James 4 - Yak'usda Ooghuni

ꞋUdudítiꞌ-i, ꞌi be dune lhdulhyoh nehúwhulyih

¹ Nohni nohtoh di ha tsꞌiyawh lhdulhyoh ꞌudahnih, ꞌinkꞌez lhéhdulh? Ntsꞌez de ha hóoltsꞌut wheꞌ hoontꞌoh? Tsꞌiyanne dukꞌunꞌa za hukwaꞌ huninzun, ꞌet whuz de ha hóoltsꞌut wheꞌ hoontꞌoh.

² Tube hoonli-unyaz ookaꞌ nuhzun ꞌet hoontsꞌi ꞌaw lháhtꞌih. ꞋEt huwa dune sulhghih. Dune gheꞌ oolhnih ꞌet hoontsꞌi ndet la hukwaꞌ nahzun-un ꞌaw lhuwháhtꞌih. ꞋEt huwa lhdulhyoh ꞌudahnih ꞌinkꞌez lhedulh, ꞌinkꞌez Yakꞌusda ꞌaw ooka lheꞌyooduzulhkut, ꞌet huwa ꞌaw lháhtꞌih.

³ Yakꞌusda ooka yoodulhkut ꞌet hoontsꞌi ꞌaw nohghá yoꞌalh ꞌaitꞌoh. Hoontsiꞌ hukwꞌunꞌa ooka yoodulhkut. ꞋAntsꞌi nohnihchꞌoh nohba hoonzoo hukwaꞌ nahzun te, bé neꞌtihtꞌen, ꞌet huwa ꞌaw nohghá yoꞌalh ꞌaitꞌoh.

⁴ Nohni dune ꞌinkꞌez tsꞌekoo lhulh nintaꞌahtꞌihne léꞌahtꞌoh, soo zúlhtsꞌai, ndi yun kꞌut hoontsiꞌ túneꞌ ꞌahtꞌen-un, ꞌet hoonáhtꞌiꞌ de, ꞌet de Yakꞌusda chꞌaz ditnine ꞌahli. ꞋEt huwa mbene la ndi yun kꞌut hoontsiꞌ tuneꞌ titꞌen hukwaꞌ ninzunne, ꞌenne Yakꞌusda chꞌaz ditnine naꞌhududulhtsi.

⁵ Yakꞌusda ooghuni ꞌantsꞌet lheꞌdusni whe njan ndutni “Ndoni neyudinda-un, ꞌen tube cho ꞌuyoonne neba ha lheꞌnizun.”

⁶ ꞋEt Yakꞌusda lhanꞌun ye unzoo-i negha íninꞌai, ꞌinka ooghuni njan ndutni, “Mbene la ꞌududíltiꞌne, ꞌenne Yakꞌusda budulhyoh ꞌuntꞌoh. ꞋEt hoontsꞌi yo údudildzunne, ꞌenne ye unzoo-i bugha yúꞌaih whe ꞌuntꞌoh.”

Be yo ꞌuzdudildzun-i, ꞌi ndi yun kꞌut hoonli za ghu nuni uznuzut de, ꞌet whuchꞌaꞌ ꞌulhdeh

⁷ ꞋEt huwa Yakꞌusda ootlꞌaꞌ dudulhye. Netsudule, ꞌen oodulhyoh oohyin, ꞌet de nohghu nátsetilyalh.

⁸ Yakꞌusda be nghoh nenahya de, ꞌet de Yakꞌusda didut cha nohenghoh netiyalh. Nohni nintaꞌutꞌihne, ꞌet whuchꞌa nohla tunáhgus. Nohni nawh ninidohne, nohdzi ootsun hooloh naoolhtselh.

⁹ ꞋEt dáhja la, ꞌet nohnichꞌoh tube cho yoo yo ꞌududolhdzin! ꞋInkꞌez howu ni oohleꞌ! Ndet la hoontsiꞌ-un howahdloh-un, ꞌet ꞌetsul ꞌudóhnih, ꞌet huwohtso! Be hóonahtꞌiꞌ-i, ꞌi tsꞌiyawh whula doohtni, ꞌinkꞌez nohdzi undoodaꞌ.

¹⁰ NeMoodihti oobut yo ꞌududoolhdzin, ꞌet de la nohdólhtiꞌ.

Nyulhutsin ooba nahonye junih

¹¹ Sulhutsinke lhdulhyoh yaoolhduk junih! Mbe dulhutsin dulhyoh yalhduk-un ꞌinkꞌez yuba nahizya de, ꞌen Yakꞌusda dughuni netlꞌa ídanꞌai-i, ꞌi yudulhyoh yalhduk whe ꞌutni. ꞋI ba nus unzoo naꞌdunúdzun. ꞋEt ndintꞌen de, ꞌaw Yakꞌusda khuni netlꞌa ídanꞌai-i, ꞌaw kwꞌunulheꞌzintꞌen, ꞌantsꞌi Yakꞌusda kꞌunꞌa nahiyilh-un ꞌintꞌoh naꞌduníndzun.

¹² ꞋAw ꞌilhoghun za ꞌuntꞌoh ndi khuni netlꞌa ídanꞌai-un. ꞋAw ꞌilhoghun za dune ulhyis-un kꞌus kwuncho yo tsꞌe butilhꞌalh. ꞋEt huwa mbe inli naꞌduninzun whe ꞌuyoonne ba nahanyelh?

Bunde datántꞌelh-un wheꞌ ꞌontꞌeꞌ junih

¹³ Nohni tsꞌiyawh soo zúlhtsꞌai. Whulohne diz unꞌa tilah njan ndudóohtniꞌ, “Bunde kꞌus ꞌom bun tilah nguz keyoh tsꞌuztidulh, kꞌus nguz tilah ꞌutsꞌooneh. Whuz ꞌilheyus kꞌut whuz uzdutáltsꞌilh, whuz la sooniya lhai ꞌutsꞌooleh.”

¹⁴ ꞋEt hoontsꞌi bunde ꞌaw dawhútanelh-un tꞌeóonuzáhzun. Be háhna-i, ꞌi di whé ꞌuntꞌoh? ꞋAntsꞌi lhut léꞌuntꞌoh. ꞋAtsulyaz ndo whe dudoh, ꞌinkꞌez gak lhih.

¹⁵ Kꞌus ndiz unꞌa njan dudóohtniꞌ hubaꞌ hoontꞌoh, “NeMoodihti hukwaꞌ ninzun de, ꞌinkꞌez ꞌawhuz tsꞌukhuna de, ꞌet de ndi kꞌus ndi, ꞌet whuz unꞌa njan dúztinelh.”

¹⁶ Nohni ꞌududíltiꞌne ndet ꞌududítiꞌ be yalhduk, ꞌet ndi tsꞌiyawh hoontsiꞌ wheꞌ hoontꞌoh.

¹⁷ ꞋEt huwa mbe tꞌehoninzun tsꞌihꞌun unꞌa neꞌhootꞌen hubaꞌ hoontꞌoh, ꞌinkꞌez ndulhúhustꞌen de, ꞌet de ooba lubeshi ꞌuhoontꞌoh.