John 10 - Yak'usda Ooghuni

Jesus hubodulhꞌeh whe ꞌutni, “Si ꞌusbai ghunli-un ꞌustꞌoh. Mbene la soo sulh ꞌútꞌenne, seꞌ ꞌusbai hinli”

¹ ꞋEt Jesus ubúlhni, “Soo tsꞌihꞌun unꞌa nohdusni, mbe la ꞌusbai ba naꞌnistlꞌóo-un ꞌaw dáti kꞌet dálhiyal ꞌinkꞌez nanistlꞌoo tus tilhget de, ꞌen dune ꞌundunutꞌíh-un ꞌuntꞌoh.

² ꞋEt mbe la dáti tsꞌe dayaih-un, ꞌen ꞌusbai ghunlí-un ꞌuntꞌoh.

³ ꞋEn dáti ghunli-un yuba daháꞌ dutih. ꞋEt de ꞌusbai, bubooziꞌ be buka huyih te, hiditsꞌo huwa tꞌehinínzun ꞌinkꞌez ꞌaz huyuntulhꞌus.

⁴ Tenábulih hukwꞌelhꞌaz, ꞌet butso tuyaih ꞌinkꞌez ꞌusbai tsꞌiyawh huyunilhꞌus, highuni tꞌehinínzun ꞌet huwa.

⁵ ꞋEt ꞌantsꞌi ꞌoh nuya-un, ꞌen ꞌaw huyuntoolhꞌas ꞌaítꞌoh. ꞋAntsꞌi ꞌoh núya-un ꞌuntꞌoh ꞌaw ooghuni tꞌehinúszun ꞌet huwa hichꞌa nutselhdilh,” ꞌubulhni.

⁶ ꞋEt Jesus ndi higha hódoolꞌeh ha bubulh náwhulnuk ꞌet hoontsꞌi daja ni whe ꞌutni-un ꞌaw tꞌehonúszun.

⁷ ꞋInka doo cha za Jesus ꞌubulhni, “Soo tsꞌihꞌun unꞌa nohdúsni, Si ꞌusbai ba dáti usdli whe ꞌustꞌoh.

⁸ Mbene la stso whusaíndilne, ꞌenne ꞌundunutꞌihne ꞌuhintꞌoh ꞌet huwa ꞌaw ꞌusbai lhuboozílhtsꞌai.

⁹ Si datí ꞌustꞌoh. Mbene la si sgha daníndilne, ꞌenne tsꞌiyawh hudutijih. Dahúnindil ꞌinkꞌez whuz ꞌaz whe hándil de, tlꞌo kꞌut nahuhootáꞌalh.

¹⁰ ꞋUndunutꞌih-un, ꞌen ꞌuduntitꞌih ꞌinkꞌez dune tuzilhghelh ꞌinkꞌez nintaꞌeꞌtilhꞌelh ꞌet wheni za dayaih. ꞋEt si whusásya whe ꞌilhiz wheni huye khúna-i hutitꞌelh ꞌinkꞌez ndi ꞌilhiz huye khúna-i, ꞌi huyutꞌi de, ꞌaw hoonli huye ndunódzit ꞌaítꞌoh.

¹¹ Si ꞌusbai ghunli-un unzóo-un ꞌustꞌoh. ꞋUsbai ghunli-un unzóo-un, ꞌen la ye khúna-i dude ꞌusbai ba yula dutitnih.

¹² ꞋEt ꞌustle-un ulꞌáꞌ-un, ꞌen ꞌaw ꞌusbai ghunlí-un iloh ꞌuntꞌoh. ꞋAntsꞌi ꞌusbai yugholeꞌ ha ulꞌaꞌ. ꞋUsbai ꞌaw oochꞌeꞌ iloh ꞌuhintꞌoh, ꞌet huwa yus whuz de úlgwulh yunilhꞌen te, ꞌusbai bula dutnih ꞌinkꞌez whetsélhyai. ꞋEt yus whulohne huboogooh ꞌet ꞌonghunne cha hichꞌa yaílwus.

¹³ Ndun ꞌustle-un ulꞌáꞌ-un, ꞌen ꞌantsꞌi ulꞌáꞌ-un ꞌuntꞌoh, ꞌet huwa ꞌusbai ꞌantsꞌi hiba unli ꞌinkꞌez didut bughu whetsélhyaih.

¹⁴ Si ꞌusbai ghunlí-un unzóo-un ꞌustꞌoh, mbene la uschꞌeꞌne tꞌebunúszun ꞌinkꞌez didut cha tꞌésonínzun.

¹⁵ ꞋEt whuz unꞌa za sBá ꞌen tꞌésunínzun ꞌinkꞌez si cha tꞌenuszun. ꞋInkꞌez seꞌ ꞌusbaine be khúsna-i buba oola dutisnih.

¹⁶ ꞋUyoo cha ꞌusbai ꞌustꞌí-i hoonli. ꞋAw ndi toh iloh. ꞋEnne cha whusáboosdlelh huba ꞌuhoontꞌoh. Sghuni hidótsꞌo, ꞌinkꞌez la ꞌilhoh ulhꞌus-i za hutileh ꞌinkꞌez ꞌilhoghun za ꞌusbai ghunlí-un whutáleh.

¹⁷ Seꞌ ꞌusbaine ba be khúsna-i oola dutisnih ꞌinka be khúsna-i doo cha za naóozchoot. ꞋEt huwa la sBá tube skꞌensiꞌ.

¹⁸ ꞋAw be khúsna-i dune sghu yólhchootne hooloh. Sichꞌoh za huwa tísꞌalh. Ndi be khúsna-i huwa tísꞌalh ꞌinkꞌez naitázchulh-un, ꞌet sghá whuntꞌai whe ꞌustꞌoh. SBá ꞌen ꞌuja ndi khuni stlꞌa ídanꞌai ndi ꞌutꞌen oosꞌen ha,” ubúlhni.

¹⁹ Ndi khuni ꞌi gha doo cha Lizwifne dichꞌoh dutoh lhchꞌa hudisdil.

²⁰ Tube lhane, ꞌenne ꞌuhutni, “Ntsiꞌ-i nudúdeh-i ooyudínda! Whusni wheꞌ ꞌutni, di ha oozúlhtsꞌai?”

²¹ ꞋEt ꞌonghohne cha ꞌuhutni, “ꞋAw ntsiꞌ-i nudúdeh-i ooyudínda-un, ꞌen ooghuni iloh ꞌutni. Ntsꞌenꞌa ntsiꞌ-i nudúdeh-i, ꞌi dune hoos̱ꞌen-un, ꞌen hooꞌen yutilhtselh?”

Lizwifne Jesus ꞌaw hikalheꞌnízun

²² ꞋEt ꞌawet khit suliꞌ. Jerusalem keyoh ꞌet nowhújeh-un néhoninꞌai. ꞋEt ꞌawhundidi nahuwhulhtsi huwhútni.

²³ ꞋEt lugliz whucho bun tsilh tꞌah ꞌet la Solomon oobuntsilh tꞌah huwhútni, ꞌoh whéya Jesus uyalh

²⁴ whe la Lizwifne higha óozdil ꞌinkꞌez huyoodulhkut, “Dawhuldzoh ꞌet nechꞌa hóotalhꞌeꞌ. ꞋAlhaꞌ whe Christ ꞌen ꞌintꞌoh de, ꞌandit ꞌet tsꞌihꞌun unꞌa nedíni.”

²⁵ ꞋEt Jesus ubúlhni, “ꞋUdaꞌ nohdásniꞌ ꞌet hoontsꞌi ꞌaw nohba ꞌalhaꞌ lheꞌduzusni. Ndi sBá booziꞌ gha ꞌutꞌen ꞌusꞌén-i, ꞌi gha si sghun cha tꞌéwhunóhzin huba ꞌuhoontꞌoh.

²⁶ ꞋEt hoontsꞌi nohni nohdúsni hukwꞌunꞌa ꞌaw seꞌ ꞌusbai iloh ꞌahtꞌoh. ꞋEt huwa ndi ꞌutꞌen ꞌusꞌén-i ꞌaw nohba ꞌalhaꞌ lheꞌítꞌoh.

²⁷ Seꞌ ꞌusbaine tꞌébunúszun. Sghuni hiditsꞌo ꞌinkꞌez sunónudilh.

²⁸ ꞋIlhiz huye khútinalh-i, ꞌi bugha núsꞌai. ꞋAw yalhahitásdla ꞌinkꞌez ꞌaw dune sla kꞌéhaboolelhne hooloh.

²⁹ SBá, mbe la sghá buninla-un, tsꞌiyanne ando ꞌuntꞌoh, ꞌinkꞌez mbene la schꞌeꞌ suliꞌne, ꞌenne ꞌilhiz sulh ótitꞌelh. ꞋAw dune soo ꞌúltus-un hooloh sBá yula kꞌéhanabutilelh wheni.

³⁰ Si ꞌinkꞌez sBá bulh ꞌilho za ídli,” ubúlhni.

³¹ ꞋEt doo cha za Lizwifne tse hiye hituzilhghelh-i hidílhchoot.

³² ꞋEt Jesus ꞌubulhni, “SBá be ꞌutꞌen kꞌoh hoonzóo-un lhat-un si sgha whunulhꞌen. ꞋInkꞌez kꞌus ndet hukwa sutilhlelh tse be suzoolhghelh hukwaꞌ nahzun?”

³³ ꞋEt Lizwifne ꞌuhuyúlhni, “ꞋAw ꞌutꞌen unzóo-i, ꞌi ha iloh tse be ntsꞌu tuzilhghelh! Nyun ꞌantsꞌi ꞌoh dune inli ꞌinkꞌez Yakꞌusda chꞌaz yaílhduk. Nyunchꞌoh Yakꞌusda naꞌdudilꞌi, ꞌet hukwa tse be ntsꞌituzilhghelh.”

³⁴ ꞋEt Jesus ubúlhni, “ꞋAw lakw eh Yakꞌusda ooghuni oonalhuzulhni whe njan Yakꞌusda njan dunohúlhni inleꞌ, ‘Nohni yakꞌusdane ꞌahli?’

³⁵ Tꞌétsꞌonínzun ꞌaw Yakꞌusda dughuni kꞌuyoyis ꞌaítꞌoh, ꞌinkꞌez mbene la Yakꞌusda ooghuni ooghi díltsꞌutne, ꞌenne yakꞌusdane ubúlhni.

³⁶ ꞋEt Yakꞌusda ooYeꞌ usdli nohdúsni-un, ꞌet whula gha tsꞌe Yakꞌusda chꞌaz yásduk dahni whe skꞌehoohꞌaih. SBá ꞌen ꞌudun nésunilhti whe ndi yun kꞌut tsꞌe sutilhꞌaꞌ.

³⁷ SBá be ꞌutꞌen lheꞌzusꞌen de, whute, nohba ꞌalhaꞌ lheꞌústꞌoh.

³⁸ ꞋEt hoontsꞌi sBá be ꞌutꞌen ꞌusꞌen de, ꞌaw si nohba ꞌalhaꞌ lheꞌustꞌoh hoontsꞌi, ndi ꞌutꞌen ꞌusꞌen-i, ꞌi gha nohba ꞌalhaꞌ ꞌuhotꞌeꞌ. ꞋI gha la noheni be tꞌéwhunóhzin ꞌinkꞌez nohba ꞌalhaꞌ ꞌuhótꞌeꞌ sBá ꞌen syudínda ꞌinkꞌez si cha ooyudúsda,” ubúlhni.

³⁹ ꞋEt doo cha za huyólhchoot hukwa ꞌuhuja whe Jesus butá ha nája ꞌinkꞌez buchꞌa níntaninya.

⁴⁰ Jordan koh nyaz tsꞌe ndet daꞌ John ꞌudechoo dune too be ꞌulhꞌen inleꞌ-un, whuz whe naja ꞌinkꞌez ꞌet indaꞌ.

⁴¹ Lhane dune highu nindil ꞌinkꞌez ꞌulhodútni, “John ꞌaw huwa ꞌítꞌen te nulhéꞌitꞌel, ꞌet hoontsꞌi ndun dune ꞌen ghun daja daniꞌ la, tsꞌihꞌun ꞌudaniꞌ.”

⁴² ꞋInkꞌez nyo ꞌet tube lhane buba ꞌálhaꞌ yintꞌoh suliꞌ.