Hebrews 4 - Yak'usda Ooghuni

Yakꞌusda ooduneꞌne ꞌawhuz nahutilyis-un ꞌet buba whuzꞌai

¹ Wheni Yakꞌusda nalyis-un netsꞌu hoozi-un, nohni nohtoh ꞌaw tilah lhuwhulhchulh. ꞋAw wheni tsꞌiyawh whéznooljut hubaꞌ hoontꞌoh.

² ꞋAlhaꞌ ꞌenne bukꞌunꞌa wheni cha ndi khuni unzoo-i be nebulh yaínduk. ꞋEt hoontsꞌi ndi khuni be bubulh yaínduk-i, ꞌaw lhuhiditsꞌil, ꞌaw buba ꞌalhaꞌ lheꞌhóonel ꞌet huwa. ꞋEt huwa ꞌaw bubeni tálheidikulh. ꞋEt huwa ꞌaw bula lhewhudínel.

³ ꞋEt wheni mbene la ooba ꞌalha ꞌuhoontꞌohne, wheni za Yakꞌusda nalyis-un netsꞌu hoozi-un negha whútaltsꞌulh. ꞋEt hoontsꞌi ndunne ooba ꞌalhaꞌ lheꞌhootꞌohne, ꞌenne ndiz unꞌa ꞌet Yakꞌusda ndúbulhni, “Bubulh húnuzchꞌe whe butsꞌu nahizusya, ndet nazyis-un, ꞌaw dahóoyaꞌ ꞌaitꞌoh.” ꞋEt hoontsꞌi ntsꞌe la ꞌudechoo wheꞌ whuditꞌen-un ndi yun ꞌulya daꞌ, ꞌoh daꞌ ꞌet dude ꞌutꞌen lhaídinla.

⁴ ꞋEt ꞌilhoghun Yakꞌusda ooghuni ꞌukꞌu nusguz-un, ꞌet whulh lhtakꞌantꞌit whudzin (7) whuneodalhꞌeꞌ whe ndiz unꞌa njan ndutni, “Yakꞌusda tsꞌiyawh dude ꞌutꞌen lhaidinla ꞌinkꞌez whulh lhtakꞌantꞌit dzin (7) ꞌet nalyiz.”

⁵ ꞋInkꞌez ndi ꞌudustlꞌus doo cha ndutni, “Ntsꞌenꞌa butsꞌu nahizusya dune nahutilyis, ꞌaw dahóoyaꞌ ꞌaitꞌoh.”

⁶ Mbene la ndi khuni unzoo-i ꞌudechoo yudántsꞌone, ꞌenne ꞌaw ꞌoh daꞌ hikꞌú nulheꞌitꞌel. ꞋEt huwa ndet la nalyis-un, ꞌet ꞌaw dalhihiyal. ꞋEt hoontsꞌi whulohne, ꞌenne ꞌawhuz bugha whútaltsꞌulh wheꞌ hoontꞌoh.

⁷ ꞋEt huwa Yakꞌusda ꞌet ꞌilhoh dzin neba ꞌudun newhúninꞌai. ꞋEt saꞌ hukwꞌelhꞌaz ꞌet Yakꞌusda David be yailhduk whe njan ndutni, “ꞋAndit dzin ooghuni dahtsꞌo de, khun te nohdzi doolhtsꞌun junih!”

⁸ ꞋEt Joshua huyúlhni-un, ꞌen Moses kꞌedanya, ꞌen Israel tsꞌu hainzutne Yakꞌusda nalyis-un, ꞌet bugha whútaꞌalh de, ꞌet de Yakꞌusda hukwꞌelhꞌaz ꞌudun dzin nalyis-un ꞌaw doo cha ꞌon ꞌun howu yaoolhduk ꞌaitꞌoh.

⁹ ꞋEt huwa tꞌetsꞌonínzun Yakꞌusda ooduneꞌne ꞌawhuz nahutilyis-un, ꞌet buba whuzꞌai.

¹⁰ Ndiz unꞌa njan dúhoontꞌoh, mbe la Yakꞌusda nalyis-un oogha whultsꞌut-un, Yakꞌusda dude ꞌutꞌen lhaidinla, ꞌen cha whuz unꞌa za dude ꞌutꞌen lhadinla.

ꞋEt Yakꞌusda ooghuni khuna whe ꞌuntꞌoh, ꞌinkꞌez hoolhtus túneꞌ ꞌutꞌen

¹¹ ꞋEt huwa Yakꞌusda ooduneꞌne nahulyis-un, nedzi ndulcho ꞌi be whuz unꞌa tsꞌuhólhchoot. ꞋEt ꞌaw ndúlhtsꞌustꞌen de, ꞌet de ndunne ꞌukꞌu nulheꞌustꞌenne whuz unꞌa wheni cha ꞌenne bukꞌunꞌa za nintaꞌtsꞌotaꞌalh wheꞌ hoontꞌoh.

¹² ꞋEt Yakꞌusda ooghuni khuna whe ꞌuntꞌoh ꞌinkꞌez whe ꞌuntꞌoh. ꞋI saluzti lhchꞌaz ookꞌa hoonli-i, ꞌi ooba nus khundiyin whe ꞌuntꞌoh. Saluzti netsꞌun lhghu nunádizꞌa-un ꞌinkꞌez neyúngheꞌ ꞌi ndi lhtsꞌititꞌus, ꞌet whuz unꞌa za Yakꞌusda ooghuni nezul ꞌinkꞌez neyughi lhkꞌeítilelh. Nedzi yo whe daja ꞌuzninzun ꞌinkꞌez ntsꞌenꞌa dáztitꞌelh hukwaꞌ tsꞌutꞌen, ꞌet tsꞌiyawh whunénulhtun, ꞌet ꞌuhoolcho whe Yakꞌusda ooghuni khundiyin whe ꞌuntꞌoh.

¹³ ꞋInkꞌez ndai la ndi yun kꞌut ꞌutsꞌulhꞌen-i ꞌaw ꞌilhoghi Yakꞌusda oochꞌa ntistꞌi-i hooloh. Tsꞌiyantsuk whunilhꞌen, ꞌinkꞌez ꞌantsꞌi ꞌi kwꞌunꞌaꞌtizbal leꞌ ꞌuntꞌoh. Yakꞌusda ꞌen datsꞌitꞌen-un, ꞌet tsꞌiyawh uzdutánelh wheꞌ hoontꞌoh.

Lubret ꞌukꞌenus diztiꞌ-un teꞌ ninzun-un

¹⁴ ꞋEt huwa ꞌilhoghun lubret ꞌukꞌenus diztiꞌ-un neba ꞌuntꞌoh. ꞋEn ꞌuja yat nduhoolcho whutoh lhuséya. Jesus Yakꞌusda ooYeꞌ ꞌen ꞌúntꞌoh. ꞋEt huwa neba ꞌalha ꞌuhoontꞌoh-un, tsꞌiyawh dutsꞌo cho tsꞌuhotun.

¹⁵ Nelubret ꞌukꞌenus diztiꞌ-un, ꞌen be tetsꞌutsun-i, ꞌi bulh ꞌalhgoh negha teꞌninzun datsꞌintꞌoh la tꞌeooninzun. ꞋEn lubeshi yit ꞌuntꞌoh ꞌet hoontsꞌi ꞌen cha wheni nekꞌunꞌa tsꞌiyantsuk tankꞌus óoneh ha óoldzih inleꞌ.

¹⁶ ꞋEt huwa Yakꞌusda ookwꞌutsꞌuzda cho diztiꞌ-i whuz de ye únzoo-i negha yúꞌaih. ꞋEt huwa ꞌaw whelhtsꞌuniljut whe whuz uztooyaꞌ. ꞋEt whuz de negha teꞌninzun, ꞌinkꞌez whé netsꞌun unzoo-un, ꞌet nduwhulcho whe tsꞌuhootálhchulh. ꞋEt whuz unꞌa la ꞌen ba ndi yun kꞌut uzdilhtsꞌi-un, ndet la whe nela ꞌeꞌ whudutánelh ꞌet negha óotaltsꞌulh.