John 9 - Yak'usda Ooghuni

Dune whuzdli daꞌ whutsꞌun hoos̱ꞌén-un, Jesus soo naꞌyuleh

¹ ꞋEt Jesus ꞌoh whuya uyalh whe, dune whuzdli daꞌ whutsꞌun hoos̱ꞌén-un yutilhꞌen.

² ꞋEt yugha hodulꞌehne huyoodulhkut, “Whunehodulhꞌéh-un ndun dune mbe oolubeshi gha ꞌúja hoos̱ꞌen whe whuzdli? Didutchꞌoh kꞌus oodusneke bulubeshi?”

³ ꞋEt Jesus ꞌubulhni, “ꞋAw didutchꞌoh oolubeshi gha, kꞌus oodusne bulubeshi gha iloh hoos̱ꞌen suliꞌ. Yakꞌusda be ꞌutꞌen kꞌoh ooghá tꞌewhunoodzeh ꞌinka ꞌuja hoos̱ꞌen whe whuzdli.

⁴ ꞋAwhuz dzenis hootꞌen whe, mbe la whuz de sútilhꞌaꞌ-un, ꞌen be ꞌutꞌen oosꞌen huba ꞌuhoontꞌoh. ꞋUlhdzis whusahóoltsꞌut ꞌinkꞌez tsalhgus yo suliꞌ de, ꞌaw dune ootꞌen ꞌaítꞌoh.

⁵ ꞋAwhuz ndi yun kꞌut susda whe, ndi yun kꞌut whuduneꞌne buba be hóotꞌen-i usdli.”

⁶ ꞋEt ndúdija hukwꞌelhꞌaz yun ꞌúntizo, ꞌinkꞌez duzo ꞌi be whutlꞌus ꞌinla, ꞌinkꞌez nyoon dune hoos̱ꞌen-un yuna yé yulhlho,

⁷ ꞌinkꞌez ꞌuyulhni, “Nghuz too dizꞌai Siloam tsꞌe inyalh ꞌinkꞌez néꞌnildeh.” ꞋEt ndi khuni Siloam ni, ꞌet whélꞌaꞌ, ni whe ꞌutni. ꞋInka whuz whinya, neꞌnilde, ꞌinkꞌez hooꞌen whe whusanája.

⁸ ꞋEt ndun hinat whutꞌíne ꞌinkꞌez ꞌuyoonne cha, hoos̱ꞌen whe hinalhꞌen daꞌ, ꞌenne ꞌulhodútni, “Ndun ꞌen daꞌ ꞌoh úsda ꞌinkꞌez datsó-un, ꞌen eh ꞌuntꞌoh?”

⁹ Whulohne ꞌuhutni, “A, ꞌen ꞌuntꞌoh.” ꞋEt whulohne cha ꞌuhutni, “ꞋAwúndooh, ꞌantsꞌi yundótꞌen-un ꞌuntꞌoh.” ꞋEt ndun hoos̱ꞌen inléꞌ-un ubúlhni, “A, si ꞌustꞌoh.”

¹⁰ ꞋEt ꞌuhuyúlhni, “Daínja whe honꞌen suliꞌ?”

¹¹ ꞋEt ubúlhni, “ꞋIlhoghun dune, Jesus huyulhni, ꞌen whutlꞌus ꞌínla, sna kꞌut yé sulhlho, ꞌinkꞌez ꞌusulhni, ‘Tadizꞌai tsꞌe, Siloam huwhútni, whuz inyalh ꞌinkꞌez neꞌnildeh.’ Whuz oozusya ꞌinkꞌez neꞌnizde whe ꞌet hoosꞌen súliꞌ.”

¹² ꞋEt doo cha huyoodulhkut, “Ndun dune ntsꞌe ꞌutꞌen?” “ꞋAw tꞌéoonuzúszun,” ubúlhni.

¹³ ꞋEt ndun hoos̱ꞌen inleꞌ-un, Phariseene bughu hinílhti.

¹⁴ Njan dzin, ndun dune Jesus whutlꞌus ꞌínla ꞌinkꞌez hooꞌen nayulhtsí-un, ꞌet natsꞌulyis dzin ꞌuyínla,

¹⁵ ꞌinka doo cha za Phariseene huyoodulhkút, “Dáhoontꞌoh-un huwa honꞌen suliꞌ?” ꞋEt ubúlhni, “Ndun dune whutlꞌus ꞌínla, sna kꞌut yé whulhlho, hukwꞌelhꞌaz neꞌnizde, ꞌinkꞌez hoosꞌen susdliꞌ.”

¹⁶ ꞋEt ndunne Phariseene whulohne ꞌuhutni, “Ndun dune ooghu yailhdúk-un, ꞌen ꞌaw Yakꞌusda ootsꞌu haínya-un iloh ꞌuntꞌoh. ꞋAw natsꞌulyis dzin hukwꞌu nulheꞌustꞌen ꞌet huwa.” ꞋEt ꞌuyoonne cha ꞌuhutni, “Ntsꞌenꞌa ꞌuwhutátꞌelh, ꞌaw lubeshi ꞌulhꞌen-un, ꞌen huwa ꞌítꞌen túneꞌ óotꞌen ꞌaítꞌoh!” ꞋEt huwun lhchꞌa nehudindil.

¹⁷ ꞋEt doo cha za ndun hoos̱ꞌen inleꞌ-un ꞌuhuyúlhni, “Hónꞌen nyulhtsi, ꞌet huwa ꞌen ooghun daja dini?” “ꞋAlhaꞌ nus hóoꞌen-un ꞌuntꞌoh,” ubúlhni.

¹⁸ ꞋEt hoontsꞌi Lizwif moodihne ꞌaw buba ꞌalhaꞌ lheꞌhóotꞌoh, hoos̱ꞌen inleꞌ whe whuzdli ꞌinkꞌez ꞌandit ꞌet hooꞌen, ꞌinka oodusneke ꞌanih hubodániꞌ,

¹⁹ ꞌinkꞌez buboohoodulhkut, “Ndun ꞌen nohyeꞌ ꞌuntꞌoh ꞌinkꞌez whuzdli whutsꞌun hoos̱ꞌen nedúhni, ꞌinkꞌez ntsꞌenꞌa ꞌandit hooꞌen?”

²⁰ ꞋEt oodusneke ꞌuhutni, “Tꞌetsꞌonínzun ndun ꞌen neyeꞌ ꞌuntꞌoh ꞌinkꞌez whuzdli whutsꞌun hoos̱ꞌen inleꞌ.

²¹ ꞋInkꞌez ndet huwa ꞌandit hooꞌen, ꞌinkꞌez mbe hooꞌen yulhtsí-un, ꞌaw tꞌétsꞌonúszun. ꞋAw tsꞌoodun lhiloh whe ꞌuntꞌoh, oodulhkut da. Didutchꞌoh la nohdóniꞌ.”

²² Oodusneke tꞌehonínzun Lizwif moodihne ꞌudaꞌ lhgha ꞌúhudija mbene la Jesus Christ ꞌuntꞌoh, ꞌuyoonne hudániꞌ de, lugliz ꞌet whuchꞌa huntájulh. ꞋEt huwa ndun dune oodusneke Lizwif moodihne bube hunuljut.

²³ Njan hunuljut-un, ꞌet huwa ꞌuhutni, “ꞋAw tsꞌoodun lhilhlhoh whe ꞌuntꞌoh, ꞌen oodulhkut dah,” hutni.

²⁴ ꞋEt doo cha za ndun dune hoos̱ꞌen inleꞌ-un, “ꞋAnih,” huyúlhni, ꞌinkꞌez ꞌuhutni, “Njan daínja-un la Yakꞌusda ꞌen ooba whudílhtiꞌ, ꞌaw ndun dune ꞌen íloh, tꞌetsꞌonínzun lubeshi ꞌulhꞌen-un ꞌuntꞌoh ꞌet huwa.”

²⁵ ꞋEt ꞌubulhni, “Lubeshi ꞌulhꞌen-un tilah ꞌuntꞌoh, ꞌaw tꞌéoonuzúszun. ꞋEt ꞌilhoghun tꞌéoonúszun, whuzisꞌen ínleꞌ ꞌet ꞌandit hoosꞌen.”

²⁶ ꞋEt doo cha za ꞌuhuyúlhni, “Dányin la ínleꞌ? Ntsꞌenꞌa honꞌen nyulhtsi?”

²⁷ ꞋEt ubúlhni, “ꞋUdaꞌ nohdasniꞌ, ꞌaw sulh oozúlhtsꞌai, di ha ꞌet doo cha nohdósniꞌ hukwaꞌ nahzun? Soo tuzálhtsꞌilh hukwaꞌ nahzun eh? Nohni cha eh oogha hodulꞌehne tihleh hukwaꞌ nahzun eh?” bubúlhni.

²⁸ ꞋEt highudloh, “Nyun ꞌen yugha hodulꞌeh-un inli! ꞋEt wheni Moses bulh ꞌútꞌenne tsinli!

²⁹ Tꞌétsꞌonínzun Yakꞌusda ꞌen Moses bulh yaílhduk ínleꞌ. ꞋEt ndun ꞌen, ꞌaw ntsꞌez de hainya-un tꞌétsꞌonuszun,” huyúlhni.

³⁰ ꞋEt ndun dune hoos̱ꞌen inleꞌ-un ubúlhni, “Ndun dune hoosꞌen nasulhtsi ꞌet hoontsꞌi nohni ꞌaw tꞌéoonuzúhzun ntsꞌez de haínya duhni! Tube sba hooncha!

³¹ Tꞌetsꞌonínzun Yakꞌusda ꞌaw lubeshi ꞌulhꞌenne lhuboozílhtsꞌai. ꞋEt mbene la Yakꞌusda tsꞌu téniꞌ nilhdzunne, ꞌinkꞌez butsꞌu húkwaꞌ ninzun te neꞌútꞌenne, ꞌenne za uboozílhtsꞌai.

³² Soo ꞌudechoo yinka ꞌuhóolya whutsꞌun ꞌaw dune hoos̱ꞌen whe whuzdli-un, ꞌen dune soo náꞌyinla-un whulheꞌuzdustsꞌo.

³³ Ndun dune mbe la hoosꞌen nasulhtsí-un, ꞌaw Yakꞌusda ootsꞌun iloh ꞌuntꞌoh de, ꞌaw ndóneh ꞌaítꞌoh,” ubúlhni.

³⁴ “Lubeshi toh whuzindli ꞌinkꞌez mbe naꞌdunínzun whe whuneoodolhꞌeh hukwaꞌ dini?” huyúlhni ꞌinkꞌez ꞌaz tenáhinino.

³⁵ ꞋEt Jesus whulh ꞌúdantsꞌo Lizwifne nyoon dune tenáhinino, hukwꞌelhꞌaz nayilhti ꞌet ꞌuyulhni, “Yakꞌusda ooYeꞌ ghun mba ꞌalha ꞌuhoontꞌoh eh?”

³⁶ ꞋEt dune ꞌutni, “Moodihti mbe whe ꞌuntꞌoh? Busúnilhtun ꞌet de la ooghun sba ꞌalhaꞌ hotꞌeꞌ.”

³⁷ ꞋEt Jesus ꞌuyulhni, “ꞋUdaꞌ inꞌen whe ꞌuntꞌoh, ꞌinkꞌez ꞌen ꞌutni nyulh yálhduk.”

³⁸ ꞋEt dune yubut nachániti ꞌinkꞌez, “SMoodihti, sba ꞌalhaꞌ ꞌintꞌoh!” yúlhni, ꞌinkꞌez yutsꞌun teniꞌ nalhdzin.

³⁹ ꞋEt Jesus ꞌutni, “Ndi yun kꞌut whusásya ꞌet huwa la yinka duneꞌne buba nahoodeh. Whusásya-un, ꞌet huwa hoos̱ꞌenne, ꞌenne huhooꞌen hutileh. ꞋEt mbene la hooꞌenne, ꞌenne cha huhoos̱ꞌen hutileh.”

⁴⁰ ꞋEt whulohne Phariseene yugha hodulꞌehne hodántsꞌo whe, ꞌet ꞌuhuyúlhni, “Wheni cha lhtsꞌuhoos̱ꞌen dini whe eh dini?”

⁴¹ ꞋEt Jesus ꞌubulhni, “Whuzihꞌen de, nohni ꞌaw lubeshi nohba hooloh. ꞋEt ꞌuduhni, ‘Wheni tsꞌoohooꞌen,’ dahni, ꞌet huwa lubeshi nohba hoonli.”