John 18 - Yak'usda Ooghuni

Jesus ꞌawet huyilhchoot

¹ Jesus ndi khuni be tenadidli hukwꞌelhꞌaz, yugha hodulꞌehne tubulh ꞌukoh wheyaz Kedron huwhútni, nyan yahunindil. ꞋEt ha nuyeh kꞌet whuzꞌai. Whuz yugha hodulꞌehne tubulh dahunindil.

² ꞋInkꞌez Judas, mbe daꞌ ye ónket-un, ꞌen cha nyo tꞌéwhunínzun, Jesus yugha hodulꞌehne tubulh lhat ꞌet ꞌilhúnahodulh ꞌet huwa.

³ ꞋEt lubret bumoodihne ꞌinkꞌez Phariseene te, ndunne lhuganne ꞌinkꞌez neilhchúkne te, Judas dulh ubutilhdil. Too dízkꞌun te, bé nukwunultꞌa-i, ꞌinkꞌez saluzti te, tsꞌiyawh hitizdla.

⁴ Jesus ntsꞌoh te la didut ooghun neꞌwhutitꞌen, soo tsꞌiyawh tꞌéwhunínzun, ꞌinka bududizya ꞌinkꞌez uboodulhkut, “Mbe kunúhta whe ꞌahtꞌen?” ubúlhni.

⁵ ꞋEt ꞌuhuyúlhni, “Jesus Nazareth whutꞌen-un, ꞌen kúznuta.” ꞋEt Jesus ꞌubulhni, “Si ꞌen ꞌustꞌoh.” ꞋEt Judas ye ónket-un, ꞌen cha butoh usyin.

⁶ Ndet la Jesus si ꞌen ꞌustꞌoh ubúlhni whe, tsꞌiyawh kꞌoh le duhúja ꞌinkꞌez yun kꞌut nahánkat.

⁷ ꞋEt doo cha za uboodulhkut, “Mbe kunúhta whe ꞌuhtꞌen?” ꞋEt ꞌuhutni, “Jesus Nazareth whutꞌen-un, ꞌen kúznuta.”

⁸ ꞋEt Jesus ꞌubulhni, “ꞋUdaꞌ nohdasniꞌ, si ꞌen ꞌustꞌoh. ꞋInka si skunáhta de, ndunne, ꞌenne nahutoodílh-un bugha óonahꞌaih.”

⁹ ꞋEt Jesus whutsodaꞌ daja tenadidli ínleꞌ daꞌ, “Sghá buninlane ꞌaw ꞌilhoghun hoontsꞌi nintalhústel,” ni, ꞌet ꞌoh te néꞌhootꞌen ꞌinka ubúlhni.

¹⁰ ꞋEt Simon Peter saluzti ꞌutꞌi, déhayalhtsus, ꞌi be lubret ꞌukꞌenus díztiꞌ-un be ꞌustle-un ye yoonilhtꞌo whe nailhni tsꞌunkꞌus yudzo habeꞌ yalhtꞌo. ꞋEn ꞌustle-un booziꞌ Malchus huyúlhni.

¹¹ ꞋEt Jesus Peter uyúlhni, “Nyoo saluzti oozus be naíntih. ꞋAlhaꞌ iloh lakw ndi lubot be dzoh nudeh-i, sBá stlꞌa yánkai-i, ꞌulhtuzisnel?”

¹² ꞋEt lhuganne bumoodih ꞌinkꞌez Lizwifne neilhchukne Jesus huyílhchoot ꞌinkꞌez huyulhghel.

¹³ ꞋInkꞌez ꞌudechoo Annas ꞌen cho highu hinílhti. ꞋEn la Caiaphas ꞌet nawhuduzuk huba lubret ꞌukꞌenus díztiꞌ-un unli ínleꞌ, ꞌinkꞌez Annas, ꞌen oozaz ꞌuntꞌoh ꞌinka.

¹⁴ ꞋEt ndun Caiaphas ꞌen ꞌutni ínleꞌ, Lizwifne bugha ꞌutni whe ndutni, ꞌilhoghun dune ꞌen tsꞌiyanne dune ba dazsai de, ꞌet hootázooꞌ ni.

Peter Jesus ꞌaw tꞌéinúszun ni

¹⁵ ꞋInkꞌez Simon Peter ꞌinkꞌez ꞌilhoghun yugha hodulꞌeh-un bulh Jesus huyúntizꞌaz. Ndun ꞌilhoghun yugha hodulꞌeh-un, ꞌen lubret ꞌukꞌenus díztiꞌ-un tꞌeinínzun, ꞌinka ꞌen Jesus nanistlꞌoo bet yúlh danínya.

¹⁶ ꞋEt Peter ꞌen dati yoo ꞌaz tsꞌe usyin. ꞋEt ndun Jesus yugha hodulꞌeh-un ꞌilhoghun, mbe la lubret ꞌukꞌenus díztiꞌ tꞌe inínzun-un, ꞌen ꞌaz tenínya ꞌinkꞌez dati ghunlí-un yulh yaílhduk whe Peter cha daínilhti.

¹⁷ ꞋEt nyoon tsꞌekeyaz, dati ghunlí-un, ꞌen Peter ꞌuyulhni, “Nyun cha iloh lakw nyoon dune yugha hodulꞌeh-un ꞌilhoghun inli?” ꞋEt Peter, “ꞋAwundooh,” yúlhni.

¹⁸ ꞋEt whulohne ꞌustlenne ꞌinkꞌez neilhchukne te whúzkꞌuz ꞌinka kwun húdulhkꞌan. Nahuldzilh whe Peter ꞌen cha butoh usyin ꞌinkꞌez naldzilh.

¹⁹ ꞋEt ndun lubret ꞌukꞌenus díztiꞌ-un Jesus yugha hodulꞌehne, ꞌinkꞌez hubodulhꞌeh-un hukwa yoodulhkut.

²⁰ ꞋEt Jesus uyúlhni, “Soo tsꞌet gaih ꞌet ndi yun kꞌut whuduneꞌne bubulh yásduk. ꞋAhoolhyiz wheni lugliz ꞌinkꞌez lugliz whucho ntsꞌe la Lizwifne ꞌilhúnahodulh-un, ꞌet dune hodusꞌeh. ꞋAw ꞌilhoh whuꞌiz khuni be yalhúsdih.

²¹ ꞋInkꞌez di ha hukwa soodulhkut? Daja dusni la mbene sudántsꞌone, ꞌenne uboodulhkut, soo tsꞌihꞌun tꞌéhonínzun daja disniꞌ la.”

²² ꞋEt Jesus njan ꞌet ndutni whe, ꞌilhoghun neilhchuk-un yuzih usyin-un, yunin tsꞌe yunízkuk ꞌinkꞌez uyúlhni, “Mbe naꞌdunínzun whe ꞌudini? Nyoon lubret ꞌukꞌenus díztiꞌ-un, ꞌen whuz unꞌa eh bulh yaílhduk!”

²³ ꞋEt Jesus uyúlhni, “Dzoh kꞌunꞌa yatísduk de, ꞌet nedini daja dusni. ꞋEt tsꞌihꞌun unꞌa ꞌudusni de, di ha sunínkuk?”

²⁴ ꞋEt Annas ꞌawhuz Jesus ꞌulhghel whe lubret ꞌukꞌenus díztiꞌ-un Caiaphas, ꞌen tsꞌun whe yalhꞌaꞌ.

²⁵ ꞋEt Peter ꞌawhuz kwun ba usyin ꞌinkꞌez naldzilh, ꞌet ꞌuhuyúlhni, “Nyun cha iloh lakw yugha hodulꞌehne butoh ꞌilhoghun inli?” ꞋEt whutsꞌoodidlai ꞌinkꞌez, “ꞋAwundooh,” ubúlhni.

²⁶ ꞋEt lubret ꞌukꞌenus díztiꞌ-un be ꞌustle-un ꞌilhoghun, Peter mbe daꞌ yudzo haílhtꞌaz-un, ꞌen oonadun ꞌuntꞌoh, ꞌet yúlhni, “Nyun cha iloh lakw ha nuyeh kꞌet bulh ꞌíntꞌen whe nyisꞌen ínleꞌ?”

²⁷ ꞋEt doo cha za Peter whutsꞌoodidlai whe soo ꞌaho lugok dune ꞌudíja.

Jesus Pilate but néhinilhti

²⁸ ꞋEt Jesus Caiaphas ooyoh tenáhinilhti, yun kꞌut humoodih, Pilate huyulhni ꞌen ooyoh tsꞌe whe húyalhti. Bundada tube ꞌudaꞌ ꞌuhoontꞌoh ꞌinkꞌez Lizwifne ꞌaw hiyoh dálhidulh. ꞋEt yoh dahúnindil de, ꞌenne buba me hoonli. ꞋEt ndahúja de, ꞌaw njan Butus Lhuseya naꞌhutꞌulh-un, ꞌaw ꞌuhooꞌalh ꞌaítꞌoh ꞌet huwa.

²⁹ ꞋEt Pilate ꞌaz butsꞌun teninya ꞌinkꞌez uboodulhkut, “Ndun dune ndet hukwa ookꞌé whuhꞌaih whe ꞌahtꞌen?”

³⁰ ꞋEt ꞌuhuyúlhni, “ꞋAw ndun dune ninta lheꞌítꞌel de, ꞌaw ntsꞌuz toolhteꞌ ꞌaítꞌoh.”

³¹ ꞋEt Pilate ubúlhni, “Ulhchóot ꞌinkꞌez nohnichꞌoh nohba ootulhúhisdeꞌ-i kꞌunꞌa ooba nahahyeh!” ꞋEt ndunne Lizwifne ꞌuhuyulhni, “Wheni ꞌaw dune tsꞌuzoolhghelh-un negha lhúhootꞌal.”

³² Njan ꞌet nduhútni whe Jesus ntsꞌenꞌa la datítsah howu yailhduk ínleꞌ, ꞌoh te néꞌhootꞌen haꞌ hutni.

³³ ꞋEt Pilate yoh tsꞌe whenája. Jesus yukahizya ꞌinkꞌez uyúlhni, “Nyun eh Lizwifne bulerwe inli?”

³⁴ ꞋEt Jesus ꞌuyulhni, “Nyunchꞌoh eh ꞌet ndunínzun, kꞌus ꞌuyoonne si sghun nyodániꞌ?”

³⁵ ꞋEt Pilate yúlhni, “Si eh Lizwif-un usdli ninzun? Nyunchꞌoh nyulh dunene ꞌinkꞌez lubret bumoodihne, ꞌenne stlꞌá nyuhalhti! Ndet whe nintaꞌnintꞌen?”

³⁶ ꞋEt Jesus ꞌuyulhni, “Ntsꞌe la lerwe usdli-un ꞌaw ndi yun kꞌut iloh ꞌuhoontꞌoh. ꞋEt ndi yun kꞌut whulerwe usdli de, sunidulhne ꞌaw daꞌ Lizwifne tlꞌa sulhoohoolhtel ooleꞌ daꞌ. ꞋAwundooh, whulerwe usdli-un ꞌaw ndi yun kꞌut iloh ꞌuhoontꞌoh.”

³⁷ ꞋEt huwa Pilate yoodulhkut, “ꞋEt de lerwe inli whe ꞌintꞌoh!” ꞋEt Jesus ꞌuyulhni, “Nyun ꞌalhaꞌ ꞌudini lerwe usdli. ꞋEt wheni whuzúsdli ꞌet huwa yinka whuduneꞌne soo cho dudeni be khuni ꞌalhaꞌ ꞌuntꞌoh-i tꞌéhinoozeh ꞌinka ndi yun kꞌut nenúsya. Mbene la khuni ꞌalhaꞌ ꞌuntꞌoh-i tꞌehuninzunne, daja dusni la soo cho suhoozílhtsꞌai.”

³⁸ ꞋEt Pilate uyúlhni, “Di la ꞌuntꞌoh khuni ꞌalhaꞌ ꞌuntꞌoh-i?” ꞋEt ndúdija hukwꞌelhꞌaz doo cha za Lizwifne ꞌaz butsꞌun tenanja ꞌinkꞌez ꞌubulhni, “ꞋAw whe nínta ꞌuntꞌen-un ooghu nahósꞌalh-un hooloh!

³⁹ ꞋEt nohni noheꞌútꞌen kꞌoh whuzꞌai Nohtus Lhuséya-un whutoh ꞌilhoghun dune ꞌadinꞌai-un, ꞌen nohba oola nadustnih lhih. Ndun Lizwifne bulerwe, ꞌen eh oola nadutistnih hukwaꞌ nahzun?”

⁴⁰ ꞋEt soo tsꞌiyawh sulya hulhduk whe ꞌuhutni, “Barabbas ꞌen oola nadintnih, ꞌaw ndun ꞌen íloh!” ꞋEt ndun Barabbas ꞌen ꞌundunutꞌih-un ꞌuntꞌoh.