John 11 - Yak'usda Ooghuni

Lazarus dazsai whe Jesus nahuyílhnaꞌ

¹ ꞋIlhoghun dune Lazarus huyúlhni, keyoh whuyaz Bethany huwhútni, ꞌet whutꞌen-un. ꞋEn la unduda suliꞌ. Bulhtuske nane Mary ꞌinkꞌez Martha bulh hizih whutꞌi.

² Ndun Mary ꞌen ꞌuja ínleꞌ neMoodihti khe sooltsun-i be yuke tunásuguz ꞌinkꞌez dutsighaꞌ be yunaꞌalhde ínleꞌ. ꞋEn bulhutsin Lazarus ꞌen unduda.

³ Bulhtuske Jesus khuni hitsꞌó tlꞌa danꞌai, “NeMoodihti dune ookꞌensíꞌ-un, ꞌen unduda,” huyúlhni.

⁴ ꞋEt Jesus whulh ꞌúdantsꞌo whe ꞌutni, “ꞋAw ndi dada ꞌilhiz yukꞌedóotsa ꞌaítꞌoh. Njan undudá-un, ꞌet whe la Yakꞌusda ooba whudóltiꞌ, ꞌinkꞌez ꞌet whe Yakꞌusda ooYeꞌ ꞌen cha ba whudutáltiꞌ.”

^5-6 ꞋEt Lazarus unduda-un Jesus whulh ꞌúdantsꞌo whe Martha, bulhtus cha, ꞌinkꞌez Lazarus cha tube bukꞌensiꞌ ꞌet hoontsꞌi whutꞌí-un nat dzin, ꞌet nanáꞌilꞌai.

⁷ Nat dzin ꞌet nadaꞌ ꞌet yugha hodulꞌehne ubúlhni, “Doo cha za Judea tsꞌe naztoodilh.”

⁸ ꞋEt yugha hodulꞌehne ꞌuhuyúlhni, “Rabbi, ꞌandit ꞌaho Lizwifne tse be nyotúzilhghelh hukwaꞌ huninzun ꞌinkꞌez cha za whuz natandalh eh?”

⁹ ꞋEt Jesus ꞌubulhni, “ꞋEt whunizyat ꞌon ꞌat nat neꞌhunutꞌoh-un sadzi gha ꞌet ꞌilhudzin ꞌuhoontꞌoh. Mbene la dzenis nudilhne, ꞌaw khun tooghalh ꞌaítꞌoh. Ndi yun kꞌut be hóotꞌen-i, ꞌi be huhooꞌen ꞌet huwa.

¹⁰ ꞋEt hoontsꞌi mbene la ꞌulhdzis nudilhne, nónughalh, ꞌaw be hóotꞌen-i bubulh lhéꞌitꞌoh ꞌet huwa.”

¹¹ ꞋEt ndúbulhni hukwꞌelhꞌaz ꞌet ꞌutni, “Neyadan Lazarus nanisti ꞌet hoontsꞌi ootsꞌun tísyalh ꞌinkꞌez tsꞌenatisdzulh.”

¹² ꞋEt yugha hodulꞌehne ꞌuhuyulhni, “NeMoodihti Lazarus nanisti de, ꞌet de soo naꞌtitnelh whe ꞌuntꞌoh.”

¹³ ꞋEt Jesus njan dazsaí-un, ꞌet howu yalhduk whe ꞌutni, yugha hodulꞌehne, ꞌenne ꞌantsꞌi nanisti ꞌinkꞌez nalyis ꞌet howu yalhduk whe ꞌutni huninzun.

¹⁴ ꞋEt Jesus soo tsꞌet gaih ꞌubulhni, “Lazarus dazsai.

¹⁵ ꞋEt nohni nohba hoonústꞌiꞌ ꞌaw ꞌet lhúsdoh whe ꞌuja. ꞋEt de la nohba ꞌalhaꞌ hotꞌeꞌ. ꞋEt hoontsꞌi ꞌandit ꞌawet ootsꞌuztoodilh.”

¹⁶ ꞋEt Thomas, ꞌen ꞌutꞌudándaꞌ-un huyúlhni, dudulh yugha hodulꞌehne ubúlhni, “Dugweꞌ! Bulh ꞌúztoodilh! Wheni cha si bulh yatsꞌodlah!”

¹⁷ Jesus whuz oozya ꞌet nahoonꞌai Lazarus ꞌahuyalhti whutsꞌun dit dzin inleꞌ.

¹⁸ Njan keyoh wheyaz Bethany ꞌet Jerusalem tube whenghoh whuzꞌai. Tsꞌiyalh whe ꞌilhoh sadzi hukwꞌeꞌ hoonitꞌoh atꞌen ꞌuwhulhdzoh ꞌuhoontꞌoh.

¹⁹ Tube bube nghoh whuzꞌai ꞌet huwa lhane Lizwifne bughu nindil. Mary ꞌinkꞌez Martha bulh bubulhutsin dazsai ꞌet whe bunehúdoolhyaꞌ ha ꞌet huwa bugho nindil.

²⁰ ꞋEt Jesus whuz de úyalh Martha whulh ꞌúdantsꞌo whe yududizya. Mary ꞌen yoh ꞌawet usda.

²¹ ꞋEt Martha Jesus ꞌuyulhni, “SMoodihti, njan sinda inleꞌ de, ꞌaw daꞌ sulhutsin dalhitsa ooleꞌ daꞌ.

²² ꞋEt hoontsꞌi, ꞌandit hoontsꞌi, ndai la Yakꞌusda ootsꞌo kwaꞌ dini-i ngha ítaꞌalh, ꞌet tꞌéwhunúszun.”

²³ ꞋEt Jesus ꞌuyulhni, “Nyulhutsin dunadójaꞌ la.”

²⁴ ꞋEt Martha ꞌuyulhni, “Tꞌéwhunúszun ꞌudekꞌez dzin de, tsꞌiyanne dunádutádulh, ꞌet de la ꞌen cha dunadójaꞌ.”

²⁵ ꞋEt Jesus ꞌuyulhni, “Si ꞌustꞌoh dunene tsꞌiyanne dunabudusdle-un ꞌinkꞌez ꞌilhiz wheni huye khóonaꞌ-i bugha yúsꞌaih. Tsꞌiyanne mbene la ooba ꞌalhaꞌ ꞌustꞌohne, dahúzsai ꞌet hoontsꞌi huhutinalh.

²⁶ ꞋInkꞌez mbene la ꞌawhuz khunane ꞌinkꞌez ooba ꞌalhaꞌ ꞌustꞌohne, ꞌaw dahóotsah ꞌaítꞌoh. ꞋEt mba ꞌalhaꞌ ꞌuhoontꞌóh eh?”

²⁷ ꞋEt Martha ꞌuyulhni, “A sMoodihti, sba ꞌalha ꞌuhoontꞌoh nyun Yakꞌusda ooYeꞌ, Christ, mbe la ndi yun kꞌeitayalh-un, ꞌen ꞌintꞌoh.”

²⁸ Njan ꞌet ndudániꞌ hukwꞌelhꞌaz ꞌet dulhtus Mary yughu nanja ꞌinkꞌez wheꞌ ízyaz yúlhni, “Whuneodulhꞌeh-un whusaínya ꞌinkꞌez nka oodulhkut.”

²⁹ Soo whudántsꞌo ibulh dudinya ꞌinkꞌez yutsꞌóozya.

³⁰ Jesus ꞌawhuz keyoh wheyaz whutsꞌun úyalh whe, ndet daꞌ Martha yududizyá-un, ꞌet za ꞌutꞌen.

³¹ ꞋEt ndunne Lizwifne, yoh bez tsꞌe hizih dilhtsꞌi, hinedílhyai wheni, Mary soo ꞌa cho dudinya ꞌinkꞌez ꞌaz whinya, hinilhꞌen ꞌet huyuntizdil ꞌinkꞌez ꞌulhodútni, “Tsꞌun kꞌut tsꞌe titso wheni whuz tizya whe ꞌutꞌen.”

³² Jesus ndet daꞌ ꞌutꞌen Mary whuz oozya. Soo yutilhꞌen ibulh yubut dugwutsi be nenínya ꞌinkꞌez ꞌuyulhni, “SMoodihti, njan ꞌintꞌoh de, ꞌaw daꞌ sulhutsin dalhitsal ooleꞌ daꞌ.”

³³ ꞋEt Jesus yunilhꞌen ꞌutso, ꞌinkꞌez Lizwifne mbene la yulh nudilhne, ꞌenne cha hutso hubunilhꞌen whe, tube whutsꞌu disnih ꞌinkꞌez ooyughi whe ooba dzoh ꞌuhooja,

³⁴ ꞌinkꞌez uboodulhkut, “Ntsꞌe ꞌalhti?” ꞋEt ꞌuhuyúlhni, “ꞋAnih, nenaoodulh whunolhꞌen si!”

³⁵ ꞋEt Jesus intse.

³⁶ Lizwifne ꞌet ꞌulhodútni, “Nulhꞌen dalcho-i be yukꞌensiꞌ!”

³⁷ ꞋInkꞌez whulohne ꞌuhutni, “Hoos̱ꞌen-un hooꞌen nayulhtsi ínleꞌ, ꞌaw eh ndun dune ꞌen cha datítsah whuchꞌa ꞌuyooleh ꞌaítꞌoh inleꞌ?”

³⁸ ꞋEt Jesus doo cha za dudzi yo whe ooba dzoh ꞌuhooja, ꞌinkꞌez ni suliꞌ whe tsꞌun kꞌuz oozya. Njan tsꞌun kꞌut ꞌet ꞌan tse whudádinꞌai-un ꞌuhoontꞌoh.

³⁹ ꞋEt Jesus ubúlhni, “Nyoo tse ꞌudun dutahꞌaih!” ꞋEt Martha dune dazsaí-un bulhtus, ꞌen ꞌutni, “SMoodihti, ndun ꞌawet dit dzin ꞌadalhteꞌ ꞌinkꞌez lhtsun cha suliꞌ.”

⁴⁰ ꞋEt Jesus ꞌuyulhni, “ꞋAw lakw lhunyudúsnel inleꞌ, si sghun mba ꞌalha ꞌuhoontꞌoh de, ꞌet de Yakꞌusda yé diztiꞌ-i tanꞌelh?”

⁴¹ ꞋEt nyo tsꞌun kꞌut dune ꞌadilhtí-un, tse ꞌudun hidutizꞌai. ꞋEt Jesus ndo yútanꞌen ꞌinkꞌez ꞌutni, “SBá sudántsꞌo ꞌinka musi nyudúsni.

⁴² ꞋInkꞌez tꞌéwhunúszun ꞌahoolhyiz wheni soo zílhtsꞌai. ꞋEt hoontsꞌi njan ꞌudusní-un ndunne ꞌilhozdílne njan nodilhya, ꞌet de la nyun whuz de sútilhꞌaꞌ-un buba ꞌalhaꞌ ꞌuhotꞌeꞌ.”

⁴³ ꞋEt ndúdija hukwꞌelhꞌaz soo khuniti be yatilhduk, “Lazarus, ndiz ínyalh!” yúlhni.

⁴⁴ ꞋEt nyoon dune dazsaí-un tsa kꞌez tsꞌe ha nája. Oola ꞌinkꞌez ooke te ꞌawhuz naih huyulh ꞌábulhtih-i, ꞌi be oogha ósduz, ꞌinkꞌez dzezoh cha oonin ꞌawhuz oogha yóonasduz. “Ookꞌu naꞌuhꞌuk ꞌinkꞌez oola duhtnih!” ubúlhni Jesus.

⁴⁵ Ndunne Lizwifne, Mary yughu nindil inleꞌne, Jesus bunalh ꞌuja ꞌet buba ꞌalhaꞌ yintꞌoh suliꞌ.

⁴⁶ ꞋEt hoontsꞌi whulohne, ꞌenne Phariseene butsꞌun nahoosdil ꞌinkꞌez Jesus ntsꞌoh te neꞌustꞌen-un, ꞌet buba hudaniꞌ.

⁴⁷ ꞋEt hukwa lubret bumoodihne ꞌinkꞌez Phariseene yahútilhduk wheni ꞌilhúnahosdil ꞌinkꞌez ꞌuhutni, “Ntsꞌenꞌa dáztinelh? Ndun dune stabe lhat-un hooncha teneꞌútꞌen!

⁴⁸ Whute ꞌutꞌen tsꞌilhꞌi de, tsꞌiyanne la buba ꞌalha ꞌootꞌeꞌ ꞌinkꞌez Romanne whusahándil whe la nelugliz whucho ꞌinkꞌez neyun kꞌut cha negha ha hólhchoot, ꞌinkꞌez la tsꞌiyawh yatsꞌódilh.”

⁴⁹ ꞋEt ꞌilhoghun butoh Caiaphas huyulhni, ꞌen la ꞌet naooduzuk wheni lubret ꞌukꞌenus díztiꞌ-un unli ínleꞌ, ꞌen ubúlhni, “ꞋAw hoonli tꞌéwhunuzúhzun!

⁵⁰ ꞋAw eh huwun nuní lhnuzulhzut, tsꞌiyanne ba ꞌilhoghun dune za dazsai de, ꞌet de ꞌon nus sooꞌ whutatꞌelh, ꞌet huwa la ꞌaw neyun kꞌut gak holeꞌ ꞌaítꞌoh.”

⁵¹ Caiaphas didutchꞌoh iloh ndi khuni yaka ni ntizut, ꞌet lubret ꞌukꞌenus díztiꞌ-un unli, ꞌet naooduzuk huba, ꞌet huwa nus hónꞌen Jesus ꞌen tsꞌiyanne Lizwifne ꞌet yun kꞌut whutꞌenne ba datítsah.

⁵² ꞋEt ꞌaw Lizwif didowhne, ꞌenne ba za iloh. Mbene la Yakꞌusda buzkeh unlíne, ntsꞌe la yahandil, ꞌoh whutꞌenne, ꞌenne buba cha. ꞋEt huwa la tsꞌiyawh ꞌilhunabootalelh ꞌinkꞌez ꞌilhoh whutꞌenne dune hutileh.

⁵³ Soo ꞌet dzin whutsꞌun la lhahóduleh hituzilhghelh wheni.

⁵⁴ ꞋEt whula gha tsꞌe Jesus ꞌaw tsꞌet Lizwifne butoh nulhúsyoh. Kꞌus yun kꞌut ꞌaw dune lhuhóotꞌih-un tsꞌe whuzih whuzꞌai, ꞌilhoghun keyoh Ephraim huwhútni, whuz whinya ꞌinkꞌez yugha hodulꞌehne tubulh ꞌet hudáltsꞌiꞌ.

⁵⁵ ꞋEt Lizwifne budzenis whuti ndet daꞌ Butus Lhuseya huwhútni-un, ꞌawet whenghoh whudizulh. ꞋInka lhane yun kꞌut whutꞌenne Lizwifne bubunaꞌudoh hukwꞌunꞌa ꞌuhutinelh wheni keyoh whuti Jerusalem tsꞌe hoozdil.

⁵⁶ Lugliz whucho nódilhya ꞌinkꞌez Jesus hika itísꞌen, ꞌet ꞌulhodútni, “Daja nahzun? ꞋAw tilah dzenis whuti wheni whusalhóosyaꞌ nahzun eh?”

⁵⁷ ꞋEt lubret bumoodihne ꞌinkꞌez Phariseene te, ꞌudaꞌ dunene toh khuni butlꞌa ídanꞌai Jesus ntsꞌe ꞌutꞌen tꞌéhonínzun de, ꞌaho hudooniꞌ, ꞌet de ꞌawet huyitálhchulh.