, ndai tsꞌiyawh ꞌutꞌen dutsun-i, ꞌi ꞌutsꞌulhꞌen de, ꞌet sooꞌ hoontꞌoh nehútni. ꞋInkꞌez Yakꞌusda ꞌen za kꞌúnuneꞌulꞌen, Jesus Christ neMoodihti, ꞌen hitsꞌoodidlai.

ꞋUdaꞌ ꞌinkꞌez ꞌandit Yakꞌusda laditnine

⁵ ꞋEt hoonli nohba whunatiznih, ꞌudaꞌ tꞌeoonáhzun ꞌet hoontsꞌi. Egypt yun kꞌut ꞌet whuchꞌa neMoodihti duduneꞌne, ꞌenne tsꞌiyawh ubulhyih. ꞋEt hukwꞌelhꞌaz ndunne ooba ꞌalhaꞌ lheꞌhootꞌohne, ꞌenne tsꞌiyawh gak ꞌubulhtsi.

⁶ ꞋEt ndunne lizas, ꞌenne cha Yakꞌusda buba ꞌuhoonla-un, ꞌet whula huditni. ꞋInkꞌez ndunne neMoodihti tsálhgus yo tsꞌe ꞌenne buboontun. Tlꞌoolh ꞌilhiz ꞌuntꞌoh-i, ꞌi be whénubudizguz, dzin hooncha-un whuz de hóoltsꞌulh ꞌoh de buba nahutiyeh.

⁷ ꞋEt whuz unꞌa ndunne Sodom ꞌinkꞌez Gomorrah whutꞌenne, whunat whuduneꞌne, ꞌenne cha, ꞌet whuz unꞌa za bukꞌoh tsꞌe ꞌuhutꞌen. ꞋUtꞌen dutsun-i ꞌuhulhꞌen, ꞌet wheni dichꞌoh whutlꞌaꞌ hududilya. Tsꞌiyai didowh-i bulh nintaꞌhutitꞌih ndi kwun ꞌaw nalhnusne-i, ꞌi be dzoh nuhudeh wheꞌ hoontꞌoh. ꞋEnne bugha tꞌetsꞌonanzin.

⁸ ꞋEt whuz unꞌa za ndunne ꞌet nduhutinelh-un ninzunne, ꞌenne buyustꞌe lubeshi be dutsun huyilhꞌi. ꞋInkꞌez ndai hikꞌúneꞌ ootꞌen buba ando ꞌuntꞌohne bukꞌunulheꞌhustꞌen. ꞋInkꞌez ndunne butsꞌu ha ꞌanduzne lizas, ꞌenne hoontsꞌi hukwꞌunꞌa bughu yahalhduk.

⁹ ꞋEt hoontsꞌi Michael ꞌen ꞌudedo lizas ꞌuntꞌoh-un, ꞌet ꞌoh daꞌ netsudule ꞌen Moses dazsai whe hukwꞌelhꞌaz oozi ꞌi ghun lhdulhyoh ꞌuhudutni. ꞋAw dichꞌoh oobaꞌ hoontꞌoh lhnízun whe yuchꞌaz ditni be yalhduk ꞌinkꞌez yuba nahutiyeh. ꞋEt hoontsꞌi Michael netsudule nduyúlhni, “NeMoodihti hukwaꞌ nyudóniꞌ!”

¹⁰ ꞋEt hoontsꞌi ndunne ndet tꞌe honuszun-un, ꞌet hoontsꞌi hukwꞌunꞌa howu yáhalhduk. ꞋInkꞌez ntsꞌenꞌa la neyustꞌe hukwaꞌ ninzun, ꞌet ntsꞌenꞌa za tsꞌantꞌi neꞌútꞌen, whuz unꞌa duyustꞌe nintaꞌhuyulhꞌih.

¹¹ Dawhultsiꞌ-un butsꞌu hóoltsꞌulh! ꞋEnne cha Cain duhulꞌen. ꞋEt huwa dawhultsiꞌ-un butsꞌu hóoltsꞌulh! ꞋEt ndun Balaam nanitꞌa hukwꞌunꞌa ꞌuja. ꞋEnne cha whuz unꞌa za tube sooniya ghu dahóoditꞌoh. ꞋEt ndun Korah dahoontꞌoh huwa Moses chꞌaz nedinja-un, ꞌenne cha ꞌen kꞌunꞌa ha hadla.

Yakꞌusda lanaditnine, ꞌenne tube hintsiꞌ suliꞌ ꞌinkꞌez buba nahisda

¹² Lhkꞌehsiꞌ whe lhla naꞌahtꞌalh, ꞌet hoontsꞌi ndunne ooghu yasdukne ꞌaw whelhoniljut whe nohlaꞌ ha ꞌalh. ꞋEnne ꞌantsꞌi howa ꞌóodli-i teh noo duhúltꞌoh. Dichꞌoh za soo neꞌhududulꞌen. ꞋAntsꞌi kwꞌus too ooghu hooloh-i leꞌ hintꞌoh. ꞋEt kwꞌus kꞌunꞌa ndulcho bubúlh nutsꞌi. ꞋAntsꞌi dakꞌet mai chun mai ooghu hooloh leꞌ hintꞌoh. ꞋInkꞌez ooghih bulh ꞌantsꞌi há nahuyulhchꞌulh leꞌ ꞌúntꞌoh. Nat daházsai leꞌ hintꞌoh.

¹³ ꞋAntsꞌi ndulcho tatsi nudútun leꞌ hintꞌoh. Ndai la dune buba hukwaya hooni-i, ꞌi huwus ꞌet nduntꞌoh. Sum kꞌunꞌa lhtanahikulh leꞌ hutꞌen. ꞋEt nduntꞌohne dune, ꞌenne soo tsalhgus tꞌes leꞌ ꞌuntꞌoh-i, ꞌi ꞌilhiz wheni ꞌet Yakꞌusda buba ꞌudun whulhꞌai.

¹⁴ ꞋEt Enoch ꞌen whulh lhtakꞌantꞌit Adam tsꞌu hainzut-un ꞌuntꞌoh, ꞌen ndunne dune, ꞌenne bughu nus hónꞌen whe ndutni, “Whunulhꞌen neMoodihti ꞌawet whusáinya! Ooduneꞌne, ꞌenne tsꞌiyawh oochꞌeꞌne, lhane kꞌet ꞌaw ꞌubutsꞌolhto ꞌaitꞌoh, ꞌenne bubulh whusatiyalh.

¹⁵ Nyoonne Yakꞌusda yit ꞌuntꞌohne, ꞌenne tsꞌiyawh buba nahutiyeh. ꞋEnne Yakꞌusda yit ꞌuntꞌohne, dahoontꞌoh hukwꞌunꞌa Yakꞌusda chꞌaz neꞌustꞌenne whuz unꞌa bukꞌehóotaꞌalh. ꞋEt ndunne Yakꞌusda yit ꞌuntꞌohne, ꞌenne lubeshi ꞌulhꞌenne ꞌuhintꞌoh. Ntsꞌenꞌa khuni dutsꞌun-i be hidulhyoh yahalhduk, ꞌet whuz unꞌa buba nahutiyeh!”

Yakꞌusda lanaditnine, ꞌenne njan dúhintꞌoh

¹⁶ Nduntꞌohne, ꞌenne tsanukhuni huldilhne, ꞌinkꞌez whunílhcho whe buba dzoh hinli. Buyustꞌe nintꞌi tsꞌe hidulh. Khuni ncha-i be yahalhduk. ꞋEt whe hoonzoo hukwꞌunꞌa dune ghu yahalhduk ꞌet whe whuchꞌa nohotálhdoh hukwa hutitꞌelh.

¹⁷ ꞋEt hoontsꞌi ookꞌesiꞌne, neMoodihti Jesus Christ ba whelꞌaꞌne ndai khuni hiye yailhduk-i, soo cho oonaoolhnih.

¹⁸ Ntsꞌenꞌa la nohodaniꞌ ꞌudekꞌez whusaóotiltsꞌulh-un lhane neBá ookꞌoh tsꞌe huwudlohne whutaleh. Yakꞌusda chꞌaz nintꞌi tsꞌe ꞌet whuz unꞌa za hutidulh.

¹⁹ Ndunne, ꞌenne ndi yun kꞌut whuba za ꞌuhintꞌoh. ꞋEnne dune lhchꞌaz hunilhtꞌi ꞌinkꞌez Ndoni ooyit ꞌuhintꞌoh.

Soo cho Yakꞌusda bulh óohtꞌeꞌ

²⁰ ꞋEt hoontsꞌi ookꞌesiꞌne be nohba ꞌalha ꞌuhoontꞌoh-i, ꞌi be ꞌon nus ulhtus ꞌududulhtsi. Ndoni ꞌen be tenadahdli.

²¹ Yakꞌusda ye nékꞌensiꞌ-i, ꞌi za bulh óohtꞌeꞌ. NeMoodihti Jesus Christ ye teꞌ ninzun-i, ꞌi be ꞌilhiz tsꞌukhoonaꞌ-un tsꞌuwhutꞌi, ꞌet za hukwa itóhꞌen.

²² Dune tꞌebunoohzeh ntsꞌenꞌa whe lhelhtsꞌun unꞌa ꞌuhintꞌoh. Whulohne bugha teꞌnohzin.

²³ ꞋEt hoontsꞌi ꞌonghohne buba whenulhjut whe uboolhyih, kwun táhanabahle. Naih buyustꞌe tꞌaiznai, ꞌi hoontsꞌi ootsꞌu doohni.

Yakꞌusda uzdólhtiꞌ

²⁴ ꞋEt ꞌawet mbe Yakꞌusda chꞌaz natilꞌahne whuchꞌa nohghundli-un, ꞌinkꞌez ootsꞌu ha yánduz-i zih nenóhtalelh, ꞌaw be ꞌukꞌehóotaltsꞌulh-i yit. ꞋEt soo ꞌukꞌenus hóontꞌiꞌ whe whuz unꞌa nohba ꞌuwhutilelh.

²⁵ ꞋAw ꞌen za Yakꞌusda whunih-un ꞌinkꞌez neulhyis-un unli. ꞋAw ꞌen za ootsꞌu ha yánduz-i ꞌinkꞌez kꞌus ncha-un ꞌuntꞌoh. ꞋInkꞌez ꞌen za kꞌúnuneꞌulꞌen-un ꞌuntꞌoh. ꞋInkꞌez tsꞌiyaitsuk ando ꞌúntꞌoh-un ꞌuntꞌoh. ꞋAndit whutsꞌun ꞌinkꞌez ꞌilhiz wheni, whuz unꞌa ꞌuwhutátꞌelh. ꞋEt ndo honeh.