John 2 - Yak'usda Ooghuni

Jesus huwa ꞌítꞌen túneꞌ ꞌutꞌen ꞌet huwa la dunene ꞌen Christ ꞌúntꞌoh tꞌehonózin

¹ ꞋEt whulh tat dzin whe Galilee yun kꞌut ꞌet ꞌilhoghun keyoh Cana huwhútni, ꞌet keyoh ꞌet la lhghuskene ba honílhni. ꞋEt Jesus ooloo ꞌen cha ꞌet usda.

² Jesus ꞌinkꞌez yugha hodulꞌehne tubulh ꞌenne cha bughu nahúzdil.

³ ꞋEt njan lhghuskene ba honílhni whutoh ꞌet la ndi tsꞌekoo tooꞌ ntsool súliꞌ. ꞋEt Jesus ooloo yughu ninya ꞌinkꞌez yúlhni, “ꞋAw tsꞌekoo tooꞌ lhuhítꞌiꞌ.”

⁴ Jesus ꞌet uyúlhni, “Tsꞌeke ꞌet di ha ꞌet ndusúdini? ꞋAw ꞌawhuz sba ꞌet nelhódiszit, ꞌawhuz stsꞌó dizulh whe ꞌuhoontꞌoh,” yúlhni.

⁵ ꞋEt ooloo ndunne ꞌustlénne ubúlhni, “Daja nohbulhni la ꞌoh te neꞌóohtꞌen.”

⁶ ꞋEt njan lhkꞌuta tse oosaꞌ cho, too huye súlhdzo wheni, ꞌet ꞌusdla. ꞋI la Lizwifne bube ꞌutꞌen kꞌoh hukwꞌunꞌa lanaꞌhuldoh wheni.

⁷ ꞋEt Jesus ndunne ꞌustlenne ubúlhni, “Ndi tse oosaꞌ cho tsꞌiyawh too be nadulhbun.” ꞋInka soo tsꞌiyawh oodah whutsꞌun yanahídilhbun.

⁸ “Dugweꞌ íhkaih ꞌinkꞌez mbe la njan howunli-un, ꞌen ootsꞌu yihkalh,” ubúlhni. ꞋInka hiloh hitsꞌu whinkai.

⁹ Ndi too tsꞌekoo tooꞌ suliꞌ-i, ꞌaw ntsꞌez de ha huyalhdzo ndun howunli-un tꞌéoonúszun, ꞌet hoontsꞌi ndunne ꞌustlénne huyínkaine, ꞌenne tꞌehonínzun. ꞋInkꞌez ndet la howunli-un yunahóozdlih whe dune ꞌat utꞌí-un, ꞌen ꞌanih yudániꞌ,

¹⁰ ꞌinkꞌez uyúlhni, “Dune tsꞌiyanne ndi tsꞌekoo tooꞌ ꞌuzooꞌ-i, ꞌi cho howu há yulhdzoh, ꞌet hukwꞌelhꞌaz sooltsuk hutni te, ꞌet ꞌandit za hukwꞌelh-i ꞌuntꞌoh-i tsꞌekoo tooꞌ ꞌi bughu há yulhdzoh. ꞋEt nyun ndi ꞌuzooꞌ-i, ꞌi ꞌudekꞌoh whutsꞌun ontun!” yúlhni.

¹¹ Njan keyoh Cana Galilee yun kꞌut whuzꞌai ꞌet soo ꞌudechoo Jesus huwa ꞌítꞌen te naꞌditꞌen, ꞌinkꞌez dádiltiꞌ la ꞌet whúbunilhtan. ꞋI gha la yugha hodulꞌehne ꞌen ghun buba ꞌalhaꞌ yintꞌoh suliꞌ.

Jerusalem lugliz whucho Jesus ooketne tenábuninyoot

¹² Hukwꞌelhꞌaz Jesus keyoh Capernaum huwhutni tsꞌe whinya. Ooloo, bulhutsinke, ꞌinkꞌez yugha hodulꞌehne cha, ꞌaw saꞌ iloh ꞌet hudáltsꞌiꞌ.

¹³ ꞋAwet whenghoh whudizulh ndet daꞌ Lizwifne buyoh Yakꞌusda oolizas Butus Lhuséya whúnahulnih-un, ꞌet Jesus Jerusalem tsꞌu whínya.

¹⁴ ꞋEt lugliz whucho whunaꞌulhyó-un whambez tsꞌe oozya ꞌet la dune ꞌeꞌóoketne ꞌubunilhꞌen. Khunai-i, musdoos, ꞌusbai te, ꞌinkꞌez dutꞌaiyaz te, dove huyúlhni, huye ꞌóoket, ꞌinkꞌez dune sooniya lhkꞌenádudzaihne, ꞌenne cha ꞌet ꞌuhutꞌen.

¹⁵ Tlꞌoolhyaz be tutsus ꞌinla. ꞋI be khuna-i tsꞌiyawh tenaíninyoot. Sooneya lhkꞌenádudzaihne cha buzooneya nus wheyantsut, ꞌinkꞌez buludab cha yun tizdla.

¹⁶ ꞋInkꞌez dutꞌaiyaz be óoketne ubúlhni, “Ndowhi tenánuhle! ꞋAw sBá ooyoh ꞌet ꞌeꞌóoket bayoh whulhtsi iloh!” ubúlhni.

¹⁷ ꞋEt ndunne yugha hodulꞌehne whunahilni ooghun ꞌukꞌu nusguz-i daja ni la, ꞌet ndutni, “Njan nyoh hukwaꞌ nuszun kꞌet ꞌantsꞌi syo tsꞌe duskꞌun le ꞌustꞌoh.”

¹⁸ ꞋEt Lizwifne ꞌuhuyúlhni, “Njan ntsꞌoh te la neꞌíntꞌen-un di gha ꞌíntꞌen hooncha túneꞌ ꞌintꞌen, ꞌet whunénilhtun?”

¹⁹ ꞋEt Jesus ubúlhni, “Njan yoh whudíztiꞌ-un nohni musai whulhtsi ꞌinkꞌez tat dzin inleꞌ de, ꞌet dunaóodutásꞌalh.”

²⁰ ꞋEt ndunne Lizwifne úhuyúlhni, “Njan yoh whudíztiꞌ-un dit whunizyat ꞌon ꞌat lhkꞌu tat yus kꞌut whe lhaóodulya. ꞋEt daja ninzun wheꞌ dini, tat dzin whutoh za dunaoodutánꞌalh dini,” huyúlhni.

²¹ ꞋEt njan Jesus yoh whudíztiꞌ-un howu yalhduk whe, didutchꞌoh duyustꞌe ꞌi ghu yalhduk whe ꞌutni ínleꞌ.

²² ꞋEt huwa la Jesus Christ dazsaine butoh dunadija whe yugha hodulꞌehne whunahilni daja ubúlhni inleꞌ daꞌ, ꞌinkꞌez Yakꞌusda ooghuni ꞌukꞌu nusguz-i ꞌinkꞌez khuni ꞌi Jesus ye yaílhduk-i bulh daja ni la tsꞌiyawh buba ꞌálhaꞌ ꞌuhoontꞌoh.

²³ ꞋAwhuz Jerusalem ꞌet ꞌutꞌen whe Butus Lhusuya-un, ꞌet whutoh neꞌwhutꞌen-un, whulohne mbene la Jesus yunilhꞌenne ntsꞌo tula neꞌútꞌen-un, ꞌet huwa kꞌus lhane booziꞌ buba ꞌalhaꞌ yintꞌoh suliꞌ.

²⁴ ꞋEt hoontsꞌi Jesus didutchꞌoh ꞌaw dunene butꞌanílhnitan, tꞌewhunínzun dune dahíntꞌoh la ꞌet huwa.

²⁵ ꞋInkꞌez ꞌaw ꞌuyoonne dune dahíntꞌoh la ꞌet hidóniꞌ ꞌaítꞌoh, didutchꞌoh dunene dahíntꞌoh la tꞌewhunínzun ꞌet huwa.