Hebrews 5 - Yak'usda Ooghuni

Lubret ꞌunkꞌenus diztiꞌ-un datítꞌelh la

¹ ꞋEt tsꞌiyawh lubret ꞌukꞌenus diztiꞌne bubulh didowhne butahayálhti, Yakꞌusda but buba netíyalh ha. ꞋEt whe bulubeshi gha ꞌet huba loodel kꞌut huwa tꞌaih-i hidutálhkꞌun ꞌinkꞌez Yakꞌusda gha tꞌaih-i buba loodel tsꞌun wheyúlih.

² Yakꞌusda yukꞌunꞌa tꞌeoonúszunne ꞌinkꞌez tankꞌus ítꞌelhne, ꞌenne bughun oodzi únduda, didutchꞌoh cha lhat-un whe tetsun ꞌet huwa.

³ ꞋEt huwa ꞌonghohne bulubeshi kꞌelha huwa ítaꞌalh-i whuz buba wheyaꞌaih, ꞌet whuz unꞌa za ꞌen hoontsꞌi didutchꞌoh dulubeshi ba huwa ítaꞌalh-i, ꞌi cha whuz wheyáꞌaih. ꞋEt ndótꞌen hubaꞌ hoontꞌoh.

⁴ ꞋEt lubret ꞌukꞌenus diztiꞌne hulih te, ꞌaw dune dichꞌoh ꞌet nduhóotꞌen ꞌaitꞌoh. ꞋEt hoontsꞌi ntsꞌenꞌa Yakꞌusda Aaron ꞌutꞌahayalhti, ꞌen kꞌunꞌa za lubret ꞌukꞌenus diztiꞌ-un ꞌutahaóoltelh hubaꞌ hoontꞌoh.

Christ ꞌen ꞌilhiz wheni lubret ꞌukꞌenus diztiꞌ-un ꞌuntꞌoh

⁵ ꞋEt whuz unꞌa za Christ, ꞌen cha ꞌaw lubret ꞌukꞌenus diztiꞌ-un ꞌududooltselh ꞌaitꞌoh. ꞋEt hoontsꞌi mbe la yadániꞌ-un, ꞌen ꞌet ndúyulhni, “Nyun sYeꞌ ꞌintꞌoh. ꞋInka ꞌandit dzin syeꞌ nyuzúsi.”

⁶ ꞋInkꞌez ꞌudun cha ꞌukꞌehóoguz whe ndutni, “Melchizedek ntsꞌenꞌa whe lubret unli, nyun cha ꞌen kꞌunꞌa ꞌilhiz wheni lubret inli.”

⁷ ꞋInkꞌez ꞌoh daꞌ Jesus Christ ndi yun kꞌut nuseya daꞌ, ꞌet whe ooBá ꞌen ye ulhtus-i ꞌutꞌi, ꞌet hukwaꞌ ninzun de datítsah whuchꞌa yutilhyih yutsꞌu tenadidli. Tube oodzi telꞌen ꞌinkꞌez oonatsultooꞌ hoonli whe Yakꞌusda yutsꞌu tédudlih yulaꞌ ooneh ha. OoBá yudílhtiꞌ, ꞌet huwa yudántsꞌo daja ni.

⁸ OoYeꞌ yinli ꞌet hoontsꞌi ndet whe dzoh nasúzut-un, ꞌet whe yukꞌúneꞌ ꞌútꞌen hodilꞌeꞌ.

⁹ ꞋInkꞌez tsꞌihꞌun ꞌulya-un suliꞌ. ꞋInka mbene yukꞌúneꞌ ꞌutꞌenne, ꞌenne ꞌilhiz wheni hudujis-un, ꞌet bugha óoninꞌai.

¹⁰ ꞋEt Yakꞌusda booziꞌ yugha ídinꞌai whe yudániꞌ, “Melchizedek whe lubret ꞌukꞌenus diztiꞌ-un ꞌuntꞌoh, nyun cha ꞌen kꞌunꞌa ꞌilhiz wheni lubret ꞌukꞌenus diztiꞌ-un inli.”

¹¹ ꞋEt lhat-un nohuzdutánelh ꞌet hoontsꞌi nedutáhtsꞌo nohba ꞌantsꞌi hoonli. ꞋEt huwa neba howa whúlnaꞌ whe ndi khuni tsꞌihꞌun unꞌa tꞌewhunoohzeh kꞌunꞌa nohtsꞌutni.

Mbene la Yakꞌusda ooghuni huyoozilhtsꞌai-un tahodiznih ꞌantsꞌi chalhtsꞌul nduhúltꞌoh

¹² ꞋEt ꞌandit dune hodoolhꞌeh-un oohleꞌ hubaꞌ hoontꞌoh, ꞌet hoontsꞌi soo ꞌudechoo be whutsꞌodilꞌeꞌ-i, ꞌi Yakꞌusda ghuni daja ni, ꞌet whulohne, ꞌenne doo cha za ndúwhulcho whe whunanohodutilhꞌeh hubaꞌ hoontꞌoh. ꞋAndit tsꞌoodunne kꞌunꞌa lilet ꞌi za ookwaꞌ khahna, ꞌaw but dutsꞌun-i, ꞌi iloh. ꞋEt whuz unꞌa ꞌahja.

¹³ Mbene la lilet za kꞌudune unline, ꞌenne ndi Yakꞌusda ooghuni tsꞌihꞌun ꞌuntꞌoh-i, ꞌi dzoh tsulyaz za tꞌehininzun. ꞋAwhuz chalhtsꞌulne hinli ꞌet huwa.

¹⁴ ꞋEt hoontsꞌi but dutsꞌun-i, ꞌi nchane baꞌ ꞌuntꞌoh. Ndunne hodulꞌeh howun nuni nuzutne ꞌinkꞌez hikꞌuneꞌ hutꞌen ꞌet whe bubeni ulhtus lheh, ꞌenne ꞌuhintꞌoh. ꞋEnne unzoo-i ꞌinkꞌez ntsiꞌ-i bulh tꞌehinínzun.