James 2 - Yak'usda Ooghuni

Khun te ꞌilhoghun, ꞌen ꞌuyoon anus unzoo whe ꞌuntꞌoh noohzun junih

¹ Sulhutsinke, neMoodihti Jesus Christ díztiꞌ-un, ꞌen nohba ꞌalhaꞌ ꞌuntꞌoh, ꞌet huwa khun te ndi yun kꞌut ꞌuyoon anus unzoo-un noohzin junih.

² Khuntsul tilah ꞌilhoghun dune nohlugliz nohghu danínya whe latultꞌo díztiꞌ-i nedúlya, ꞌinkꞌez naih unzoo-i be dune unli. ꞋInkꞌez ꞌet za ꞌuyoon dune yuniyalh. ꞋEn telꞌen-un ꞌinkꞌez oonaih ꞌutsiꞌ-i be dune unli.

³ ꞋEt ndun oonaih unzoo-un hoonáhtꞌiꞌ whe, “Njan hoonzoo-un sinda,” dahni, ꞌinkꞌez telꞌen-un, ꞌen ꞌudahni, “Njan yun neke zih sinda kꞌus ꞌantsꞌi tedut ti ꞌet sinyin.”

⁴ ꞋEt whuz unꞌa ndahtꞌen de, ꞌet ꞌalhaꞌ nohni ꞌilhoghun ꞌen ꞌuyoon anus unzoo nahzun. ꞋEt noheni untsiꞌ-i be ꞌudaꞌ buba nahizahya.

⁵ Sulhutsinke ookꞌesiꞌne, soo zúlhtsꞌai. Ndi yun kꞌut telꞌenne, Yakꞌusda kꞌensiꞌne, ꞌenne ꞌutahábanla buba ꞌalha ꞌuhoontꞌoh-i, ꞌi be hoonzoo ꞌuntꞌohne ꞌubulhtsi. ꞋAw ndi yun kꞌut be ꞌutsꞌintꞌoh-i iloh. ꞋInkꞌez ntsꞌe Yakꞌusda lerwe unli-un, neBá yutꞌi-i bugha ítalelh-i, ꞌet ꞌi bugha ootakulh. ꞋEt whuz unꞌa mbene la yukꞌensiꞌne, ꞌenne cha bugha ítalelh.

⁶ ꞋEt ndun telꞌen-un nohghu ninya whe ootsꞌeꞌ dudalhtiꞌ. ꞋEt hoontsꞌi hoonzoo ꞌuntꞌohne, hoontsiꞌ hukwꞌunꞌa nunéꞌnohuhulhꞌen. ꞋAhoolhyiz nahíyilh-un but nenóhohugus.

⁷ Nohooziꞌ unzoo-i, ꞌi be nohúlhni, ꞌalhaꞌ ꞌi chꞌaz yahalhduk.

⁸ Yakꞌusda nelerwe, ndi ooghuni netlꞌa ídanꞌai-i neba ꞌukꞌeyánguz-i, ꞌet njan ndutni, “Ntsꞌenꞌa la nohnichꞌoh kꞌenahsiꞌ, whuz unꞌa za ꞌuyoonne bukꞌeoohsiꞌ.” ꞋEt nduhtꞌen de, ꞌet sooꞌ hoontꞌoh.

⁹ ꞋEt hoontsꞌi ꞌilhoghun ꞌuyoon anus unzoo-un nahzun de, lubeshi ꞌahla whe ꞌahtꞌoh. ꞋEt whuz unꞌa ndi Yakꞌusda ooghuni netlꞌa ídanꞌai-i whunóhnulhtun khuni kꞌunyisne ꞌahli.

¹⁰ ꞋEt ndi Yakꞌusda ooghuni netlꞌa ídanꞌai-i, ꞌi hoontsool-unyaz kꞌuz ninyuz de, tsꞌiyawh kꞌuz ninyuz ꞌet za ꞌuhoontꞌoh.

¹¹ ꞋEt ndutni, “Dune kꞌus tsꞌeke bulh nintaꞌoohtꞌen junih.” ꞋEn njan cha ndutni, “Dune solhghelh junih.” ꞋEt njan dúhoontꞌoh, ꞌuyoonne ꞌat bulh nintaꞌlheꞌíntꞌel de, ꞌet hoontsꞌi dune sílhghih de, ꞌet ndi Yakꞌusda ooghuni netlꞌa ídanꞌai-i, ꞌi tsꞌiyawh kꞌuninyuz wheꞌ hoontꞌoh.

¹² Yaooduk ꞌinkꞌez whuz unꞌa za neꞌoohte khuni Yakꞌusda nohtlꞌadanꞌai-i be nohba nahutde ꞌi nela nahutitnih-i ꞌuntꞌoh.

¹³ ꞋInka ndet dzin suba neba nahutideh-un whusaóotiltsꞌulh, mbene lhgha tꞌelhenízun-un, ꞌen oogha telheꞌwhunídzun whe Yakꞌusda buba nahutiyeh. ꞋEt mbe ꞌuyoon gha téꞌ ninzun-un, ꞌen Yakꞌusda yugha teꞌuntazeh whe yuba nahutiyeh.

Be ꞌalha ꞌuhoontꞌoh-i ꞌutꞌen unzoo-i yit de, ꞌaw hoonli lhuhóoloh wheꞌ hoontꞌoh

¹⁴ Sulhutsinke, mbe dune ꞌutni, “Be ꞌalha ꞌuhoontꞌoh-i ꞌustꞌi,” ꞌet hoontsꞌi Yakꞌusda ꞌaw yukꞌú nulhéꞌustꞌen de, ꞌi ꞌaw ooba lheꞌhóozooꞌ wheꞌ hoontꞌoh! Nduntꞌoh-i be ꞌalha ꞌuhoontꞌoh-i, ꞌubutilhyih nahzun eh? ꞋAwundooh!

¹⁵ ꞋEt neulhutsinke kꞌus neulhtuske, naih lhuhítꞌiꞌ, kꞌus ꞌandit dzin huba hoontsꞌi, ꞌaw huyooꞌalh-i lhuhítꞌiꞌ de,

¹⁶ ꞌet ꞌilhoghun nohni nohtoh ubúlhni, “Soo óohtꞌeꞌ la. Noolhwus la. Soo cho naꞌoohtꞌalh.” ꞋInkꞌez hoonli hiye ndunidzit-i ꞌaw hiye bula lheꞌáhnel de, ntsꞌenꞌa nohba hootázooꞌ? ꞋAw khuni za hikꞌu khoonaꞌ ꞌaitꞌoh.

¹⁷ ꞋEt whuz unꞌa za dune ꞌutni, “Be ꞌalha ꞌuhoontꞌoh-i ꞌustꞌi,” ꞌet hoontsꞌi Yakꞌusda ba ꞌutꞌen unzoo-i yit de, ꞌaw hoonli lhiloh.

¹⁸ ꞋEt hoontsꞌi ꞌilhoghun tilah ndiz unꞌa njan dusúdoniꞌ, “Nyun be ꞌalha ꞌuhoontꞌoh-i ꞌintꞌi, ꞌinkꞌez si ꞌutꞌen ꞌustꞌi. Nye ꞌutꞌen ooyit be, be mba ꞌalha ꞌuhoontꞌoh-i whusunilhtun, ꞌet de si cha seꞌ ꞌutꞌen be, ꞌi be sba ꞌalha ꞌuhoontꞌoh-un whunyunoostun.”

¹⁹ ꞋInkꞌez cha sudóniꞌ, “Yakꞌusda ꞌilhoghun za ꞌuntꞌoh.” ꞋEt mba ꞌalha ꞌuhoontꞌoh, ꞌet huwa ꞌutꞌen unzoo-i ꞌilhꞌen. Ntsiꞌ-i nududeh-i ꞌenne hoontsꞌi, buba ꞌalha ꞌuhoontꞌoh whe nujut bulh hudutlut.

²⁰ ꞋEt nyun tube whuzini! ꞋAwhuz eh tꞌeóonuzínzun? ꞋUtꞌen yit de, be ꞌalha ꞌuhoontꞌoh-i, ꞌaw hoonli lhiloh whe ꞌuntꞌoh.

²¹ Netsodaꞌ-un, Abraham, ꞌen duyeꞌ, Isaac, ꞌen loodel kꞌeyilhti, Yakꞌusda ba yutuzilhghelh ha. ꞋEt huwa dude ꞌutꞌen be tsꞌihꞌun dune suliꞌ.

²² Whunulhꞌen eh? Abraham be ꞌutꞌen kꞌoh, be ꞌalha ꞌuhoontꞌoh-i, ꞌi be ꞌuja. ꞋEt be ꞌutꞌen kꞌoh huwa, be ꞌalha ꞌuhoontꞌoh-i soo tsꞌihꞌun unꞌa lhadúlya suliꞌ.

²³ Yakꞌusda ooghuni daja ni ꞌen ghun, ꞌi tsꞌiyawh lhaooduja. Njan ndutni, “Abraham ꞌen Yakꞌusda yuba ꞌalhaꞌ ꞌuntꞌoh. ꞋEt huwa Yakꞌusda tsꞌihꞌun dune inli,” yúlhni. ꞋInkꞌez Yakꞌusda ookꞌeke suliꞌ-un, huyúlhni.

²⁴ Tꞌewhunúhzun eh? Njan ndúhoontꞌoh. ꞋAw be ꞌalha ꞌuhoontꞌoh-i gha za iloh whe tsꞌihꞌun dune tsꞌulih. Ne-eꞌutꞌen gha cha, tsꞌihꞌun dune tsꞌulih.

²⁵ Ndun lubeshi ꞌulhꞌen-un, Rahab huyúlhni, ꞌen dichꞌoh dude ꞌutꞌen kꞌoh huwa, dune nalh tsꞌihꞌun ꞌuntꞌoh-un suliꞌ. ꞋEt ndiz unꞌa ndúja, ndunne Joshua ba khuni naꞌáne, ꞌenne dábúninla whe ꞌet hukwꞌelhꞌaz ꞌudun tetí-un tenábuninla.

²⁶ ꞋEt ꞌinka njan ndúhoontꞌoh, neyustꞌe neyughi ooghu whe yooloh de, ꞌaw lhtsꞌuhínoh. ꞋEt whuz unꞌa za be ꞌalha ꞌuhoontꞌoh-i, ꞌinkꞌez neꞌutꞌen unzoo-i kꞌoh ooghu whe yooloh de, be ꞌalha ꞌuhoontꞌoh-i ꞌaw hoonli lhuhóoloh.