John 7 - Yak'usda Ooghuni

Bulhutsinke ꞌaw buba ꞌalhaꞌ lheꞌhóotꞌoh Jesus ꞌen Christ ꞌuntꞌoh

¹ Njan hukwꞌelhꞌaz Jesus Galilee yun kꞌut za nusúya. Lizwifne hituzilhghelh hukwaꞌ huninzun ꞌet whuchꞌa ꞌaw Judea yun kꞌut nóyaꞌ hukwa lheꞌnízun.

² Lizwifne budzenis whuti, ꞌet la ꞌulbun be yoh nehúwhulih-un cha huwhútni, ꞌawet nilhdukw whuzꞌai.

³ ꞋEt bulhutsinke khuni beꞌ huyulhni, “Njan huwinyalh ꞌinkꞌez Judea yun kꞌut tsꞌe inyalh, ꞌet de la ngha hodulꞌehne ndai ꞌutꞌen oogha ína-un honoolhꞌen.

⁴ Mbe la tsꞌiyanne tꞌeinózin hukwaꞌ ninzun-un ꞌaw whuꞌiz neꞌootꞌen ꞌaítꞌoh. ꞋAlha ꞌuhooncha túneꞌ ꞌintꞌen de, ndi yun kꞌut dunene tsꞌiyanne nyun nghun tꞌehonózin huba ꞌuhoontꞌoh!”

⁵ Bulhutsinke ꞌenne hoontsꞌi ꞌaw ndun Christ ꞌen ꞌuntꞌoh ꞌaw buba ꞌalhaꞌ lheꞌhóotꞌoh, ꞌinka ꞌoh te néꞌhiduniꞌ.

⁶ ꞋEt Jesus ꞌubulhni, “Stso whudizulh-un ꞌawhuz whusalhúwhulhtsꞌit, ꞌet nohni nohtsꞌu hóoltsꞌulh-un, ꞌahoolhyiz lhawhúdintꞌoh.

⁷ Ndi yun kꞌut dunene ꞌaw nohni nohtsꞌo dootni ꞌaítꞌoh, ꞌet si stsꞌu hudutni. Tankꞌus ꞌúhutꞌen-un tsꞌiyawh ꞌet huwun ꞌubudúsni, ꞌet huwa.

⁸ Whute dzenis whuti tsꞌe whuz áhdulh. Sghá whuntꞌai-un ꞌawhuz ꞌaw lhalhódusne, ꞌet huwa ꞌawhuz ꞌaw si dzenis whuti tsꞌe toosyaꞌ ꞌaítꞌoh,” ubúlhni.

⁹ Njan ꞌet ndubúdaniꞌ hukwꞌelhꞌaz Galilee yun kꞌut ꞌet indaꞌ.

¹⁰ Bulhutsinke dzenis whuti tsꞌe whehandil hukwꞌelhꞌaz, Jesus didutchꞌoh cha whuꞌiz ꞌet whuz whinya, ꞌaw dunene bunalh iloh.

¹¹ ꞋEt nyo dzenis whuti whutoh ꞌet Lizwifne hika itísꞌen ꞌinkꞌez ꞌuhutni, “Ntsꞌe ꞌutꞌen whe ꞌuntꞌoh?” hutni.

¹² ꞋEt ꞌilhozdílne didutchꞌoh dutoh whuꞌízyaz whe highu yalhduk. Whulohne cha ꞌen unzoo hutni, ꞌinkꞌez whulohne cha ꞌawundooh dune nanaꞌah hutni.

¹³ ꞋEt hóontsꞌi ꞌaw ꞌilhoghun hoontsꞌi tsꞌet highu yalhulhduk, ndunne Lizwif moodihne bubé hunuljut ꞌet huwa.

¹⁴ ꞋAwet dzenis whuti lhoohoolcho atꞌen ꞌuhootꞌelh, ꞌet Jesus ndo lugliz whucho tsꞌe oozya, ꞌinkꞌez dune hubodulhꞌeh,

¹⁵ ꞌinkꞌez daja ni la Lizwifne tube buba hooncha ꞌinkꞌez ꞌuhutni, “ꞋAw dune hodulꞌeh tsꞌe indaꞌ iloh, ꞌinkꞌez ntsꞌenꞌa stabe ꞌon nus lhat-un tꞌéwhunínzun?”

¹⁶ ꞋEt Jesus ꞌubulhni, “Ndai la bunohodusꞌeh-i, ꞌaw si schꞌeꞌ iloh ꞌuntꞌoh. Mbe la whuz de sútilhꞌaꞌ-un, ꞌen ootsꞌu haídiltsꞌut-i, ꞌi ꞌuntꞌoh.

¹⁷ Mbene la Yakꞌusda yukꞌúneꞌtitꞌen hukwaꞌ ninzunne, ꞌenne la tꞌehonózin, ndi khuni Yakꞌusda ootsꞌu ha idiltsꞌut-i ꞌuntꞌoh, kꞌus sichꞌoh sghuni be tilah yasduk, ꞌet la tꞌehonózin.

¹⁸ ꞋEt dune didutchꞌoh khuyanalduk de, dichꞌoh dutátiꞌ-i ꞌet za hukwunúta whe ꞌutni. ꞋEt hoontsꞌi dune yalhdúk-un, mbe la whuz de yútilhꞌaꞌ-un, ꞌen yudutálhtiꞌ-un hukwunúta de, ꞌen tsꞌihꞌun unꞌa dune unli whe ꞌutni ꞌinkꞌez tankꞌus neꞌutꞌen-i ooghu whéyooloh.

¹⁹ Moses ꞌen ndi khuni ootulhúhisdeꞌ-i, ꞌi nohtlꞌa idanꞌai, ꞌet hoontsꞌi ꞌaw ookꞌú nulheꞌzuhtꞌen, ꞌinkꞌez di ha sutuzilhghelh hukwaꞌ tahꞌen?” ubúlhni.

²⁰ ꞋEt ꞌilhozdílne ꞌuhuyulhni, “Ntsiꞌ-i nudúdeh-i, ꞌi nyudínda! Mbe nyutuzilhghelh-un hukwunúta wheꞌ dini?”

²¹ ꞋEt Jesus ꞌubulhni, “ꞋEt natsꞌulyís-un dzin ꞌilhoghi ꞌutꞌen ncha-i ꞌúsdla, ꞌet nohni huwa ꞌíhꞌen.

²² Moses, ꞌen gha ooka dune uhli-i, ꞌi oonahtꞌus ínleꞌ. (ꞋAw Moses ꞌen gha za iloh, nohtsodaꞌne, ꞌenne butsꞌu ha hóoltsꞌut whe ꞌuhtꞌen.) ꞋInkꞌez ꞌet natsꞌulyis dzin chalhtsꞌul duneyaz whulih te, ꞌon ꞌat natsꞌulyis dzin ꞌet yuka dune unli-i, ꞌi huyitꞌus.

²³ Moses be ꞌudustlꞌus kꞌut ootulhúhisdeꞌ-i kꞌohyis whuchꞌa, natsꞌulyís-un dzin ꞌet dzin hoontsꞌi chalhtsꞌul dune whulih te yuka dune unli huyoohtꞌas. ꞋInkꞌez di ha ꞌet si dune natsꞌulyis-un, ꞌet dzin dune soo náꞌusdla ꞌet hukwa sulh húnulhchꞌe?

²⁴ ꞋAw whunulhꞌen-un ꞌet huwa iloh dune ba nahahyeh, tsꞌihꞌun unꞌa ꞌuhoontꞌoh hukwꞌunꞌa za dune ba nahoohyeh,” ubúlhni.

Whulohne dune Jesus ꞌen Christ ꞌuntꞌoh huninzun

²⁵ Whulohne Jerusalem whutꞌenne ꞌuhutni, “Ndun ꞌen lakw ꞌuntꞌoh hituzilhghelh wheni hikunuta?

²⁶ Whunilhꞌen tsꞌiyanne dune bez usda ꞌinkꞌez bubulh yálhduk, ꞌet hoontsꞌi ꞌaw dune daja lhunuhidusnih. Ndunne moodihne, ꞌenne tꞌehonínzun tilah ꞌet ndun ꞌen ꞌalhaꞌ Christ ꞌuntꞌoh?

²⁷ ꞋEt ndun ꞌen ntsꞌez de haínya la tꞌetsꞌonínzun, ꞌet hoontsꞌi Christ whusaínya de, ntsꞌez de hainya, ꞌaw ꞌilhoghun hoontsꞌi tꞌewhunózin ꞌaítꞌoh,” hutni.

²⁸ ꞋEt nyo lugliz whucho dune hodulhꞌeh whe Jesus soo khuniti be ubúlhni, “Nohni tꞌesunáhzun ꞌinkꞌez ntsꞌez de hásya-un cha tꞌewhunáhzun, ꞌaw sichꞌoh sghá iloh whusásya, ꞌet hoontsꞌi mbe la whuz de ha sálhꞌaꞌ-un, ꞌen soo tsꞌihꞌun ꞌen unli whe ꞌuntꞌoh, ꞌen ꞌaw nohni tꞌenuzuhzun.

²⁹ ꞋEt ꞌen ootsꞌu hásya ꞌet huwa tꞌenuszun ꞌinkꞌez ꞌen whuz de ha sálhꞌaꞌ!” ubúlhni.

³⁰ ꞋEt hukwaꞌ huyólhchoot hukwaꞌ hitꞌen ꞌet hoontsꞌi ootsꞌun whudiltsꞌulh-un ꞌawhuz whusalhúwhulhtsꞌit, ꞌet huwa ꞌaw dalhúhuyilel.

³¹ ꞋEt ꞌilhozdílne butoh lhane ꞌen buba ꞌalhaꞌ yintꞌoh suliꞌ ꞌinkꞌez ꞌuhutni, “Ndun Christ whusaínya de, ndun yanus toleh huwa ꞌítꞌen te néꞌtitꞌen? ꞋAwundooh!” hutni. ꞋEt huwa ꞌen Christ ꞌuntꞌoh huninzun.

³² ꞋEt ndunne ꞌilhozdílne whuz unꞌa Jesus highu yalhduk whe Phariseene hubodántsꞌo, ꞌet Phariseene ꞌinkꞌez lubret moodihne, neilhchúkne whuz whehalhꞌaꞌ Jesus hiyólhchoot ha.

³³ ꞋInka Jesus ꞌilhozdílne ubúlhni, “ꞋAwhuz dzoh saꞌyaz tileh ꞌet nohbulh ꞌutistꞌelh ꞌet ꞌinkꞌez mbe la whuz de ha sálhꞌaꞌ-un, ꞌen ootsꞌu nátisdalh.

³⁴ Nohni skunoohtaꞌ la ꞌet hoontsꞌi ꞌaw nasólhtelh ꞌaítꞌoh, ntsꞌe la ꞌustꞌoh tsꞌe ꞌaw nohni whuz toohyaꞌ ꞌaítꞌoh.”

³⁵ ꞋEt Lizwifne dichꞌoh ꞌulhodutni, “Ntsꞌe atꞌen tiyalh whe ꞌutni? ꞋAw natsꞌólhtelh ꞌaítꞌoh neúlhni. ꞋUdun yun kꞌut whutꞌenne, ꞌenne butuz toleh tiyalh whuz Lizwifne whulohne yahandil inleꞌ, ꞌinkꞌez whuz toleh ꞌudun yun kꞌut whutꞌenne hubodutilhꞌeh?

³⁶ Daja ni whe utni inleꞌ, ‘Nohni skunóohtaꞌ la ꞌet hoontsꞌi ꞌaw nasólhtelh ꞌaítꞌoh, ꞌinkꞌez ntsꞌe la tisdalh tsꞌe ꞌaw nohni whuz toohyaꞌ ꞌaítꞌoh,’ ꞌet daja ni whe ꞌutni?” hutni.

Jesus Ndoni butsꞌú yoozi

³⁷ ꞋEt ꞌawet nuhwhújeh-un cho whutoh, ꞌudekꞌez dzin-un, ꞌet dzin ꞌukꞌenus hooncha. ꞋEt dzin ꞌet Jesus butoh usyin ꞌinkꞌez soo khuniti be bubulh yálhduk, “Mbene la taꞌóosdane stsꞌun túhdilh ꞌinkꞌez uhtnai!

³⁸ Mbe la si ooba ꞌalhaꞌ ꞌustꞌohne, Yakꞌusda ooghuni ꞌukꞌu nusguz-i ndutni, ‘Too, ꞌi ꞌilhiz wheni be tsꞌúkhuna-i, ꞌenne ootsꞌu haítili,’” ubúlhni.

³⁹ ꞋEt Jesus ndutni whe Ndoni ghun bubulh yaílhduk. Mbene la didut buba ꞌalhaꞌ yintꞌohne, ꞌenne buyudútiltsꞌulh. ꞋAw ꞌaho iloh. Jesus ooba whudáltiꞌ hukwꞌelhꞌaz de, ꞌet de nduwhutanelh.

⁴⁰ ꞋEt ꞌilhozdílne butoh ndi khuni hidántsꞌo whe lhanne, ꞌenne ꞌuhutni, “Ꞌalha ꞌi be ndun ꞌen nyoon nus hóoꞌen-un ooghu yaduk inleꞌ-un ꞌuntꞌoh.”

⁴¹ ꞋEt whulohne cha ꞌuhutni, “Ndun ꞌen Christ ꞌen ꞌuntꞌoh.” ꞋEt ꞌuyoonne cha ꞌuhutni, “ꞋAwundooh! ꞋAw Christ Galilee yun kꞌut tsꞌe toleh ha tíyalh!

⁴² Yakꞌusda ooghuni ꞌukꞌu nusguz-i, ꞌi ndutni, David yutsꞌu ha kédanzut-un, ꞌen keyoh Bethlehem huwhútni, David ookeyoh ínleꞌ, Christ whuz de ha tíyalh,” hutni.

⁴³ ꞋInka ꞌet huwa ndunne ꞌilhozdílne nyoon ꞌen ooghun lhchꞌaz nehúdindil.

⁴⁴ Whulohne, ꞌenne huyitálhchulh hukwaꞌ huninzun, ꞌet hoontsꞌi dalhúhuyilel.

⁴⁵ ꞋEt nyoonne neilhchúkne, lubret moodihne ꞌinkꞌez Phariseene te hubuhalhꞌaꞌne cha hiyit whuz náhoosdil whe ubuhoodulhkut, “Di ha whusálhulhtel?”

⁴⁶ Neilhchúkne ꞌuhutni, “ꞋAw whutsodaꞌ ꞌuyoon dune ꞌen ndun dune kꞌunꞌa yalhulhduk.”

⁴⁷ ꞋEt Phariseene ꞌuhutni, “Nohni cha eh nohnanꞌa wheꞌ dahni?

⁴⁸ Wheni moodihne kꞌus Phariseene wheni cha neba ꞌalhaꞌ ꞌuntꞌoh nahzun eh? ꞋAwundooh!

⁴⁹ ꞋEt hoontsꞌi ndunne ꞌilhozdílne lugliz whucho ꞌet, tsꞌiyawh laitꞌénne ꞌuhintꞌoh ꞌet huwa ndai la Moses ꞌukꞌu néyuzguz-i ꞌaw dudeni be tꞌéhinúszun!” hutni.

⁵⁰ Nicodemus, ꞌen la ꞌilhe ꞌúlhdzis Jesus yughu ninya inleꞌ-un, ꞌen cha Pharisee bubulh ꞌilhoghun unli whe dudulh Phariseene ꞌubulhni,

⁵¹ “Wheni neba khuni ootulhúhisdeꞌ-i, ꞌi ꞌutni, dune ooghuni ꞌuzdántsꞌo ꞌinkꞌez be ꞌutꞌen uznalhꞌen de, ꞌet de za ooba natsꞌuhooyeh huba ꞌuhoontꞌoh.”

⁵² ꞋEt ꞌuhuyúlhni, “Nyun cha eh Galilee tsꞌe haínya-un inli? Yakꞌusda ooghuni ꞌukꞌu nusguz-i soo cho nilhꞌen, ꞌet de la nyeni be tꞌéoonónzin, ꞌaw ꞌilhoghun hoontsꞌi nus hóoꞌen-un, ꞌen Galilee yun kꞌut tsꞌe haínya-un hooloh!”

⁵³ ꞋEt ꞌawet tsꞌiyanne duyoh tsꞌe whenáhidil.