Hebrews 12 - Yak'usda Ooghuni

Neba ꞌalha ꞌuhoontꞌoh-i, ꞌi be lhghu naztoolghas

¹ ꞋEt huwa nohdutásnelh, ndunne bughun nohdásniꞌne, ꞌenne Yakꞌusda be ꞌutꞌen kꞌoh whunénulhtunne. Huldlai kꞌet, nenat ndúlcho ꞌantsꞌi kwꞌus leꞌ hintꞌoh. ꞋEt huwa neba ndaz-i kꞌoh nenilhtꞌi-i, ꞌinkꞌez lubeshi ꞌaw huwa lhúhoolnaꞌ whe neilhchuk, ꞌi tsꞌiyawh ꞌun tsꞌutoolhdilh. Yakꞌusda ba lhghu naztulwus-i, ꞌi nebut néwhultsꞌut-i, nelhtsꞌunisi whe uztoolghas.

² Netso tsꞌe Jesus Christ uznoolhꞌen. ꞋAw ꞌen za neba bé ꞌalha ꞌuhoontꞌoh-un dantꞌoh la, ꞌen tsꞌihꞌun unꞌa whunénulhtun-un ꞌuntꞌoh. ꞋInkꞌez ndi yun kꞌut usda-un, ꞌet ye khuna-i, ꞌen dúwhulcho whe neba ꞌalha ꞌuhoontꞌoh-i neba lhaoodulhꞌih-un ꞌuntꞌoh. Nus de ye whúntalhni-i, ootsꞌu yíkulh, ꞌet huwa tulalhgus yulh ínyin inleꞌ. Yugha yooya suliꞌ-i ooba ꞌantsꞌi ꞌuhoontꞌoh inleꞌ. ꞋInkꞌez Yakꞌusda ookwꞌutsꞌuzda cho diztiꞌ-i, ꞌet naílhni tsꞌe huwun nátlꞌa didaꞌ.

Yakꞌusda khuni yé nebulh yalhduk-i, khun te ꞌantsꞌi nohba ootꞌeꞌ junih

³ ꞋEt Jesus daja la, soo cho huwun nuní noohzut. Lubeshi ꞌulhꞌenne, ꞌenne hichꞌaz ditni, ꞌet hoontsꞌi soo whulh ínyin. Nohni cha tsꞌiyawh ꞌen za ooghu nuní nahdeh de, ꞌet huwa ꞌaw nénohtsilh junih ꞌinkꞌez ꞌaw tehtsun oohleꞌ junih.

⁴ Nohni lubeshi chꞌa neꞌahtꞌen-un, tube nohba huwa whúlna ꞌet hoontsꞌi ꞌaw hukwꞌe yalhizahdla.

⁵ Yakꞌusda khuniti be duyeꞌke kꞌunꞌa nohbulh yalhduk-un, whunaoodoolhnoh junih. Ndiz unꞌa nohMoodihti ꞌunohúlhni, “Syeꞌke khuni be nohbulh yasduk-i ootsꞌu doohtni junih. Nintaꞌ ꞌahtꞌih-un hukwaꞌ nohúlhni de, khun yo whúꞌun ꞌetsul oohneh junih.

⁶ Mbene la neMoodihti bukꞌensiꞌne, ꞌenne tsꞌiyawh khuniti be bubulh yalhduk. Mbene buzke unline, ꞌenne tsꞌiyawh uboolhtsas.”

⁷ ꞋEt Yakꞌusda khuni ulhtus-i be nohbulh yalhduk, ꞌinkꞌez ꞌaw whulh nuzulhti de, ꞌet de duzkehke kꞌunꞌa nohnulhyeh. Mbe dune suba ꞌuntꞌoh ooyeꞌ tankꞌus ꞌuja de yutsꞌa halhoohoosꞌal?

⁸ ꞋEt nohni nihyilh whe Yakꞌusda khuni ulhtus-i be nohbulh yalhduk de, ꞌinkꞌez tsꞌiyawh whuz unꞌa ꞌilhoghun tsinli whe uznizyai, ꞌaw ookꞌu nulheꞌzahtꞌen de, ꞌaw nohbá hooloh, ꞌinkꞌez Yakꞌusda buzkeh lhahloh whé ꞌahtꞌoh.

⁹ Nja ꞌon ꞌun cha nohdusni, ndi yun kꞌut nebáke ꞌenne khuni ulhtus-i be nebulh yahalhduk ꞌinkꞌez bukꞌúneꞌ tsꞌustꞌen. ꞋInkꞌez Yakꞌusda, ꞌen neyughi ooBá tsꞌutni-un, ꞌen neBá ꞌukꞌenus díztiꞌ-un ꞌuntꞌoh, ꞌen ꞌon nus ootlꞌaꞌ úzdudoolyelh ndi yun kꞌut uzdutaltsꞌilh huba.

¹⁰ Ndi yun kꞌut nebáke ꞌatsulyaz za bubulh ꞌutsꞌintꞌeꞌ, ndet ꞌukꞌenus neba hoonzoo-un, ꞌet tꞌehoninzun, whuz unꞌa khuni ulhtus-i be nehunilhyai. ꞋEt hoontsꞌi Yakꞌusda neBá, ꞌen ꞌilhiz wheni neba whutizooꞌ kꞌunꞌa khuni ulhtus-i be nebulh yailhduk. ꞋEn kꞌunꞌa ꞌon ꞌun lubeshi neghu hooloh tsꞌooleꞌ ha.

¹¹ Ntsꞌenꞌa tsꞌihꞌun unꞌa khuni ulhtus-i be nebulh yainduk whe uznizyai, whuloh te whutsꞌuzdutni, ꞌet hoontsꞌi hukwꞌelhꞌaz whuz unꞌa uznizya de, ꞌet de soo tsꞌihꞌun ꞌuntꞌohne dune ꞌuztileh whe Yakꞌusda nalh tsꞌihꞌun unꞌa lhtsꞌun ꞌuztitꞌelh.

Yakꞌusda ooghuni khun te oola doohtnih junih

¹² ꞋEt huwa nénihtsai leꞌ ꞌahtꞌoh whe nohgan naintle ꞌinkꞌez nohgwut cha tetsun suliꞌ de, soo ꞌon ꞌun oohneh ꞌaitꞌoh whe ulhtus naoolhtselh.

¹³ ꞋInkꞌez nohke ba ti cha lhtsꞌe oodizꞌa nahoolhtselh. Mbene nohtoh tetsunne, ꞌenne tinchꞌu hooyaꞌ ꞌaitꞌoh, ꞌet kꞌus soo hilhtus naꞌhutitleh.

¹⁴ Tsꞌiyanne butsꞌun tsꞌihꞌun unꞌa lhtsꞌun oohtꞌeꞌ hukwaꞌoohtꞌen. Lubeshi ooghu hoolohne dune oohleꞌ hukwaꞌoohtꞌen. ꞋAw ꞌet de za neMoodihti uztiꞌelh.

¹⁵ Soo cho nohtoh nohnichꞌoh nohulhutsinke bughohleꞌ! Doo ka si Yakꞌusda ye unzoo-i hiye nghoyaꞌ. ꞋEt de la whulohne nohtoh nukꞌoz hudooleꞌ ꞌaitꞌoh. Ndihíntꞌoh de, ꞌet ꞌenne bugha lhane ꞌi be hintsiꞌ hulih wheꞌ hoontꞌoh.

¹⁶ Doo ka si nohtoh whulohne, ꞌuyoonne tsꞌekoo kꞌus dune bulh lubeshi olhchoot whutsꞌu noohtꞌi. Kꞌus Esau kꞌunꞌa Yakꞌusda ooghohdloh. ꞋEn ꞌudechoo whuzdli-un ꞌuntꞌoh ꞌinkꞌez di la oobá yutsꞌu yoozi-i, ꞌi oochꞌeꞌ yataleh, bubá nahuyoosdzi-i didut ootsꞌitikulh-i, ꞌi ꞌuyinla, ꞌilhoh yutiꞌulh-i za kꞌelha yutizꞌai.

¹⁷ Tꞌeoonáhzun hukwꞌelhꞌaz dáhooja. Ndi hoonzoo-un yukꞌelhꞌotiꞌalh-un hukwaꞌ ninzun, ꞌet hoontsꞌi oobá yuchꞌaz nálhꞌa. Lhat whe huwintse, ꞌet hoontsꞌi ꞌaw oobá dudeni nahundunooꞌah ꞌaitꞌoh. Ntsꞌoh dátꞌen hoontsꞌi, ꞌaw yuba lhkꞌenaóodooꞌalh ꞌaitꞌoh.

Yakꞌuz dilhtsꞌine butsꞌun tsꞌilwus

¹⁸ ꞋEt ndunne Israel buzkehke, ꞌaw ꞌenne bukꞌunꞌa iloh whe dzulh Sinai dune yutꞌainaih-i, ꞌaw whuz ulhtáhyal. Ndi dzulh dizkꞌun, ꞌinkꞌez tsahólhgus chaꞌ hoontꞌoh. ꞋAw hoonli huhooꞌen ꞌaitꞌoh, ꞌinkꞌez nilhtsi dus cho cha hoonli.

¹⁹ ꞋEt Yakꞌusda ba be tsꞌújih-i, ꞌi cha hudántsꞌo ꞌinkꞌez Yakꞌusda yalhduk-un, ꞌet cha huwhudántsꞌo. Nyoonne yudántsꞌone, ꞌaw ꞌon ꞌun hidótsꞌo hukwa lheꞌhunízun. ꞋEt whuz unꞌa hitsꞌu tedudli ꞌaw ꞌon ꞌat huwhudutátsꞌo-un hukwa lheꞌhunizun ꞌet huwa.

²⁰ Yakꞌusda khuni butlꞌa ídanꞌai-i, ꞌaw whulh hooyin ꞌaitꞌoh ꞌet huwa. Khuni njan ndutni, “Khuna-i hoontsꞌi ndi dzulh yutꞌaiznai de, ꞌet de tse be hizoolhghelh, kꞌus kꞌaza be huyoochꞌih huba ꞌuhoontꞌoh.”

²¹ ꞋInkꞌez hohonꞌen whe tube whe húnilhjoot. Moses ꞌen hoontsꞌi, “Whenuzjut ꞌinkꞌez dustlut,” ni.

²² Ndi dzulh ooghun nohuzdániꞌ-i, ꞌaw whuz whe lhahdulh. Kꞌus ndi dzulh Zion tsꞌutni, ꞌi ootsꞌóozahdil. Yakꞌusda khuna-un, ꞌen ookeyoh whuti ꞌuhoontꞌoh. ꞋInkꞌez keyoh whuti Jerusalem tsꞌuwhútni. ꞋEt yakꞌuz whuzꞌai. Lizas huldlai kꞌet, ꞌaw ꞌuzdooniꞌ ꞌaitꞌoh.

²³ ꞋInkꞌez ndunne Yakꞌusda ooba ꞌalhaꞌ yintꞌohne tsꞌiyanne ꞌilhunaoodulh buba whuzꞌai. Mbe ꞌudechoo whuzdli-un oosdzi-un, ꞌen mbene oochꞌeꞌ yinline, ꞌenne yakꞌuz tsꞌe bubooziꞌ ꞌukꞌusguz, ꞌenne cha ꞌet hudilhtsꞌi. Yakꞌusda ꞌen tsꞌiyanne ba nahiyilh-un, ꞌen cha ꞌet usda. ꞋInkꞌez mbene la tsꞌihꞌun unꞌa lhadúlyane, ꞌenne buyughi-i, ꞌi cha ꞌet ꞌuntꞌoh.

²⁴ ꞋInkꞌez Jesus ooghu nahya, ꞌen ndi ꞌandit khuni neba lhaídinla-i, ꞌen neba ꞌukꞌelha whulhtsi-un, ꞌen cha ꞌet usda. ꞋInkꞌez ndi ꞌuskaiꞌ neba nadíltꞌiꞌ, ꞌi be nelubeshi tsꞌiyawh neba gak suliꞌ, ꞌet Abel yuzilhghi whe buzkaiꞌ yun nadíltꞌiꞌ, ꞌi anus hoonzoo-un whunénilhtan, ꞌet cha ꞌet whuzꞌai.

Yakꞌuz whutsꞌun nebulh yalhduk-un tsꞌoozólhtsꞌaiꞌ

²⁵ Yakꞌusda nohbulh yálhduk-un, ꞌet huwun nohbulh yalhduk-un, khun dah doohtniꞌ junih. Soo cho whunulhꞌen, yun kꞌut ꞌet ndúbulhni ꞌet hoontsꞌi ꞌaw hikꞌu nulheꞌitꞌel, ꞌet huwa hoolhtus whe buba nahizya. ꞋEt ꞌandit yakꞌuz whutsꞌun nebulh yalhduk-un, ꞌen oochꞌaz nátsꞌulhya de, ꞌet ꞌon nus dáwhultus whe neba nahutideh.

²⁶ ꞋOh daꞌ Yakꞌusda bubulh yálhduk whe ndi yun ditlut. ꞋInkꞌez doo cha za netsꞌú hoozi whe njan dútni, “Doo cha za ndi yun dutistlut. ꞋAw ꞌi za iloh, yat cha ndúwhulcho whe whudútistlut.”

²⁷ ꞋInkꞌez ndi khuni, “Doo cha za,” ꞌutni-un, ꞌet whunénulhtun, tsꞌiyai ndai la ꞌulya-i, ꞌi tsꞌiyawh dutitlut. ꞋEt whuz unꞌa ditlut-i gak whutaleh. ꞋEt ndai la ꞌaw dootlut ꞌaitꞌoh-i, ꞌi ꞌilhiz wheni ꞌutitꞌelh.

²⁸ ꞋEt huwa ntsꞌe Yakꞌusda lerwe unli-un, ꞌet ꞌaw nohóohootnah ꞌaitꞌoh. ꞋEt netsꞌu whutikulh. ꞋInkꞌez ye unzoo-i, ꞌi be si Yakꞌusda, ꞌen neba díztiꞌ-un ꞌinkꞌez neba be óonujut-un, ꞌen ooba neꞌtsꞌootꞌen.

²⁹ Wheni neYakꞌusda kwun tsꞌiyai dilhkꞌun-i nduntꞌoh whe ꞌuntꞌoh ꞌet huwa.