James 3 - Yak'usda Ooghuni

Neghuni ooghu lhtsꞌiloh de

¹ Sulhutsinke nohtoh khun te stalhane dune hodulhꞌehne oohleꞌ hukwaꞌoohtꞌen junih. Wheni dunne hodulhꞌehne, ꞌon nus hooncha whe neba nahutideh ꞌet huwa.

² Lhat-un whe lubeshi ꞌutsꞌulhꞌen ꞌet huwa. Dune dichꞌoh dughuni be ꞌaw lubeshi lhilhchulh de, ꞌen dune soo lhadúlya-un suliꞌ. Duyustꞌe dulcho whe tsꞌihꞌun unꞌa yughunli de.

³ Nja howu nuní noohzut, ndi yeztli ooze yuzdla-i ooza tsꞌuyulih te, ntsꞌoh núznulhtꞌiꞌ, ooyustꞌe ꞌoh túneꞌ ꞌutꞌen.

⁴ Njan ꞌet cha howu nuní noohzut, lubaz ncha-i be tsꞌikelh ꞌinkꞌez tube nilhtsꞌi de, ꞌoh te nulhtsꞌi. Ntsꞌoh tsꞌi dalcho ꞌet hoontsꞌi tsꞌi bulh too yuzdla-i lheltsool ꞌet hoontsꞌi whuz unꞌa za yukꞌúneꞌ ꞌutꞌen.

⁵ ꞋInkꞌez netsoola lheꞌultsool, ꞌet hoontsꞌi hooncha-un howu yalhduk. ꞋInkꞌez whunulhꞌen, kwun ntꞌum-iyaz dikꞌaih te, dáwhulcho chuntoh be whúdutakꞌun wheꞌ ꞌuhoontꞌoh.

⁶ Netsoola ꞌantsꞌi kwun leꞌ ꞌuntꞌoh. Ndai la khuni tsꞌihꞌun unꞌa lheꞌítꞌoh be yatsꞌulhduk-i, ꞌi be dubih. ꞋI be ndulcho neyustꞌe nintaꞌyulhꞌih. Ndi yun kꞌut neyustꞌe whutsꞌu nintꞌi-un, ꞌantsꞌi kwun kꞌunꞌa hoolhtus whulhtsih. ꞋInkꞌez netsoola ꞌi kwuncho yo whumoodih, ꞌen be dikꞌaih.

⁷ ꞋEt ndi yun kꞌut khuna-i didowh-i, dutꞌai cha, ndai yun kꞌut núlhꞌas-i cha, ꞌinkꞌez ndai toot hoonli, ꞌi cha, wheni ndi yun kꞌut dunene, ꞌi tsꞌiyawh kꞌuneꞌ tsꞌulꞌen.

⁸ ꞋEt hoontsꞌi ꞌaw ꞌilhoghun netoh, khuni be yatsꞌulhduk-un, ꞌaw kꞌuneꞌ tsꞌuhoolꞌen ꞌaitꞌoh. ꞋAhoolhyiz bé hoontsiꞌ tuneꞌ uzduniꞌ-un ꞌaw ꞌetsul uzdónih ꞌaitꞌoh. Neghuni lubezo leꞌ ꞌuntꞌoh, ꞌi be ꞌuyoonne tsꞌughan leꞌ tsꞌutꞌen.

⁹ Neze whe Yakꞌusda neBá tube cho ooba tsꞌodílhtiꞌ. ꞋInkꞌez ꞌet whe za nebulh dunene bubézduyaih, Yakꞌusda dukꞌunꞌa ꞌubínla, ꞌenne hoontsꞌi neghuni be ꞌet dúbutsꞌutni.

¹⁰ ꞋEt whuz unꞌa za nawh kꞌunꞌa yatsꞌulhduk. Whuloh te hoonzoo kꞌunꞌa neuzduniꞌ. ꞋInkꞌez whuloh te hoontsiꞌ whe tuneꞌ uzduniꞌ. Sulhutsinke ꞌet ꞌaw whuz unꞌa lheꞌhóstꞌeꞌ hubaꞌ hoontꞌoh.

¹¹ Too unzoo-i ꞌinkꞌez too tsulkiꞌ-i ꞌaw ꞌilhoghun za haóoli ꞌaitꞌoh.

¹² Sulhutsinke, ndi duchun fig huyulhni, ꞌi oomaiꞌ olive cha ootsꞌu ha nóoyeh ꞌaitꞌoh. ꞋInkꞌez mai chun, ꞌi cha ꞌaw oomaiꞌ, fig huyulhni, ootsꞌu ha nóoyeh ꞌaitꞌoh. ꞋEt whuz unꞌa za too tsulkiꞌ-i ꞌinkꞌez too unzoo-i bulh nankultꞌoh ꞌilhoghun za haóoli ꞌaitꞌoh.

Yakꞌusda ye whunih-i ꞌinkꞌez netsudule ye whunih-i

¹³ Mbe la nohtoh whunih-un dune unli ꞌinkꞌez lhat-un tꞌewhunínzun? ꞋEt nduntꞌóh-un hoonzoo kꞌunꞌa nohtoh dune ooleꞌ. Whuz unꞌa oobe ꞌutꞌen kꞌoh whunih-i be ꞌinkꞌez yo ꞌududildzun whuz unꞌa huba ꞌuhoontꞌoh.

¹⁴ ꞋEt hoontsꞌi nohni ꞌukꞌenus lhgheꞌ oolhnihne ꞌahtꞌoh, ꞌinkꞌez ꞌahoolhyiz kꞌuneꞌ tihtꞌen hukwaꞌ nahzun. ꞋEt whuz unꞌa nohdzi dizꞌai de, ꞌet whe óontꞌeꞌ be howu yaoolhduk junih! Ndi khuni ꞌalhaꞌ ꞌuntꞌoh-i, khun te huwun hoohtsꞌit junih.

¹⁵ ꞋAw ndi be whútnih-i, ꞌaw yakꞌuz tsꞌe hálhdiltsꞌulh. Kꞌus ndi yun kꞌut hiye whunih-i, ꞌi ꞌuntꞌoh. Ntsꞌenꞌa la neyustꞌe whutsꞌu nintꞌi-un hukwꞌunꞌa ꞌúhoontꞌoh. Ntsiꞌ-i nududeh-i, ꞌen ye whunih-i, ꞌi ꞌuntꞌoh.

¹⁶ Ntsꞌe ꞌuhoontꞌoh dune lhgheꞌ oolnih ꞌinkꞌez ꞌahoolhyiz dichꞌoh za khununi hunudzut, ꞌet whuz unꞌa tsꞌiyawh buba wheꞌ hoontꞌoh hooyoh dawhútanelh suba, ꞌinkꞌez tsꞌiyaitsuk hoontsiꞌ-un ꞌoh ꞌuwhahulhꞌen.

¹⁷ ꞋEt hoontsꞌi ndus de be whutnih-i, ꞌudechoo-i netsun hooloh neilhꞌi, ꞌinkꞌez nedzi dizghel cha yulhtsi, ꞌinkꞌez nánilhtsulyaz néꞌtsꞌutꞌen. ꞋEt whe ꞌuyoonne hukwaꞌ huninzun kꞌunꞌa bugha tsꞌúwhunle. Be teꞌ nudzun-i, cha ꞌuztitꞌelh, ꞌinkꞌez ꞌuyoonne ba cha ꞌutꞌen unzoo-i ꞌutsꞌoolhꞌen. ꞋInkꞌez tsꞌiyanne lhgha za nebutsꞌoolhꞌen, ꞌinkꞌez ꞌaw nawh lheꞌtsꞌunizun whe neꞌtsꞌootꞌen.

¹⁸ Mbene la ꞌuyoonne gha tsꞌihꞌun ꞌuhootꞌeꞌ ꞌet buba hukwaꞌ huninzun, ꞌi bube ꞌutꞌen gha tsꞌihꞌun unꞌa buba neꞌhootꞌen. ꞋEt de lhane tsꞌihꞌun unꞌa lhtsꞌun ꞌuhútitꞌelh.