John 20 - Yak'usda Ooghuni

Jesus tsꞌun kꞌut dunadija

¹ Lisman whutoh ꞌudechoo dzin ꞌawhuz tsahólhgus whe Mary Magdala whutꞌen-un, tsꞌun kꞌuz tizya. Whuz oozya whe tse cho tsꞌun kꞌut whudadinꞌai-i, ꞌudun dunizꞌai whe yutilhꞌen.

² ꞋEt ꞌawet Simon Peter ꞌinkꞌez nyoon ꞌilhoghun Jesus yugha hodulꞌeh-un kꞌus yúkꞌensiꞌ-un, ꞌen bulh, bughulgai ꞌinkꞌez ꞌúbulhni, “NeMoodihti oozi huyílhchoot. ꞋUtsꞌun whe húyalhti, ꞌinkꞌez ꞌaw tꞌétsꞌonúszun ntsꞌe suba whe húyalhti.”

³ ꞋInka Peter ꞌinkꞌez nyoon ꞌilhoghun bulh tsꞌun kꞌuz tsꞌe hutilhgai.

⁴ Lhgha hilgai. ꞋEt nyoon ꞌilhoghun ꞌen Peter anus ꞌa nulgai huwa ꞌudechoo tsꞌun kꞌuz oolhgai.

⁵ ꞋAwet whuz oolhgai daꞌ, nyo duja ꞌinkꞌez niꞌ whunalhꞌen. ꞋEt naih diztiꞌ-i ꞌet ꞌusdla yunilhꞌen, ꞌet hoontsꞌi ꞌaw dálhiyal.

⁶ ꞋEt soo yunilgih whe Simon Peter whuz oozya. ꞋEn tsꞌun kꞌut danínya ꞌinkꞌez naih diztiꞌ-i ꞌet ꞌusdla yunilhꞌen.

⁷ ꞋEt nyoo dzezoh ootsighaꞌ gha yóonasduz inléꞌ-i, ꞌaw naih diztiꞌ-i ootoh whe yooloh. ꞋEt hoontsꞌi soo cho lhénintan ꞌinkꞌez ꞌudun sulhchooz.

⁸ ꞋEt nyoon ꞌilhoghun yugha hodulꞌeh ꞌudechoo tsꞌun kꞌuz oolhgai-un, ꞌen cha danínya. Soo cho whunalhꞌen ꞌinkꞌez ooba ꞌalha ꞌuhooja.

⁹ ꞋAwhuz soo cho dudeni be tꞌéhonúszun daja ni la ndi Yakꞌusda ooghuni ꞌukꞌu nusgúz-i kꞌut, Jesus yaidlane toh dunádutádalh ꞌet huwun.

¹⁰ ꞋEt ꞌawet Jesus yugha hodulꞌehne duyoh tsꞌun whenáhitꞌaz.

¹¹ ꞋEt hoontsꞌi Mary ꞌen tsꞌun kꞌut ꞌawet nétlꞌadindaꞌ. Yoo ꞌaz tsꞌe usyin ꞌinkꞌez ꞌutso. ꞋInkꞌez ꞌutso whe nyo duntꞌoh ꞌinkꞌez niꞌ tse bez whunilhꞌen.

¹² ꞋInkꞌez nane lizas soo ꞌulhyúl-i be húzke, ndet whe ꞌubutilhꞌen. ꞋIlhoghun ꞌen yutsi tꞌah, ꞌet ꞌilhoghun cha yukꞌetlꞌah ndet la Jesus oozi ilhteꞌ-un, ꞌet huzke.

¹³ ꞋEt huyoodulhkut, “Tsꞌeke, di haꞌ dini intso?” ꞋEt ubúlhni, “SMoodihti ꞌutsꞌun whe húyalhti ꞌinkꞌez ntsꞌe suba ꞌahúyalhti ꞌaw tꞌéwhunuzúszun.”

¹⁴ ꞋEt ndúdija hukwꞌelhꞌaz nꞌawh nalhꞌa whe khuntsul Jesus ꞌet usyin whe yutilhꞌen, ꞌet hoontsꞌi ꞌaw Jesus ꞌuntꞌoh ꞌaw nalhuyóoltsꞌulh.

¹⁵ ꞋEt Jesus ꞌuyulhni, “Tsꞌeke, ꞌet di ha intso? Mbe kunínta whe ꞌintꞌen?” ꞋEt Mary ꞌuninzun ha niyeh kꞌet huwunlí-un tole ꞌutꞌen, ꞌinkꞌez ꞌuyulhni, “Nyun ílhchoot ꞌinkꞌez ꞌutsꞌun wheílhti de, ntsꞌe nenilhti-un sudíni, ꞌet de si naóoschoot.”

¹⁶ ꞋEt Jesus yukahizya, “Mary,” yúlhni. ꞋEt Mary nꞌawh nalhꞌa ꞌinkꞌez, “Rabboni!” yúlhni (ꞌi khuni nehodulhꞌeh-un ni whe ꞌutni).

¹⁷ ꞋEt Jesus uyúlhni, “ꞋAw njan soontun iloh. ꞋAwhuz ndo sBá ootsꞌun nálhtuzusdai. ꞋEt hoontsꞌi sulhutsinke butsꞌun naíndalh ꞌinkꞌez ubudíni, ndo sBá ootsꞌun nátisdalh. ꞋEn nohni cha nohBá. Si sYakꞌusda ꞌinkꞌez nohni cha nohYakꞌusda unli.”

¹⁸ ꞋEt Mary Magdala whutꞌen-un Jesus yugha hodulꞌehne bughu nanja ꞌinkꞌez ndi khuni ubudaniꞌ, ꞌinkꞌez neMoodihti cha yanꞌen ubúlhni. ꞋEt Jesus daja yudániꞌ-un hukwꞌu bubulh náhoolnuk.

Jesus yugha hodulꞌehne bunalhtsꞌet haínya

¹⁹ ꞋEt dzin ꞌet ꞌudechoo dzin lisman whutoh ꞌuhoontꞌoh, ꞌet hulhgha za, ꞌet yugha hodulꞌehne ꞌilhunahosdil. Dulh Lizwifne bube hunuljut ꞌinka datih dáꞌ dinla. Jesus butoh usyin hitilhꞌen. ꞋEt ubúlhni, “Soo cho nohdzi doghel.”

²⁰ ꞋEt ndúbudaniꞌ whe dula cha, ꞌinkꞌez duzih kꞌut cha bunalhtsꞌet ha honla. ꞋEt yugha hodulꞌehne tube cho huhóostꞌet buMoodihti huyanꞌen ꞌinka.

²¹ ꞋEt Jesus doo cha za ubúlhni, “Nohdzi doghel, ntsꞌenꞌa la sBá whuz de sútilhꞌaꞌ, ꞌet whuz unꞌa si cha nohtisꞌaꞌ.”

²² ꞋEt ndúdija hukwꞌelhꞌaz bukꞌuz injiz ꞌinkꞌez ubúlhni, “Ndoni nohyudóoltsꞌit.

²³ Mbene la bulubeshi buba ꞌun tilhdilne, ꞌenne ꞌudaꞌ buba ꞌun tizkat whe ꞌuntꞌoh. ꞋInkꞌez mbene la bulubeshi buba ꞌun lhituzulhdilne ꞌaw buba ꞌun lhitikulh whe ꞌuntꞌoh.”

²⁴ ꞋEt nyoonne whunizyane ꞌon ꞌat nane butoh ꞌilhoghun, ꞌutꞌudándaꞌ-un, Thomas huyulhni-un, ꞌaw butoh hooloh whe Jesus bughu ninya.

²⁵ ꞋEt nyoonne yugha hodulꞌehne, ꞌenne Thomas huyulhni, “NeMoodihti tsꞌanꞌen!” ꞋEt ubúlhni, “Soo sichꞌoh sna be oola lugloo kꞌoh whunisꞌen, ꞌinkꞌez slasga be ꞌanúdizga de, ꞌinkꞌez oozih kꞌut ꞌet sla be ooka kꞌet ꞌanúdizni de, ꞌet de za la sba ꞌalhaꞌ ꞌuhotꞌeꞌ,” ni.

²⁶ ꞋEt ꞌilhu lisman inleꞌ whe, doo cha za Jesus yugha hodulꞌehne yoh bez tsꞌe hudilhtsꞌi whe Thomas ꞌen cha butoh usda. Datih dadinla, ꞌet hoontsꞌi khuntsul Jesus butoh usyin hitilhꞌen, ꞌinkꞌez ꞌubulhni, “Nohdzi doghel.”

²⁷ ꞋEt Thomas ꞌulhni, “Sla nilhꞌen ꞌinkꞌez nlasga be ska kꞌet nudilga ꞌinkꞌez nla be szih kꞌut cha nudílnih. ꞋOn ꞌat si sghun whutsꞌoodóntlaiꞌ junih. Mba ꞌalhaꞌ ꞌuhotꞌeꞌ,” yúlhni.

²⁸ ꞋEt Thomas uyúlhni, “SMoodihti ꞌinkꞌez sYakꞌusda!”

²⁹ ꞋEt Jesus uyúlhni, “Thomas, ꞌandit sanꞌen, ꞌet huwa mba ꞌalha ꞌuhoontꞌoh. ꞋEt hoontsꞌi mbene la ꞌaw sulhíꞌelne hoontsꞌi, ꞌinkꞌez buba ꞌalha ꞌuhoontꞌohne, ꞌenne ꞌukꞌenus hoonzoo-un bugha whultsꞌut.”

³⁰ ꞋEt ꞌon nus lhat-un yugha hodulꞌehne bunalh Jesus hooncha túneꞌ ꞌustꞌen ꞌet hoontsꞌi ꞌaw ndi ꞌudustlꞌus kꞌut ꞌukꞌu lhúhooguz.

³¹ ꞋEt hoontsꞌi nduwhi ꞌukꞌu nusgúz-i nohba ꞌalhaꞌ ꞌuhotꞌeꞌ ha, ꞌalhaꞌ Jesus ꞌen Christ, Yakꞌusda ooYeꞌ, ꞌen ꞌuntꞌoh. ꞋEt njan nohba ꞌalha ꞌuhoontꞌoh whe ꞌilhiz ooleꞌ be tsꞌúkhuna-i, ꞌi Jesus Christ booziꞌ gha tíhtꞌelh.