Hebrews 6 - Yak'usda Ooghuni

Yakꞌusda ooghuni butsꞌodoolꞌeh ꞌinkꞌez ꞌon ꞌun cha ꞌinkꞌez ꞌon ꞌun cha

¹ ꞋEt huwa ndi ꞌudechoo Christ ghun hodilhꞌeꞌ-un, ꞌet za hodoolhꞌeh junih, kꞌus ꞌon ꞌun cha hodoolhꞌeh. ꞋEt de soo tsꞌihꞌun unꞌa lhadulyane kꞌunꞌa oohtꞌeꞌ. Ndi ꞌudechoo whutsꞌodilꞌeꞌ-un, ꞌet yoh ookwꞌuwhuzꞌai-i ndúwhultꞌoh, ꞌinkꞌez ꞌi whenichꞌoh ꞌaw ꞌuyoo naꞌtsꞌooleh hukwa lheꞌuznízun. Ndi ꞌudechoo whutsꞌodilꞌeꞌ-un, ndai la ꞌutsꞌalhꞌen-i ꞌantsꞌet ꞌuhoontꞌoh, ꞌaw nela ooneh ꞌaitꞌoh, ꞌi tsꞌiyawh oochꞌaz nátsꞌoolꞌah. ꞋEt ntsꞌenꞌa ꞌuhoontꞌoh Yakꞌusda neba ꞌalhaꞌ ꞌuntꞌoh-un, ꞌet cha.

² ꞋInkꞌez ntsꞌenꞌa dune too be ꞌúlꞌen-un, ntsꞌenꞌa la ꞌuyoonne dune kꞌehúdilnih-un, ꞌinkꞌez ꞌet ntsꞌenꞌa ꞌuhutinelh dune yaidlane toh dunahudutádalh, ꞌinkꞌez ntsꞌenꞌa ꞌilhiz neba nahutideh-un whuz uztidulh. Njan ꞌudechoo hodilhꞌeꞌ-un, ꞌet ꞌuhoontꞌoh. ꞋEt cha za ꞌon ꞌun whunohtsꞌunoolhtun ꞌaitꞌoh.

³ ꞋInkꞌez Yakꞌusda netlꞌa hónꞌai de, ꞌet sih tsꞌihꞌun unꞌa lhadulyane ꞌuztileh.

⁴ ꞋEt ndunne Christ ghun hodilꞌeꞌne ꞌinkꞌez tꞌehonínzun, ndi yakꞌuz howatꞌaih-i, ꞌi huyílhchoot ꞌinkꞌez Ndoni cha buyudinda,

⁵ ꞌinkꞌez Yakꞌusda ooghun ꞌet daldzooꞌ la, ꞌi cha huyílhchoot, ꞌinkꞌez ndet ye úlhtus-i whuz de hóoltsꞌulh, ꞌet cha tꞌehinanzin.

⁶ ꞋEt tankꞌus hutizya de ꞌinkꞌez Yakꞌusda chꞌa nahusja de, dulubeshi yughu ni ooleꞌ, ꞌaw doo cha za whuz unꞌa dudzi nahondunooleh ꞌaitꞌoh. Nduntꞌohne dichꞌoh Yakꞌusda ooYeꞌ tulalhgus kꞌenáhuyilhti leꞌ huyulhꞌen, ꞌinkꞌez tsꞌiyanne but highudloh.

⁷ Soo cho whunulhꞌen, ꞌet nawhúlhtih te ha níyeh ba hoonzoo. ꞋInkꞌez tsꞌiyaitsuk tꞌalh-i neba ha núlhyeh de, ꞌet de whuz unꞌa Yakꞌusda netsꞌun unzoo.

⁸ ꞋEt hoontsꞌi, ꞌi yun whus ꞌinkꞌez ꞌutꞌantsiꞌ, ꞌi za ha níyeh de, ꞌet de ꞌaw hoonli lhiloh whe ꞌuntꞌoh. ꞋEt huwa ookalheꞌtsꞌunízun. Kꞌat le tsꞌiyawh uzdutálhkꞌun. ꞋEt soo cho howu ni óhtan!

Yakꞌusda ooba neꞌtsꞌutꞌen-un ꞌaw whunaoodoolnoh ꞌaitꞌoh

⁹ Nekꞌekene nohni ndi khuniti be dunóhtsꞌutni, ꞌet hoontsꞌi Yakꞌusda chꞌa nasdilne lhahloh, ꞌet neba ꞌalha ꞌuhoontꞌoh. ꞋEt kꞌus be uzdujis-i, ꞌi gha ꞌon nus hoonzoo hukwꞌunꞌa ꞌutihtꞌelh, ꞌet neba ꞌalha ꞌuhoontꞌoh.

¹⁰ Yakꞌusda oochꞌeꞌne, ꞌenne nohni ooba neꞌútꞌenne ꞌahli ínleꞌ, ꞌinkꞌez ꞌawhuz ꞌet za nduhtꞌen. Nohꞌeꞌutꞌen ꞌinkꞌez Yakꞌusda ookꞌehsiꞌ whe ꞌahtꞌen, ꞌet tsꞌiyawh Yakꞌusda whunilhꞌen. Yakꞌusda tsꞌihꞌun unꞌa ꞌuntꞌoh, ꞌet huwa ꞌaw whunaoodoolnoh ꞌaitꞌoh.

¹¹ ꞋIlhone ꞌahli whe ꞌet whula toh whutsꞌun, nohdzi ndulcho-i be ꞌet ndóhtꞌen, ꞌet nohba hukwaꞌ ꞌuzninzun. ꞋEt whuz unꞌa ndet la hukwa tse hoohli-un, ꞌet nawh lheꞌhootꞌoh nohtsꞌun whutikulh.

¹² ꞋInkꞌez tsedahtni oohleꞌ junih. ꞋEt kꞌus ndai Yakꞌusda whe netsꞌu náhizya-un, ꞌet mbene bé ꞌalha ꞌuhoontꞌoh-i ꞌinkꞌez saꞌ huba whulh huzyin whe ꞌenne bugha ítaꞌalh whutsꞌun, ꞌet nohni cha ꞌenne bukꞌunꞌa oohtꞌen.

Yakꞌusda didutchꞌoh netsꞌu hoozi Christ ooka tse tsꞌuhooli-un ꞌuntꞌoh

¹³ ꞋAw dune Yakꞌusda ando ꞌuntꞌohne hooloh. ꞋEt huwa ꞌoh daꞌ ꞌet Yakꞌusda Abraham yutsꞌu náhizya-i, dichꞌoh dudooziꞌ be yutsꞌu náhizya,

¹⁴ ꞌinkꞌez Yakꞌusda Abraham yudániꞌ, “Tubeh ntsꞌun tíszooꞌ. Si sgha ntsꞌu haíndene hutildlaiꞌ.”

¹⁵ ꞋInkꞌez ꞌet whuz unꞌa ꞌuhooja. Yakꞌusda Abraham tsꞌu nahizyai-un saꞌ whe yubailhꞌeꞌ, ꞌet hoontsꞌi whe yutsꞌu náhizya-un ooghá whultsꞌut.

¹⁶ ꞋEt ndet la dune hoonli-unyaz huwun ꞌuyoon dune yutsꞌu nahutiyeh de, ꞌet tsꞌihꞌun néhotaꞌalh hukwaꞌ huninzun de, ꞌet de mbe yando ꞌuntꞌoh-un, ꞌen booziꞌ be tsꞌihꞌun nehohoꞌalh hubaꞌ hoontꞌoh.

¹⁷ ꞋEt Yakꞌusda ndunne mbene la ndai la butsꞌu hoozi, ꞌenne bugha ítaꞌalh. Ndet butsꞌu hoozi-un, ꞌaw ꞌatsꞌun unꞌa nahótneh ꞌaitꞌoh. Soo tsꞌihꞌun unꞌa tꞌehonoozeh buba hukwaꞌ ninzun, ꞌet huwa dudooziꞌ be butsꞌu náhizya.

¹⁸ Yakꞌusda ꞌaw hootsꞌit ꞌaitꞌoh. ꞋEt huwa ndet la howu yalhduk-un ꞌinkꞌez butsꞌu náhizya-un, ꞌet náwhultꞌoh ꞌaw ꞌatsꞌun unꞌa naꞌhotneh ꞌaitꞌoh. ꞋEt huwa tꞌetsꞌoninzun Yakꞌusda ꞌaw nela dootnih ꞌaitꞌoh. Wheni cha ndet la hukwa tse tsꞌúhooli-un, ꞌet tsꞌohótun hubaꞌ hoontꞌoh. ꞋI gha nedzi do náꞌutꞌi.

¹⁹ Ndet hukwa tse tsꞌúhooli-un, ꞌi ndi yun kꞌut uzdilhtsꞌi-un ꞌantsꞌi neba tsedlooh leꞌ ꞌuntꞌoh. ꞋEt ꞌilhiz dutsꞌo ꞌinkꞌez ꞌaw nuhóotnah ꞌaitꞌoh. ꞋInkꞌez ndi tsedlooh, ꞌi whúlh nat-un whutsoh súbal-un, whuzai.

²⁰ ꞋEt Jesus Christ ꞌudaꞌ ꞌuja netso nusiya-un, ꞌen whuz danínya. Melchizedek ꞌen kꞌunꞌa ꞌilhiz wheni lubret ꞌukꞌenus diztiꞌ-un suliꞌ.