Hebrews 10 - Yak'usda Ooghuni

Khuna-i loodel kꞌut huídilhkꞌun-i, ꞌi be ꞌaw bulubeshi bunaꞌoodeh ꞌaitꞌoh

¹ ꞋEt Moses ꞌukꞌehonguz-un daldzooꞌ-i la whuz ha tikulh-un, ꞌet ꞌaw soo cho lhunedinel. Mbene ndi khuni yukꞌuneꞌ ꞌustꞌenne, ꞌenne naoodizulh totsuk ndai huwa tꞌaih-i whe loodel kꞌut hidutálhkꞌun-i, ꞌet hoontsꞌi ꞌaw Yakꞌusda nalh lhadulyane uboolhtselh ꞌaitꞌoh.

² Lhadulyane ubutilhtselh de, ndai huwa tꞌaih-i ꞌetsul ꞌuhuyooleh hubaꞌ hoontꞌoh. ꞋEt doo cha bulubeshi bubunayide de, ꞌet sih buyo tsꞌe oogha tꞌetsꞌoninzun-i, ꞌi be tꞌehontizeh.

³ ꞋEt hoontsꞌi naoodizulh totsuk, ndai huwa tꞌaih-i, ꞌi be ꞌet whe tsꞌiyawh tꞌehonínzun ꞌawhuz lubeshi hutꞌi.

⁴ Musdoos dune ꞌinkꞌez dube buzkaiꞌ, ꞌi ntsꞌoh dáhoontꞌoh ꞌet hoontsꞌi bulubeshi ꞌaw ꞌi be bunaꞌoodeh ꞌaitꞌoh ꞌet huwa.

Christ duzkaiꞌ ꞌi be za nelubeshi yunaꞌalhde

⁵ ꞋEt huwa nkedaꞌ Jesus Christ ndi yun kꞌeínya whe, ꞌet njan ndutni, “O Yakꞌusda ndai huwa tꞌaih-i, ꞌinkꞌez loodel kꞌut hidílhkꞌun-i, ꞌi tsꞌiyawh ookwa lheꞌnínzun. ꞋEt hoontsꞌi ꞌilho yustꞌe ꞌi sba lhadinla.

⁶ Loodel kꞌut lubeshi ba dízkꞌun-i, ꞌinkꞌez ꞌuyoo huwa huyulih-i cha, ꞌi ꞌaw mba soo lheꞌildzooꞌ.

⁷ ꞋEt huwa njan dúdusni, ‘O Yakꞌusda ndi ꞌudustlꞌus sghun ꞌukꞌuneꞌ ꞌúsguz ꞌet ꞌalha ꞌuhoontꞌoh. Nyun hukwaꞌ ninzun-un te neꞌtistꞌen ꞌet huwa whusásya.’”

⁸ ꞋUdechoo dutni, “Ndai loodel kꞌut lubeshi ba dízkꞌun-i, ꞌinkꞌez ꞌuyoo huwa huyulih-i inleꞌ cha, tsꞌiyawh ꞌaw mba soo leꞌ ildzooꞌ,” ꞌet hoontsꞌi Moses be ꞌudustlꞌus ꞌi gha ꞌet nduwhutꞌen inleꞌ.

⁹ ꞋEt huwa Jesus Christ ꞌet njan cha ndutni, “O Yakꞌusda nyun hukwaꞌ ninzun-un te neꞌtistꞌen huwa whusásya.” ꞋEt whuz unꞌa Yakꞌusda ndi ꞌudechoo khuni buba lhaídinla-i, ꞌi gak yulhtsi. ꞋInkꞌez bulh nanki khuni buba lhaídinla-i, ꞌi yukꞌenaídanꞌaih.

¹⁰ ꞋInkꞌez Yakꞌusda ndet hukwaꞌ ninzun, ꞌet whe ꞌilhoh ꞌinkꞌez ꞌilhiz wheni Jesus Christ duyustꞌe be neba huwaꞌ dudulti. ꞋEt whuz unꞌa ꞌudaꞌ oochꞌeꞌ tsꞌuzdliꞌ.

Christ neba dazsai-un, ꞌi be ꞌutahalyanne, ꞌenne lhadúlyane ꞌubulhtsi

¹¹ ꞋInkꞌez ndi loodel kꞌut hidílhkꞌun-i, ꞌet dzin totsuk ꞌi za ndunne lubret whusaháyuli. ꞋInkꞌez whuz unꞌa za dunene buba neꞌhutꞌen. ꞋEt hoontsꞌi ꞌet nduhútꞌen-un ꞌaw bulubeshi bunaꞌoodeh ꞌaitꞌoh.

¹² ꞋEt hoontsꞌi Jesus Christ nelubeshi kꞌelha ꞌilhoh za ꞌinkꞌez ꞌilhiz wheni ꞌuja dichꞌoh huwáꞌ dudulti. Hukwꞌelhꞌaz Yakꞌusda nailhni tsꞌe yughu nátlꞌa dida.

¹³ ꞋAndit ꞌet usda nkede ꞌuwhutanelh whe yuchꞌaz ditnine, ꞌenne ꞌantsꞌi ookꞌut neke nályis-i, ꞌi kꞌunꞌa duke tꞌah nébutalelh, ꞌet huba sulhꞌi.

¹⁴ Ndunne Yakꞌusda ba ꞌudun nebuninlane, ꞌenne buba Jesus Christ ꞌilhoh za huwa dudulti. ꞋEt whe ꞌi be ꞌilhiz wheni lhadúlyane huzdliꞌ.

¹⁵ Ndoni ꞌen cha whuz unꞌa za nduneúlhni. ꞋOh daꞌ ꞌet ndutni,

¹⁶ “NeMoodihti njan ndutni, ‘ꞋEt dzin hukwꞌelhꞌaz ndi khuni butsꞌun lhadutisdleh. ꞋEt ꞌon ꞌun cha ꞌutni, Skꞌoh tsꞌe budzi yo cha newhudutasꞌalh ꞌinkꞌez bubeni toh cha ꞌukꞌehóotasgus.’”

¹⁷ ꞋInkꞌez cha ꞌutni, “Bulubeshi ꞌinkꞌez ꞌukꞌú nulhéꞌustꞌen-i, ꞌi tsꞌiyawh ꞌon ꞌun buba whunaooznih ꞌaitꞌoh.”

¹⁸ ꞋAwet ndai nelubeshi tsꞌiyawh neba whunaoodilhnoh, ꞌinkꞌez ꞌaw ꞌon ꞌun nelubeshi ba ꞌudólkꞌun ꞌaitꞌoh.

Jesus Christ neba daja la, khun te neba nawh ꞌohotꞌeꞌ junih ꞌinkꞌez soo cho tsꞌuhotun

¹⁹ ꞋEt huwa sulhutsinke, Jesus buzkaiꞌ gha tube nedzi hoonli whe ndet ꞌukꞌenus whudíztiꞌ tsꞌe ꞌahoolhyiz whuz uztoodulh, ꞌet netlꞌa honꞌai.

²⁰ ꞋEt ndi ti, ꞌi ꞌawhundit-i ꞌinkꞌez tsꞌihꞌun unꞌa ꞌuhoontꞌoh-i neba whulhtsi. ꞋEt didutchꞌoh neba dazsai-un, ꞌet whe whutsoh súbal-i neba lhchꞌaz yilhchoot duyustꞌe be.

²¹ ꞋInkꞌez Yakꞌusda ooyoh dilhtsꞌine, ꞌenne buba ꞌen lubret ꞌukꞌenus diztiꞌ-un unli.

²² ꞋEt huwa wheni cha soo cho neba ꞌalha ꞌootꞌeꞌ ꞌinkꞌez nedzi tsꞌihꞌun ꞌuntꞌoh whe ootsꞌúztooyaꞌ. ꞋInkꞌez duzkaiꞌ be ꞌudaꞌ nedzi tunayuzguz. ꞋI be ndet neyo tsꞌe oogha tꞌetsꞌoninzun-i whudutsun-un neba whunaꞌalhde. ꞋInkꞌez neyustꞌe too unzoo-i be tunásguz leꞌ tsꞌootꞌeꞌ.

²³ Ooka tse tsꞌúhooli-un, ꞌet neba ꞌalha ꞌuhoontꞌoh tsꞌutni, khun te neba nawh huhotꞌeꞌ junih ꞌinkꞌez soo cho tsꞌuhotun. Mbe netsꞌéꞌ oozi-un, ꞌen ꞌaw nela dootnih ꞌaitꞌoh ꞌet huwa.

²⁴ ꞋInkꞌez tsꞌiyawh lhghu nuní uznoozut ꞌet de nus lhtsꞌun nooltꞌi, ꞌet de la tsꞌiyanne bukꞌetsꞌoosiꞌ ꞌinkꞌez ꞌutꞌen unzoo-i be bula tsꞌootꞌen.

²⁵ Ntsꞌenꞌa la ꞌahoolhyiz ꞌilhunatsꞌodulh-un khun te whulazdootnih junih! Whulohne ꞌetsul ꞌuhutꞌih. ꞋEt hoontsꞌi ꞌawet ꞌudekꞌez dzin whuz de hóoltsꞌulh-un ꞌawet neba nilhdukw suliꞌ. ꞋEt huwa ꞌon nus soo cho nus lhtsꞌunooltꞌi whe ꞌahoolhyiz Yakꞌusda ba ꞌilhunatsꞌódilh hubaꞌ hoontꞌoh.

Tsꞌihꞌun unꞌa ꞌuntꞌohne, ꞌenne be ꞌalha ꞌuhoontꞌoh-i, ꞌi be ndi yun kꞌut hudóltsꞌiꞌ

²⁶ ꞋEt huwa khuni ꞌalhaꞌ ꞌuntꞌoh-i tꞌezninzin whe tsꞌiyawh tsꞌilhchoot, ꞌinkꞌez hukwꞌelhꞌaz ꞌonilha lubeshi tsꞌilhchoot de, ꞌet ndutsꞌútꞌen ꞌet whe ꞌaw be húwa ꞌutꞌaih-i, ꞌi neba lheꞌítꞌoh suliꞌ.

²⁷ Kꞌus ndet neba nahutideh-un, wheoonujut kꞌet ꞌaw ꞌuzdooniꞌ ꞌaitꞌoh, Yakꞌusda ye hunilchꞌoh-i, ꞌi be neba nahutideh. ꞋInkꞌez ndi ye hunilchꞌoh-i, ꞌi kwun ulhtus kꞌet beꞌ duldi leꞌ ꞌutni, ꞌi kꞌunꞌa ndunne Yakꞌusda chꞌaz ditnine, tsꞌiyawh ꞌi be hudutákꞌun.

²⁸ Ndi Moses be ꞌudustlꞌus kꞌut ꞌukꞌeguz-i, mbe nꞌun whutulhdulhne, ꞌenne nane kꞌus tane te nalh ꞌet nduhútꞌen de, ꞌet de be ꞌugha teꞌnidzeh-i, ꞌi yit dahútitsah inleꞌ.

²⁹ ꞋEt hoontsꞌi ꞌon nus hootátsiꞌ. Mbene Yakꞌusda ooYeꞌ ꞌantsꞌi yuba unli whe yukꞌunuya de, ꞌinkꞌez Jesus buzkaiꞌ be ꞌandit khuni buba lhaídinla-i huwhutꞌi, ꞌinkꞌez Yakꞌusda ꞌudun nebuninla, ꞌet hoontsꞌi buzkaiꞌ ꞌaw hoonliyaz buba lhíloh de, ꞌinkꞌez Ndoni ꞌen cha ꞌen unzoo-i ootsꞌu haídultsꞌuk-un, hichꞌaz yalhduk de, tsꞌiyawh mbene whuz unꞌa ndutꞌenne, ꞌon nus whéoonujut whe buba nahutideh.

³⁰ ꞋEt neMoodihti, ꞌen ookꞌoh tsꞌe tꞌetsꞌoninzun. ꞋEn ꞌutni, “Be kꞌuz nudzun-i, si schꞌeꞌ ꞌuntꞌoh! Si hukwꞌelha whutiselh.” ꞋInkꞌez cha ꞌutni, “NeMoodihti duduneꞌne, buba nahutiyeh.”

³¹ Yakꞌusda khuna-un, oola kꞌetsꞌultsꞌuk te, whe whunujut whe ꞌuhoontꞌoh.

³² ꞋEt hoontsꞌi nohni whunalhnih ndi khuni niz dakꞌez daja hutni la, soo cho tꞌeoonáhzun ꞌinkꞌez ulhchoot. Hukwꞌelhꞌaz dzoh nusahde ꞌet hoontsꞌi ꞌaw nohchꞌa lheꞌílhdoh. ꞋEt tsꞌiyawh whutulh usáhdil.

³³ Whuloh te Yakꞌusda gha tsꞌiyanne nalh dzoh nunóhuhulhdeh ꞌinkꞌez nohchꞌaz yahalhduk. Whuloh te whuz unꞌa Yakꞌusda ba dzoh nudehne, ꞌenne butsꞌú nedahdaih te ꞌet hukwa cha dzoh nunohulhdzut.

³⁴ ꞋInkꞌez ꞌoh daꞌ ꞌasuhanꞌai whe sgha teꞌnahzun ꞌinkꞌez sla ꞌahtꞌen inleꞌ. ꞋEt ndai ahtꞌi-i, ꞌi ꞌantsꞌi nohghu ha yílhchoot ꞌet hoontsꞌi hoonáhtꞌiꞌ. Tꞌeoonáhzun nohnichꞌoh ꞌon nus hoonzun-un ꞌinkꞌez ꞌilhiz ꞌuhoontꞌoh, ꞌet yakꞌuz nohba whuzdla ꞌet huwa.

³⁵ Be nóhdzi ulhtus-un khun whula doohtnih júnih! ꞋI gha hooncha-un nohgha whutaltsꞌulh ꞌet huwa.

³⁶ ꞋEt njan ꞌet tsꞌiyawh oola doohtnih junih! ꞋEt Yakꞌusda nohtsꞌu hukwaꞌ ninzun-un, lhaoodihla de, ꞌet nóhtsꞌu nahizya-un, ꞌet nohgha whútakulh.

³⁷ ꞋUdaꞌ khuni ꞌet njan ndutni, “Ndun whusatíyalh-un, ꞌaw saꞌ iloh whusatíyalh.

³⁸ ꞋEt tsꞌihꞌun unꞌa ꞌuntꞌohne, ꞌenne be ꞌalha ꞌuhoontꞌoh-i, ꞌi be ndi yun kꞌut hudóltsꞌiꞌ hubaꞌ hoontꞌoh. ꞋEt hoontsꞌi kꞌoh naꞌhuja de, ꞌet de ꞌaw si buba hóstꞌeꞌ ꞌaitꞌoh.”

³⁹ Ndunne mbene la Yakꞌusda ooba ꞌalhaꞌ yintꞌohne ꞌinkꞌez kꞌoh naꞌhuja de, ꞌenne ndai la Yakꞌusda bugha whútaꞌalh-un, ꞌaw huyólhchoot ꞌaitꞌoh. Wheni ꞌaw ꞌenne bukꞌunꞌa lheꞌtsꞌítꞌoh. ꞋEt kꞌus wheni Yakꞌusda ooba ꞌalhaꞌ yintꞌohne tsinli, ꞌet whe dijizne ꞌutsꞌintꞌoh.