John 12 - Yak'usda Ooghuni

Soo ꞌudekꞌez Jesus Jerusalem tsꞌe tizya

¹ Dzenis whuti Butus Lhuseya huwhútni-un ꞌawhuz lhkꞌu tat dzin whuzꞌai, ꞌet Jesus keyoh wheyaz Bethany ꞌet ꞌuja Lazarus dazsai whe yaidlane toh dunaidilhti inleꞌ, ꞌet Lazarus whutꞌi, whuz oozya.

² ꞋEt hulhgha naꞌtitꞌulh wheni hiba lhadúja. Martha ꞌen buba hukwꞌeꞌile. ꞋEt Lazarus ꞌen cha bubulh naꞌutꞌalh.

³ ꞋEt Mary lubot dizbun atꞌen, kꞌunutsꞌújul soo díztiꞌ-i, ꞌughih nard huyulhni, ꞌi utahaltsus-i whusayánꞌai. ꞋI be Jesus yuke yulhlho ꞌinkꞌez dutsighaꞌ be yunaꞌalhde. Yoh ndulcho whe kꞌunutsꞌújul be soo whultsun suliꞌ.

⁴ ꞋEt ꞌilhoghun yugha hodulꞌeh-un Judas Iscariot, Simon ooyeꞌ, ꞌen ꞌutinelh yeꞌ óotakulh-un,

⁵ ꞌen ꞌutni, “Di ha ndi kꞌunutsꞌújul be lhéꞌoohkulh ꞌinkꞌez telꞌenne gha lhúzahdzaih? Tube díztiꞌ whe ꞌuntꞌoh!” ni.

⁶ ꞋEt ꞌaw telꞌenne buba dátni iloh huwa ꞌet ndutni, ꞌundunutꞌih-un unli ꞌinkꞌez sooniya zus ndai la be yúkat-i, didut buba nuyáꞌa, ꞌinkꞌez hukwaꞌ ninzun totsuk ndai la be yúkat-i ꞌantsꞌi yilhchuk, ꞌinka ꞌutni.

⁷ ꞋEt Jesus ꞌutni, “Ndun tsꞌeke ootsꞌá ha lhozahꞌai, ndi ꞌasotilhtelh dzin wheni, ꞌet yálhꞌaꞌ ꞌi ꞌuntꞌoh.

⁸ Telꞌenne ꞌahoolhyiz nohbulh ꞌúhintꞌoh, ꞌet si ꞌahoolhyiz wheni iloh nohbulh ꞌútistꞌelh.”

⁹ Lizwifne Jesus ꞌet usda tꞌéhonanzin whe, soo tube lhane ꞌilhozdílne whusahándil. ꞋAw Jesus ꞌen gha za iloh, Lazarus mbe daꞌ Jesus dunaidilhti inleꞌ, ꞌen huyuntilhꞌelh ha.

¹⁰ ꞋEt lubret bumoodihne ꞌilhuhozdil Lazarus ꞌen cha hituzilhghelh ꞌet howu yahutilhduk wheni.

¹¹ ꞋEn oogha tube lhane Lizwifne bube ꞌutꞌen kꞌoh whuchꞌa huzdil ꞌinkꞌez Jesus ꞌen ghun buba ꞌalhaꞌ yintꞌoh, ꞌinka Lazarus hituzilhghelh hukwaꞌ huninzun.

Jesus Jerusalem ninya

¹² ꞋEt ꞌom bun dzin lhane ꞌilhozdílne dzenis whuti wheni Jerusalem tsꞌu hoozdil Jesus huyúlh ꞌúdantsꞌo whuz de úyalh hutni ꞌinka.

¹³ ꞋUl hudílhchoot ꞌinkꞌez ꞌi hidilelh whe hidudizdil ꞌinkꞌez tube cho ꞌuhutni, “Yakꞌusda ooba whudúlhtiꞌ! Mbe la neMoodihti booziꞌ gha whusaínya-un, ꞌen ꞌukꞌenus hoonzoo-un oogha whultsꞌut! ꞋEn Israel ootsꞌu haindene bulerwe ꞌuntꞌoh!”

¹⁴ ꞋEt Jesus yeztliyaz hiba whusahúyalhti ꞌinkꞌez yukꞌetlꞌa didaꞌ. ꞋEt whundúlya whe ndi ꞌudaꞌ ooghun ꞌukꞌuneꞌ ꞌúsguz-i, ꞌi ndutni,

¹⁵ “Zion whuzkehke nohdzi úlhtus ꞌulhtsi! Nulhꞌen nohlerwe yeztliyaz kꞌut usda ꞌinkꞌez nohtsꞌun úyalh!”

¹⁶ ꞋUdechoo whe Jesus yugha hodulꞌehne ꞌaw dudeni be tꞌéhonúszun nduwhi ꞌi ghun. ꞋEt yakꞌuz ooba whudáltiꞌ tsꞌe, whenája hukwꞌelhꞌaz ꞌet whunahilni nduwhi ooghun ꞌukꞌunéꞌ ꞌusguz-i ꞌet ndutni ꞌinkꞌez whe didut ꞌoh te neꞌhuyulꞌen.

¹⁷ ꞋEt ndunne ꞌilhozdílne, mbene daꞌ yugha hodulꞌeh whe Lazarus yukahizya ꞌinkꞌez tsꞌun kꞌut yaidláne toh dunaidilhti whe hinalhꞌen inleꞌ, ꞌet howu yawhehunilhduk.

¹⁸ ꞋEt ndunne ꞌilhozdílne hooncha túneꞌ ꞌustꞌen-un whulh ꞌúhudantsꞌo ꞌinka ꞌuhuja highu nindil.

¹⁹ ꞋEt Phariseene dichꞌoh ꞌulhodutni, “Nulhꞌen! ꞋAw hoonli-unyaz lheꞌwhahlel! Ndi yun kꞌut dune, tsꞌiyawh huyúntizdil!”

Whulohne ꞌudun yun kꞌut whutꞌenne, ꞌenne cha Jesus hitiꞌelh hukwaꞌ huninzun!

²⁰ Mbene la dune Jerusalem tsꞌe tizdilne, ꞌenne butoh, whulohne Greekne chaꞌ hutꞌen. Dzenis whuti ꞌet Yakꞌusda tsꞌu teni ꞌuhuntilhzilh, ꞌet wheni.

²¹ Philip, ꞌen keyoh Bethsaida, Galilee yun kꞌut whuzꞌai, ꞌen highu nindil ꞌinkꞌez ꞌuhuyúlhni, “Wheni cha Jesus uztiꞌelh hukwa ꞌuzninzun.”

²² ꞋEt Philip, Andrew yughu ninya ꞌinkꞌez yudániꞌ, ꞌinkꞌez Andrew Philip bulh Jesus hidániꞌ.

²³ ꞋEt Jesus ubúlhni, “ꞋAwet Yinka Dune Yeꞌ ooba whudutáltiꞌ-un, ꞌet whusahónzut.

²⁴ Soo tsꞌihꞌun unꞌa nohdúsni, ha nuyeh-i oomaiꞌ ꞌaw yun kꞌut nálhniltsꞌulh de, dantꞌoh la ꞌet za ndutitꞌelh. ꞋEt hoontsꞌi yun kꞌut ánisꞌai de, soo lhai oomaiꞌ-i, ꞌi ooghu ha náyuntijeh.

²⁵ Mbe la dune ye khuna-i yukꞌensiꞌ de, ꞌet de ye khúna-i ninta itáꞌalh whe ꞌuntꞌoh. ꞋEt hoontsꞌi mbe la ndi yun kꞌut ye khúna-i ooba ꞌantsꞌi yintꞌoh de, yootatun whe ꞌilhiz ooleꞌ hutinalh.

²⁶ Mbe la sba néꞌutꞌen de, ꞌenne suntooyaꞌ ꞌinkꞌez ntsꞌe la ꞌustꞌoh-un, ꞌet la oodaꞌ. Mbe la sba neꞌutꞌen unlí-un, ꞌen SBá bubudutálhtiꞌ.”

Jesus datitsah-un howu yalhduk

²⁷ “ꞋAndit tube szul ba ndo haꞌ hootꞌen, ꞌinkꞌez daja doosniꞌ suba? SBá njan stsꞌun whudiltsꞌulh-un whuchꞌa sla ꞌineh doosniꞌ eh? ꞋAwundooh! Njan stsꞌun whudiltsꞌulh-un, ꞌet wheni whusásya.

²⁸ ‘SBá nyooziꞌ ꞌon nus diztiꞌ ílhtsi.’” ꞋEt yakꞌuz whutsꞌun khuni huduztsꞌai, “ꞋUdaꞌ sooziꞌ dastiꞌ ꞌinkꞌez doo cha za ꞌon ꞌun dutástiꞌ,” whutni.

²⁹ Whulohne ꞌilhunaoosdílne, ꞌet nódilhya ꞌinkꞌez hodántsꞌo. ꞋEt ꞌulhodútni, “Ditni disnih!” ꞋEt whulohne, “Lizas yulh yátilhduk whe ꞌuwhutni,” hutni.

³⁰ ꞋEt Jesus ꞌubulhni, “Ndi khuni huduztsꞌai dáhtsꞌo-i, ꞌaw si sba iloh ꞌuwhutni, nohni nohba ꞌuwhutni.

³¹ ꞋAndit ꞌawet yinka whuduneꞌne buba nahutideh ꞌinkꞌez whutsodaꞌ ndi yun kꞌut humoodih, ꞌen ꞌilhiz ꞌun hítinoh.

³² ꞋInkꞌez ndi yun kꞌut dubeꞌ sodunintan de, ꞌet de tsꞌiyanne tsꞌúbun tiztꞌi.”

³³ ꞋEt ndutni whe ntsꞌenꞌa la datítsah, ꞌet bunalh ni whe ꞌutni.

³⁴ ꞋEt ꞌilhunaoosdílne ꞌuhuyulhni, “Moses ꞌukꞌunéyuzguz inleꞌ-i, ꞌi gha whulh ꞌúzditsꞌo ndun Christ ꞌen ꞌilhiz hutinalh. ꞋInkꞌez dálhtiꞌ ꞌudini ꞌet Yinka Dune Yeꞌ, ꞌen whe beꞌ dutáltsiꞌ dini? Mbe whe ꞌuntꞌoh ndun Yinka Dune Yeꞌ?” hutni.

³⁵ ꞋEt Jesus ꞌubulhni, “ꞋAwhuz dzoh saꞌyaz whuzꞌai ꞌet ndi be hóotꞌen-i nohbulh ꞌútitꞌelh. ꞋAwhuz ndi be hóotꞌen-i nohbulh ꞌúntꞌoh whe ꞌahdulh za ꞌahtꞌen. ꞋEt nduhtꞌen de, ꞌaw tsalhgus nohkꞌédoltsꞌit ꞌaítꞌoh. Mbene la tsalhgus yo udúlhne ꞌaw ntsꞌe hidulh tꞌéhonúszun.

³⁶ Dáwhuldzoh la ndi be hóotꞌen-i ꞌahtꞌí-i, ꞌinkꞌez nohba ꞌalhaꞌ ooteꞌ, ꞌet de be hóotꞌen-i buzkeh tihleh.” ꞋEt Jesus ndubulhni hukwꞌelhꞌaz, bughu whenája ꞌinkꞌez buchꞌa untilhꞌi.

³⁷ Tube ꞌutꞌen-i uncha-i bunalh ꞌalhꞌen ꞌet hoontsꞌi ꞌaw buba ꞌalhaꞌ lheꞌítꞌoh.

³⁸ ꞋEt nus hóoꞌen-un Isaiah ꞌukꞌu néyuzguz-i, ꞌi gha whuz unꞌa ꞌoh te neꞌwhustꞌen. Njan ndutni whe ꞌukꞌuneꞌ ꞌúzguz, “Moodihti ndi khuni whutlꞌazdanꞌai-i mbe za ooba ꞌalhaꞌ yintꞌoh? NeMoodihti yé ulhtus-i mbe tsꞌun yunaꞌdunilhtan?”

³⁹ ꞋEt huwa cha buba ꞌalhaꞌ lheꞌhóotꞌoh, Isaiah doo cha ndutni ꞌet huwa,

⁴⁰ “Yakꞌusda buna cha hoohoos̱ꞌen ꞌubulhtsi, ꞌinkꞌez budzi cha dutsꞌun yulhtsi. ꞋEt ꞌaw duna be huhooꞌen ꞌaítꞌoh ꞌinkꞌez budzi be ꞌaw tꞌehononozin ꞌaitꞌoh. ‘Soo naꞌbutisdlelh huba stsꞌun nahoolyeh ꞌaitꞌoh,’ ni Yakꞌusda.”

⁴¹ ꞋEt Isaiah Yakꞌusda yé diztiꞌ-i yunalhꞌen whe ꞌet yughun ndutni inleꞌ.

⁴² ꞋEt hoontsꞌi lhane dune ando ꞌuntꞌohne, ꞌenne Jesus buba ꞌalhaꞌ yintꞌoh, ꞌet hoontsꞌi ꞌaw hudooniꞌ ꞌaítꞌoh. ꞋEt nduhtni de, Phariseene Lizwifne bulugliz whuchꞌa ꞌilhiz tebohoneh la ꞌet whe hunuljut.

⁴³ ꞋEnne dune ubudílhtiꞌ-un, ꞌet Yakꞌusda ubúdutálhtiꞌ-un whanus huhóontꞌiꞌ.

⁴⁴ ꞋEt Jesus khuni ulhtus-i be ndutni, “Mbene la si buba ꞌalhaꞌ ꞌustꞌoh-un, ꞌaw si sghun za íloh, mbe la whuz de sútilhꞌaꞌ-un, ꞌen buba ꞌalhaꞌ yintꞌoh.

⁴⁵ ꞋInkꞌez mbe la sunilhꞌén-un, ꞌenne mbe la whuz de sútilhꞌaꞌ-un, ꞌen yunilhꞌen.

⁴⁶ Yinka whuduneꞌne ba be hóotꞌen-i ꞌet hukwa ndi yun kꞌut nenúsya. ꞋEt huwa mbe la ooba ꞌalhaꞌ ꞌustꞌoh-un, ꞌaw tsálhgus yo hudoltsꞌiꞌ ꞌaítꞌoh.

⁴⁷ ꞋInkꞌez mbe la sghuni hiditsꞌo hoontsꞌi buba ꞌalhaꞌ lheꞌyítꞌoh de, ꞌaw buba nahoosyeh ꞌaítꞌoh. Ndi yun kꞌut whuduneꞌne buba nahutisyeh íloh ha whusásya, ubutisyih ha whusásya.

⁴⁸ Mbene la stsꞌu disnihne ꞌinkꞌez ꞌaw sghuni lhuyílhchulh, ꞌilhoghun ꞌen buba nahutiyeh. Ndi khuni be nohbulh yasduk-i, ꞌi khuni za ꞌudekꞌez dzin de be nohba nahutideh.

⁴⁹ ꞋAw sichꞌoh iloh yasduk. SBá, mbe la whuz de sútilhꞌaꞌ-un, ꞌen didutchꞌoh khuni yutulhúhizyeꞌ-i, ꞌi stlꞌa ídanꞌai daja doosniꞌ whe yaoosduk ꞌet wheni.

⁵⁰ ꞋInkꞌez tꞌéwhunúszun ndi khuni yutulhúhizyeꞌ-i, ꞌi gha ꞌilhiz be khútna-i unli. ꞋInka ndai la sichꞌoh be yásduk-i, ntsꞌenꞌa la sBá sudániꞌ-un, si cha whuz unꞌa za yasduk,” ubúlhni.