John 14 - Yak'usda Ooghuni

Jesus yugha hodulꞌehne ubúlhni, “Si sgha za sBá ootsꞌu tíhdulh”

¹ “Khun te nohdzi úndoodaꞌ junih. Yakꞌusda nohba ꞌalhaꞌ ꞌuntꞌoh, whuz unꞌa si cha nohba ꞌalhaꞌ oostꞌeꞌ.

² SBá ooyoh lhat-un yoh whuzdla whe ꞌuhoontꞌoh. ꞋAw ꞌalhaꞌ lheꞌhóotꞌoh de, nohdósniꞌ daꞌ. Whuz tisyalh nohba lhawhúdutisdleh wheni.

³ Whuz oozusya ꞌinkꞌez nohba lhawhúdusdla de, doo cha za whusanátisdalh ꞌinkꞌez nohitáschulh, ndet susda-un, ꞌet si sulh ꞌútihtelh.

⁴ ꞋInkꞌez ntsꞌe la whésya tsꞌe ꞌinkꞌez ntsꞌe ti whéhonꞌa ꞌet tꞌéwhunáhzun.”

⁵ ꞋEt Thomas yoodulhkut whe ꞌuyúlhni, “Moodihti, ntsꞌe tanyalh ꞌaw tꞌetsꞌonúszun, ꞌinkꞌez ntsꞌenꞌa whuz ti tꞌétsꞌontázin?”

⁶ ꞋEt Jesus ꞌuyulhni, “Si yakꞌuz ti ꞌustꞌoh, khuni ꞌalhaꞌ ꞌuntꞌoh-i usdli, ꞌinkꞌez ꞌilhiz wheni be tsꞌukhuna-i, ꞌi cha usdli. ꞋAw ꞌilhoghun hoontsꞌi sBá yutsꞌun tóoyaꞌ ꞌaítꞌoh, si sgha za ꞌet ndótinelh.

⁷ Si tꞌésunahzun inleꞌ de, ꞌet sBá cha daꞌ tꞌenóhzin ooleꞌ. ꞋEt ꞌandit whútsꞌun, ꞌen ꞌawet tꞌenahzun ꞌinkꞌez ahꞌen cha ꞌáhja.”

⁸ ꞋEt Philip ꞌuyulhni, “Moodihti, mBá bunenilhtun ꞌinkꞌez uznoolhꞌen, ꞌet ꞌawet neba soo hoontꞌoh.”

⁹ ꞋEt Jesus ꞌuyulhni, “Philip, lheꞌwhuldzoh nohbulh ꞌústꞌen, ꞌet ꞌawhuz eh tꞌésunuzínzun? Mbe la sanꞌen-un, ꞌen sBá cha hiyanꞌen. ꞋInkꞌez di ha, ‘MBá bunenilhtun,’ díni?

¹⁰ Si sBá ooyudúsda ꞌinkꞌez sBá cha syudínda. ꞋEt ꞌaw eh mba ꞌalhaꞌ lheꞌhóotꞌoh? Khuni be nohbulh yásduk-i ꞌaw si sghuni iloh ꞌuntꞌoh. SBá syudínda-un, ꞌen ndi ꞌutꞌen ꞌuyulhꞌen-i ꞌuntꞌoh.

¹¹ Nohba ꞌalhaꞌ ꞌuhotꞌeꞌ si sBá ooyudúsda ꞌinkꞌez sBá ꞌen syudínda. ꞋEt nohba ꞌalhaꞌ lheꞌhóotꞌoh de, ndi ꞌutꞌen ndai la ꞌulyá-i, ꞌi gha si sghun nohba ꞌalhaꞌ ꞌuhotꞌeꞌ.

¹² Soo tsꞌihꞌun unꞌa nohdúsni, mbe la buba ꞌalhaꞌ ꞌustꞌoh-un, ꞌen ndi ꞌutꞌen ndai la ꞌusꞌén-i, ꞌenne cha ꞌuhitilhꞌelh. ꞋEt si sBá ootsꞌu nátisdalh ꞌet huwa si ꞌutꞌen ꞌisꞌén-i ꞌon nus ꞌulcho-i ꞌutꞌen ꞌi la ꞌuhuyoolhꞌen.

¹³ ꞋInkꞌez ndai la si sooziꞌ gha ookaꞌ dahni-i ꞌoh te nohba neꞌtistꞌen. ꞋEt huwa la sBá ꞌen ooYeꞌ gha ooba whudóltiꞌ.

¹⁴ Ndai la si sooziꞌ gha ookaꞌ dahni-i, ꞌet nohba ꞌuwhutisdlelh.

¹⁵ Nohni skꞌehsiꞌ de, ndi khuni nohtlꞌa dísdla-i ookꞌuneꞌ ꞌoohtꞌen.

¹⁶ ꞋInkꞌez sBá ꞌen la ꞌilhiz wheni nohLaꞌtitꞌelh-un, ꞌen nohgha ítalhtelh, ꞌet la ootsꞌu hukwaꞌ doosniꞌ.

¹⁷ ꞋEn Ndoni ꞌuntꞌoh. Ndai la khuni ꞌalhaꞌ ꞌuntꞌoh-i, ꞌi za ootsꞌu haídultsꞌuk. Ndi yun kꞌut whuduneꞌne ꞌaw dudeni be tꞌehinúszun ꞌinkꞌez ꞌaw huyólhchoot ꞌaítꞌoh. ꞋEt nohni tꞌenahzun, nohbulh ꞌúntꞌoh ꞌinkꞌez nohyudútiltsꞌulh.

¹⁸ ꞋAw tsꞌunóhne ꞌahli leꞌ ꞌahtꞌoh whe nohghu toosyaꞌ ꞌaítꞌoh. Nohtsꞌun tóosyaꞌ la.

¹⁹ Dzoh saꞌyaz inleꞌ de, ꞌinkꞌez yinka whuduneꞌne, sulhotisꞌel, ꞌet hoontsꞌi nohni suntilhꞌelh. Si khusna ꞌet huwa nohni cha khutihnalh.

²⁰ ꞋEt dzin de ꞌet la tꞌewhunohzin si sBá ooyudúsda ꞌinkꞌez sBá cha syudínda ꞌinkꞌez ꞌon ꞌun nohni cha nohyudusda.

²¹ Mbene la khuni ꞌet nédisdla-i yukꞌúneꞌ ꞌutꞌenne, ꞌenne skꞌensiꞌne ꞌuhintꞌoh. ꞋInkꞌez mbene la skꞌentsíꞌne, sBá cha bukꞌetisiꞌ, ꞌinkꞌez si cha bukꞌetisiꞌ ꞌinkꞌez mbe usdli ꞌet la tꞌehoninzun hubooselh.”

²² ꞋEt Judas, ꞌaw Judas Iscariot ꞌen iloh, ꞌen Jesus ꞌuyulhni, “Moodihti, ntsꞌenꞌa ꞌuhoontꞌoh whe nyun nghun tꞌetsꞌonózin-un neba ꞌuwhutánlelh, ꞌet hoontsꞌi yinka whuduneꞌne, ꞌenne nyun nghun ꞌaw tꞌéhontászin dini?”

²³ ꞋEt Jesus ꞌuyulhni, “Mbene la skꞌentsiꞌne, ꞌenne sghuni yootatun. ꞋEnne sBá bukꞌetisiꞌ ꞌinkꞌez bubulh whútitꞌelh ꞌet whe la si bulh butoh ókeꞌ.

²⁴ Mbene la skꞌelhísiꞌne, ꞌaw sghuni hikꞌu nulheꞌustꞌen. ꞋInkꞌez ndi khuni nohni dahtsꞌo-i, ꞌaw sichꞌoh sghuni iloh ꞌuntꞌoh. SBá, whuz de sútilhꞌaꞌ-un, ꞌen ooghuni ꞌuntꞌoh.

²⁵ ꞋAwhuz nohtoh ꞌustꞌoh whe njan ꞌet nohdúsni.

²⁶ ꞋEt ndun nohLaꞌutꞌen-un, Ndoni ꞌuntꞌoh, ꞌen si sooziꞌ gha sBá ꞌen nohtsꞌítilhꞌalh, tsꞌiyantsuk whunohodutilhꞌeh ꞌinkꞌez daja nohdásniꞌ la ꞌet whunalhnih cha nohtilhtselh.

²⁷ Be nedzi dizghel-i, ꞌi nohghu nenánustꞌai. ꞋI sichꞌoh be sdzi dizghel-i, ꞌi nohgha núsꞌai. Ndi be nedzi dizghel nohgha núsꞌai-i, ꞌi ꞌaw yinka whuduneꞌne nohgha húyuꞌaih-i, ꞌi ndúlhiltꞌoh whe ꞌuntꞌoh. Khun te nohdzi úndoodaꞌ ꞌinkꞌez noolhjut júnih!

²⁸ Sudahtso whe nohdásniꞌ. ꞋAwet nohghu tisyalh ꞌinkꞌez nohtsꞌun natisdalh la. SBá ꞌen sanus díztiꞌ ꞌet huwa ꞌen ootsꞌu nátisdalh, ꞌinkꞌez skꞌehsiꞌ de, ꞌandit daja nohdásniꞌ ꞌet huwa la whunólhni.

²⁹ ꞋInkꞌez ꞌoh te neꞌwhutitꞌen-un, ꞌandit nohdásniꞌ. ꞋEt de la whusahóoltsꞌut de, si sghun nohba ꞌalhaꞌ ꞌuhotꞌeꞌ.

³⁰ ꞋAw dzoh saꞌyaz ꞌon ꞌun nohbulh yaóosduk ꞌaítꞌoh. Ndi yun kꞌut humoodih ꞌaz de úyalh ꞌinkꞌez si sghun ꞌaw ntsool-iyaz ꞌi hoontsꞌi oochꞌeꞌ lhuyíloh ꞌet huwa.

³¹ Dugweꞌ dudahdilh, ꞌawet njan huwuztoodilh, ꞌet huwa la yinka whuduneꞌne tꞌéhonózin sBá ookꞌesiꞌ ꞌinkꞌez ntsꞌoh te la khuni stlꞌa ídanꞌai, ꞌoh te neꞌústꞌen.”