Hebrews 9 - Yak'usda Ooghuni

ꞋOh daꞌ nimbali cho ꞌulya-un

¹ ꞋInkꞌez njan ꞌudechoo khuni buba lhaídinla-i, ꞌi be whubúnilhtan lubretne Yakꞌusda ba neꞌhóotꞌen hubaꞌ hoontꞌoh. ꞋInkꞌez ndet la nimbali cho ꞌuhuhóonla-un, ꞌet Yakꞌusda tsꞌun teniꞌ hunilhdzin-un ꞌuhoontꞌoh.

² ꞋInkꞌez nimbali cho be ꞌuhóolya-un. ꞋUdechoo-un whambez tsꞌe, ꞌet lhtakꞌantꞌi kwun ookꞌu dizkꞌun-i ꞌet skai. ꞋInkꞌez ludab lhes nulꞌen-i huyulhni ookwꞌusdla cha ꞌet skai. ꞋEt ꞌudechoo-un whambez tsꞌe, ꞌet whudíztiꞌ-un ꞌuhoontꞌoh.

³ ꞋEt ꞌon niꞌ whulh nat whutsoh subal-i, ꞌet ꞌon nus whudiztiꞌ, ꞌinkꞌez ꞌukꞌenus whudiztiꞌ wheꞌ ꞌuhoontꞌoh.

⁴ Whambez tsꞌe ludab gold huyalhꞌuz-i, ꞌi ndulcho whe ooghá yosduz, ꞌet ꞌuskai. ꞋI kꞌut ooluts sooltsun-i hudílhkꞌun. ꞋInkꞌez ndi chunkelh cho, ꞌi cha bez tsꞌe ꞌinkꞌez yoo ꞌaz tsꞌe, ꞌet ndulcho whe ndi gold ndulcho ooghá yosduz, ꞌi cha ꞌet ꞌusꞌai. ꞋInkꞌez ꞌi Yakꞌusda khuni buba lhaídinla-i oochunkel ꞌuntꞌoh. ꞋI bez tsꞌe gold oosaꞌ cha be ꞌusꞌai. Ndi gold oosaꞌ, lhes manna huyulhni, ꞌi bé yuzꞌai. Aaron ootuz, ꞌutꞌan ootsꞌu ha nálhyai inleꞌ, ꞌi cha be ídiztan. ꞋInkꞌez ndi whunizyai khuni netlꞌa ídanꞌai, tse kꞌut ꞌukꞌu nusguz, ꞌi cha be ídizꞌai.

⁵ ꞋInkꞌez ndi chunkelh cho kꞌut, ndunne Cherubim ubutsꞌútnine, ꞌenne bube Yakꞌusda yé diztiꞌ-un tꞌetsꞌoninzun. Butsꞌuntꞌaꞌ whutus lhtꞌaítnaih huyulhtsi, ꞌi tꞌah, ꞌet ꞌi kꞌut ꞌuskaiꞌ yukꞌunídilhtꞌih whe Yakꞌusda soo cho netsꞌu naítotꞌen ha tsꞌuwhútni. ꞋAw ꞌandit howu yatsꞌoolhduk ꞌaitꞌoh.

ꞋUdechoo nimbali cho ꞌulya-un, ꞌi tꞌah loodel kꞌut hidilhkꞌun-i ꞌaw ꞌet whe nintaꞌtsꞌuntꞌen-un neba ꞌun whutookat ꞌaitꞌoh

⁶ ꞋEt nduwhi oolaꞌ hubaꞌ hoontꞌoh-un, ꞌet nehíninla. ꞋEt ꞌudechoo whambez tsꞌe ꞌet ndunne lubretne, ꞌenne dzin totsuk neꞌhutꞌen.

⁷ ꞋEt hoontsꞌi lubret ꞌukꞌenus diztiꞌ-un, ꞌen naoodizulh totsuk ꞌilhoh za ꞌon niꞌ whulh nat-un tsꞌe núyaih. ꞋUskaiꞌ yit de, ꞌaw whuz tooyaꞌ ꞌaitꞌoh. ꞋEt ꞌuskaiꞌ dichꞌoh duba cha ꞌinkꞌez mbene ꞌaw tꞌehonúszun whe lubeshi hilhchuk, ꞌenne buba cha, tsꞌiyawh bulubeshi huwa whuz Yakꞌusda nalh wheyúkaih.

⁸ Ndiz unꞌa Ndoni whuneoodulhꞌeh, ndi nimbali cho ꞌawhuz ꞌet ꞌusꞌai de, ꞌet de ꞌukꞌenus whudíztiꞌ tsꞌe, ntsꞌe Yakꞌusda ꞌuntꞌoh-un, ꞌaw whuz datsꞌóoyaꞌ ꞌaitꞌoh.

⁹ ꞋEt dúhoontꞌoh-un, ꞌet huwa hoonli whutsꞌodulꞌeh-un hubaꞌ hoontꞌoh. Mbe Yakꞌusda ba huwa ítaꞌalh-i ꞌinkꞌez loodel kꞌut yadutálhkꞌun, ndun Yakꞌusda ba neꞌtitꞌen, ꞌet hoontsꞌi ꞌawhuz hoonli-unyaz buyo tsꞌe oogha tꞌetsꞌoninzun-i hinzoo ooleꞌ ꞌaítꞌoh wheꞌ hoontꞌoh.

¹⁰ ꞋAntsꞌi hitiꞌulh-i, hititnelh-i, lhelhtsꞌun unꞌa la tunáhududugus, ꞌinkꞌez ndai la buyustꞌe ba tsꞌihꞌun ꞌuntꞌoh-i, ndi ꞌi tsꞌiyawh nus de ꞌandit-un Yakꞌusda ba neꞌhutitꞌen, ꞌoh de buba whusawhútiltsꞌulh-un, ꞌet whutsꞌun, whuz unꞌa ꞌuhootꞌen hubaꞌ hoontꞌoh inleꞌ.

Jesus Christ didutchꞌoh duzkaiꞌ be nintaꞌtsꞌuntꞌen-un neba gak whulhtsi

¹¹ ꞋEt hoontsꞌi Christ lubret ꞌukꞌenus diztiꞌ-un unli whe whusainya. Hoonzoo-un whusaóotikulh-un, ꞌen ꞌet negha whútalelh. Ndi nimbali cho ꞌukꞌenus ncha-i ꞌinkꞌez ꞌon nus tsꞌihꞌun unꞌa ꞌuhoontꞌoh-un, ꞌet whe neba neꞌutꞌen. ꞋAw dune iloh ꞌuyinla. ꞋAw ndi yun kꞌut iloh ꞌuhóolya.

¹² ꞋUsbai ꞌinkꞌez musdoosyaz bubuzkaiꞌ, ndi ꞌukꞌenus whudiztiꞌ tsꞌe ꞌaw whuz whelhúyikaih. Kꞌus dichꞌoh duduzkaiꞌ, ꞌi be ꞌukꞌenus whudiztiꞌ tsꞌe whuz whinya. ꞋIlhoh za ꞌinkꞌez ꞌilhiz wheni, whuz whinya. Ndúja whe ꞌilhiz wheni naneoket.

¹³ Moses be ꞌudustlꞌus gha dahúja la ꞌet huwa ꞌaw nimbali cho ꞌusꞌai tsꞌe ꞌaw whuz hutoodilh ꞌaitꞌoh, nduntꞌohne musdoos dune ꞌinkꞌez dube buzkaiꞌ bukꞌehídutalhtꞌih. ꞋInkꞌez musdoos hidálhkꞌun-i oolez ꞌi bukꞌunuhítidzih, Yakꞌusda nalh buyustꞌe ꞌaw lhoditsun nahudlih. ꞋEt whuz unꞌa ꞌet nduhúja de za nimbali cho ꞌusꞌai-i whuz hutidulh.

¹⁴ ꞋEt hoontsꞌi Christ ꞌen dichꞌoh duduzkaiꞌ ꞌi be ꞌon nus dáwhulcho whe neyo tsꞌe oogha tꞌetsꞌoninzun-i ꞌet tsꞌiyawh neba whunaꞌalhde. ꞋUtsꞌulhꞌen-i, ꞌaw nela ꞌootꞌen ꞌaitꞌoh, ꞌantsꞌet ꞌuhoontꞌoh. ꞋEt huwa Yakꞌusda, mbe la khuna-un, ooba néꞌtsꞌootꞌen hubaꞌ hoontꞌoh. Christ ꞌen ꞌuja ꞌaw hoonliyaz bulh lhodíꞌoh whe Ndoni mbe la ꞌilhiz khuna-un, ꞌen be Yakꞌusda yutlꞌaꞌ dudilti, neba datítsah ha.

¹⁵ ꞋEt huwa ndi ꞌandit-i khuni neba lhaídinla-i, ꞌet Christ ꞌen neba ꞌukꞌelha whulhtsi-un unli. Ndunne njan ꞌudechoo khuni buba lhaídinla-i, ꞌet hukwꞌúne ꞌuhootꞌen hukwa ꞌuhitꞌen, ꞌet hoontsꞌi lubeshi ꞌuhalhꞌen, ꞌenne tsꞌiyawh tulalhgus kꞌut buba dazsai ꞌet whe njan ꞌudechoo khuni buba lhaídinla-i, ꞌet whuchꞌa whula naditnine huzdliꞌ. ꞋEt whe la mbene la ꞌilhiz wheni hudutijih ha bukaꞌ daniꞌ, ꞌenne ndi ꞌandit khuni buba lhaídinla-i, ꞌi huyólhchoot ha.

Dune hoonli mba nayoosdzi de, ꞌen dune dazsai de za ntsꞌu tíkulh

¹⁶ Dune hoonli mba nayoosdzi-i, ꞌen dune dazsai, ꞌet de za ntsꞌu tíkulh, whuz unꞌa ꞌuhoontꞌoh.

¹⁷ ꞋEt hoontsꞌi ꞌawhuz khina de, ndi dune ba naoozíndzi-i, khina whutoh, ꞌet ꞌawhuz nchꞌeꞌ unli whe ꞌuntꞌoh.

¹⁸ ꞋEt huwa ꞌoh daꞌ ꞌudechoo whe Yakꞌusda ndi ꞌudechoo khuni buba lhaídinla-un, loodel kꞌut ꞌinkꞌez dunene bukꞌut cha, Moses ꞌuskaiꞌ be bukꞌeídilhtꞌih.

¹⁹ ꞋEt Yakꞌusda dughuni Moses yutlꞌa ídanꞌai, ꞌi ꞌuwhúlhni-un, tsꞌiyawh Moses budániꞌ. ꞋEt hukwꞌelhꞌaz musdoosyaz ꞌinkꞌez dube buzkaiꞌ too bulh ꞌuntꞌoh, ꞌi yílhchoot. Dube gha dulkꞌun-i, ꞌi duchunyaz ꞌi hyssop huyúlhni, ꞌi oozooschum, ꞌi yula ídalhꞌoo ꞌinkꞌez ꞌuskaiꞌ yé tunayuzsi ꞌinkꞌez Yakꞌusda be ꞌudustlꞌus yukꞌunéꞌdilhtꞌih ꞌinkꞌez dunene cha, tsꞌiyawh bukꞌunéꞌ dilhtꞌih.

²⁰ ꞋEt ndúbulhni, “Yakꞌusda khuni nohba lhaídinla-i, ndi ꞌuskaiꞌ ꞌi be ꞌet whuz unꞌa ꞌandit whutsꞌun nohba ꞌuhóonla,” ni Yakꞌusda.

²¹ ꞋInkꞌez nimbali cho, ꞌi cha, ꞌinkꞌez bez tsꞌe Yakꞌusda bé ba ꞌuwhutꞌen-i, ꞌi cha tsꞌiyawh, ndi ꞌuskaiꞌ yukꞌunídilhtꞌih.

²² ꞋEt Moses be ꞌudustlꞌus ꞌi be ꞌankwꞌus tsꞌiyaitsuk ꞌet ndi ꞌuskaiꞌ ꞌi be whuz unꞌa lhoditsun nahudlih. ꞋAw ꞌuskaiꞌ bukꞌélhdulhtꞌi de, ꞌaw lubeshi bubunayoodeh ꞌaitꞌoh.

Christ ꞌilhoh za neba dazsai-un dáhoolcho wheꞌ hoontꞌoh

²³ ꞋEt huwa ndi yun kꞌut hoonli-i, tsꞌiyawh yakꞌuz ꞌusdla-i ndultꞌoh whe ꞌuntꞌoh. Ntsꞌenꞌa la Moses dátꞌen, ꞌet whuz unꞌa lhditsun suliꞌ. ꞋEt hoontsꞌi soo yakꞌuz tsꞌihꞌun ꞌuntꞌoh-i, ndai ꞌet ꞌuntꞌoh-i dutsun ooleꞌ whuchꞌa, ꞌi ꞌon nus hoonzoo be huwa tꞌaih-i hóleꞌ hubaꞌ hoontꞌoh.

²⁴ ꞋEt Christ ꞌen ndi yun kꞌut nimbali cho bet, ndet kꞌus whúdiztiꞌ-un, dune dula be ꞌuhuhóonla-un, ꞌaw ꞌet dálhiyal. Njan yakꞌuz whundóhotꞌen huwhulhtsi ꞌet huwa. ꞋEt kꞌus ndo yakꞌuz tsꞌe whuz whenya. ꞋEt whuz unꞌa Yakꞌusda but neba nenínya.

²⁵ ꞋEt njan lubret ꞌukꞌenus diztiꞌ-un, ꞌen khuna-i ꞌuzkaiꞌ be, naoodizulh totsuk, njan ꞌukꞌenus whudíztiꞌ-un, whuz kꞌunádaih. ꞋEt hoontsꞌi Christ ꞌaw dichꞌoh lhat cho huwá dudóltelh huba lheꞌhóotꞌoh.

²⁶ ꞋEt ndúja de, ndi yun ꞌulya daꞌ whutsꞌun ꞌandit whutsꞌun, ꞌet de tube lhat daꞌ daootsah ooleꞌ. ꞋEt ꞌandit ꞌawet ndi yun ꞌetsul ꞌutinelh-un nilhdukw whuzdliꞌ, ꞌet ꞌilhoh za ndi yun kꞌut nuseya, ꞌinkꞌez neba huwaꞌ dudulti. Whuz unꞌa nelubeshi neba yunaoodilhnoh.

²⁷ ꞋInkꞌez dune ꞌilhoh za dahútitsah, whuz unꞌa ꞌuhóolya, dahúzsai hukwꞌelhꞌaz ꞌet de buba nahutideh.

²⁸ Whuz unꞌa Christ za, ꞌen ꞌilhoh za huwáꞌ dudulti, lhane bulubeshi bughu yílhchoot ꞌi yukꞌelha dazsai. ꞋEt hoontsꞌi whulh nat-un, ꞌaw lubeshi gha iloh whusanatidalh. ꞋEt kꞌus tsꞌiyanne mbene yuka tse hooline, ꞌenne bunalhtsꞌet be hóodutaltsilh, ꞌet whe hudutijih.