Hebrews 11 - Yak'usda Ooghuni

Be ꞌalha ꞌuhoontꞌoh-i, ꞌi be tꞌetsꞌoninzun

¹ ꞋEt ndai la ooka tse tsꞌúhooli-i, be ꞌalha ꞌuhoontꞌoh-i, ꞌi be tꞌetsꞌonínzun neba whusatíkulh. ꞋInkꞌez nduwhi ndet la lhtsꞌuhoosꞌen-un, ꞌet hoontsꞌi be ꞌalha ꞌuhoontꞌoh-i, ꞌi be tꞌetsꞌonínzun ꞌet whuzúsdla wheꞌ hoontꞌoh.

² Ndi be ꞌalha ꞌuhoontꞌoh-i, ꞌi be ndunne Yakꞌusda ba ꞌutso whudilhdzulhne, ꞌenne soo tsꞌihꞌun unꞌa bughu yaduk.

³ Be ꞌalha ꞌuhoontꞌoh-i, ꞌi be za tꞌetsꞌonínzun Yakꞌusda ooghuni be tsꞌiyaitsuk ndi yun kꞌut ꞌulya. Ndai lhtsꞌisꞌen-i, ꞌi hoontsꞌi, dughuni ꞌi be tsꞌiyawh ꞌuyinla-i wheꞌ hoontꞌoh.

Yakꞌusda ndi yun ꞌuyinla ꞌoh daꞌ whutsꞌun be neba ꞌalha ꞌuhoontꞌoh-i, ꞌi gha za Yakꞌusda oonalh tsꞌihꞌun ꞌutsꞌintꞌoh

⁴ Abel Yakꞌusda ooba ꞌalhaꞌ yintꞌoh. ꞋI be ꞌuja dulhutsin Cain ꞌen anus unzoo-i Yakꞌusda loodel kꞌut yuba ídalhkꞌun. Ndi huwa íninꞌai-i, ꞌet Yakꞌusda hoonzoo kꞌunꞌa yughu yalhduk. Abel dazsai hukwꞌelhꞌaz hoontsꞌi ntsꞌenꞌa daja-un, ꞌet ooghun nebulh yaínduk, Yakꞌusda tsꞌihꞌun dune ꞌuntꞌoh yulhni.

⁵ Be ꞌalha ꞌuhoontꞌoh-i, ꞌi be Enoch Yakꞌusda yutsꞌu hukwaꞌ ninzun-un, ꞌet ꞌuhóonla ꞌet whuz unꞌa ooghun tꞌewhunúdzun. ꞋAw dalhitsal. Khuna whe Yakꞌusda yakꞌuz whe yalhti. Yakꞌusda ooghuni ꞌet ndutni, “Yakꞌusda yakꞌuz tsꞌe whenáyalhti. Hooloh. ꞋEt huwa huyulh ꞌutꞌenne ꞌaw lhahuyisꞌen suliꞌ.”

⁶ Bé ꞌalha ꞌuhoontꞌoh-i, ꞌi ooyit de, ꞌaw Yakꞌusda ooba dzoh tsꞌoozooꞌ ꞌaitꞌoh. Mbene Yakꞌusda tsꞌun hutidulh hukwaꞌ huninzun, Yakꞌusda hoonli wheꞌ hoontꞌoh, ꞌet buba ꞌalhaꞌ hotꞌeꞌ hubaꞌ hoontꞌoh. ꞋInkꞌez soo tsꞌihꞌun dudzi huwaꞌ hooli whe hikꞌoh tsꞌe hukwa hítisꞌenne, ꞌenne za buba ꞌukꞌelha whutilhtselh.

⁷ Noah ꞌen cha Yakꞌusda ooba ꞌalhaꞌ yintꞌoh. ꞋI be ꞌawhuz lhuhoos̱ꞌen-un Yakꞌusda yúlhni, “Huwonleꞌ ꞌawet whuz de hóoltsꞌulh.” Whe nuljut ꞌinka tsꞌi cho ꞌuyínla. ꞋEt huwa Noah hiyoh dilhtsꞌine, ꞌenne tsꞌiyawh ubúlhyih. Ndi tsꞌi cho ꞌuyínla-i, ꞌi gha ndi yun kꞌut dúlcho whe dunene buba nahisda. ꞋInkꞌez be ꞌalha ꞌuhoontꞌoh-i be tsꞌihꞌun unꞌa ꞌuntꞌohne tsinli, Noah ꞌen cha whuz unꞌa Yakꞌusda ooba ꞌalhaꞌ yintꞌoh-un suliꞌ, ꞌi be tsꞌihꞌun dune inleꞌ.

Abraham ooba ꞌalha ꞌuhoontꞌoh-un

⁸ Abraham, ꞌen cha Yakꞌusda uyúlhni, “ꞋUdun yun kꞌuz tonyaꞌ. Kꞌat le de njan yun kꞌut ꞌet nchꞌeꞌ whutaleh.” ꞋEt be ꞌalha ꞌuhoontꞌoh-i be Abraham whuz unꞌa yukꞌúneꞌ ꞌustꞌen. Ntsꞌe tiyalh ꞌaw tꞌéoonúszun ꞌet hoontsꞌi ꞌawet tizya.

⁹ Be ꞌalha ꞌuhoontꞌoh-i, ꞌi be yun yutsꞌe ooziya, ꞌi oochꞌeꞌ tileh. ꞋUtsꞌun keyoh whutꞌen-un unli njan yun kꞌut usda. Nimbali bet za whutꞌi. Isaac ꞌinkꞌez Jacob ꞌenne cha ꞌen kꞌunꞌa nimbali be za huwhutꞌi. ꞋEnne cha Abraham ye yutsꞌu náhizya-un, ꞌenne bubulh buchꞌeꞌ whutaleh.

¹⁰ ꞋEt njan keyoh ꞌilhiz ꞌuwhutatꞌelh-un, ꞌet Yakꞌusda, ꞌen ꞌuwhutileh, Abraham huba sulhꞌi whe nimbali be za hootꞌeꞌ inleꞌ.

¹¹ Be ꞌalha ꞌuhoontꞌoh-i, ꞌi be Sarah ꞌen cha Yakꞌusda ye ulhtus-i yutlꞌa nahonꞌai oolchan ha. Tube yoo ꞌun uzulh ꞌaw ooyaz hóleꞌ ooba lheꞌhóotꞌoh. ꞋEt hoontsꞌi Yakꞌusda yutsꞌú hoozi-un Sarah tꞌeooninzun Yakꞌusda ꞌaw yula dootnih ꞌaitꞌoh.

¹² ꞋEt huwa ꞌilhoghun dune nisjan kꞌet ꞌantsꞌi dazsai leꞌ ꞌuntꞌoh, ꞌet hoontsꞌi yé dindene huldlai. Ndoghi sum ꞌi bundeíniltsukne ꞌinkꞌez taba sai ꞌaw oonolto ꞌaitꞌoh, ꞌet ꞌuhuniltsuk ꞌenne hiye ndunne hinli.

ꞋUdaꞌne Yakꞌusda ooba ꞌalhaꞌ yintꞌohne, ꞌenne tsꞌiyawh ꞌawhuz buba ꞌalha ꞌuhoontꞌoh whe whulh yahadla

¹³ ꞋUdaꞌne Yakꞌusda ooba ꞌalhaꞌ yintꞌohne, ꞌenne tsꞌiyawh buba ꞌalha ꞌuhoontꞌoh whe whulh yahadla. ꞋEt ndai Yakꞌusda yé butsꞌú nahizya-i, ꞌi ꞌaw butlꞌa lhéyizulh. ꞋEt hoontsꞌi ndai la nus huhonꞌen-i, ꞌet huwa ꞌaw nawh buba lheꞌhóotꞌoh. Budzi hóontꞌiꞌ whe huhoontun. ꞋInkꞌez tsꞌiyanne hutni, ꞌaw ndi yun kꞌut whutꞌenne lhuhíloh. ꞋAntsꞌi ndi yun kꞌut whukꞌuhundilh wheꞌ hintꞌoh.

¹⁴ ꞋEt dahutitsa whutso ndunne whuz unꞌa yalhdukne whe tsꞌiyanne whubuhonulhtun, dichꞌoh duyun kꞌut za hukwaꞌ huninzun.

¹⁵ ꞋAlhaꞌ ndet yun kꞌut whuchꞌa huzdil-un, ꞌet howu nuní hunudeh de, ꞌet whuz daꞌ nahutoodilh ooleꞌ.

¹⁶ ꞋEt hoontsꞌi ꞌon nus keyoh hoonzoo-un hukwaꞌ huninzun. Njan keyoh ꞌuwhúlhni-un, ꞌet yakꞌuz whuzꞌai. ꞋEt huwa Yakꞌusda ꞌen duYakꞌusda hidániꞌ. ꞋInkꞌez Yakꞌusda ꞌen duYakꞌusda huyulhni, ꞌet ꞌaw hukwaya lhiloh, keyoh whuti ꞌet buba lhaóodinla ꞌet huwa.

ꞋUdaꞌ dunene unzoone buba ꞌalha ꞌuhoontꞌoh-un

¹⁷ Be ꞌalha ꞌuhoontꞌoh-i, ꞌi be ꞌoh daꞌ Yakꞌusda Abraham yóolhdzai whe ꞌaw ꞌilhoghun duyeꞌ Isaac loodel kꞌeyilhti ꞌinkꞌez Yakꞌusda ba yutuzilhghelh ha. Ndet Yakꞌusda yutsꞌú hoozi-un whe ooyeꞌ ootsꞌu haindene hutildlai, ꞌet tsꞌiyawh hóolhchoot.

¹⁸ ꞋInkꞌez whutso ꞌuja ꞌen Yakꞌusda Abraham yudániꞌ, “Isaac ꞌen gha nyédinde tsꞌiyawh whusahátidulh.”

¹⁹ ꞋEt hoontsꞌi Isaac loodel kꞌeyítalhtelh whutso Abraham whunalni Yakꞌusda daja yudániꞌ. ꞋEt huwa ꞌet dunínzun, Yakꞌusda ꞌen soo ꞌúltus whe Isaac dazsai de, ꞌet hoontsꞌi yaidlane butoh dunaidutálhtelh. ꞋInkꞌez ꞌalha ꞌuhoontꞌoh, ꞌantsꞌi yaidláne ha náyalhti leꞌ yinla.

²⁰ ꞋInkꞌez be ꞌalha ꞌuhoontꞌoh-i, ꞌi be ndet la tsꞌiyantsuk whusaóotikulh-un, Isaac Yakꞌusda yoodalhkut, nus de huba Jacob ꞌinkꞌez Esau bulh butsꞌun óozooꞌ ha.

²¹ Be ꞌalha ꞌuhoontꞌoh-i, ꞌi be Jacob dawhénintsai whe Yakꞌusda yoodalhkut Joseph ooyeꞌke butsꞌun óozooꞌ ha. Dutuz la chándunuti whe Yakꞌusda tsꞌun teniꞌ nalhdzin.

²² ꞋInkꞌez be ꞌalha ꞌuhoontꞌoh-i, ꞌi be Joseph ꞌawet ooyiz la toh whéninleꞌ whe Israel whuduneꞌne Egypt yun kꞌut whuchꞌa nahutidulh whe huwun bubulh yaílhduk. ꞋInkꞌez ootsꞌun cha dahítilelh, ꞌet ubudániꞌ.

Moses ooba ꞌalha ꞌuhoontꞌoh-un

²³ Moses whuzdli daꞌ, tsꞌoodun daldzooꞌ la, ꞌet huwa be ꞌalha ꞌuhoontꞌoh-i, ꞌi be oodusneke lerwe daja ni-un, ꞌaw hikꞌunꞌa lheꞌinel, kꞌus ta sanun ndúwhulyiz ꞌet oodusneke nuhínilhꞌiꞌ.

²⁴ Moses kꞌéninyai whe Pharaoh ootseꞌ, ꞌen ooyaz huyúlhni, ꞌet be ꞌalha ꞌuhoontꞌoh-i, ꞌi be nduhúyulhni-un ꞌilhiz chꞌa bunísjoot.

²⁵ ꞋEt kꞌus Yakꞌusda ooduneꞌne, ꞌenne bulh lhat-un hoontsiꞌ-un dzoh nutizut, ꞌet whuz unꞌa Moses ꞌutahahónꞌai. ꞋAtsulyaz lubeshi be hootátꞌeꞌ-un, ꞌaw ꞌet iloh ꞌutahahónꞌai.

²⁶ Christ ꞌen gha ndunne Egypt whutꞌenne, Israel tsꞌu haindene buchꞌaz yahalhduk. ꞋEt Moses nduninzun buchꞌaz yahalhduk-un, ꞌet Egypt whulerwe daltsuk sooniya, ꞌi tsꞌiyawh ba nus yinzoo. Yakꞌusda oochꞌeꞌne buba ꞌukꞌelha whutaleh-un, ꞌet buba neóoninꞌai, ꞌet huwa ꞌet dúhoontꞌoh-un za Moses hukwa itísꞌen.

²⁷ Yakꞌusda lhistꞌen-un, ꞌen ꞌantsꞌi yanꞌen hukwꞌunꞌa ꞌuja, ꞌet huwa ooba howa whulnaꞌ-un whulh usyin. ꞋEt huwa be ꞌalha ꞌuhoontꞌoh-i, ꞌi be yun kꞌut Egypt whuchꞌa nasja. ꞋAw lerwe ye hunilchꞌoh-i, Moses ꞌaw yé lhniljut.

²⁸ Be ꞌalha ꞌuhoontꞌoh-i, ꞌi be Moses tsꞌiyantsuk Yakꞌusda kꞌuneꞌ ꞌustꞌen. ꞋEt huwa yoh ꞌuskaiꞌ be whe hoodalꞌen-un, ꞌet lizas whutus lhuseya. ꞋEt huwa ꞌudechoo whuzdline, ꞌenne ndun lizas buzoolhghelh ꞌaitꞌoh.

²⁹ Yatooꞌ dulkꞌun-i, Yakꞌusda buba lhchꞌaz ꞌúyinla ꞌinkꞌez yun whudizgih-un whe be ꞌalha ꞌuhoontꞌoh-i, ꞌi be hikꞌut naníndil. Egypt ba lhuganne, ꞌenne cha buba huntizdil whe tsꞌiyawh too ꞌubanghan.

ꞋUdaꞌ lhane buba ꞌalha ꞌuhoontꞌoh-un, ꞌet whe whuchꞌa honílhde

³⁰ Be ꞌalha ꞌuhoontꞌoh-i, ꞌi be Jericho keyoh lhtakꞌantꞌit dzin whunahudidulh whe tse dutai-i whunanilhyo-i nanánkat.

³¹ Be ꞌalha ꞌuhoontꞌoh-i, ꞌi be ndun ꞌulꞌen-un Rahab huyúlhni, ꞌen ndunne Moses ba nunúlꞌiꞌne, ꞌenne bulaꞌ tinelh ha duyoh dábuninla. ꞋEt huwa mbene la Yakꞌusda kꞌunulheꞌustꞌenne ꞌaw bubulh dalhitsal.

³² ꞋAwet lheꞌwhultsuk be ꞌalha ꞌuhoontꞌoh-i kꞌuneꞌ hustꞌen, ndunne huldlai kꞌet ꞌaw tsꞌiyawh bughun nohdósniꞌ ꞌaitꞌoh. Gideon ndet ꞌuhóonla. Barak ꞌen cha. Sampson, Jephthah, David, Samuel, ꞌinkꞌez nus hooꞌenne, ꞌenne tsꞌiyawh,

³³ be ꞌalha ꞌuhoontꞌoh-i, lhelhdun keyoh whutꞌenne, tsꞌiyawh buchꞌaꞌ hunilhde. Ndet tsꞌihꞌun unꞌa ꞌuhoontꞌoh-un, be ꞌalha ꞌuhoontꞌoh-i, ꞌi be ꞌuhuhóonla. Ndet Yakꞌusda butsꞌú hoozi-un, be ꞌalha ꞌuhoontꞌoh-i, ꞌi be buchꞌeꞌ whutaleh tꞌehoninzun. Be ꞌalha ꞌuhoontꞌoh-i, ꞌi be Yakꞌusda ndi khuna-iti, lion huyúlhni-i, ꞌi hize lhtsꞌunaꞌ hoonla bundólhda whuchꞌa.

³⁴ Be ꞌalha ꞌuhoontꞌoh-i, ꞌi be kwun dizkꞌun-i cha nahinilhno. Yakꞌusda chꞌaz ditnine, ꞌenne ooduneꞌne, ꞌenne saluzti be bubuhutighan inleꞌ, ꞌet hoontsꞌi be ꞌalha ꞌuhoontꞌoh-i, ꞌi be buchꞌa hudujih. Tetsunne, ꞌenne cha ꞌi be hilhtus suliꞌ. Lhuhutigan whe ꞌet cha be ꞌalha ꞌuhoontꞌoh-i, ꞌi be hilhtus suliꞌ. ꞋInkꞌez bubulh lhúhuganne, ꞌenne cha bube nújut hudanꞌai ꞌet whuz unꞌa whenábuhunanyoot.

³⁵ Be ꞌalha ꞌuhoontꞌoh-i, ꞌi be whulohne tsꞌekoo bughu yaidlane cha za dunahudidil ꞌinkꞌez bughu nahundil. ꞋInkꞌez ꞌuyoonne cha dzoh nubuhulhde, ꞌet hoontsꞌi be ꞌalha ꞌuhoontꞌoh-i, ꞌi be za didutchꞌoh ꞌaw bula nahudutitnih hukwa lheꞌhunízun. ꞋEt whe ꞌon nus hoonzoo hukwꞌunꞌa dunabudutálelh ꞌet nahohootáꞌalh.

³⁶ ꞋUyoonne cha ꞌenne bughu hudlo ꞌinkꞌez whulohne bubuhoolhtsas. ꞋInkꞌez whulohne tlꞌoolh be bubuhulhghel ꞌinkꞌez ꞌabahanla.

³⁷ Whulohne tse be buba ha nghan. Whulohne be dugut be buyustꞌe tánuhidizghut. Whulohne cha nintaꞌhutitꞌelh-un whutsꞌú bonalhtꞌi. Whulohne saluzti be bubuhanghan. ꞋInkꞌez whulohne khuna-i zuz, dube te, ꞌusbai te, ꞌi tsꞌiyawh lhenyoo zuz ꞌi za be dune hinli. ꞋInkꞌez ꞌantsꞌi ꞌoh nuhudilh. Hikꞌu khútinalh-i, ꞌi hoontsꞌi lhuhuyítꞌiꞌ inleꞌ. Dunene dzoh nubuhulhde, ꞌinkꞌez tebehilhꞌen.

³⁸ ꞋEt nduntꞌohne ndi yun ꞌaw buba soo lheꞌyildzooꞌ. ꞋAw dune lhuhóotꞌih-un ꞌinkꞌez dzulh toh te ꞌoh ho lhelhtsꞌun náhutudulh. Tseꞌan te kꞌus yun ꞌan te, ꞌoh huwhutꞌi.

³⁹ ꞋEt ndunne tsꞌiyawh be buba ꞌalha ꞌuhoontꞌoh-i, ꞌet huwa hoonzoo kꞌunꞌa bughu yainduk. ꞋEt hoontsꞌi ndet butsꞌu hoosdzi-un, ꞌaw butlꞌa lhúhoozulh.

⁴⁰ Whuz unꞌa wheni tsꞌiyawh nús de Yakꞌusda ꞌon nus hoonzoo-un nebaꞌ ꞌuhóonla. Ndunne tsꞌiyawh wheni tsꞌuhooloh ꞌet huwa Yakꞌusda butsꞌu hoozi-un, neyit ꞌaw tsꞌihꞌun unꞌa lhadúlyane hooleꞌ ꞌaitꞌoh.