Hebrews 1 - Yak'usda Ooghuni

ꞋAndit ꞌudekꞌez dzin whe Yakꞌusda duYeꞌ ꞌen be nebulh yaílhduk

¹ Lhat-un ꞌinkꞌez lhelhtsꞌun unꞌa, niz haóodanzut, Yakꞌusda be nus hooꞌenne, ꞌenne bube netsodaꞌne bubulh yaílhduk.

² ꞋEt njan ꞌandit ꞌudekꞌez dzin whe Yakꞌusda duYeꞌ ꞌen be nebulh yaílhduk. ꞋEn ooBá yutꞌi-i, ꞌi tsꞌiyawh oochꞌeꞌ yutileh, ꞌet whuz unꞌa ooBá yutlꞌa hónꞌai. OoYeꞌ ꞌen be ꞌuja tsꞌiyaitsuk ꞌuhóonla.

³ ꞋEn za ꞌuntꞌoh ooBá ye diztiꞌ-i, ꞌi whunénulhtun. ꞋInkꞌez ooBá dantꞌoh la, ꞌet ooYeꞌ ꞌen soo tsꞌihꞌun yundultꞌoh. ꞋUhóonla-un, ooghuni ulhtus-i be yalhduk-un, ꞌi be ndulcho hoontun. ꞋEn za ꞌuja, nelubeshi ꞌi tsꞌiyawh neba yunaꞌalhde. ꞋEt hukwꞌelhꞌaz ꞌet yakꞌuz tsꞌe Yoodoghun ncha-un, ꞌet nailhni tsꞌe yughu nátlꞌa didaꞌ.

⁴ ꞋEt lizasne buba nus ncha-un ꞌuntꞌoh. Ndi booziꞌ oogha ídiltsꞌut-i, ꞌi lizas bubooziꞌ ba nus diztiꞌ whé ꞌuntꞌoh. ꞋEt ꞌuhoolcho whe buba ndo ꞌuntꞌoh.

Yakꞌusda ooYeꞌ ꞌen lizasne buba ndo ꞌuntꞌoh

⁵ Njan ndúhoontꞌoh, Yakꞌusda ꞌilhoghun lizas ꞌaw ndulhúbudinel, “Nyun sYeꞌ ꞌintꞌoh. ꞋInka ꞌandit dzin sYeꞌ sinliꞌ, whuz unꞌa nyoozúszi.” ꞋInkꞌez njan cha Yakꞌusda ꞌutni, “ꞋEn ba ꞌuBá tisdleh ꞌinkꞌez si sba sYeꞌ tileh.”

⁶ ꞋInkꞌez ꞌudechoo whuzdlí-un, Yakꞌusda doo cha ndi yun kꞌut neítalhtelh whe ꞌet ndutni, “Yakꞌusda oolizas, ꞌenne tsꞌiyawh hitsꞌu teniꞌ noolhdzin.”

⁷ ꞋEt dulizas bughu yalhduk whe njan ndutni, “Oolizas nilhtsi kꞌunꞌa ꞌubinla. ꞋEnne yuba ꞌutꞌenne ꞌuhintꞌoh ꞌinkꞌez kwun nudúnat-i kꞌunꞌa nabulhtsi.”

⁸ ꞋEt hoontsꞌi duYeꞌ yughu yalhduk whe ndutni, “O Yakꞌusda whulerwe inli-un, ꞌet ꞌi ꞌilhiz wheni ꞌuntꞌoh. ꞋInkꞌez tsꞌihꞌun unꞌa kꞌuneꞌ whutalꞌen.

⁹ Tsꞌihꞌun ꞌuhoontꞌoh-un za hukwꞌensiꞌ, ꞌukꞌú nulheꞌustꞌen-i, ꞌi ootsꞌu dintni. ꞋEt huwa O Yakꞌusda, nYakꞌusda ndi khe ꞌilho didowh-i, ꞌi dune be ba tsꞌodilhtiꞌ-i ꞌuntꞌoh, ꞌi gha budzi hoontꞌiꞌ, ꞌi ntsꞌún nditnine buba nus lhai be nyúlhtlo.”

¹⁰ ꞋInkꞌez ꞌudun cha ooghuni ꞌukꞌeguz whe ꞌet ndutni, “Moodihti nyun ꞌudechoo wheꞌ whuditꞌen ꞌet whutsꞌun, ndi yun cha ꞌinla. Nla be yat cha ꞌuhóonla.

¹¹ ꞋI tsꞌiyawh gak whutáleh, ꞌet hoontsꞌi nyun ꞌilhiz wheni ꞌintꞌoh. Ndai la ꞌinla-i, ꞌi ꞌantsꞌi naih ꞌujut ꞌulhih te whuz unꞌa ꞌuwhutanelh.

¹² ꞋInkꞌez nahuyitsꞌuz-i, ꞌi kꞌunꞌa lhenántanlelh, ꞌinkꞌez ꞌuyoo natidleh. ꞋEt hoontsꞌi nyun whuz unꞌa za ꞌet ndintꞌoh. Nye yus kꞌut ꞌaw whulátanálhuhóoꞌoh.”

¹³ ꞋEt hoontsꞌi Yakꞌusda oolizas ꞌaw ꞌilhoghun hoontsꞌi ꞌet ndúlh budinel, “Nchꞌaz ditníne tsꞌiyawh nke bukꞌut natalhyis-un mba butisdlelh. ꞋOh de ꞌet whutsꞌun ꞌet duhóoja de, nailhnih tsꞌe sughu tandalh.”

¹⁴ ꞋEt ndunne lizasne, ꞌenne nudúdeh ꞌinkꞌez be ꞌustlenne ꞌuhintꞌoh. Yakꞌusda whébalhꞌaꞌ ꞌet de mbene la ndi bé uzdujis-i netsꞌu tíkulh, ꞌet huba neba neꞌutꞌenne ꞌuhintꞌoh.