Hebrews 3 - Yak'usda Ooghuni

Jesus Christ yula dootnih ꞌaitꞌoh-un ꞌuntꞌoh

¹ ꞋInka sulhutsinke, nohni Yakꞌusda oochꞌeꞌne ꞌahli. Soo hoonzoo hukwꞌunꞌa ndi yun kꞌut dólhtsꞌi ꞌet nohtsꞌu hukwaꞌ ninzun. ꞋEt huwa nohni tsꞌiyawh Christ Jesus ꞌen za ooghuni záhtan ꞌinkꞌez ꞌen ookꞌunꞌa oohtꞌeꞌ. ꞋEn whelꞌaꞌ-un ꞌuntꞌoh, ꞌinkꞌez be neba ꞌalha ꞌuhoontꞌoh-un, ꞌet huba neba lubret ꞌukꞌenus diztiꞌ-un unli.

² ꞋEt Yakꞌusda ꞌutaháyalhti. ꞋEt huwa ntsꞌenꞌa yutsꞌu hukwa ꞌutni, ꞌet tsꞌiyawh lhaóodinla. Yakꞌusda Moses duyoh datitꞌelh ꞌet yutsꞌu hukwaꞌ ninzun-un, tsꞌiyawh lhaóodinla. Jesus ꞌen cha Moses kꞌunꞌa ꞌuntꞌoh.

³ Mbe la yoh ꞌuwhulhꞌen-un, ꞌen yoh whanus diztiꞌ-un ꞌuntꞌoh, ꞌet whuz unꞌa za Jesus Christ Moses anus diztiꞌ-un ꞌuntꞌoh.

⁴ ꞋEt yoh totsuk lhenyoone ꞌuhóonla, ꞌet hoontsꞌi Yakꞌusda ꞌen za tsꞌiyantsuk ꞌuhóonla.

⁵ ꞋInkꞌez Yakꞌusda ooyoh ꞌet Moses ꞌen ooba ꞌustle-un unli, ꞌinkꞌez Moses tsꞌiyawh lhaóodinla. ꞋEt whuz unꞌa ꞌen ghun tsꞌiyaitsuk lhaóodutatneh, ꞌet de Moses datꞌen inleꞌ-un, whunenulhtun hukwꞌelhꞌaz tꞌewhutidzeh.

⁶ ꞋEt hoontsꞌi Christ, ꞌuYeꞌ kꞌunꞌa whe duBá ooyoh huwunleꞌ. ꞋEt ooka tse tsꞌúhooli-i, nedzi yoo do cho whe tsꞌodólhtiꞌ, ꞌinkꞌez ootꞌa niuznintan, ꞌinkꞌez ꞌudekꞌez dzin whutsꞌun soo cho tsꞌoontun de, ꞌet de ooyoh whutꞌi-un tsinli whe ꞌutsꞌintꞌoh.

Wheni cha whula lhtsꞌudoostnine tsꞌooleꞌ

⁷ ꞋEt huwa Ndoni ꞌalhaꞌ ꞌutni whe njan ndutni, “ꞋAndit dzin Yakꞌusda ooghuni dahtsꞌo de,

⁸ khun nohdzi doolhtsꞌun junih! ꞋEt whuz unꞌa ꞌuhóoja whe ꞌoh daꞌ mbene la schꞌaz ditníne, ꞌaw ska lheꞌhunízun. ꞋEt dzin dune Yakꞌusda ꞌen huyóolhdzai-i huyúlhni. ꞋEt dune lhuhóotꞌih-un, ꞌet whuz unꞌa ꞌuhóoja. Khun nohdzi ꞌaw ꞌenne bukꞌoh tsꞌe oolhleh junih!

⁹ ꞋEt whuz unꞌa nohtsodaꞌne suhóolhdzai inleꞌ. Dit whunizyat (40) yus kꞌut ꞌet ndúwhulyiz whe seꞌ ꞌutꞌen kꞌoh honalhꞌen.

¹⁰ ꞋEt huwa ndunne, ꞌenne bubulh húnuzchꞌe, ꞌinkꞌez butsꞌu nahizusya njan dudúsni, ꞌahoolhyiz dudzi yo nintaꞌhuwhulhꞌih ꞌinkꞌez seꞌ ꞌutꞌen kꞌoh ꞌaw tꞌehonúszun.

¹¹ ꞋEt huwa bubulh húnuzchꞌe whe butsꞌu nahizusya whe njan dudúsni, ‘Dune nalyis huba ꞌaw dahóodilh ꞌaitꞌoh,’” ni.

¹² Sulhutsinke nohnichꞌoh soo cho huwahli! Nohni nohtoh whulohne tilah nohdzi tankꞌus ꞌuntꞌoh ꞌet whe ꞌaw nohba ꞌalhaꞌ lheꞌhóotꞌoh. ꞋEt huwa Yakꞌusda ꞌilhiz wheni ꞌuntꞌoh-un, doo ka si ꞌen oochꞌaz naóolhyeh.

¹³ ꞋEt hoontsꞌi dzin totsuk, ꞌawhuz khahna daꞌ, ꞌet tsꞌiyawh lhba nus whunoolhtꞌi whe lhla oohtꞌen. Doo ka si lubeshi gha nanihtꞌa de, nohdzi dutsꞌun ooleꞌ.

¹⁴ ꞋEt ꞌudechoo whutsꞌun Christ ookꞌúneꞌ tsꞌutꞌen-un, ꞌet whula toh whutsꞌun whulh tsꞌuzyin de, ꞌet de za Christ ootsꞌu ditnine ꞌuztileh.

¹⁵ ꞋEt whuz unꞌa ꞌukꞌu neyuzguz whe ꞌet ndutni, “ꞋAndit dzin Yakꞌusda ooghuni dahtsꞌo de, khun nohdzi doolhtsꞌun junih! Ndunne Yakꞌusda chꞌaz yailhdukne ꞌaw ꞌenne bukꞌunꞌa oohtꞌen junih.”

Dune lhuhootꞌi tsꞌe dilhtsꞌine, ꞌenne whula ditnine hinli

¹⁶ ꞋEt whulohne ndunne Yakꞌusda ooghuni dántsꞌone ꞌinkꞌez ꞌet hoontsꞌi hichꞌaz datni. Moses yun kꞌut Egypt tsꞌe ha nábanlane ꞌuhintꞌoh.

¹⁷ Ndunne ndutꞌenne, ꞌenne dit whunizyat (40) yus kꞌut ndúwhulyiz whe Yakꞌusda bubúlh huske. Ndunne ꞌenne dune lhuhóotꞌih tsꞌe lubeshi ílhchootne, ꞌet huwa whuz yahadla.

¹⁸ ꞋEnne ꞌuhintꞌoh Yakꞌusda ooghuni hikꞌu nulheꞌitꞌel, ꞌet huwa ndiz unꞌa Yakꞌusda butsꞌu hoozi-un, Yakꞌusda nalyis-un, ꞌaw dahóoyaꞌ ꞌaitꞌoh.

¹⁹ ꞋEt huwa whutsꞌodilꞌeꞌ, ndunne mbene la ooba ꞌalhaꞌ lheꞌhóotꞌoh, ꞌet huwa ndet la Yakꞌusda butsꞌu hoozi-un, ꞌaw dahóoyaꞌ ꞌaitꞌoh.