John 19 - Yak'usda Ooghuni

Pilate Jesus tulalhgus unduntáltꞌoh-un whutsꞌu beꞌ neninya

¹ ꞋEt hukwꞌelhꞌaz Pilate Jesus huyolhtsas-un huwá balhꞌaꞌ,

² ꞌinkꞌez lhuganne whus cho ꞌawh nahinilhjaz-i, ꞌi hitsi nehídanꞌai, ꞌinkꞌez luglok dulkꞌun-i, ꞌi hitꞌuhúyulhbal,

³ ꞌinkꞌez ꞌuhuyulhni, “Lizwif bulerwe-un saꞌ cho honaꞌ.” ꞋInkꞌez hinin tsꞌe huyoonukat.

⁴ ꞋEt doo cha za Pilate ꞌaz butsꞌú tenanja ꞌinkꞌez ꞌubulhni, “Nulhꞌen, ndun ꞌaw whe nínta ꞌuntꞌen-un ooghu nahósꞌalh ꞌaítꞌoh, ꞌinka nohtsꞌú tenanusti.”

⁵ ꞋEt Jesus whus cho ootsi nedinꞌai ꞌinkꞌez luglok dulkꞌun-i naitsꞌuz whe tenánja Pilate yunilhꞌen ꞌet ubúlhni, “Nulhꞌen, ndun dune!”

⁶ Lubret bumoodihne ꞌinkꞌez neilhchúkne te, hitilhꞌen ibulh, soo tube cho sulya hulhduk ꞌinkꞌez, “Tulalhgus ꞌundunulhtꞌah! Tulalhgus ꞌundunulhtꞌah!” hutni. ꞋEt Pilate ubúlhni, “Nohnichꞌoh ulhchoot ꞌinkꞌez tulalhgus ꞌundunulhtꞌah! Si ꞌaw whe nínta ꞌuntꞌen-un ooghu nalhuwhúsꞌal ꞌaítꞌoh ꞌet huwa!”

⁷ ꞋEt Lizwifne ꞌuhuyúlhni, “Wheni khuni neba ootulhúhisdeꞌ-i tsꞌutꞌi, ꞌi kꞌut ꞌutni, daóotsa huba ꞌuhoontꞌoh. Lheꞌutni Yakꞌusda ooYeꞌ ꞌududulhtsi ꞌet huwa.”

⁸ ꞋEt Pilate whudántsꞌo whe tube ꞌon nus nílhjoot.

⁹ ꞋInkꞌez doo cha za duyoh tsꞌe danánja ꞌinkꞌez Jesus yoodulhkut, “Ntsꞌez de haínya whe ꞌintꞌoh?” yúlhni. ꞋEt Jesus ꞌaw yulh yálhtilhdih.

¹⁰ ꞋEt huwa Pilate uyúlhni, “ꞋAw eh sulh yaóolhduk ꞌaítꞌoh? ꞋAw eh tꞌéwhunuzínzun tulalhgus nyundunóstꞌa-un sghá whuntꞌai kꞌus nla nadutistníh-un cha sghá whuntꞌai?”

¹¹ ꞋEt Jesus uyúlhni, “ꞋAw ndus de yakꞌuz whutsꞌun ngha lhúhootꞌal de, ꞌaw sando ꞌontꞌeꞌ ꞌaítꞌoh. ꞋEt huwa mbe la ntlꞌa sálhti-un, ꞌen oolubeshi nyun nlubeshi anus ꞌulcho.”

¹² Pilate whudántsꞌo whe Jesus whe yúla nadootnih-un, ꞌet nahóꞌalh hukwa ꞌitꞌen. ꞋEt Lizwifne sulya hulhduk ꞌinkꞌez huyúlhni, “Ndun dune oola nadantni de, ꞌaw lerwe Caesar ooyadan iloh ꞌintꞌoh! Mbe la lerwe naꞌdudilꞌí-un, ꞌen lerwe Caesar yuchꞌaz ditni-un ꞌuntꞌoh!”

¹³ Pilate whuduztsꞌai whe kwꞌutsꞌuzda yukꞌusda whe dune ba nahiyilh-i, ꞌi kꞌenátlꞌa didaꞌ. ꞋEt Jesus dubut nehéyolhtelh ndet la Hebrew kꞌunꞌa Gabbatha huwhútni, ꞌi khuni ꞌutni tse ookꞌut hoodzo-i ni whe ꞌutni. ꞋI kꞌut kwꞌutsꞌuzda yulhꞌai dune ba nahiyilh wheni.

¹⁴ Ndi dzin Butus Lhuséya-un, ꞌet dzin wheni lhahúdutneh-un, 6:00 atꞌen ꞌuhúnitꞌoh, ꞌet Pilate Lizwifne ubúlhni, “Ndun nohlerwe nulhꞌen!”

¹⁵ ꞋEt hoontsꞌi sulya hulhduk ꞌinkꞌez ꞌuhutni, “Nꞌawh bulh ꞌudini! Tulalhgus undunilhtꞌah!” ꞋEt Pilate ubúlhni, “Nohlerwe ꞌen eh tulalhgus kꞌeítastelh?” ꞋEt lubret bumoodihne ꞌuhutni, “Lerwe Caesar ꞌaw ꞌen za nelerwe, ꞌaw ꞌuyoon nelerwe hooloh!”

Jesus tulalhgus kꞌehíyilhti

¹⁶ ꞋEt ꞌawet Pilate Jesus tulalhgus kꞌehúyolhtelh wheni butlꞌa yálhti. Huyílhchoot ꞌinkꞌez ꞌon ꞌun whenáhuyalhti.

¹⁷ ꞋInkꞌez dutulalhgus yuditelh whe ꞋUtsin Tsꞌun huwhútni, whuz oozya. ꞋEt Hebrew kꞌunꞌa Golgotha huwhútni.

¹⁸ Whuz tulalhgus kꞌehíyilhti. ꞋUyoonne nane cha huyúlh ꞌubihinla. ꞋIlhoghun ꞌíntlꞌus tsꞌe, ꞌet ꞌilhoghun cha ooghu naílhni tsꞌe, ꞌet Jesus ꞌen buniz ꞌuhuyínla.

¹⁹ ꞋEt Pilate yukꞌúneꞌ uzguz-i, ꞌi butlꞌa yánꞌai tulalhgus huyundunólhtꞌa ha. ꞋI kꞌut ꞌutni: JESUS NAZARETH WHUTꞋEN, LIZWIFNE BULERWE ꞋUNTꞋOH

²⁰ Tube keyoh whenghoh ꞌuhuyinla whe tulalhgus kꞌehúyilhti ꞌet huwa, tube lhane Lizwifne ndi Pilate yukꞌúneꞌ úzguz-i hikꞌu yailhduk. ꞋInkꞌez ndi khuni tawh didowhne bukꞌunꞌa ꞌukꞌu nusguz. Hebrew kꞌunꞌa cha, Greek kꞌunꞌa cha, ꞌinkꞌez Latin kꞌunꞌa cha.

²¹ ꞋEt huwa Lizwif lubret bumoodihne Pilate huyúlhni, “ꞋAw ndun Lizwifne bulerwe ꞌuntꞌoh dini whe iloh ꞌukꞌeꞌinges. ꞋAntsꞌi njan ndutni dini, si Lizwifne bulerwe ꞌustꞌoh.”

²² ꞋEt Pilate ubúlhni, “Ndai la ꞌukꞌú nusúsguz-i, ꞌi ntsꞌenꞌa ꞌusdla, ꞌet whuz unꞌa ootꞌeꞌ ha ꞌusdla.”

²³ ꞋEt ndunne lhuganne Jesus tulalhgus ꞌuhídunilhtꞌo hukwꞌelhꞌaz, hinaih huyílhchoot ꞌinkꞌez dunghi huyulhtsi whe ꞌilhoghun hinli whe lhtahúyulya. ꞋEt ndi ꞌude kꞌut ye usdá-i, ꞌi ꞌaw lhunduníkai iloh whe ꞌilho za unli whe ꞌulya-i.

²⁴ ꞋI ghun didutchꞌoh ꞌulhodutni, “Ndi ꞌi ꞌaw yanúlhtsꞌudoolhchꞌul. ꞋAntsꞌi ooghu ꞌá tsꞌoolꞌih, mbe suba ootsꞌítooneh.” ꞋEt nduhútni whe Yakꞌusda ooghuni soo ookꞌoh te néꞌhootꞌen ꞌinka ꞌuhutni. Ndi khuni ꞌi ndutni inleꞌ, “Snaih-i, ꞌi tsꞌiyawh lhtahúyulya. ꞋUde kꞌut be susda-i, ꞌi higha ꞌaínlih.” ꞋEt soo ꞌoh te lhuganne néꞌhustꞌen.

²⁵ ꞋEt Jesus ootulalhgus soo be nghoh ꞌet ooloo usyin. Ooloo bulhtus cha, ꞌinkꞌez Mary Clopas ooꞌat cha, ꞌinkꞌez Mary Magdala whutꞌen cha.

²⁶ Jesus duloo yunilhꞌen ꞌinkꞌez ꞌilhoghun yugha hodulꞌeh, soo ꞌukꞌenus yukꞌensiꞌ-un, ꞌen cha ye nghoh usyin. ꞋEt Jesus duloo ꞌuyulhni, “Tsꞌeke, ndun nyeꞌ nilhꞌen.”

²⁷ ꞋEt ndun yugha hodulꞌeh-un, ꞌen cha yunilhꞌen whe uyúlhni, “Ndun nloo nilhꞌen.” Soo ꞌet whutsꞌun ndun yugha hodulꞌeh-un Jesus ooloo duyoh daínilhti.

Tulalhgus kꞌut Jesus ye khúna-i yula ditni

²⁸ Njan ꞌoh te neꞌwhustꞌen hukwꞌelhꞌaz Jesus tꞌéwhunínzun tsꞌiyantsuk lhaóoduja. ꞋEt didut ooghun Yakꞌusda ooghuni ꞌukꞌu nusgúz-i daja ni la, ꞌet ndúhoneh ꞌet huwa, “Taꞌóosda,” ni.

²⁹ ꞋEt nyo ꞌoosaꞌyaz tsꞌekoo tooꞌ tsꞌulkiꞌ-i ꞌet ꞌusꞌai. ꞋEt nyoo ootaꞌniltsít-i tsꞌekoo tooꞌ huyé tunahuyuzꞌai ꞌinkꞌez duchun hyssop huyúlhni, ꞌi la hídalhꞌooꞌ, ꞌinkꞌez hize tsꞌe dubeꞌ hidunintan.

³⁰ ꞋEt nyoo tsꞌekoo tooꞌ tsꞌulkiꞌ-i yunawhúzdlih ꞌinkꞌez ꞌutni, “ꞋAwet tsꞌiyantsuk lhawhúduja.” Yo nenintꞌai ꞌinkꞌez ye khúna-i yula ditni.

³¹ ꞋEt dzin ꞌet la nahulyís-un dzin huba lhahúdutneh, ꞌinkꞌez nyo natsꞌulyís-un dzin whudíztiꞌ whe ꞌuhoontꞌoh. Lizwifne ꞌet dzin nezi ꞌaw tulalhgus kꞌut oolaꞌ hukwa lheꞌhunízun, ꞌinka Pilate huyoodulhkut bukechun kꞌunuhúyooyuz ꞌinkꞌez buzi nanáhuyoolelh ꞌet hukwa.

³² Lhuganne whuz hoozdil whe soo ꞌudechoo ndunne nane Jesus hiyulh tulalhgus kꞌut sulhtíne, ꞌenne cho bukechun kꞌunuhúzyuz.

³³ ꞋEt Jesus highu nindil whe ꞌudaꞌ dazsai hinilhꞌen, ꞌinka ꞌaw hikechun kꞌunulhúhiyus.

³⁴ ꞋEt hoontsꞌi ꞌilhoghun lhugan-un sohtuz be yuzih kꞌut ꞌet yúzgwut. ꞋAho ꞌuskaiꞌ ꞌinkꞌez tooyaz bulh, ꞌi ootsꞌu ha yíjul.

³⁵ ꞋEt ndun mbe la howu yalhduk-un, soo ꞌalhaꞌ whunalhꞌen whe ꞌutni. ꞋInkꞌez daja ni la soo didutchꞌoh tꞌéwhunínzun whe ꞌutni. ꞋEt huwa la nohba ꞌalhaꞌ ꞌuhotꞌeꞌ.

³⁶ ꞋEt whuz unꞌa ꞌoh te neꞌwhustꞌen. ꞋEt huwa ndai la Yakꞌusda ooghuni ꞌukꞌu nusguz-i, ꞌi kꞌunꞌa lhawhúduja whe ndutni, “ꞋAw ꞌilho ootsꞌun ꞌi hoontsꞌi kꞌulhítih,” ni.

³⁷ ꞋEt Yakꞌusda be ꞌudustlꞌus ꞌukꞌu nusgúz-i, ꞌi kꞌut ꞌudun ꞌet cha ꞌutni, “Mbe la huyúzgwut-un, hinoolhꞌen la,” ni.

Jesus ꞌahúyalhti

³⁸ ꞋAwet ꞌoh te neꞌwhustꞌen hukwꞌelhꞌaz ꞌet Joseph, Arimathea whutꞌen-un, Pilate yughu ninya ꞌinkꞌez Jesus oozi yólhchoot hukwa yoodulhkut. ꞋEt Joseph ꞌen cha Jesus yugha hodulꞌeh-un unli, ꞌet hoontsꞌi Lizwifne bube nuljut ꞌinka whuꞌiz Pilate yugha óoninꞌai Jesus oozi nayólhchoot ꞌinkꞌez whusainya ꞌinkꞌez oozi yílhchoot.

³⁹ ꞋEt Nicodemus, ꞌen cha yulh whúsainꞌaz. ꞋEn ꞌuja ínleꞌ soo ꞌudechoo Jesus wheꞌ ditꞌen whe ꞌilho ꞌulhdzis yughu ninya. Yoo sooltsun-i, myrrh ꞌinkꞌez aloes bulh lhtadilyá-i whe 100 pounds atꞌen ꞌuldaz, ꞌi whusayánꞌai.

⁴⁰ ꞋEt Jesus oozi huyílhchoot ꞌinkꞌez Lizwifne bube ꞌutꞌen kꞌoh hukwꞌunꞌa, naih diztiꞌ ꞌulhyúl-i huyílhchoot ꞌinkꞌez yoo sooltsun-i lhtahidínla-i hikꞌú nuhúyuzdzai, ꞌinkꞌez Jesus oozi higha húyozduz ꞌahitílhtelh wheni.

⁴¹ ꞋEt nyo ndet daꞌ tulalhgus ꞌahidunilhtꞌó-un, ꞌet whenghoh haꞌ nuyeh kꞌet whuzꞌai. ꞋEt ꞌawhundidí-un tse be tsa kꞌet ꞌaw whutsodaꞌ dune ꞌalhuhulhtí-un whuzꞌai.

⁴² ꞋEt tube nilhdukw ꞌinka Jesus oozi ꞌet ꞌuháyalhti, Lizwifne ꞌet dzin lhahúdutneh-un ꞌuhoontꞌoh ꞌet huwa.