Hebrews 7 - Yak'usda Ooghuni

Melchizedek lerwe ꞌukꞌenus tsꞌihꞌun neꞌutꞌen-un

¹ ꞋEt ndun Melchizedek ꞌilhoghun keyoh Salem huwhútni-un whulerwe unli. Yakꞌusda tsꞌiyantsuk whando ꞌuntꞌoh-un, ꞌen oolubret unli. ꞋOh daꞌ Abraham ꞌen lhane lerwene bulh lhígan ꞌinkꞌez lhane hánghan. ꞋEt hukwꞌelhꞌaz dukeyoh tsꞌu náhutisdil whe Melchizedek Abraham yududizya whe Yakꞌusda tsꞌun yuba tenadidli, ꞌukꞌenus hoonzoo-un yughá hoꞌalh ha.

² ꞋInkꞌez ndunne buhanghane ndi hiye ántꞌeꞌ-i, ꞌi tsꞌiyawh huyílhchoot. ꞋEt ndi whuloh, ꞌi 10% tsꞌutni, ꞌi Abraham Melchizedek tsꞌú beꞌ yunilhni. ꞋEt Melchizedek booziꞌ-i ndi ꞌuntꞌoh, tsꞌihꞌun unꞌa lerwe unli. ꞋInkꞌez keyoh Salem whulerwe cha unli. ꞋI tsꞌihꞌun unꞌa lhtsꞌun beꞌ tsꞌintꞌoh-i lerwe unli ni whe ꞌutni.

³ Ooloo hooloh ꞌinkꞌez oobá cha hooloh. Mbe édinzut-un cha hooloh. ꞋAw lhuhóolel ꞌinkꞌez ꞌaw dálhitsal. Yakꞌusda ooYeꞌ kꞌunꞌa ꞌulya whe ꞌilhiz wheni lubret unli.

⁴ Ndun ꞌen Melchizedek ntsꞌenꞌa la dune ncha-un unli, ꞌet howu nuní nuhzut. Netsodaꞌ-un ꞌuntꞌoh-un Abraham ꞌen lhane yé dinzut, ꞌet hoontsꞌi ndai la dune hiyudanghan-i, ꞌi 10% tsꞌutni, ꞌi Melchizedek tsꞌú tlꞌa yanla.

⁵ ꞋInkꞌez ꞌalha ꞌuhoontꞌoh, Levi tsꞌu haindene, ꞌenne za lubret hulih. Yakꞌusda butlꞌa hónꞌai whe dunene 10% huyutꞌi-i, ꞌi lubretne hitlꞌa náhuyooꞌalh hubaꞌ hoontꞌoh. ꞋEnne Abraham édindene ꞌuhintꞌoh ꞌinkꞌez bubulhutsinke hinli, ꞌet hoontsꞌi ꞌenne whuz unꞌa ꞌet nduhútꞌen inleꞌ.

⁶ ꞋEt Melchizedek ꞌaw Lizwifne butsꞌu hálhizulh, ꞌet hoontsꞌi Yakꞌusda Abraham ye yutsꞌu náhizya-i yugha óoninꞌai ꞌinkꞌez Abraham 10% tsꞌu beꞌ yunilhni. ꞋInkꞌez Melchizedek Yakꞌusda tsꞌun yuba tenadidli ꞌukꞌenus hoonzoo-un yughá hoꞌalh ha.

⁷ ꞋEt nawh lheꞌhootꞌoh mbe la kꞌus ꞌuntꞌoh-un unli-un, ꞌen dukꞌelhꞌih ꞌuntꞌoh-un, ꞌen ba tenadidli.

⁸ ꞋEt diz unꞌa ꞌet ꞌúhoontꞌoh, nyoonne Levitne, ꞌenne cha ꞌantsꞌi yinka dune za ꞌuhintꞌoh, ꞌinkꞌez yahadlah, ꞌet hoontsꞌi ndi 10% ꞌi cha whuz unꞌa za nahuyulhdzooh. ꞋEt Melchizedek ꞌilhiz wheni khuna-un huyúlhni, ꞌen ꞌuyinla Abraham 10% yughaꞌaih.

⁹ ꞋEt ndiz unꞌa njan dúzdutinelh, Levi ꞌen 10% nalhdzooh-un ꞌuntꞌoh, ꞌen hoontsꞌi Abraham gha Melchizedek 10% yughaꞌaih.

¹⁰ Whunulhꞌen, whutsodaꞌ Melchizedek Abraham ghu ninya whe, ꞌet Levi ꞌawhuz lhuwhusdle whe.

ꞋUyoon lubret whusatíyalh

¹¹ ꞋEt huwa ndunne Levi tsꞌu haíndene, ꞌaw ꞌenne za dune buba lubret hulih ꞌinkꞌez ꞌenne bugha Yakꞌusda dughuni butlꞌa ídanꞌai, ꞌet hoontsꞌi ꞌenne bugha Yakꞌusda dunne hizoo suliꞌ de, dahoontꞌoh huwa ꞌuyoon lubret Melchizedek didoh-un whusatíyalh lubret. Ndun lubret whusatíyalh-un, ꞌaw Aaron lubret ootꞌeꞌ hubaꞌ hoontꞌoh. ꞋInkꞌez Melchizedek kꞌunꞌa ootadziꞌ.

¹² ꞋEt ndet howa mbene za lubret huli, ꞌet Yakꞌusda lhkꞌenaóodanꞌai de, ꞌet de ꞌet huwun dughuni butlꞌa ídanꞌai, ꞌet cha ꞌutsꞌun unꞌa naꞌwhutátnelh huba ꞌuhoontꞌoh.

¹³ ꞋEt ndun ooghu yatsꞌulhduk-un, ꞌen neMoodihti ꞌuntꞌoh, ꞌen ꞌudoh didowhne butsꞌu haínzut-un ꞌuntꞌoh. ꞋInkꞌez ndunne ꞌudoh didohne ꞌaw lubret hooleꞌ ꞌaitꞌoh. ꞋEnne loodel kꞌut ꞌaw hoonli hudólhkꞌun huba lheꞌhitꞌoh.

¹⁴ ꞋEt neMoodihti ꞌen Judah didowhne tsꞌu hainzut-un ꞌuntꞌoh, ꞌet tsꞌiyanne tꞌehonínzun. ꞋInkꞌez ꞌenne lubret hutileh huwun, Moses ꞌaw howu yalhtílhdih.

¹⁵ ꞋInkꞌez ꞌon nus soo tꞌewhunidzin, Melchizedek kꞌunꞌa ꞌuyoon lubret whusatíyalh de,

¹⁶ ye khuna-i be ꞌaw gak huyoolhtselh ꞌaitꞌoh, whuz unꞌa Jesus Christ lubret suliꞌ. ꞋEt hoontsꞌi ntsꞌenꞌa la Yakꞌusda ooghuni be dune Levi tsꞌu hainzut whe lubret tileh, ꞌaw ꞌet huwa iloh.

¹⁷ Jesus Christ ghun Yakꞌusda ooghuni njan ndutni, “Ndun Melchizedek, kꞌunꞌa, nyun cha ꞌilhiz wheni lubret inli.”

¹⁸ ꞋEt ndiz unꞌa njan dúhoontꞌoh, ꞌudechoo khuni butlꞌa díltsꞌut daꞌ, ꞌaw dune la ootꞌen ꞌaitꞌoh. ꞋEt huwa Yakꞌusda ꞌudun newhuninꞌai.

¹⁹ ꞋEt ndai la ꞌudechoo Yakꞌusda dughuni netlꞌa ídanꞌai-i, ꞌi be ꞌaw dune soo lhadúlyane hooleꞌ ꞌaitꞌoh. ꞋEt hoontsꞌi ꞌuyoo khuni netlꞌaidiltsut, ꞌi be ꞌon nus hoonzoo-un hukwa tse tsꞌúholeꞌ. ꞋEt de ꞌon nus Yakꞌusda be nghoh ꞌuztitꞌelh.

Jesus ꞌen ꞌandit lubret ꞌuntꞌoh

²⁰ Yakꞌusda dichꞌoh dughuni be Jesus Christ yutsꞌu náhizya whe yudániꞌ, “Nyun ꞌilhiz wheni lubret inli.”

²¹ ꞋEt hoontsꞌi ndunne Aaron lubretne Yakꞌusda ꞌaw whuz unꞌa buba nalhihíyel whe lubret anleꞌ. ꞋEt hoontsꞌi dichꞌoh yutsꞌu náhizya-un, ꞌet whe Jesus Christ lubret unli. Whuz unꞌa ndutni Yakꞌusda ooghuni, “Moodihti dughuni yutlꞌa ídanꞌai, dudeni ꞌaw ꞌatsꞌun unꞌa naꞌyooleh ꞌaitꞌoh. ꞋInkꞌez ꞌuyulhni, ‘Melchizedek kꞌunꞌa nyun cha ꞌilhiz wheni lubret tanleh.’”

²² ꞋEt whuz unꞌa ndi ꞌandit khuni netsꞌun lhaidinla-i, Jesus Christ neba dazsai-un, ꞌi be netsꞌu whutikulh wheꞌ hoontꞌoh.

²³ Ndunne lubret lhane hinli ꞌet hoontsꞌi ꞌilhoghun hinli whe tsꞌiyawh yahadlah. ꞋEt huwa ꞌaw ꞌilhoghun ꞌilhiz wheni lubret hooleꞌ ꞌaitꞌoh.

²⁴ ꞋEt hoontsꞌi Jesus Christ ꞌilhiz wheni khuna, ꞌet huwa neba lubret unli-un, ꞌaw ꞌuyoon dune yukꞌedóoyaꞌ-un hooloh.

²⁵ ꞋEn ꞌilhiz wheni khuna ꞌinkꞌez neba tenadudli, ꞌet huwa nawh lheꞌhóotꞌoh tsꞌiyanne, ꞌen be Yakꞌusda hiyenghoh hutitꞌelh, tsꞌiyawh ꞌenne buba ye ulhtus-i ꞌutꞌi whe ꞌilhiz wheni ubutilhyis ha.

²⁶ Jesus Christ lubret ꞌukꞌenus diztiꞌ-un neba unli. Lubeshi ooghu hooloh, ꞌaw whe ookꞌeholtsꞌit-un cha hooloh. ꞋInkꞌez tankꞌus ꞌuhoontꞌoh-un ꞌaw hoontsool-unyaz hoontsꞌi ookwꞌuz lhístꞌen. Lubeshi ꞌulhꞌenne bubulh ꞌutꞌen inleꞌ, ꞌet hoontsꞌi ꞌaw ꞌenne bukꞌunꞌa ndi yun kꞌut lhidal. Buchꞌa nasja, ꞌinkꞌez yakꞌuz whanus díztiꞌ suliꞌ.

²⁷ ꞋAw Lizwifne buba lubret ꞌukꞌenus diztiꞌne bubundúlh lhiltꞌoh. Ndunne lubretne dzin totsuk dulubeshi ba loodel kꞌut ꞌuhudílhkꞌun. ꞋEt hukwꞌelhꞌaz dudulh dunene ba loodel kꞌut ꞌuhudílhkꞌun inleꞌ. ꞋEt hoontsꞌi ꞌandit Jesus Christ tsꞌiyanne ba didutchꞌoh ꞌet ꞌilhoh za ꞌinkꞌez ꞌilhiz wheni nelubeshi kꞌelha dazsai.

²⁸ Dune bulubeshi gha tehutsun ꞌet hoontsꞌi ndai la ꞌoh daꞌ Yakꞌusda khuni netlꞌa ídanꞌai, ꞌi be dune lubret ꞌukꞌenuz diztiꞌne hutileh. Yakꞌusda ooghuni Moses ꞌukꞌu néyuzguz-i, ꞌi ookꞌelhꞌaz, Yakꞌusda duYeꞌ ꞌen ghun netsꞌu nahizya lubret ꞌukꞌenus diztiꞌ-un tileh. ꞋEn ꞌuntꞌoh, duYeꞌ ꞌen ꞌilhiz wheni soo ꞌet lhadulya-un suliꞌ.