John 5 - Yak'usda Ooghuni

Tadizꞌai-un Bethesda huwhútni, ꞌet Jesus ꞌilhoghun dune soo náꞌyinla

¹ Njan ꞌoh te neꞌwhustꞌen-un hukwꞌelhꞌaz ꞌet Lizwifne budzenis whuti ꞌet wheni Jesus Jerusalem tsꞌe whinya.

² Nyo Jerusalem ꞌet ꞌusbai ba dádintan-i hoonli, ꞌet la whenghoh tádizꞌai-un whuzꞌai. Njan tádizꞌai-un, ꞌet Hebrew kꞌunꞌa Bethesda huwhútni, ꞌet whunat-un kwulat-un bun tsilh tꞌah whuzdla.

³ Nyo bun tsilh tꞌah ꞌet tube lhane ndudane ꞌet husdla. Whulohne hoos̱ꞌenne, ꞌinkꞌez whulohne bodinꞌaíne, ꞌinkꞌez whulohne cha délhdusnine. ꞋEnne ndi too nótitnah-un, ꞌet huba hilhꞌih.

⁴ Soo nenaóodudzuk leꞌ whutꞌih totsuk la, lizas ndus de ha dúdoh ꞌinkꞌez tadizꞌaí-un, ꞌet too nunáhuyilnaih. Mbe la soo ꞌudechoo toot tayaih-un, ntsꞌoh dantꞌi-i dada be nduda, ꞌet hoontsꞌi soo naꞌutꞌih.

⁵ ꞋIlhoghun dune tat whunizyat ꞌon ꞌat lhkꞌu dit yus kꞌut naóodizut, ꞌen ꞌet ndidaꞌ.

⁶ ꞋEt sulhti whe Jesus yunilhꞌen. Tꞌewhunínzun tube saꞌ ꞌet ilhteꞌ. ꞋEt uyúlhni, “Soo náꞌtantnelh hukwaꞌ ninzun eh?”

⁷ ꞋEt ꞌaho dune nduda-un ꞌutni, “Ndi too nakhitnaih te, ꞌaw dune tasóolhtelh-un hooloh. ꞋAwhuz whutsꞌun húkwa ꞌustꞌen whe ꞌuyoon whusayaih ꞌinkꞌez stso tayaih.”

⁸ Jesus ꞌet uyúlhni, “Dudinyaih, kwꞌusintí-i ilhchoot, ꞌinkꞌez ninya!”

⁹ ꞋAho dune ndudá-un soo náꞌuja. Yukꞌustí-i yílhchoot, ꞌinkꞌez tizya. Lizwifne nahulyis-un ꞌet dzin ꞌet ꞌuhóoja.

¹⁰ Ndun dune soo náꞌuja-un, ꞌen la Lizwifne ꞌuhuyúlhni, “ꞋAndit dzin nahulyís-un ꞌuhoontꞌoh. ꞋAw ookwꞌusintí-i nónꞌaꞌ huba lheꞌhóotꞌoh!”

¹¹ ꞋEt ubúlhni, “Mbe la soo náꞌsinla-un, ꞌen ꞌusúlhni, ‘Kwꞌusintí-i ilhchoot ꞌinkꞌez ninya,’ sulhni.”

¹² ꞋInka huyoodulhkut, “Mbe whe ꞌuntꞌoh ndun ookwꞌusintí-i ilhchoot ꞌinkꞌez ninya nyulhni?”

¹³ ꞋEt ndun dune dichꞌoh cha ꞌaw tꞌeinúzun mbe ꞌuyinla soo náꞌyinla-un. Tube lhane dune tadizꞌaí-un, ꞌet ꞌuhutꞌen whe Jesus whuꞌih tsꞌe whenya, ꞌet huwa ꞌaw tꞌelhihinízil.

¹⁴ Njan ꞌet ndúhooja-un hukwꞌelhꞌaz lugliz whucho ꞌet Jesus ndun nayilhti ꞌinkꞌez ꞌuyulhni, “Hadih, ꞌandit ꞌawet soo náꞌinja. Lubeshi ꞌilhꞌen-un ꞌetsul ꞌoneh, doo ka la ꞌon nus ꞌuwhultsiꞌ-un ꞌet nghá holtsꞌit!”

¹⁵ ꞋEt ndun dune whenája ꞌinkꞌez Lizwifne ubudániꞌ Jesus ꞌen ꞌuyínla soo náꞌyinla.

¹⁶ ꞋEt huwa Lizwifne Jesus dzoh nahídilhdzut ꞌinkꞌez hituzilhghelh ꞌet hukwa húnuta. Njan nahulyis-un dzin ꞌet ꞌoh te neꞌustꞌen ꞌet hukwa.

¹⁷ ꞋEt hoontsꞌi Jesus ubúlhni, “SBá ꞌahoolhyiz ꞌutꞌen, ꞌinka si cha ꞌustꞌen.”

¹⁸ ꞋEt hukwa Lizwifne ꞌon nus hituzilhghelh-un hukwa hunuta. ꞋAw nahulyis dzin kꞌonínyuz ꞌet huwa za iloh, ꞌinkꞌez cha Yakꞌusda ꞌen duBá yulhni. ꞋEt ndutni whula gha tsꞌe Yakꞌusda bulh húlhgha ꞌuntꞌoh ni, ꞌet huwa hituzilhghelh-un hukwaꞌ huninzun.

¹⁹ ꞋEt Jesus ubúlhni, “Soo tsꞌihꞌun unꞌa nohdúsni, ooYeꞌ ꞌaw dichꞌoh hukwaꞌ ninzun te neꞌutꞌen ꞌaítꞌoh. OoBá ntsꞌoh la neꞌútꞌen yunilhꞌen, ꞌet whuz unꞌa za ooYeꞌ neꞌútꞌen.

²⁰ OoBá duYeꞌ yukꞌensiꞌ ꞌinka tsꞌiyantsuk be ꞌutꞌen kꞌoh whínulhtun. Ndet la whunalhꞌen-un, ꞌet ꞌon nus ꞌutꞌen kꞌoh hooncha-un, ꞌet whuyúntilhtun. ꞋI be la tube nohba hocha.

²¹ OoBá ntsꞌenꞌa la yaidlane dunabudile ꞌinkꞌez ꞌilhiz huye khúna-i bughaꞌaih, whuz unꞌa za ooYeꞌ, mbene la bukaꞌ ninzunne, ꞌenne ꞌilhiz huye khúna-i bughaꞌaih.

²² OoBá ꞌen ꞌaw dune ba nahiyilh íloh, kꞌus OoYeꞌ ꞌen dune ba nahooyeh-un, ꞌet yutlꞌa hónꞌai.

²³ ꞋEt huwa la ooYeꞌ dune tsꞌiyanne ꞌen hidólhtiꞌ ntsꞌenꞌa la ooBá hidílhtiꞌ hukwꞌunꞌa. Mbe la ooYeꞌ lhidílhtiꞌne ꞌaw ooBá ꞌen cha lhuhidílhtiꞌ, ꞌinkꞌez ꞌen ꞌuyinla duYeꞌ whusayálhꞌaꞌ inleꞌ.”

Mbene la sghuni ílhchoot ꞌinkꞌez ndun whuz de sútilhꞌaꞌ-un, ꞌen ghun buba ꞌalhaꞌ ꞌuntꞌohne, ꞌenne ꞌilhiz huye khúna-i huyutꞌi

²⁴ Soo tsꞌihꞌun unꞌa nohdúsni, mbene la sghuni ílhchoot ꞌinkꞌez ndun whuz de sútilhꞌaꞌ-un, ꞌen ghun buba ꞌalhaꞌ ꞌuntꞌohne, ꞌenne ꞌilhiz huye khúna-i huyutꞌi. “ꞋAw buba nahoodeh ꞌaítꞌoh, ꞌudaꞌ be datsꞌutsaih-i huye nghoozdil ꞌinkꞌez ꞌilhiz huye khúna-i, ꞌi huyutꞌi.

²⁵ Soo tsꞌihꞌun unꞌa nohdúsni, ndet la whuz de whúdizulh-un ꞌandit ꞌawet ꞌet néwhultsꞌut. ꞋAndit ꞌet ꞌawet yaidlane Yakꞌusda ooYeꞌ ooghuni hidutátsꞌo, ꞌinkꞌez mbene la yudántsꞌone, ꞌenne huhutinalh.

²⁶ SBá ꞌen dichꞌoh huye khúna-i yutꞌi. ꞋEt whuz unꞌa za duYeꞌ, ꞌen cha be khútna-i dichꞌoh yutꞌi, ꞌet yugha óoninꞌai ꞌet huwa.

²⁷ ꞋInkꞌez tsꞌiyanne ba ndó ootꞌeꞌ-un, ꞌet cha yugha óoninꞌai ꞌinkꞌez tsꞌiyanne dune ba nahutiyeh huba ꞌuhoontꞌoh. Yinka Dune Yeꞌ unli, ꞌet huwa.

²⁸ Daja nohdúsni la ꞌaw nohba hocha junih! ꞋAwet whuz de whúdizulh, ꞌet la tsꞌun kꞌut yaidláne highuni hidutatsꞌo,

²⁹ ꞌinkꞌez la dunáhudódilh. Mbene la ꞌutꞌen unzoo-i ꞌalhꞌénne, ꞌenne dunábudutálelh ꞌilhiz wheni huhutinalh ha, ꞌinkꞌez mbene la hoontsiꞌ tuneꞌ ꞌústꞌenne, ꞌenne cha dunábudutálelh ꞌilhiz wheni dzoh notizut ha buba nahutiyeh.

³⁰ ꞋAw sichꞌoh ndúhoontꞌoh-un ꞌuhoosꞌen ꞌaítꞌoh. ꞋAw sichꞌoh hukwaꞌ nuszun te neꞌóostꞌen ꞌaítꞌoh. Ntsꞌoh tula sBá stsꞌu húkwaꞌ ninzun ꞌoh te za neꞌústꞌen. ꞋEt huwa dune ba nahutisyeh de, sBá súlhni, ꞌet whuz unꞌa za dune ba nahusyeh-un, ꞌet tsꞌihꞌun unꞌa ꞌuhoontꞌoh.

³¹ Sichꞌoh sghun nohdúsni de, ꞌaw la nohba ꞌálhaꞌ lheꞌhóstꞌeꞌ.

³² ꞋEt hoontsꞌi ꞌuyoon ꞌuntꞌoh-un, ꞌen si sghun tsꞌiyanne dune whúbunulhtun ꞌinkꞌez si sghun daja ni, ꞌalha ꞌuhoontꞌoh ꞌet tꞌewhunúszun.

³³ ꞋEt nohni ꞌuyoonne, ꞌenne John tsꞌun whébilhꞌaꞌ, ꞌet daja ni la, ꞌet khuni ꞌalhaꞌ ꞌuntꞌoh-i be ubudániꞌ.

³⁴ ꞋAw dune si sghun daja ni la, ꞌet huwa za iloh, njan ndúhoontꞌoh-un huwun nohdúsni, ꞌet huwa la whedóohjih ꞌinka ꞌunohdúsni.

³⁵ John ꞌen la too dízkꞌun ꞌinkꞌez be hóotꞌen-i ootsꞌu ha yándi ꞌet ndántꞌeꞌ. ꞋAtsulyaz wheni ndi be hóotꞌen-i, ꞌi be whunúlhni inleꞌ.

³⁶ ꞋEt hoontsꞌi John si sghun ꞌuyoonne whúbunilhtan-un, ꞌon nus ꞌuwhulchó-un, ꞌet whustꞌi. Ndi ꞌutꞌen ꞌi sBá stlꞌa yánꞌai lhadóosdleh wheni, ꞌi ꞌutꞌen ꞌaw ꞌi za ooghásna, ꞌi gha la ꞌuyoonne tꞌehonózin, sBá ꞌen whuz de sútilhꞌaꞌ.

³⁷ ꞋInkꞌez sBá, mbe la whuz de sútilhꞌaꞌ-un, ꞌen didutchꞌoh si sghun tsꞌihꞌun unꞌa whulhtsi. ꞋAw yalhduk whe lhduzúhtsꞌo, ꞌinkꞌez dantꞌóh-un unli ꞌaw lhuzihꞌen.

³⁸ ꞋInkꞌez ooghuni ꞌaw lhóohtun. Mbe whuz de yútilhꞌaꞌ-un ꞌaw nohba ꞌalhaꞌ lheꞌítꞌoh, ꞌet huwa ooghuni ꞌaw nohyo lhdiꞌoh.

³⁹ Yakꞌusda ooghuni ꞌukꞌu nusgúz-i, ꞌi be ꞌilhiz huye khúna-i ahtꞌi nahzun, ꞌinka ꞌáhtꞌen soo cho bodulhꞌeh, ꞌinkꞌez ndi khuni ꞌukꞌu nusgúz-i, ꞌi si sghun za ꞌuntꞌoh.

⁴⁰ Si sgha la ꞌilhiz ooleꞌ huye khúna-i oohtꞌeꞌ, ꞌet hoontsꞌi ꞌaw stsꞌu tóohdilh hukwa lheꞌnáhzun.

⁴¹ ꞋAw dunene ye súdilhtiꞌ-i óschoot ꞌaítꞌoh,

⁴² ꞌet hoontsꞌi nohni nohghun tsꞌiyawh tꞌéoonúszun. Nohyo tsꞌe dahtꞌoh whe ꞌaw Yakꞌusda ookꞌelháhsiꞌ ꞌet tꞌéwhunúszun.

⁴³ SBá ꞌen booziꞌ gha whusásya, ꞌet nohni ꞌaw ska lheꞌnáhzun, ꞌet hoontsꞌi ꞌuyoon te didutchꞌoh dudooziꞌ gha whusaínya de, ꞌet de daꞌ ꞌen ookaꞌ noohzin.

⁴⁴ Nohnichꞌoh nohtoh lhudúlhtiꞌ. ꞋEt hoontsꞌi, ndai la be ꞌúzdilhtiꞌ-i Yakꞌusda didutchꞌoh ootsꞌu haídiltsꞌut-i, ꞌi ꞌaw ookúlhnuzahtoh, ꞌet huwa ntsꞌenꞌa nohba ꞌalhaꞌ whutatꞌelh?

⁴⁵ SBá ꞌen oobut la nohkꞌéhosꞌalh khun te noohzin junih! ꞋUtsꞌun unꞌa cha hoonli. Yakꞌusda neba lhúhizyeꞌ-un, ꞌi Moses ꞌen yutlꞌa ídanꞌai ínleꞌ, ꞌi ootꞌa nínuhtan hoontsꞌi, ꞌi la nohkꞌéhoꞌalh.

⁴⁶ Ndi Moses ꞌukꞌu néyuzguz-i, nohba ꞌalhaꞌ ꞌuntꞌoh de, ꞌet de si sghun cha daꞌ nohba ꞌalhaꞌ ꞌuhótꞌeꞌ, Moses si sghun ꞌukꞌu néyuzguz-i ꞌuntꞌoh ꞌet huwa.

⁴⁷ ꞋEt hoontsꞌi ndi Moses ꞌukꞌu néyuzguz-i ꞌaw nohba ꞌalhaꞌ lheꞌyítꞌoh ꞌet huwa ntsꞌenꞌa suba si sghuni ꞌi nohba ꞌalha ꞌootꞌeꞌ,” Jesus ndubulhni.