Hebrews 8 - Yak'usda Ooghuni

Jesus ꞌandit lubret unli whe dude ꞌutꞌen kꞌoh huwana

¹ ꞋEt ꞌawet niz de daja uzdaniꞌ, njan ꞌet ꞌuwhúlhni, wheni neba lubret ꞌukꞌenus diztiꞌ-un tsꞌutꞌi, mbe la yakꞌuz kꞌus úncha-un, ꞌen ookwꞌutsꞌuzda cho díztiꞌ-i, ꞌi nailhni tsꞌunkꞌus yughu nátlꞌa didaꞌ.

² Ndi ndai nimbali cho neMoodihti néninꞌai-i, ꞌi tsꞌihꞌun unꞌa ꞌuntꞌoh-un ꞌuhoontꞌoh. ꞋI ꞌaw dune iloh néninꞌai. ꞋEt huwa ꞌudéniꞌ nimbali bet whambez, ꞌinkꞌez ꞌet ꞌukꞌenus whudíztiꞌ-un, ꞌet Jesus Christ neba neꞌutꞌen.

³ ꞋEt ndunne lubret ꞌukꞌenus diztiꞌ unline, ꞌenne loodel kꞌut ꞌuhudilhkꞌun ꞌinkꞌez Yakꞌusda gha hóoꞌalh hubaꞌ hoontꞌoh. ꞋEt whuz unꞌa ndun dune ooghu yatsꞌulhduk-un, ꞌen cha hoonli huwa óoꞌalh hubaꞌ hoontꞌoh.

⁴ ꞋEt lhane lubretne ndi yun kꞌut, ꞌenne Moses ooghuni kꞌunꞌa, ꞌet whuz unꞌa ꞌet nduhútꞌen. ꞋEt huwa Jesus Christ ꞌawhuz ndi yun kꞌut usda de, ꞌaw daꞌ lubret lhiloh ooléꞌ.

⁵ Ndunne nimbali cho tꞌah tsꞌe dunene buba neꞌhutꞌen te, ꞌet ndi nimbali cho ꞌet yakꞌuz whuzꞌai-un, ꞌet whunduhúlꞌen wheꞌ hutꞌen. ꞋI yakꞌuz dahoontꞌoh-un ꞌantsꞌi ꞌet whunduhúlꞌen leꞌ hutꞌen. ꞋOh daꞌ Moses nimbali cho netíꞌalh whe, Yakꞌusda yudániꞌ, “Dzulh kꞌut nimbali cho netíltsꞌulh-un whunyunistan-un, ꞌet wheni ooghá neꞌtantꞌen-i mba ꞌusdla, ꞌi kꞌunꞌa ꞌonleh.”

⁶ ꞋEt hoontsꞌi Jesus Christ ndunne ꞌon nus soo buba soo neꞌútꞌen-un suliꞌ. Ndi ꞌukꞌenus hoonzoo khuni netsꞌun lhaídinla-i, ꞌet huwa Jesus Christ ꞌen neba ꞌukꞌelha whulhtsi-un unli. Yakꞌusda ꞌon nus hoonzoo kꞌunꞌa netsꞌú hoozi-un, ꞌet whuz unꞌa neba ꞌuhóonla.

ꞋAndidi khuni lhaídinla-i

⁷ ꞋEt khuni ꞌudechoo khuni butsꞌu lhaídinla-i buba hoolhtus, ꞌaw hikꞌu nelheꞌhítꞌel. ꞋInka ꞌi gha dune Yakꞌusda nalh tsꞌihꞌun lheꞌhitꞌoh. ꞋEt huwa doo cha za whulh nat-un netsꞌu nahizya.

⁸ ꞋInkꞌez Yakꞌusda ooduneꞌne, tsꞌiyawh hukwaꞌ budániꞌ whe njan ndutni, “Soo zulhtsꞌai, ꞌilhudzin whusahóoltsꞌut de, ꞌet de Israel buyun kꞌut dilhtsꞌine ꞌinkꞌez Judah buyun kꞌut dilhtsꞌine cha, ꞌoh de ndi ꞌandidi whulh nat-un khuni bubulh lhadutisdleh.

⁹ Ndet la butsodaꞌne ꞌudechoo khuni buba lhaídusdla, ꞌet whulh nat-un ꞌaw ꞌet hukwꞌunꞌa iloh ꞌutiꞌel. ꞋOh daꞌ bula úschoot ꞌinkꞌez Egypt yun kꞌut hukwꞌu nabutísdla. ꞋEt hoontsꞌi sghuni ꞌaw lhuhuyílhchulh, ꞌet huwa bula disni, ni neMoodihti.

¹⁰ ꞋInkꞌez hukwꞌelhꞌaz Israel buzkehke ꞌandidi-i, ꞌi khuni buba lhaídutisdle. Nus de, ni neMoodihti, sghuni bubeni táwhudutasdlelh, ꞌinkꞌez budzi kꞌut cha ꞌukꞌehóotasgus. ꞋInkꞌez si buYakꞌusda tisdleh, ꞌinkꞌez ꞌenne sduneꞌne hutileh.

¹¹ ꞋOh de de tsꞌiyawh ꞌilhoghun hinli whe dudulh whutꞌenne kꞌus dudulh dunne ꞌinkꞌez yoo ꞌun udohne bulh ꞌalhgoh, Si tꞌesontizeh. ꞋEt huwa datístꞌelh-un, ꞌet huwa dudenghoh whutꞌíne, kꞌus dudulhutsinke ꞌaw ꞌilhoghun hoontsꞌi, doo cha za ‘neMoodihti ghun hodulhꞌeh!’ hudooniꞌ huba lheꞌhootꞌoh.

¹² Dáhoontꞌoh la ꞌaw tsꞌihꞌun lheꞌhustꞌen de, bugha téꞌuntaszeh. ꞋInkꞌez bulubeshi ꞌinkꞌez skꞌú nulheꞌustꞌen-un, ꞌi tsꞌiyawh ꞌaw ꞌon ꞌun ꞌaw whunaooznih ꞌaitꞌoh.”

¹³ Yakꞌusda ndi soo ꞌandit-i khuni neba lhaídinla-i howu yailhduk, ꞌet ndutni, ꞌi gha njan ꞌudechoo khuni buba lhaídinla-i, ꞌaw whe lhéꞌhootꞌoh suliꞌ, Yakꞌusda neba lhkꞌenaoodanꞌai, ꞌinkꞌez ꞌaw ꞌon ꞌun ookꞌuneꞌ tsꞌootꞌen ꞌaitꞌoh.