James 5 - Yak'usda Ooghuni

Hoonzoo ꞌuntꞌohne telꞌenne teilhꞌenne buba nahutideh

¹ ꞋEt nohni hoonzooꞌ ꞌuntꞌohne soo zúlhtsꞌai. Dawhultsiꞌ-un nohtsꞌu hóokulh, ꞌet huwa tube cho ꞌahtso ꞌinkꞌez ꞌalhdzul.

² Whe soo dahꞌa-un, tsꞌiyawh holhjut. Nohnaih ꞌi cha musdziyaz tsꞌiyawh yaꞌalh.

³ Nohgold ꞌinkꞌez silver ꞌi bulh, tsꞌiyawh kꞌenáditsan. ꞋInkꞌez ndi kꞌenáditsan-un, ꞌet whe nahohootáꞌalh dantꞌohne ꞌahli. Ndi kwun gak ilhꞌí-i, ꞌet whuz unꞌa ndahtꞌen-un nintaꞌnohtálhꞌelh. ꞋUdekꞌez dzin ꞌet huba ꞌaoohli!

⁴ ꞋEt tlꞌo nohba nadulhdzóohne, ꞌenne cha tsꞌiyawh bubeꞌ whulhtsꞌit. ꞋEt huwa nohchꞌa tsó yahalhduk. ꞋInkꞌez mbene nohba whutꞌásne, ꞌenne cha whuz unꞌa za ꞌubulhꞌen. ꞋInkꞌez Yakꞌusda, mbe la tsꞌiyantsuk whuMoodih unli-un, ꞌen nohchꞌa húnahutso whe tsꞌiyawh ꞌubudántsꞌo.

⁵ Nohni hoonzooꞌ ꞌuntꞌohne, ndi yun kꞌut hoonahtꞌiꞌ-un za ꞌuwhulhꞌen, ꞌinkꞌez hoonzoo hukwꞌunꞌa za dune ꞌahli. ꞋEt nohni ꞌet tsꞌiyawh hukwaꞌ nahzun tuneꞌ ꞌahtꞌen. Ntsꞌenꞌa musdoos natsꞌuzulghih te whutso ꞌet naznulhkꞌoh, ꞌet whuz unꞌa nohni cha ꞌet ndahtꞌen.

⁶ Mbene tsꞌihꞌun unꞌa ꞌutꞌenne, ꞌenne nohni bukꞌé whahꞌai, ꞌinkꞌez ꞌet whe ubahghan, ꞌet hoontsꞌi ꞌaw kꞌúlhonidzun, nohnichꞌoh hukwaꞌ nahzun huwa ꞌáhtꞌen.

Dzoh nahdeh-un nohba huwa whúlnaꞌ ꞌet hoontsꞌi whulh sahyin

⁷ ꞋInka sulhutsinke neMoodihti whusanátidalh whutsꞌun, ꞌet huba sulhꞌih. Dune ha níyeh ꞌulhꞌen-un, ndi haínulhyeh-i, ꞌi soo ꞌúlcho tileh whutsꞌun, saꞌ whe yuba sulhꞌi. ꞋOlulh ꞌinkꞌez dakꞌet naootilhtelh-un, ꞌet huba sulhꞌi.

⁸ Nohni cha neMoodihti whusanatidalh-un, whuz unꞌa za huba oolhꞌeꞌ, ꞌinkꞌez nohdzi soo cho ulhtus óolhꞌeꞌ. ꞋAwet neba nilhdukw suliꞌ ꞌet huwa.

⁹ Sulhutsinke lhchꞌa neꞌdoohtniꞌ junih, doo ka si nohkꞌéholtsꞌit. Nulhꞌen Yakꞌusda, nahiyilh-un, ꞌen dati usyin ꞌet huwa.

¹⁰ Sulhutsinke ndunne nus hooꞌenne, ndunne neMoodihti booziꞌ be yailhdukne, ꞌenne dude ꞌutꞌen kꞌoh huwa dzoh nuhúde inleꞌ. ꞋEt hoontsꞌi neMoodihti datinelh, ꞌet huba hilhꞌi. ꞋEnne bugha hodoolhꞌeh!

¹¹ Soo zúlhtsꞌai, ndunne howa whúlnaꞌ hoontsꞌi whulh huzyin, ꞌenne ꞌukꞌenus hoonzoo-un bubulh ꞌúhooja butsꞌutni. ꞋEt ndun Job tsꞌutni, ꞌen cha ntsꞌenꞌa dzoh nusuzut, ooba howa whúlnaꞌ hoontsꞌi whulh ínyin. ꞋInkꞌez ntsꞌenꞌa la neMoodihti tube yugha teꞌninzin, ꞌinkꞌez hukwꞌelhꞌaz hoonzoo ꞌuntꞌoh-un yutlꞌa náhonꞌai, ꞌet tsꞌiyawh whulh údahtsꞌoh.

¹² ꞋInkꞌez sulhutsinke ndi ꞌuhoontꞌoh-un ꞌunohdúsni, hoonliyaz dune tsꞌu nahizinya de, khun te yakꞌuz whunalh ꞌudúsni kꞌus ndi yun kꞌut whunalh ꞌudusni, kꞌus ꞌuyoo khuni be, whuz unꞌa te yatoolhdih junih. ꞋEt kꞌus, “A,” dutihnelh de, ꞌantsꞌi, “A,” doohtniꞌ. ꞋEt, “Dah,” dutihnelh de, ꞌet cha, “Dah,” doohtniꞌ! Doo ka si nohba nahoodeh.

Lhla tsꞌootꞌen

¹³ Nohtoh dzoh nuzutne hoonli de, ꞌenne tenahudoodli. ꞋInkꞌez nohtoh hoontꞌiꞌne hoonli de, ꞌenne cha shun ꞌi be Yakꞌusda hudólhtiꞌ.

¹⁴ Nohtoh hunduda de, ndunne Yakꞌusda ba ꞌilhunaoodulhne nohtso whudilhdzulhne, ꞌenne ꞌanih budóhniꞌ. ꞋInkꞌez la ndi khe neMoodihti booziꞌ be ꞌi ndun tetsun-un, ꞌet ookwꞌut ububoolhlho ꞌinkꞌez hiba tenadoodli.

¹⁵ ꞋInkꞌez be ꞌalha ꞌuhoontꞌoh-i bulh tenahudoodli. ꞋEt de nduda-un soo naꞌootneh. ꞋEt de la neMoodihti do náꞌyooleh. Lubeshi ꞌutꞌi de, ꞌi yuba whunawhudoolnoh.

¹⁶ Lhtsꞌun tankꞌus ꞌahtꞌen de, lhudóhni ꞌinkꞌez lhba tenadoohdli. ꞋEt ndahtꞌen de, ꞌet de la soo naꞌoohtneh. Tsꞌihꞌun dune, ꞌen tsꞌihꞌun unꞌa whe tenadudli de, ꞌet whuz unꞌa ootenadudli gha lhat-un hooncha túneꞌ whutitꞌen ꞌet huwa.

¹⁷ Elijah ꞌen wheni nekꞌunꞌa dune unli inleꞌ. ꞋEn ꞌuja soo chan chꞌa tenadidli. ꞋEt tat yus kꞌut ꞌon ꞌat lhúhoolcho, ꞌet ꞌaw nalhúhoolhtel, ndi yun kꞌut.

¹⁸ ꞋInkꞌez doo cha za tenadidli whe chan yakꞌuz tsꞌe hájulh ꞋEt yun doo cha za mai ookꞌut ha nanyai.

Tankꞌus níntꞌi-un nahundunooyaꞌ ha oolaꞌoohneh

¹⁹ Sulhutsinke nohtoh ꞌilhoghun khuni ꞌalhaꞌ ꞌuntꞌoh-i yuchꞌanasja de, nohtoh neMoodihti ghu nainilhti de,

²⁰ ꞌen ꞌet nduja-un, njan dudóhniꞌ, “Mbe la lubeshi ꞌulhꞌen-un, be ꞌalhaꞌ nudzun-i yuchꞌanasja de, ndújan-un neMoodihti ghu nainilhti de, ꞌen ndi yun kꞌut datítsah-un whuchꞌa nayulhti whe ꞌuntꞌoh. ꞋInkꞌez ꞌen gha lhai lubeshi ookꞌé ꞌimbal leꞌ tinelh.”