James 1 - Yak'usda Ooghuni

Mbene la Lizwifne ooba ꞌalha ꞌuhoontꞌohne James hadih ꞌubulhni

¹ Si James, Yakꞌusda ꞌinkꞌez neMoodihti Jesus Christ ba ꞌulhna-un usdli. Nohni Lizwifne, mbene la Jesus Christ ooba ꞌalhaꞌ yintꞌohne, nohkeyoh whuchꞌa nohonízyootne ꞌahli, ndi ꞌudustlꞌus nohtsꞌó kꞌesges-i, ndi yun kꞌut whutꞌenne tsꞌiyawh be hadih nohdúsni.

Dzoh nuhudeh-un huwa hóhodulꞌeh

² Sulhutsinke lhat-un whe lhelhtsꞌun unꞌa dzoh nahdeh de, ꞌet hoontsꞌi hoonahtꞌiꞌ whe whuz unꞌa za oohtꞌeꞌ.

³ Tꞌewhunáhzun Yakꞌusda ootꞌa ninahtan whe lhelhtsꞌun unꞌa dzoh nahdeh, ꞌet whuz unꞌa hodoolhꞌeh soo ulhtus whe núdolhyaꞌ ꞌet huwa.

⁴ Yakꞌusda ba ulhtusne suhliꞌ, tsꞌihꞌun unꞌa tsꞌiyawh hodoolhꞌeh. ꞋEt de la Yakꞌusda ba lhadúlyane oohleꞌ. ꞋInkꞌez tsꞌihꞌun unꞌa ꞌutꞌen kꞌoh lhaóodahla. Yakꞌusda ba hoonliyaz whuyit lheꞌáhnel.

⁵ ꞋEt nohni whulohne Yakꞌusda be whútnih-i ꞌaw lhahtꞌih de, ꞌet de Yakꞌusda hika huyoodolhkut. ꞋEt de ye dánzoo whe bugha ítaꞌalh. ꞋInkꞌez ꞌaw yooya uboolhtselh ꞌaitꞌoh.

⁶ Mbene la yoodulkutne, bé ꞌalha ꞌuhoontꞌoh-i be hudoontni. Khun te buba nawh ꞌuhotꞌeꞌ junih. Mbene ooba nawh ꞌuhoontꞌohne, nilhtsꞌi too bubulh nudutun leꞌ hintꞌoh.

⁷ Nduntꞌohne dune khun te neMoodihti ꞌaw hoonli-unyaz bugha óotaꞌalh hunoozin junih!

⁸ Nduntꞌohne, ꞌahoolhyiz nawh ꞌuhitꞌelhne hinli.

Hoonzoo ꞌuntꞌohne ꞌinkꞌez telꞌenne cha Yakꞌusda ba lhgha zaꞌ ꞌuhintꞌoh

⁹ Neulhutsin telꞌen-un, ꞌen Yakꞌusda ꞌuntꞌoh-un yulhtsi de, hótꞌeꞌ hubaꞌ hoontꞌoh.

¹⁰ ꞋEt hoontsꞌi hoonzoo ꞌuntꞌoh-un duzooneya be do ꞌúdudildzun-un, ꞌen Yakꞌusda yo naꞌyitilalh, ꞌet huwa hótꞌeꞌ hubaꞌ hoontꞌoh. ꞋEt hoontsꞌi tꞌewhunónzin ntsꞌenꞌa la ꞌindaiyaz dátsaih, whuz unꞌa za ye hoonzoo ꞌuntꞌoh-i, ꞌi gha khoonaꞌ ꞌaitꞌoh.

¹¹ ꞋEt sa ha ꞌaih te ꞌi be tube whúnilwus. ꞋI be ꞌindai chun dugih te, bindai nakuk. Lheldzooꞌ whundoútꞌen ꞌet hoontsꞌi hooloh lhih. Whuz unꞌa za hoonzoo ꞌuntꞌohne ꞌawhuz dude ꞌutꞌen ꞌuhulhꞌen whe didutchꞌoh hoontsꞌi huhooloh hutileh.

Dzoh nutsꞌuzut ꞌet hoontsꞌi Yakꞌusda ookꞌetsꞌoosiꞌ

¹² Mbe la óolhdzai-un, ꞌawhuz whulh usyin, ꞌen ꞌukꞌenus hoonzoo-un oogha whutaltsꞌulh. ꞋEn ꞌuntꞌoh ꞌilhiz ye khútinalh-un ooghá whuntꞌai. Whuchꞌaꞌ whunílhde-un, ꞌet cha oogha whútaltsꞌulh. Mbene la neMoodihti yukꞌensiꞌne, whuz unꞌa butsꞌún hoozi.

¹³ ꞋIlhoghun lubeshi tsꞌu níntꞌi de, khun te Yakꞌusda sóolhdzih dooniꞌ junih. ꞋAw Yakꞌusda ntsiꞌ-i be óldzih ꞌaitꞌoh. ꞋInkꞌez didutchꞌoh cha whuz unꞌa za ꞌuyoonne hoontsiꞌ tsꞌe ꞌubunoolhtꞌi ꞌaitꞌoh.

¹⁴ ꞋEt hoontsꞌi wheni ꞌilhone tsinli whe whenichꞌoh hukwaꞌ ꞌuzninzun ꞌet huwa lubeshi ꞌuztilhꞌelh-un tsꞌe whutsꞌúznintꞌi.

¹⁵ Ndutsꞌutꞌen de, ꞌet ntsꞌenꞌa la hukwaꞌ ꞌuzninzun kꞌunꞌa whe lubeshi ꞌutsꞌulhꞌih-un, ꞌet lubeshi wheditꞌiꞌ. Lubeshi ꞌutsꞌulhꞌen te, ꞌi gha datsꞌútsaih.

¹⁶ Sulhutsinke ookꞌesiꞌne, nanoohtꞌah júnih!

¹⁷ NeBá, ꞌen yakꞌuz be hootꞌen-i tsꞌiyawh ꞌuyinla. Ndi be hootꞌen-i whuloh te ꞌutsꞌun unꞌa naꞌutꞌih ꞌinkꞌez tsawhúsꞌih leꞌ whulhꞌih. NeBá ꞌaw nawh huninizun-un unli iloh. ꞋEt huwa dai la ndus de negha nukat-i unzoo ꞌinkꞌez soo tsꞌihꞌun ꞌuntꞌoh, ꞌi tsꞌiyawh ꞌen za tsꞌu ha whúkat wheꞌ hoontꞌoh.

¹⁸ Dichꞌoh hukwaꞌ ninzun-un, ꞌet whuz unꞌa ꞌuja whe ndi khuni ꞌalhaꞌ ꞌuntꞌoh-i, ꞌet ꞌi be doo cha tsꞌuwhuzdli. ꞋEt whuz unꞌa ndúhooja ndai la ꞌuyalhꞌen-i ootoh whe wheni ꞌudechoo oochꞌeꞌne tsꞌuzdliꞌ.

ꞋIlhoghun ꞌahli whe ꞌa cho ohtsꞌo

¹⁹ ꞋEt huwa sulhutsinke ookꞌesiꞌne, ꞌilhone ꞌahli whe Yakꞌusda ooghuni soo ꞌa cho dohtsꞌo. Nánilhtsulyaz hukwꞌu nuní nulhzut whe yatulhdih. Khun te hunólhchꞌeh junih.

²⁰ Huzáhke de, Yakꞌusda ye tsꞌihꞌun unꞌa ꞌuntꞌoh-i, ꞌaw ookꞌuneꞌ oohtꞌen ꞌaitꞌoh.

Yakꞌusda ooghuni ookꞌuneꞌ ꞌahtꞌen ꞌantsꞌi oozúlhtsꞌai iloh

²¹ ꞋEt ꞌinka tsꞌiyai whudutsun kꞌunꞌa neꞌahtꞌen, ꞌinkꞌez lhat-un whe tankꞌus unꞌa ꞌahtꞌen-un, ꞌet ꞌi tsꞌiyawh whula doohtnih. ꞋInkꞌez Yakꞌusda ooghuni nohyudánde-i, ꞌi nohdzi yo úlhdzun whe ólhchoot. Ndi khuni ꞌi be za nohtilhyih.

²² Yakꞌusda ooghuni daja ni la, whuz unꞌa ookꞌuneꞌ oohtꞌen. ꞋAntsꞌi oozúlhtsꞌai iloh. ꞋEt ndahtꞌen de, nohnichꞌoh naꞌdunahtꞌah whé ꞌahtꞌen.

²³ ꞋEt mbene ndi khuni ꞌantsꞌi hiditsꞌo ꞌet hoontsꞌi lheyúlhchootne, ꞌenne nduntꞌohne, ꞌenne ꞌuhintꞌoh, ndai la be naꞌuzdunulꞌen ꞌi be naꞌhundunulꞌen, hukꞌo tsꞌe ꞌuhintꞌoh.

²⁴ Dichꞌoh naꞌdunulꞌen, ꞌinkꞌez daootꞌen ꞌaho whunahoodulneh.

²⁵ ꞋEt hoontsꞌi Yakꞌusda ooghuni lhaidinla-i, ꞌi be lubeshi chꞌa naneulhti, soo cho hikꞌu yalhduk ꞌinkꞌez whunalhuhodulhnoh, ꞌinkꞌez daja ni ꞌahoolhyiz hukwꞌú neꞌhutꞌen de, ndutꞌenne, whuz unꞌa dude ꞌutꞌen kꞌoh huwa ꞌukꞌenus hoonzoo-un bugha whutaltsꞌulh.

²⁶ Mbene la nohtoh Yakꞌusda ba neꞌhutꞌen huninzun, ꞌet hoontsꞌi ꞌaw dughuni gha lhéꞌoolihne, dichꞌoh naꞌhundunutꞌah. ꞋEt ꞌantsꞌet nduntꞌohne Yakꞌusda ba hutꞌen-un, ꞌet ꞌaw hoonli lhuhóoloh.

²⁷ ꞋEt tsꞌihꞌun ꞌuhoontꞌoh, ꞌinkꞌez ꞌalha ꞌuhoontꞌoh whe Yakꞌusda neBá, ꞌen ba néꞌtsꞌutꞌen-un, ꞌet njan dúhoontꞌoh: tsꞌunohne ꞌinkꞌez tsandilhne, ꞌenne dzoh nahudeh huwa buzih nutsꞌoodilh hubaꞌ hoontꞌoh bula tsꞌootꞌen ha. ꞋInkꞌez cha ndi yun kꞌut dawhútꞌen lubeshi ꞌulꞌen, ꞌet whuchꞌa khutsꞌoodleꞌ.